Azərbaycanda ərzaq mağazaları və apteklər istisna olmaqla, bütün ticarət obyektləri koronavirusun yayılmasına qarşı mübarizə məqsədilə xüsusi karantin rejimi üzrə əlavə tədbirlərin görülməsindən sonra bağlanıb. Bu qadağa kənd təsərrüfatı məhsulları bazarlarına toxunmayıb.
İndi bazarlarda nə baş verir? Bura hələ də izdihamlıdır, lakin əvvəllər olduğu qədər deyil. Demək olar ki, bütün satıcılar alıcıların xeyli azaldığından şikayətçidirlər. Heç bir məhsul çatışmazlığı yoxdur, hətta əksinə - rəflərdə bolluq dərhal gözə dəyir. Həm də satıcıların və alıcıların əksəriyyətinin tibbi maskalarda, bəzilərinin də həm maska, həm də rezin əlcəklərdə olduğu nəzərə çarpır. Bundan başqa, orada insanların əllərini spirtlə necə dezinfeksiya etdiyini də görə bilərsiniz.
Bazarların rəhbərliyindən onu da öyrəndik ki, imkan daxilində bazarların ərazisinin, eləcə də ticarət cərgələrinin dezinfeksiyası hər gün həyata keçirilir.
Daxili İşlər Nazirliyi, AR Nazirlər Kabineti yanında koronavirusla mübarizə üzrə Operativ Qərargah, həmçinin Sputnik Azərbaycan vətəndaşları xüsusi karantin rejimi qaydalarına riayət etməyə və heç bir zərurət olmadan evlərini tərk etməməyə çağırır.
