İlham Mustafayev, Sputnik Azərbaycan

Şəmkirli gənclər maraqlı ideya reallaşdırıblar. Onlar bölgədə ilk olan "bullinqlərə yox deyək" təşəbbüsü çərçivəsində fikirlərini qraffitiyə çeviriblər. Küçələrdə avanqard formada rəsmlər çəkənlərdən fərqli olaraq onlar insanları düşündürən, cəmiyyət üçün faydalı olan mesajlar verməyə çalışıblar. Şəhərin Nizami küçəsində çəkdikləri divar rəsmləri nəinki həmin küçə, eləcə də rayon sakinləri tərəfindən maraqla qarşılanıb. Sosial şəbəkələrdə də maraqla paylaşılıb.

Qraffitinin müəlliflərindən olan Etibar Usubov hər bir kəsin isti münasibətə, gözəl sözlərə ehtiyacı olduğunu deyib. Elə bu səbəbdən dostları ilə birgə divarlarda bu cür mesajlar verməklə insanları şiddətə qarşı çıxmağa səslədiklərini söyləyib:

"Son vaxtlar demək olar insanlar arasında şiddət halları artıb. O səbəbdən qərara gəldik ki, belə bir qraffiti çəkək. Bu işimizlə çalışmışıq ki, insanların üzündə təbəssüm yaransın. Şiddətdən uzaq olsunlar. Bu işdə şəmkirli gənc könüllülər yaxından iştirak edib. Hətta küçədən keçən insanlar da yaxşı mənada nəsə etməyə çalışıblar", - deyə o, bildirib.

Şəmkir Gənclərin İnkişafı və Karyera mərkəzinin mütəxəssisi Könül Rəhimova layihənin gənclər arasında intiharların azalması, şiddətin xoş sözlər, nəvaziş və digər qayğıkeş hərəkətlərlə əvəz edilməsini özündə ehtiva etdiyini deyib. Onun sözlərinə görə, ilk öncə anti-bullinqlə bağlı sosial şəbəkələrdə müxtəlif mesajlar toplayıb. Bundan sonra bu anti-bullinq mesajları respublikamızda ilk dəfə olaraq Şəmkir şəhər mərkəzi küçələrinin birində divara çəkilən qraffitidə istifadə olunub.

"Şəmkirdə bullinqə son mövzusunda layihə işləmək istədik. Fikirləşdik ki nə edə bilərik. İnsanlara fikrimizi necə çatdıra bilərik. Belə qərara gəldik ki qraffiti edək. Eskimizi hazırladıq, UNİSEFə göndərdik. UNISEF bizim ideyamızı dəstəklədi. Facebookda sorğu edərək sloqanları yazdıq. Nəticədə belə maraqlı iş ortaya çıxdı", - deyə məlumat verib.

Gənclər soyuqda divarlarda boya ilə işləməyin çətin olmasına baxmayaraq, küçə sakinlərinin də köməyindən istifadə edərək işlərini gerçəkləşdirirlər. Onlar əl işlərini gələcəkdə Şəmkirin ucqar dağ kəndlərdə, eləcə də digər yaşayış məntəqələrində tətbiq etməyi planlaşdırırlar.

BAKI, 20 aprel — Sputnik. 2020-ci ildə ölkədə 3486,5 min ton və ya əvvəlki illə müqayisədə 6,4 faiz çox tullantı əmələ gəlib və onların 67,4 faizini bərk məişət tullantıları, 32,6 faizini isə müəssisələrin istehsal fəaliyyəti nəticəsində yaranan müxtəlif növ tullantılar təşkil edib.

Sputnik Azərbaycan-ın Dövlət Statistika Komitəsinə istinadən xəbərinə görə, ötən il yaranan 2350,0 min ton bərk məişət tullantılarının 74,5 faizi zərərsizləşdirilməsi məqsədilə poliqonlara daşınıb, 25,0 faizi enerji əldə edilməsi məqsədilə istifadə olunub, 0,5 faizi isə ölkə daxilində satılıb. Məişət tullantılarından istifadə hesabına 200,6 milyon kVt saat və ya 2019-cu illə müqayisədə 2,4 faiz çox elektrik enerjisi istehsal edilib.

Sənayedə və iqtisadiyyatın digər sahələrində əvvəlki illərdə yaranan qalıqlar daxil olmaqla, ötən il istehsalat tullantılarının 24,6 faizi müəssisələrdə xammal kimi istifadə edilib, 20,7 faizi ölkə daxilində satılıb, 1,8 faizi ixrac olunub, 8,4 faizi zərərsizləşdirilməsi məqsədilə poliqonlara daşınıb, 44,5 faizi isə müəssisələrdə qalıb.

Müəssisələrin istehsal fəaliyyəti nəticəsində 2019-cu illə müqayisədə 0,1 faiz az və ya 317,2 min ton təhlükəli tullantı yaranmış və tullantıların ümumi miqdarında onların payı 9,1 faiz olub. Tullantıların 53,8 faizi mədənçıxarma sənayesi müəssisələrində yaranıb ki, onların da böyük hissəsi Bakı şəhərində yerləşən müəssisələrin payına düşür. Əvvəlki illərdə yaranan qalıqlar da daxil olmaqla, ötən il 61,4 min ton təhlükəli tullantı tamamilə zərərsizləşdirilib.