Sergey Markov

"Azərbaycan - Rusiya münasibətləri ideal səviyyədədir"

101
(Yenilənib 16:45 30.09.2016)
Sergey Markov: "Bizim dövlət qurumları səviyyəsində çox yaxşı və səmərəli münasibətlərimiz var. Bu, xüsusilə mümkün terror təhlükəsi ilə bağlı məlumat mübadiləsinə aiddir"

"Azərbaycan - Rusiya münasibətləri ideal səviyyədədir"
BAKI, 30 sen — Sputnik. Təhlükəsizlik sahəsində Azərbaycan ilə Rusiya arasındakı münasibətlər idealdır. Bu gün Sputnik Beynəlxalq Mətbuat Mərkəzində, "Rusiya-Azərbaycan münasibətlərinin aktual məsələləri" mövzusunda keçirilən konfransda, Rusiya İctimai Palatası beynəlxalq əməkdaşlıq komissiyasının sədri, politoloq Sergey Markov belə deyib.

Onun sözlərinə görə, Azərbaycan-Rusiya münasibətləri müsbət trenddədir və bir neçə istiqamətlər üzrə inkişaf edir: "Bizim dövlət qurumları səviyyəsində çox yaxşı və səmərəli münasibətlərimiz var. Mən, hətta bizim rəsmilərdən eşidirəm ki, Azərbaycanla Rusiya arasındakı təhlükəsizlik sahəsindəki münasibətlər, praktiki olaraq, idealdır. Xüsusilə bu, mümkün terror təhlükəsi ilə bağlı məlumat mübadiləsinə aiddir".

"İndi terror təhlükəsi bütün dünyada artır. Rusiya-Azərbaycan münasibətləri bu sahədə çox yaxşı qurulub. Bundan başqa, bizim dövlət başçıları səviyyəsində çox yaxşı münasibətlərimiz var. Prezident Vladimir Putin və prezident İlham Əliyev müntəzəm görüşlər keçirərək mühüm məsələləri müzakirə edirlər", — deyə o bildirib.

Markov ölkələr arasındakı hərbi-texniki əməkdaşlığı da mühüm hesab edib: "Bu əməkdaşlıq iki ölkə münasibətlərinin möhkəmləndirilməsi üçün mühüm bənddir. Azərbaycan Rusiyanın hərbi texnikasını alan ölkələrdən biridir. Silah bazarındakı ən son statistikaya görə, Rusiya öz payını sürətlə artırır. Biz artıq Çin və Fransanı geridə qoyub Amerikaya yaxınlaşırıq. Bizim amerikalıları da keçmək üçün şansımız var".

Politoloqun dediyinə görə, əməkdaşlığın daha bir mühüm istiqaməti Xəzərin hüquqi statusunun müəyyənləşdirilməsi üzrə işdir ki, bu məsələ üzrə hər iki ölkənin mövqeyi yaxındır: "Xəzər dənizinin statusunun müəyyən edilməsində Rusiya və Azərbaycanın mövqeləri son illər ərzində yaxınlaşıb və indi onlar, demək olar ki, eynidir. Belə dialoq bu məsələdə ortaq anlaşmaya nail olmaq üçün zəruridir. Biz hüquqi statusunun sonsuz həllini gözləmək istəmirik. Xəzəryanı ölkələr öz sahələrində olan təbii ehtiyatları istismar edə bilər. Bundan başqa, bu sahə İranın təklif etdiyi kimi tam bölünməli deyil. Xəzər dənizinin ortasında bütün xəzəryani ölkələrin istifadə edə biləcəyi ümumi məkan olmalıdır".

"Xəzər dənizi rabitə sahəsində də çox əhəmiyyətlidir. Biz dəniz əlaqələrini yaratmalıyıq. Bundan başqa, İranla birgə yol və avtomobil əlaqələrini də artırmalıyıq", — deyə ekspert əlavə edib.

Tədbirdə iştirak edən Rusiyadakı Azərbaycanın Dostları Qrupunun koordinatoru Darya Qrevçova isə Bakıda keçirilən V Humanitar Forumdan danışıb: "Bu, mənim iştirak etdiyim sayca ikinci forumdur. O, əvvəlki forumdan bir neçə xüsusiyyəti ilə fərqlənir. Birincisi, burada yeni mövzu və yeni iştirakçıların olması məni sevindirdi. Məsələn, jurnalistikaya aid suallara çox yer ayrılıb. Orada xeyli sayda KİV nümayəndələri vardı. Onlar tək forumu işıqlandırmaq üçün deyil, həm də diskussiyalarda iştirak etmək üçün gəlmişdilər".

Koordinatorun sözlərinə görə, sosial şəbəkələrdə ona "orada ermənilər də vardımı?" kimi suallar verilirdi. O isə, onlara belə cavab verib: "Burada, şəhərin mərkəzində erməni kilsəsi qorunub saxlanılır. Bəs Ermənistanda Azərbaycanla bağlı nəsə varmı? Orada azərbaycanlılar varmı?".

Bu cavablardan sonra qeyd olunan hücumlar kəsilib. Qrevçova onu da bildirib ki, Azərbaycan bir çox dövlətlər üçün nümunədir: "Bu forumun ən mühüm cəhətlərindən biri multikulturalizm nümunəsi olmasıdır. Ümumiyyətlə, buradakı multikulturalizm bir çox ölkələr üçün nümunədir. Forum iştirakçıları da qeyd edirlər ki, Azərbaycan bu mövzuda çox böyük irəliləyiş əldə edib və bir çox dövlətlər üçün nümunə göstərir".

101
Teqlər:
Darya Qrevçova, münasibət, Sergey Markov, Rusiya, Azərbaycan, əməkdaşlıq
Əlaqədar
IV Rusiya-Azərbaycan Gənclər Forumu keçiriləcək
Rusiya XİN-dən Azərbaycan və Belarusa təşəkkür
Azərbaycan Prezidenti Rusiya Baş nazirinə məktub göndərdi
Azərbaycan, Rusiya və İran prezidentlərinin sammitinin yekun bəyannaməsi imzalanıb
Azərbaycan və Rusiya xarici işlər nazirlərinin görüşü başlayıb
Rusiya XİN: Azərbaycan vacib strateji tərəfdaşımızdır
Rusiyanın Xarici İşlər naziri Sergey Lavrov, arxiv şəkli

"Lavrovun Qarabağla bağlı sözləri fikir ayrılıqlarının olduğunu göstərir"

89
(Yenilənib 15:01 19.01.2021)
Bu məsələdə Lavrovun cavabı reallığı əks etdirir, ancaq, eyni zamanda, Rusiyanın bölgədəki varlığını və sülhməramlılar vasitəsilə əhəmiyyətli təsir qüvvəsinə sahib olan bir siyasi aktor kimi çıxış etdiyini də inkar etmək olmaz.

Eldar Tanrıverdiyev, Sputnik Azərbaycan

BAKI, 19 yanvar — Sputnik. Rusiya xarici işlər naziri Sergey Lavrov ötən gün 2020-ci ilin yekunları ilə bağlı keçirdiyi mətbuat konfransında bir sıra məsələlərə toxunub. Rusiyanın xarici işlər naziri Sergey Lavrov Ermənistan – Azərbaycan sülh prosesi barəsində bəzi bəyanatlar səsləndirib və 44 günlük müharibədən sonra müzakirə edilən bir çox məsələyə toxunub. Rusiyalı nazir Ermənistan rəsmilərinin Qarabağ səfərlərinə reaksiya verərək onları siyasiləşmiş bəyanatlardan çəkinməyə çağırıb, bu cür bəyanatların gərginlik yaratdığını da xüsusilə vurğulayıb. Lavrov bununla da Yerevana mesaj göndərib. Bundan əlavə, Rusiya xarici işlər naziri öz çıxışında Qarabağın statusu, sülhməramlıların mandatı, həmçinin erməni diversantların taleyi kimi məsələlərə də toxunub.

Sputnik Azərbaycan Beynəlxalq Münasibətlərin Təhlili Mərkəzinin eksperti Vasif Hüseynovla Rusiya xarici işlər nazirinin fikirləri barədə həmsöhbət olub.

© Sputnik
Beynəlxalq Münasibətlərin Təhlili Mərkəzinin eksperti Vasif Hüseynovl

Ekspert qeyd edib ki, Lavrovun çıxışında ən çox maraq doğuran məqamlardan biri keçmiş Dağlıq Qarabağ bölgəsinin statusu məsələsinə aid verilən suala cavabı olub: "Onu deyim ki, müharibənin başa çatmasından sonra noyabrın 12-də açıqlama verən Lavrov bildirmişdi ki, "indi müharibədən sonrakı siyasi prosesin əsas mövzusu Dağlıq Qarabağın statusudur". Dünən baş tutan mətbuat konfransında isə bunun əksinə olaraq bildirdi ki, "hal-hazırda status məsələsini prioritet kimi irəli sürmək üçün yaxşı vaxt deyil. Bu məsələ gələcəkdə həll olunmalıdır". Lavrovun keçən 2 ay ərzindəki bəyanatlarında belə bir dəyişikliyin baş verməsi tərəflər arasında fikir ayrılığının olduğunu göstərməklə yanaşı, status məsələsinin gündəmdə saxlanılmasına cəhd kimi də dəyərləndirilə bilər".

Vasif Hüseynovun sözlərinə görə, Lavrovun bəyanatında digər diqqətçəkən məqam Rusiyanın Qarabağa iddialarına dair şayiələrlə bağlı idi. Belə ki, Rusiyanın Qarabağı ilhaq etmək niyyətinə aid sualı "ekzotik" adlandıran Lavrov Rusiyanın belə bir planının olmadığını bildirdi:

"Düşünürəm ki, bu məsələdə Lavrovun cavabı reallığı əks etdirir, ancaq, eyni zamanda, Rusiyanın bölgədəki varlığını və sülhməramlılar vasitəsilə əhəmiyyətli təsir qüvvəsinə sahib olan bir siyasi aktor kimi çıxış etdiyini də inkar etmək olmaz. İndi tərəflər arasında müzakirə mövzularından biri məhz sülhməramlıların mandatının hazırlanması və onların fəaliyyətinin müəyyən edilmiş və razılaşdırılmış çərçivəyə salınmasıdır. Lavrov da bu məsələnin müzakirə edildiyini təsdiq etdi".

BMTM-in eksperti vurğulayıb ki, Lavrovun 44 günlük müharibədən sonra Azərbaycana qarşı təxribat göstərmiş və həbs olunmuş diversant qruplarının taleyi haqqındakı açıqlaması da Rusiyanın prosesə yanaşması haqqında bəzi nüansları ortaya çıxarıb: "Yanvarın 11-dəki üçtərəfli sammitdə Rusiya Prezidenti Vladimir Putinin söylədiyini təkrar edən Lavrov bəyan etdi ki, 9 noyabra qədər əsir götürülmüş hərbçilərin geri qaytarılması başa çatıb. O, müharibədən sonrakı dövrdə Azərbaycan tərəfindən həbs edilmiş diversant qrupların taleyi ilə bağlı danışıqlar getdiyini bildirdi. Baxmayaraq ki, Lavrov bu məsələnin 11 yanvar görüşündə də müzakirə edildiyini söylədi, həmin görüşdən sonra Prezident Putinin mətbuata açıqlamasında bu mövzuya toxunulmadı. Nə də Azərbaycan Prezidenti bu haqda hər hansı bir fikir dedi. Belə görünür ki, bu məsələni qabardan və müzakirə masasına gətirən yalnız Ermənistan tərəfidir, lakin təxribatın müharibədən sonra baş verməsi və bunun üçtərəfli bəyanatla əhatə olunmaması Yerevanın imkanlarını əhəmiyyətli dərəcədə məhdudlaşdırır".

89
Teqlər:
bəyanat, rus, sülhməramlılar, Dağlıq Qarabağ, Sergey Lavrov
Prezident İlham Əliev, arxiv şəkli

Azərbaycan Prezidenti indoneziyalı həmkarına başsağlığı verib

3
Yanvarın 15-də İndoneziyanın Sulavesi adasında 6,2 manqitudalı zəlzələ baş verib. Zəlzələ nəticəsində ölənlərin sayı 84 nəfərə çatıb.

BAKI, 19 yanvar — Sputnik. Azərbaycan Respublikasının Prezidenti İlham Əliyev İndoneziya Respublikasının Prezidenti Zati-aliləri Coko Vidodoya başsağlığı məktubu göndərib.

Sputnik Azərbaycan xəbər verir ki, başsağlığında deyilir:

"Hörmətli cənab Prezident, Sulavesi adasında baş vermiş güclü zəlzələ nəticəsində çoxsaylı insan tələfatı və dağıntılar barədə xəbər məni son dərəcə sarsıtdı.

Bu faciə ilə əlaqədar Sizə, həlak olanların ailələrinə və yaxınlarına, dost İndoneziya xalqına öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyirəm. Allah rəhmət eləsin!"

Qeyd edək ki, yanvarın 15-də İndoneziyanın Sulavesi adasında 6,2 manqitudalı zəlzələ baş verib. Zəlzələ nəticəsində ölənlərin sayı 84 nəfərə çatıb. Təbii hadisə zamanı daha 844 nəfər xəsarət alıb.

3
Pasport, arxiv şəkli

Şəxsiyyət vəsiqəsilə Türkiyəyə səfəri nəzərdə tutan layihə müzakirə olunacaq

0
(Yenilənib 19:39 19.01.2021)
Azərbaycan Respublikası vətəndaşının şəxsiyyət vəsiqəsi Türkiyəyə səyahət edən Azərbaycan vətəndaşları üçün vizadan azad səyahət çərçivəsində etibarlı sərhədkeçmə sənədlərinin siyahısına daxil edilib

BAKI, 19 yanvar — Sputnik. Azərbaycan vətəndaşlarının Türkiyəyə şəxsiyyət vəsiqəsi ilə səyahət etməsini nəzərdə tutan qanun layihəsi Milli Məclisə daxil olub.

Sputnik Azərbaycan xəbər verir ki, bu, Milli Məclisin Beynəlxalq münasibətlər və parlamentlərarası əlaqələr komitəsinin bu gün keçirilən iclasının gündəliyinə daxil edilən "Azərbaycan Respublikası Hökuməti ilə Türkiyə Respublikası Hökuməti arasında qarşılıqlı olaraq vizadan azad etmə haqqında 25 fevral 2020-ci il tarixində Bakı şəhərində imzalanmış Sazişə dəyişikliklər edilməsi haqqında Azərbaycan Respublikası Hökuməti ilə Türkiyə Respublikası Hökuməti arasında 1 saylı Protokol"un təsdiq edilməsi barədə" qanun layihəsində əksini tapıb.

Layihəyə əsasən, Azərbaycan Respublikası vətəndaşının şəxsiyyət vəsiqəsi Türkiyə Respublikasına səyahət edən Azərbaycan Respublikası vətəndaşları üçün vizadan azad səyahət çərçivəsində etibarlı sərhədkeçmə sənədlərinin siyahısına daxil edilib.

Bu məsələ eyni zamanda Türkiyə vətəndaşlarının Azərbaycana səfərinə də şamil olunacaq.

Qanun layihəsi müzakirələrdən sonra plenar iclasa tövsiyə olunub.

0