Kimyəvi Silahların Qadağan edilməsi Təşkilatının baş qərargahı

Azərbaycanlı diplomat müəmmalara son qoydu

344
(Yenilənib 16:41 06.04.2018)
Cəlal Mirzəyev: "Ermənistanın səsvermə hüququ yoxdur"

İradə Cəlil, Sputnik Azərbaycan

BAKI, 6 aprel — Sputnik. Kimyəvi Silahların Qadağan edilməsi Təşkilatının (KSQT) İcraiyyə Şurası rəsmi Moskvanın Britaniyanın Solsberi şəhərində baş vermiş insidentlə bağlı qərar layihəsini qəbul etməyib. Dünya mətbuatında məsələ ilə bağlı müxtəlif fikirlər səsləndirilir. Bəzi iddialara görə, Ermənistan nümayəndəsi qərarın lehinə səs verərək Rusiyanı müdafiə edib.

Cəlal Mirzəyev
© Foto Azərbaycanın Niderlanddakı nümayəndəliyi tərəfindən təqdim olunub
Cəlal Mirzəyev

Azərbaycan Respublikasının Niderland Krallığındakı müvəqqəti işlər vəkili və Kimyəvi Silahların Qadağan edilməsi Təşkilatındakı nümayəndəsi Cəlal Mirzəyev Sputnik Azərbaycan-a verdiyi açıqlamada məsələyə aydınlıq gətirib. O bildirib ki, Ermənistan İcraiyyə Şurasının üzvü olmadığına görə, səsvermə hüququ da yoxdur.

"Solsberidə baş vermiş insident ətrafında vəziyyətlə bağlı birgə bəyanat var idi. Bu bəyanata bütün üzv ölkələr qoşula bilər. Bu, indi də açıqdır. Qazaxıstan, Rusiya, Pakistan, Venesuella, Kuba, Suriya, Tacikistan, Özbəkistan, Nikaraqua, İran, Belarus da bu bəyanata qoşulub" — deyə müvəqqəti işlər vəkili bildirib.

C.Mirzəyev əlavə edib ki, bu bəyanat qərar layihəsi ilə müqayisə edilə bilməz: "Burada səs verilmir. Bu, ümumi bir bəyanat idi və dediyim kimi KSQT-yə üzv olan bütün ölkələr bu bəyanata qoşula bilər".

"Azərbaycan Kimyəvi Silahların Qadağan olunması Təşkilatının üzvüdür. Təşkilatın 192 üzv ölkəsi, Təşkilat İcraiyyə Şurasının isə 41 üzv ölkəsi var. Bu da qruplara bölünür. Asiya, Afrika, Şərqi Avropa, Latın Amerikası — Karib hövzəsi ölkələri qrupu və Qərbi Avropa, həmçinin digər ölkələr qrupları var. Azərbaycanın da daxil olduğu Şərqi Avropa qrupunun isə 5 üzv ölkəsi var. Bura Azərbaycan, Rusiya, Slokaviya, Polşa və Estoniya daxildir", – Mirzəyev deyib.

O vurğulayıb ki, Ermənistan KSQT–nin İcraiyyə Şurasının üzvü deyil: "Yalnız İcraiyyə Şurası üzv ölkələrinin hər hansı qərar layihəsinə səsvermə hüququ var. Yəni 192 ölkədən İcraiyyə Şurasına üzv olan 41 ölkənin səsvermə hüququ var. Ermənistan 192-dən biridir, amma 41-liyə daxil deyil. Yəni Ermənistanın səsvermə hüququ yoxdur".

Nümayəndə xatırladıb ki, İcraiyyə Şurasına ölkələr iki ildən bir seçilir: "Biz bir ildir ki, İcraiyyə Şurasının üzvüyük və gələn ilin mayında İcraya Şurasına üzvlüyümüz başa çatır. İcraiyyə Şurası çərçivəsində hər hansı qərar layihəsinin qəbul edilməsi üçün isə 2\3 səs çoxluğu lazımdır. Yəni 28 səs tələb olunur".

"Səsvermə Rusiyanın təqdim etdiyi qərar layihəsi üçün idi. Azərbaycan nümayəndə heyəti də səsvermədə iştirak edib. Rusiyanın çıxışından sonra bu qərar layihəsinə Çin və İran da həmmüəllif kimi qoşuldu. Qərar layihəsi səsverməyə qoyuldu. İcraiyyə Şurasının 6 üzv ölkəsi — Rusiya, İran, Çin, Azərbaycan, Sudan və Əlcəzair qərarın lehinə, 15 ölkə əleyhinə səs verdi. 17 ölkə bitərəf qaldı, 3 ölkə — Seneqal, Liviya və Cənubi Afrika Respublikası isə səsvermədə iştirak etmədi. Qərar layihəsi qəbul edilmədi".

Qeyd edək ki, martın 4-də Rusiya Baş Kəşfiyyat İdarəsinin keçmiş polkovniki Sergey Skripal və qızı Yuliya Böyük Britaniyanın Solsberi şəhərinin mərkəzində huşsuz vəziyyətdə tapılıb. Britaniya hökuməti hər iki şəxsin kimyəvi maddə ilə zəhərləndiyini bildirib. Cavab tədbiri olaraq rəsmi London 23 rusiyalı diplomatı ölkədən çıxarıb.

Britaniyanın bu qərarına dəstək olaraq Aİ-nin 16 ölkəsi, ABŞ, Kanada, Norveç, Avstraliya, Moldova, Albaniya, Makedoniya və Ukrayna da eyni addımı atıb. Ümumilikdə 150 rusiyalı diplomat bu ölkələrdən qovulub.

Rusiya da buna cavab olaraq analoji addımlar atıb. Ayrıca, rəsmi Moskva ittihamları qəbul etmir və hadisənin qurama olduğu qənaətindədir.

344
Teqlər:
səsvermə hüququ, Cəlal Mirzəyev, nümayəndə, müvəqqəti işlər vəkili, Niderland Krallığı, Azərbaycan Respublikası, Rusiya, Ermənistan, qərar layihəsi, Solsberi şəhəri, Britaniya, Moskva, İcraiyyə Şurası, KSQT, Kimyəvi Silahların Qadağan edilməsi Təşkilatı
Əlaqədar
Rusiya 50 britaniyalı diplomatı ölkədən qovur
Daha dörd ölkənin diplomatları Rusiyadan qovulur
Cavab tədbirləri özünü çox gözlətmədi: Diplomatik savaş yeni mərhələdə
Rusiyaya qarşı diplomatik müharibə elan edən Britaniya yeni hədəfini göstərdi
ABŞ və AB Rusiya ilə diplomatik müharibəyə başladı
Tramp "müharibə" siqnalı verdi: Rusiyalı diplomatlar qovula bilər
AŞPA-da plenar iclas, arxiv şəkli

Ermənistanın düzəlişlərini AŞPA rədd edib - Azərbaycan XİN

13
AŞPA-dakı Ermənistan nümayəndə heyətinin qətnamə layihəsinə əsassız düzəlişlər irəli sürmək cəhdləri uğursuzluqla nəticələnib. Ermənistan tərəfinin düzəlişləri həm Monitorinq Komitəsi, həm də Assambleyanın plenarı tərəfindən rədd edilib

BAKI, 27 yanvar - Sputnik. Bu il yanvarın 25-də Avropa Şurası Parlament Assambleyasın Monitorinq Komitəsinin “AŞPA Monitorinq prosedurunun 2020-ci il üzrə tərəqqi hesabatı” adlı qətnamə qəbul edilib. Hər il ənənəvi hazırlanan hesabat ilə əlaqədar qətnamə layihəsində monitorinq proseduruna və ya monitorinqdən sonrakı dialoqa cəlb edilmiş ölkələrdə, o cümlədən Azərbaycan və Ermənistanda baş vermiş əsas hadisələr qiymətləndirilir və müvafiq tövsiyələr verilir.

Azərbaycan Xarici İşlər Nazirliyindən Sputnik Azərbaycan-a verilən məlumata görə, sözügedən qətnamədə Ermənistan və Azərbaycan arasında baş vermiş döyüşlər kontektsində müvafiq bəndlər yer alıb. Belə ki, qətnamənin 5-ci bəndində komitənin “27 sentyabr 2020-ci il tarixində Ermənistan və Azərbaycan arasında Dağlıq Qarabağ bölgəsində baş verən hərbi döyüş əməliyyatları ilə bağlı hadisələri izlədiyi, bu mövzuda cari məsələlər üzrə debat irəli sürdüyü, hər iki tərəfdən deputatların iştirakı ilə fikir mübadiləsi təşkil etdiyi, Ermənistan və Azərbaycan üzrə həmməruzəçilərin münaqişənin sülh yolu ilə həllinə çağırışlar etdiyi” qeyd olunur. Qətnamənin 11-ci bəndində isə aşağıdakı fikirlər yer alıb:
“Dağlıq Qarabağ münaqişəsi ilə əlaqədar olaraq, Assambleya bütün tərəfləri siyasi dialoqa mane olan iltihablı ritorikadan çəkinməyə, Ermənistanı və Azərbaycanı üçtərəfli bəyanatın humanitar məsələlərlə bağlı müddəalarını ən qısa müddətdə həyata keçirməyə, bütün tərəfləri dərhal hərbi əsirlərin və cəsədlərin mübadiləsini həyata keçirməyə, mədəni irsə hörmət etməyə çağırır və Monitorinq Komitəsini parlament səviyyəsində sülh prosesi üçün əlverişli bir atmosferə töhfə vermək üçün yolları araşdırmağa dəvət edir. Assambleya bu münaqişə zamanı bütün tərəflərin humanitar və insan hüquqları qanunlarını pozduğuna dair məlumat və iddialar, bəzi dini yerlərin və abidələrin deqradasiyası, eləcə də xüsusi mülkiyyətin dağıdılması iddialarından ciddi narahatlığını ifadə edir və bu məlumatların tam araşdırılmasını və pozuntuların aradan qaldırılmasını və günahkarların mühakimə olunmasını gözləyir”.

​Qeyd olunmalıdır ki, AŞPA-dakı Ermənistan nümayəndə heyətinin sözügedən qətnamə layihəsinə əsassız düzəlişlər irəli sürmək cəhdləri uğursuzluqla nəticələnib. Ermənistan tərəfinin düzəlişləri həm Monitorinq Komitəsi, həm də Assambleyanın plenarı tərəfindən rədd edilib.

​Bundan başqa, Ermənistan nümayəndə heyəti sessiya çərçivəsində cari məsələlər üzrə debat proseduru əsasında “Avropa Beynəlxalq İnsan Hüquqları Standartlarının pozulması kimi Azərbaycan hakimiyyət orqanları tərəfindən erməni əsirlər və digər saxlanılan şəxslərin qaytarılmasının əsassız olaraq gecikdirilməsi” mövzusunda müzakirənin keçirilməsini istəyib. Bu xüsusda, Azərbaycan nümayəndə heyəti tərəfindən AŞPA Prezidentinə məktub ünvanlanaraq məsələ üzrə mövqeyimiz onun diqqətinə çatdırılıb və belə bir debatın keçirilməsinin məqbul olmadığı vurğulanıb. Nəticə etibarı ilə, qurumun Bürosu tərəfindən bu mövzuda debatın keçirilməsi məqsədəuyğun hesab edilməyib.

"​Eyni zamanda vurğulamaq istərdik ki, 25 yanvar tarixində Avropa Şurasının Baş katibi Mariya Peyçinoviç Buriç qış yarım-sessiyasında AŞPA üzvləri qarşısında çıxışında təşkilatın mövqeyini bir daha ifadə edərək Ermənistan və Azərbaycan arasında imzalanmış 10 noyabr tarixli üçtərəfli bəyanatı alqışladıqlarını söyləyib. O, AŞ-nin səlahiyyətləri çərçivəsində hər iki ölkəyə post-konflikt dövründə dəstək verməyə hazır olduqlarını və bu məqsədlə tərəflərlə məsləhətləşmə apardıqlarını bildirib", - XİN-in məlumatında deyilir.

13

Putin prezident Baydenlə ilk dəfə danışdı, ABŞ-ın arzusunu yerinə yetirdi

19
(Yenilənib 23:17 26.01.2021)
Vladimir Putin Cozef Baydenlə ABŞ prezidenti qismində ilk dəfə telefonla danışıb. ABŞ-ın təşəbbüsü ilə baş tutan danışıqda Baydenin arzusunda olduğu məsələ həllini tapıb

BAKI, 26 yanvar - Sputnik. Rusiya Prezidenti Vladimir Putin ABŞ-ın yeni seçilmiş dövlət başçısı Cozef Baydenlə bu gün telefonla danışıb. 

Sputnik Azərbaycan bildirir ki, bu barədə Kremlin mətbuat xidməti məlumat yayıb.

Co Baydenin mətbuat katibib Cen Psakinin sözlərinə görə, telefon danışığı ABş tərəfinin təşəbbüsü ilə baş tutub.

Putin həmkarını ABŞ prezidenti postunda işə başlaması münasibətilə təbrik edib. 

Kremlin məlumatına görə, Putin dünyada təhlükəsizlik və sabitliyin qorunmasına görə məsuliyyətləri nəzərə alınmaqla Rusiya ilə ABŞ-ın münasibətlərinin normallaşmasının hər iki ölkənin, eləcə də bütün dünyanın xeyrinə olacağını vurğulayıb. 

Psakinin sözlərinə görə, ABŞ tərəfinin əsas niyyətlərindən biri Strateji Hücum Silahlarına dair Müqavilənin (SHS-3) 5 il müddətinə uzadılması olub. Prezidentlər müqavilənin uzadılması barədə razılığa gəliblər.

Həmçinin dövlət başçıları koronavirus pandemiyasına qarşı mübarizədə, eləcə də ticari-iqtisadi əlqələr daxil olmaqla digər sahələrdə də əməkdaşlıq imkanlarını müzakirə ediblər. Beynəlxalq və ikitərəfli gündəmin aktual məsələləri də müzakirə obyekti olub.

Qeyd edək ki, SHS-3 silahlanmanın məhdudlaşdırılması ilə bağlı Rusiya və ABŞ arasında qüvvədə olan yeganə müqavilədir. 5 fevral 2011-ci ildə qüvvəyə minmiş müqavilənin müddəti 5 fevral 2021-ci il tarixində başa çatacaq. Əgər müqavilə yenilənməsə, artıq dünyada bu iki böyük nüvə gücünün silah arsenallarını məhdudlaşdıran heç bir sənəd mövcud olmayacaq

19
Tərəzi, kökəlmək, köklük

Diabetə qalib gəlməyin çox asan yolu

0
(Yenilənib 00:44 27.01.2021)
Diabetə on iki həftə ərzində qalib gəlmək mümkündür. Amerikalı alimlərin araşdırmasına görə, minimal karbohidratlı pəhriz həm sağaldır, həm də arıqladır

BAKI, 27 dekabr - Sputnik. On iki həftə boyunca minimal karbohidrat pəhrizinə riayət edən insanlar ikinci tip diabetə qalib gəlmək şansını təxminən 30% artırırlar. 

Sputnik Azərbaycan bildirir ki, bu barədə Diabetes.co.uk portalı Texasın A&M Universitetinin (ABŞ) əməkdaşlarının araşdırmalarına istinadən yazır.

Tədqiqatda 1357 nəfər iştirak edib. Yaşları 47 ilə 67 arasında dəyişən bu şəxslərin əksəriyyəti artıq çəki və ya piylənmədən əziyyət çəkib. Onlar on iki həftə ərzində minimal karbohidrat pəhrizinə riayət ediblər. Bundan 6 ay və bir il sonra isə mütəxəssislər tədqiqatda iştirak edənlərin səhhətlərini təkrar yoxlamadan keçiriblər. 

Qeyd olunur ki, pasiyentlər nişastalı karbohidratlardan (daha çox kartof və makaronda olur) imtina ediblər. Alimlər belə nəticəyə gəliblər ki, 6 aydan sonra bu qrup insanların xəstəliyin əlamətlərini azaltmaq şansları digər pəhrizlərə riayət edənlərlə müqayisədə daha çoxdur. 

Elmi tədqiqatın müəllifləri qeyd ediblər ki, gələcəkdə onlar kalorilərə nəzarətlə bağlı da bir sıra tədqiqatlar aparmaq niyyətindədirlər. Bununla onlar minimal karbohidratlı pəhrizin arıqlamağa və diabetin remissiyasına davamlı müsbət təsir göstərdiyinə əmin olmaq istəyirlər.

* Minimal karbohidratlı pəhriz - sutkada 100-150 qramdan artıq olmayan karbohidratın qəbul olunmasını nəzərdə tutan qida rejimidir. Bundan başqa, burada istifadə olunan karbohidratın əksər hissəsi böyük miqdarda lifə malik tərəvəz və tam buğdaların payına düşməlidir. 

Bu pəhriz həm diabet xəstələrinə, həm də arıqlamağa çalışan idmançılara məsləhət görülür. O, qanda şəkərin miqdarını tənzimləmək üçün əla üsul sayılır.

0