Mövlud Çavuşoğlu və Sergey Lavrov

Mövlud Çavuşoğlu Sergey Lavrovla mərcə girdi

127
Türkiyə XİN başçısı: "Əgər siz sübut etsəniz, mən istefaya gedəcəm, yox əgər sübut edə bilməsəniz, sizi ömrünüzün geri qalan hissəsini Antalyada qonağımız olmağa dəvət edirəm"

BAKI, 18 may — Sputnik. Türkiyənin xarici işlər naziri Mövlud Çavuşoğlu bəyan edib ki, əgər Türkiyənin "İslam dövləti" (İŞİD) terror qruplaşması ilə əlaqəsi sübut olunsa, istefaya getməyə hazırdır.

Sputnik-in məlumatına görə, Çavuşoğlu Vyanada Suriyaya dəstək beynəlxalq qrupunun iclasında iştirak edib. İclasda Rusiyanın xarici işlər naziri Sergey Lavrov Ankaranın İŞİD-ə dəstək verdiyini deyib, bundan narahat olduqlarını dilə gətirib. Rusiyalı diplomat deyib ki, Türkiyədə İŞİD yaraqlılarının silahla təchizatı ilə məşğul olan çox ciddi şəbəkənin mövcudluğu barədə çoxlu faktlar var.

"Söhbət öz növbəsində Türkiyə-Suriya sərhəddinin 90 km-lik ərazisindən gedir. Terrorçular hələ də ora nəzarət edirlər və oradan yardım alırlar", — Lavrov bildirib.

Lakin bu iddialar Türkiyə tərəfinin narazılığına səbəb olub. "Siz, cənab Lavrov, ciddi diplomatsınız və bu iclasın iştirakçıları arasında ən təcrübəlisisiniz. Buna görə də, hesab edirəm ki, siz bu qəbildən olan qeyri-ciddi fikirlərə istinad etməməlisiniz. Əgər Rusiyada Türkiyənin İŞİD-ə dəstək verdiyi barədə heç olmasa bir dənə sübut varsa, mən istefaya getməyə hazıram. Əgər sübut edə bilməsəniz, mən sizi ömrünüzün geri qalan hissəsini Antalyada qonağımız olmağa dəvət edirəm" — deyə Çavuşoğlu bildirib.

Diplomat həmçinin, Türkiyə prezidenti Rəcəb Tayyib Ərdoğanın bu barədə fikirlərini də xatırladıb. O da daha əvvəl Ankaranın İŞİD-lə əməkdaşlığı barədə informasiyaları birmənalı olaraq təkzib etmişdi və bildirmişdi ki, əgər belə bir əlaqə sübut olunsa, istefaya getməyə hazırdır.

Rusiya KİV-ləri artıq dəfələrlə Türkiyə hökumətini İŞİD terrorçularına dəstək verməkdə günahlandırıb. Hətta bu ilin martında RT telekanalı Suriya Kürdüstanında tapılan İŞİD sənədləri ilə bağlı eksklüziv material hazırlamışdı. Onların arasında neft quyularının üzərində işlərin aparılmasına dair təlimat, xam neft ticarətinə dair mühasibat hesabatları, həmçinin Türkiyəyə gediş-gəliş ştampının vurulduğu pasport nümayiş etdirilmişdi. Yaraqlılardan biri etiraf etmişdi ki, Türkiyə təkcə İŞİD terrorçularından neft almır, həm də onlara qida, döyüş sursatı və digər mallar verir.

RT bu yaxınlarda terrorçuların Türkiyə ilə əlaqəsinə dair digər sübutlar da əldə etmişdi. Əl-Hasaka əyalətinin sakinləri jurnalistlərə demişdilər ki, terrorçular nefti Türkiyəyə silaha və dollara satırlar.

Ankaranı terrorçularla birgə biznesdə əsasən Rusiya hakimiyyəti günahlandırır. Ötən ilin dekabrında Rusiyanın BMT-dəki və BMT Təhlükəsizlik Şurasındakı daimi nümayəndəsi Vitali Çurkin terrorçuların avtosisternlərinin keçdiyi sərhəd məntəqələrinin və təchizatla məşğul olan türk şirkətlərinin konkret adlarını çəkmişdi.

Analoji bəyanatla Rusiya Müdafiə Nazirliyinin nümayəndələri də çıxış etmişdilər və onlar İŞİD-in neft sisternlərinin sputnikdən çəkilmiş görüntülərini yaymışdılar. Amma Türkiyə tərəfi bu görüntülərin manipulyasiya xarakteri daşıdığını və onlarla heç bir əlaqəsinin olmadığını bildirmişdi.

127
Teqlər:
Vyana, Sergey Lavrov, Mövlud Çavuşoğlu, Rusiya, Türkiyə
Əlaqədar
Çavuşoğlu: Qarabağ problemi həll olmayınca Türkiyə-Ermənistan əlaqələri düzəlməyəcək
Çavuşoğlu Bakıdan Rusiyaya səsləndi
Çavuşoğlu Azərbaycana qısamüddətli rəsmi səfərə gəlir
Mövlud Çavuşoğlu Sergey Lavrova başsağlığı verib

Rəsmi Bakı Avropa Parlamentinin qərəzli iddialarını pislədi

8
"Qətnamədə qardaş Türkiyə ilə bağlı əsassız iddialar əks olunub, həqiqəti əks etdirməyən qərəzli fikirlərə yer verilib. Vurğulayırıq ki, Türkiyə bölgənin aparıcı ölkələrindən biridir"

BAKI, 22 yanvar — Sputnik. "İlk növbədə onu vurğulamaq istərdim ki, bu il yanvarın 20-də Avropa Parlamentinin (AP) qəbul etdiyi illik doktrinal və hüquqi təsirə malik Ümumi Xarici və Təhlükəsizlik Siyasətinin tətbiqi barədə qətnaməsi və 2021-ci il üçün yol xəritəsi sayılan bu hesabat sənədində növbəti dəfə Şərq Tərəfdaşlığı ölkələrinin (o cümlədən Azərbaycanın) beynəlxalq səviyyədə tanınmış sərhədləri çərçivəsində ərazi bütövlüyünə Aİ-nin dəstəyi birmənalı şəkildə əks olundu. Bəzi ermənipərəst dairələrin səylərinə baxmayaraq, 44 günlük Vətən müharibəsindən sonra Avropa İttifaqının Azərbaycanın və digər Şərq Tərəfdaşlığı ölkələrinin ərazi bütövlüyünün və beynəlxalq səviyyədə tanınmış sərhədlərinin toxunulmazlığına dəstəyə dair mövqeyində hər hansı dəyişiklik baş vermədi".

Bunu Sputnik Azərbaycan-a açıqlamasında Xarici İşlər Nazirliyinin Mətbuat xidməti idarəsinin rəisi Leyla Abdullayeva deyib.

"Sənəddə, həmçinin qeyd edilir ki, Azərbaycan, Rusiya və Ermənistan dövlət başçıları tərəfindən 10 noyabr tarixində imzalanmış üçtərəfli bəyanat müsbət qarşılanır, gələcək sülh üçün bu razılaşmanın daha yaxşı perspektivlər açacağına ümid ifadə olunur. Burada, mülki əhalinin öldürülməsi, mülki infrastrukturun dağıldılması, kasetli döyüş sursatlarından istifadə pislənir və bu xüsusda həm Ermənistan, həm də Azərbaycana çağırışlar edilir. Sənəddə məcburi köçkünlər və qaçqınların evlərinə geri qayıtması, ehtiyacı olanlara humanitar yardımın göstərilməsi, habelə müharibə cinayətlərinə məsul olanların qanun qarşısında cavab verməsi kimi məsələlər əks olunub.

Bir sözlə, Avropa Parlamenti qətnaməsi Şərq Tərəfdaşlığı ölkərindəki münaqişələrlə bağlı bütün məsələlərin həllini məhz beynəlxalq hüquq əsasında, ilk növbədə isə ŞT ölkələrinin beynəlxalq sərhədləri çərçivəsində ərazi bütövlüklərinin Aİ tərəfindən qətiyyətli dəstəklənməsi əsasında həll edilməsinin vacibliyini son 4 ildə olduğu kimi bir daha vurğulayıb.

O ki qaldı qətnamədə əks olunmuş bəzi əsassız və gecikmiş məqamlara, onlara aydınlıq gətirmək istərdik. İlk növbədə, bölgənin gələcək statusu və Dağlıq Qarabağın erməni əhalisi və irsinin təhlükəsizliyinin təmin olunması məsələsi ilə bağlı mövqeyimiz bəllidir və birmənalı şəkildə dəfələrlə ifadə olunub. Bu mövqe ilə tanış olmayan AP üzvlərinin diqqətinə bir daha çatdırırıq ki, Azərbaycan Prezidenti status məsələsini tarixin zibilliyinə yollayıb, erməni əhalisinin və irsinin təhlükəsizliyinə gəldikdə isə, Azərbaycan ərazisindəki bütün vətəndaşların hüquqları etnik mənsubiyyətindən və dinindən asılı olmayaraq Azərbaycan Konstitusiyası ilə təmin olunur, tarixi-mədəni abidələr isə dövlət səviyyəsində qorunur.

Qətnamədə qardaş Türkiyə ilə bağlı əsassız iddialar əks olunub, həqiqəti əks etdirməyən qərəzli fikirlərə yer verilib. Vurğulayırıq ki, Türkiyə bölgənin aparıcı ölkələrindən biridir, bölgədə sülh və təhlükəsizliyin təmin olunmasında maraqlıdır və bu xüsusda müstəsna rol oynayır", - deyə Leyla Abdullayeva qeyd edib.

8
Co Bayden, arxiv şəkli

Konqresmenlə prezidenti bir tutmayın - Co Baydenin hakimiyyəti Azərbaycana vəd edir?

21
(Yenilənib 15:47 22.01.2021)
"Düzdür, Bayden seçki kampaniyası dönəmində ermənilərlə bağlı onların xoşuna gələcək fikirlər səsləndirirdi. Amma Vaşinqtonda anlayırlar ki, Azərbaycan güclü dövlətdir" - siyasi ekspert

Elvin Səlimov, Sputnik Azərbaycan

BAKI, 22 yanvar — Sputnik. Yanvarın 20-də Vaşinqtonda Co Bayden ABŞ-ın yeni prezidenti olaraq and içib. Səkkiz il vitse-prezident vəzifəsini icra edən Bayden indi ölkə tarixində ən yaşlı prezident olaraq fəaliyyətə başlayıb.

Qeyd edək ki, Prezident İlham Əliyev 2016-cı ilin martında ABŞ-da səfərdə olarkən o dövrdə vitse-prezident vəzifəsini icra edən Co Bayden ilə görüşmüşdü.

Bəs Co Baydenin prezident olmasının Azərbaycan üçün hansı siyasi təsirləri olacaq?

Mövzunu Sputnik Azərbaycan-a şərh edən politoloq Fikrət Sadıxov bildirib ki, Bayden ABŞ-ın həm daxili, həm də xarici siyasətində müəyyən düzəlişlər edəcək: “Bununla belə, yeni prezident ABŞ-ın strateji kursunu dəyişməyəcək. Düzdür, Bayden seçki kampaniyası dönəmində ermənilərlə bağlı onların xoşuna gələcək fikirlər səsləndirirdi. Amma Vaşinqtonda anlayırlar ki, Azərbaycan güclü dövlətdir”.

“Ölkəmiz regionda meqalayihələrin ideya müəllifidir, həm də onların həyata keçirilməsində vacib rol oynayır. Ona görə də yeni administrasiya Azərbaycana münasibətdə real və praqmatik mövqedə dayanmalıdır”, – deyə Fikrət Sadıxov əlavə edib.

Atlas Araşdırmalar Mərkəzinin rəhbəri, politoloq Elxan Şahinoğlu isə deyib ki, Bayden hələ konqresmen olduğu vaxtlarda erməni diasporu ilə sıx əlaqədə olub və Azərbaycana qarşı olan ədalətsiz 907-ci düzəlişin həmmüəlliflərindən biridir.

Politoloq deyir ki, Baydenin konqresmenlik dövründəki fəaliyyəti ilə prezidentlik vəzifəsini eyniləşdirmək olmaz: “O, artıq ABŞ-ın milli təhlükəsizlik və strateji maraqlarından çıxış etməlidir. Bu maraqlar Cənubi Qafqazda Azərbaycanla əməkdaşlığı diktə edir. Amma bu, o demək deyil ki, Baydenin prezidentliyi dönəmində ABŞ-Azərbaycan əməkdaşlığı indikindən daha çox olacaq. Azərbaycan üçün önəmli olan ABŞ-ın onun daxili işlərinə qarışmamasıdır”.

21
Teqlər:
siyasət, prezident, Azərbaycan, Co Bayden
KT, arxiv şəkli

"Tibbi ölçü cihazları dövlət yoxlamasından keçməlidir"

0
(Yenilənib 16:38 22.01.2021)
Məqsəd diaqnostikada istifadə olunan klinik-laborator, rentgen aparatları və s.  kimi diaqnostik tibbi cihazların qeyri-dəqiq ölçmələrinin vətəndaşların həyatı və sağlamlığına mənfi təsirinin qarşısını almaqdır.

BAKI, 22 yanvar — Sputnik. Mülkiyyət formasından asılı olmayaraq, səhiyyə sahəsində istifadə olunan tibbi ölçü cihazları istismara verilənədək və təmirdən sonra ilkin yoxlamadan, istismar prosesində isə dövrü yoxlamadan keçirilməlidir. Bunu Sputnik Azərbaycan-a Antiinhisar və İstehlak Bazarına Nəzarət Dövlət Xidmətinin sektor müdiri Elməddin Quliyev deyib.

Məqsəd göstərilən səhiyyə xidmətləri zamanı xəstəliklərin diaqnostikasında istifadə olunan klinik-laborator, rentgen aparatları və s. kimi diaqnostik tibbi cihazların qeyri-dəqiq ölçmələrinin vətəndaşların həyatı və sağlamlığına mənfi təsirinin qarşısını almaqdır. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti səhiyyə sahəsində xidmət göstərən subyektlərin nəzərinə çatdırır ki, "Ölçmələrin vəhdətinin təmin edilməsi haqqında" Azərbaycan Respublikası Qanununa əsasən, səhiyyə sahəsində yalnız üzərində yararlılığına dair yoxlama nişanı və ya yoxlama haqqında şəhadətnaməyə malik tibbi ölçü cihazlarından istifadəyə icazə verilir.

İnzibati Xətalar Məcəlləsinə əsasən, səhiyyə sahəsində ölçmələrin tipi təsdiq edilməmiş və ya yoxlamadan keçirilməmiş ölçmə vasitələrindən istifadəyə görə vəzifəli şəxslər üçün 1500 manatdan 2000 manatadək, hüquqi şəxslər üçün 3000 manatdan 4000 manatadək məbləğdə cərimə olunur. Mülkiyyət formasından asılı olmayaraq, səhiyyə sahəsində xidmət göstərən subyektlər tibbi ölçü cihazlarını ilkin yoxlamadan və ya dövrü yoxlamadan keçirmək üçün "Azərbaycan Metrologiya İnstitutu" publik hüquqi şəxsə və ya ölçmələrin vəhdətinin təmin edilməsi sahəsində akkreditasiya olunmuş digər qurumlara müraciət edə bilərlər.

İstehlakçılara tövsiyə olunur ki, səhiyyə xidmətlərindən istifadə edərkən ölçmələrin qeyri-dəqiq nəticələri ilə qarşılaşmamaq üçün tibbi ölçü cihazlarının yararlılığına dair təsdiqedici sənədi tələb etsinlər, yoxlamadan keçməmiş tibbi cihazlarla göstərilən xidmətləri almaqdan çəkinsinlər. Bu kimi hallarla qarşılaşdıqları təqdirdə istehlakçılara İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət etmələri tövsiyə olunur (tel: 498-15-01 və 498-15-04).

0