Elmar Məmmədyarov

Elmar Məmmədyarov Pan Ki Muna müraciət etdi: "Mülki əhalimiz atəşə tutulur"

79
Azərbaycan XİN rəhbəri beynəlxalq ictimaiyyəti təcili addımlar atmağa çağırıb: "Ermənistan silahlı qüvvələrinin təxribatçı əməlləri ATƏT-in Minsk Qrupunun münaqişənin həlli istiqamətində göstərdiyi diplomatik səylərə zərbə vurur"

BAKI, 27 apr — Sputnik. BMT-nin Sivilizasiyalar Alyansının Bakıda keçirilən 7-ci Qlobal Forumu ərəfəsində və forumun keçirildiyi dövrdə Ermənistan silahlı qüvvələri tərəfindən qoşunların təmas xətti boyunca Azərbaycan silahlı qüvvələrinin mövqeləri və ərazidə sıx yaşayan mülki insanlar və obyektləri ağır atəş vasitələri, o cümlədən D-30 haubitsaları və beynəlxalq konvensiyalarla qadağan olunmuş silah növləri ilə atəşə tutmaqda davam edib. Ermənistanın bu əməlləri nəticəsində xüsusilə Tər-Tər rayonunda özəl və dövlət mülkiyyətinə ciddi ziyan dəyib.

Sputnik xəbər verir ki, bu barədə Azərbaycan Xarici İşlər Nazirliyinin (XİN) mətbuat xidmətinin rəhbəri Hikmət Hacıyev açıqlama verib: "Ermənistan silahlı qüvvələrinin təxribatçı əməlləri nəticəsində cəbhə xəttində baş vermiş gərginlik və insidentlərlə bağlı Azərbaycan Respublikasının xarici işlər naziri Elmar Məmmədyarov tərəfindən BMT-nin baş katibi Pan Ki Mun, Təhlükəsizlik Şurasının sədri Liu Jieyi və ATƏT Daimi Şurasının sədri Pol Eberharda müvafiq məktublar ünvanlanıb. Ermənistanın davam etməkdə olan təxribat əməlləri ilə əlaqədar Azərbaycan Respublikasının BMT və ATƏT yanında nümayəndəlikləri tərəfindən üzv dövlətlərə əlavə məlumatlar verilib".

"Xarici işlər naziri Elmar Məmmədyarov tərəfindən ünvanlanmış məktublarda və BMT və ATƏT yanında nümayəndəliklərimiz tərəfindən yayılmış məlumatlarda Ermənistan tərəfinin 5 aprel tarixində Moskvada Azərbaycan və Ermənistan Silahlı Qüvvələrinin baş qərərgah rəisləri arasında əldə olunmuş atəşkəsin pozmasına diqqət çəkilib, Ermənistanın qoşunların təmas xəttinə əlavə hərbi qüvvə və silahlar cəlb edərək, cəbhə xəttinə yaxın ərazilərdə yaşayan azərbaycanlı mülki əhalini ağır artilleriya və iri çaplı silahlardan atəşə tutduğu qeyd edilib", —deyə H. Hacıyev bildirib.

Onun sözlərinə görə, məktubda nazir Elmar Məmmədyarov Ermənistan silahlı qüvvələrinin təxribatçı əməllərinin ATƏT-in Minsk Qrupunun münaqişənin həlli istiqamətində göstərdiyi diplomatik səylərə zərbə vurduğunu xüsusilə qeyd edərək, beynəlxalq ictimaiyyəti Ermənistanı beynəlxalq hüququnun norma və prinsiplərini, həmçinin 5 aprel tarixində əldə edilmiş atəşkəsi pozduğu üçün kəskin qınamağa, sözügedən atəşkəs ilə bağlı üzərinə götürdüyü öhdəliklərə tam əməl etməyi və öz silahlı qüvvələrini Azərbaycanın işğal olunmuş ərazilərindən çıxarmağı tələb etməyə çağırıb.

79
Teqlər:
işğal, Qarabağ, Ermənistan, Pol Eberhard, Liu Jieyi, Ban Ki Mun, Elmar Məmmədyarov, Hikmət Hacıyev
Əlaqədar
Azərbaycan Ordusunun itki verdiyi barədə səs yazısı saxtadır
Ermənistan Azərbaycana qarşı qadağan olunmuş silahlardan istifadə edir
Ermənilərin hərbi obyektlərinə ağır zərbə vurulub
Rusiya və Ermənistan XİN rəhbərləri Qarabağ problemini müzakirə ediblər
Yaxın zamanlarda Qarabağda növbəti genişmiqyaslı hərbi əməliyyatların şahidi ola bilərik
İran Xarici işlər naziri Məhəmməd Cavad Zərif

İrandan Azərbaycana dəstək

855
Nazir Məhəmməd Cavad Zərif İranın Azərbaycanın ərazi bütövlüyünü dəstəkləməsi ilə bağlı məlum mövqeyini təkrar edib.

 

BAKI, 14 iyul — Sputnik. 14 iyul 2020-ci il tarixində Xarici İşlər naziri Elmar Məmmədyarovun İran İslam Respublikasının Xarici İşlər naziri Məhəmməd Cavad Zərif ilə telefon danışığı baş tutub. Bu barədə Sputnik Azərbaycan AR XİN Mətbuat xidməti idarəsinə istinadən məlumat verir.

Nazir Elmar Məmmədyarov İranlı həmkarını Azərbaycan-Ermənistan sərhədində Ermənistan silahlı qüvvələrinin törətdiyi hərbi təxribat, hücum cəhdinin qarşısının alınması, bölgədə davam edən gərginlik və mövcud vəziyyət barədə məlumatlandırıb. Ermənistan təcavüzünün bölgədə əsas təhlükə mənbəyi olduğu qarşı tərəfin diqqətinə çatdıran nazir Elmar Məmmədyarov işğalçı Ermənistan qüvvələrinin Azərbaycanın Dağlıq Qarabağ və ətraf rayonlarından çıxarılmasının zəruriliyini vurğulayıb.

Nazir Məhəmməd Cavad Zərif İranın Azərbaycanın ərazi bütövlüyünü dəstəkləməsi ilə bağlı məlum mövqeyini təkrar edərək, Azərbaycan Respublikasının ərazi bütövlüyünün qorunmasının İran İslam Respublikasının regional strategiyası olduğunu bildirib. O, münaqişənin həllinin irəlilədilməsi üçün İranın dəstək göstərməyə hər zaman hazır olduğunu qeyd edib.

855
Prezident Administrasiyasının Xarici siyasət məsələləri şöbəsinin müdiri Hikmət Hacıyev

Təcavüzkar siyasətlə digər ölkələri təhdid edirlər - Hikmət Hacıyev

819
Azərbaycan Respublikası Prezidentinin köməkçisi Hikmət Hacıyev bildirib ki, Ermənistan özünün sosial-iqtisadi problemlərinin dərinləşməsi fonunda uzun sürən hərbi münaqişənin kəskinləşməsinə çalışır.

 

BAKI, 14 iyul - Sputnik. Ermənistanın təcavüzkar siyasəti digər ölkələri təhdid edir. Bunu Azərbaycan prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev lenta.ru-ya Azərbaycan-Ermənistan sərhədində baş verənlərlə bağlı müsahibəsində deyib.

“Ermənistan silahlı qüvvələri Azərbaycanın Tovuz istiqamətində təxribatçı hərəkətlər edib və atəşkəs rejimini kobud şəkildə pozub. Onlar ilk olaraq öz artilleriyasını işə saldılar, lakin cavab atəşi və əks-hücumla bunun qarşısı alındı”, - deyən Hacılyev vurğulayıb ki, atəşkəs rejiminin pozulması bütün bu hadisələrə görə məsuliyyətin Ermənistan tərəfinin üzərinə düşdüyünü açıq şəkildə göstərir.

Yerevana bütün bunların nə üçün lazım olduğu barədə suala cavabında Azərbaycan prezidentinin köməkçisi deyib ki, Ermənistan hərbi avantüralar yolu ilə üzv olduğu hərbi-siyasi təşkilatları Ermənistan-Azərbaycan münaqişəsinə cəlb etməyə, Azərbaycana qarşı işğalçılıq və təcavüz siyasətinə görə məsuliyyətdən qaçmağa çalışır. Çünki Yerevanın fəaliyyəti üzv olduğu beynəlxalq təşkilatların hüquqi sənədlərinə ziddir.

Hacıyev həmçinin qeyd edib ki, Ermənistan öz sosial-iqtisadi problemlərinin kəskinləşməsi fonunda uzun sürən hərbi münaqişənin kəskinləşməsinə çalışır. Üstəlik, Ermənistan rəhbərliyinin destruktiv siyasətinin nəticəsi olan COVID-19-un geniş yayılması da, diqqəti daxili problemlərdən yayındıraraq sərhəddəki gərginliyə yönəltməyə hesablanıb.

"Ölkəmiz sərhəddə gərginliyin yaranmasına qarşıdır. Həm sərhəd xidmətlərimiz, həm də Silahlı Qüvvələrimiz təxribatın qarşısını almaq üçün qüvvələrini səfərbər ediblər", - deyə o vurğulayıb.

Bakının hadisələrin bu cür inkişafına hazır olub-olmaması barədə suala cavab verən Hacıyev bildirib ki, iyulun 12-də Ermənistan tərəfindən Tovuz sərhəddinə ağır hərbi texnika və canlı qüvvə daşınması müşahidə edilib. Azərbaycan tərəfi bunu artilleriya qurğularından istifadə etməklə hücumun Ermənistan tərəfindən əvvəlcədən hazırlanmasının sübutu kimi qiymətləndirir.

"Amma nəticədə onlar heç yeri tuta bilmədilər. Bakı hər zaman təxribatların qarşısını almağa və Ermənistan-Azərbaycan sərhədində gərginlik yaratmağa hesablanmış belə insidentlərin aradan qaldırılmasına hazırdır", - deyə o bildirib.

Onun sözlərinə görə, Qazax və Tovuz rayonları boyu əhəmiyyətli sahədə Azərbaycan Dövlət Sərhəd Xidmətinin bölmələri yerləşdirilib. Ermənistan tərəfi isə əksinə, iki ölkə arasında dövlət sərhədini sistemli şəkildə hərbiləşdirməkdə və dinc vətəndaşları qəsdən atəşə tutmaqda davam edir.

Bu vəziyyətin daha ciddi silahlı münaqişəyə çevrilə bilib-bilməyəcəyinə toxunan prezident köməkçisi deyib ki, Ermənistan Dağlıq Qarabağı və daha yeddi rayonu işğal etdikdən sonra Azərbaycanla Ermənistan arasında ciddi münaqişə 30 ildir davam edir. Onun sözlərinə görə, iki ölkənin silahlı qüvvələri indi də orada üz-üzə dayanıblar.

"Bütün bunlar 100 minlərlə hərbçinin üz-üzə dayandığı Birinci və İkinci Dünya müharibəsinin ssenarisini xatırladır. Bu da onu deməyə əsas verir ki, istənilən vaxt toqquşma gözləniləndir. Bundan sonra da təxribatlar gözləməyə dəyərmi, bunu Ermənistan tərəfindən soruşmaq lazımdır, axı onlar Azərbaycan torpaqlarını zəbt ediblər", - deyə Hacıyev qeyd edib.

Azərbaycan prezidentinin köməkçisi münaqişənin bütün regionu əhatə edib-etməyəcəyi barədə suala cavab verərkən, bu ssenarini qeyri-real adlandırıb. İran, Rusiya və Türkiyənin xarici işlər nazirlərinin narahatlıqlarını bildirdiklərini xatırladan Hacıyev qeyd edib ki, Azərbaycan bu ölkələrə Ermənistanın məsuliyyətsiz siyasətinə biganə qalmadığına görə təşəkkür edir. Onun sözlərinə görə, qonşu ölkələr dünyada vəziyyətin onsuz da qeyri-sabit olduğunu başa düşürlər və müharibə qızışacağı təqdirdə bu, onlara da təsir göstərəcək. Ermənistan isə düşünülməmiş hərəkətlər edir və onların nəticələri haqqında fikirləşmir.

"Azərbaycan bu məsələni sülh yolu ilə həll etməyə həmişə hazırdır və biz həmişə öz təşəbbüsümüzü göstəririk. Biz ATƏT nümayəndəsi ilə məsələləri həmişə müzakirə edirik və digər ölkələrin diqqətini yayındırmaq istəmirik, amma Ermənistan digər regionları öz təxribatlarına cəlb etməkdə çox maraqlıdır", - deyə lenta.ru-nun həmsöhbəti vurğulayıb.

Rusiyanın münaqişənin qarşısını almağa kömək edəcək tərəf qismində çıxış etməsinə gəlincə, Hacıyev deyib ki, bu məsələnin həllində Rusiya tərəfinin rolu həqiqətən çox böyükdür.

"Rusiya Federasiyasının rəhbərliyi və şəxsən Prezident Vladimir Putin lazımi addımları atıblar, biz bunu çox yüksək qiymətləndiririk. Ancaq əfsuslar olsun ki, ermənilərin işğalçı və təxribatçı addımları məsələni sülh yolu ilə həll etməyə imkan vermir. Biz bütün beynəlxalq birliyə müraciət edirik ki, Ermənistanı məsuliyyətə cəlb edək", - deyə o bildirib.

“Ermənistan sübut edir ki, məsələnin sülh yolu ilə həll olunmasında maraqlı deyil. Ermənistanın bu təcavüzkar siyasəti bir sıra başqa ölkələri də təhdid edir”, - deyə Azərbaycan Prezidentinin köməkçisi fikrini yekunlaşdırıb.

819

Şəhid general-mayorla doğulduğu Qəbələdə izdihamlı vida

0
Azərbaycan-Ermənistan dövlət sərhədinin Tovuz rayonu istiqamətində gedən döyüşlərdə şəhid olan qəhrəman hərbçimiz, general-mayor Həşimov Poladın nəşi doğulduğu Qəbələnin Vəndam kəndinə gətirilib.

General-mayor Həşimov Polad İsrayıl oğlu qəhrəmanca şəhid olub. Onun nəşi doğulduğu Qəbələnin Vəndam kəndinə gətirilib. Məmləkətinə onunla vidalaşmaq imkanı yaradılıb.

Qeyd edək ki, şəhidimiz sabah paytaxtdakı İkinci Fəxri Xiyabanda son mənzilə yola salınacaq.

İyulun 12-də Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz istiqamətində mövqelərimizi ələ keçirmək məqsədilə artilleriya atəşindən istifadə edərək hücuma keçməyə cəhd göstərib.

Düşmən hücumunun qarşısını alarkən döyüşdə Azərbaycan Ordusunun  hərbi qulluqçuları çavuş Sadıqov Vüqar Lətif oğlu, baş əsgər Məmmədov Elşad Dönməz oğlu, baş leytenant Mahmudov Rəşad Rəşid oğlu, hərbi qulluqçumuz əsgər Daşdəmirov Xəyyam Məhəmməd oğlu, bu gün isə döyüş zamanı müdafiənin ön xəttində olan general-mayor Həşimov Polad İsrayıl oğlu, polkovnik Mirzəyev İlqar Anzor oğlu, mayor Əhmədov Namiq Hajan oğlu, mayor Novruzov Anar Gülverdi oğlu, gizir Zeynallı İlqar Ayaz oğlu, gizir Babayev Yaşar Vasif oğlu və müddətdən artıq həqiqi xidmət hərbi qulluqçusu, əsgər Mustafazadə Elçin Arif oğlu şəhid olub.

0