Şahpəri Abbasova, Sputnik Azərbaycan

Bakı, Sputnik — 2 iyun. Onlar insanlara təbəssüm bağışlayırlar. Gələcəyə ümid verirlər. Uşaqlar dünyanın sevinci, şənliyi, ümididirlər. Yer üzünün ən təmiz, ən saf və ən gözəl varlıqları uşaqlardır.

Humanistlər deyirlər ki, dünyanı uşaqlara bağışlayaq. Ekoloqlar isə bu fikirdədirlər ki, dünyanı uşaqlar üçün qoruyaq. Pedoqoqlar da deyirlər ki, uşaqlara insandan daha üstün münasibət göstərmək lazımdır, çünki onlar gələcəkdirlər.

Uşaqlar hər gün, hər saat, hər an belə bizim üçün, bizim dünya üçün aktualdırlar. Çünki onlar bizi gələcəyə bağlayan yeganə ümidlərdir. İnsanların ən çox sevdiyi şüarlardan biri "Uşaqlar bizim gələcəyimizdir" şüarıdır. İnsansevərlərinsə başlıca şüarı "Uşaqlar ölməsin"dir. Bu gün ağıllı xalqlar diqqətlərini məhz uşaqların hələ körpə yaşlarından sağlam gələcək üçün yetişdirilməsinə yönəldiblər.

Lap qədimlərdə qız uşaqlarını öldürürdülər. Bəzi dinlərə görə onlar lənətlənmiş elan edilir və allahlara qurban kəsilirdilər. Amma Məhəmməd Peyğəmbər (s.ə.s.) insanlara başa saldı ki, bütün insanlar Allah qarşısında bərabərdir və Allah onun yaratdıqlarının insanlar tərəfindən öldürülməsini bağışlamır. Məhəmməd (s.ə.s.) uşaqların günahsız doğulduğunu və haqqın dərgahında uca mövqedə dayandıqlarını insanlara nişan verdi.

Renesans dövrünün Rafaello, Mikelancelo, Leonardo da Vinçi kimi rəssam və heykəltaraşları öz əsərlərində uşaqlara böyük önəm verdilər. Yüzilliklər ərzində mələklər uşaq sifətində təsvir olunurdu. Qanadlı uşaqlar mələkləri simvolizə edirdi.

Lev Tolstoy öz "Hərb və sülh" əsərində yazırdı ki, dünyada müharibələrin törədilməsində günahı olmayan yeganə varlıqlar uşaqlardır. Uşaqlar həqiqətən də insanların həyata ümididir, yaşamaq üçün vəsilədir. Ən nəhayət gələcəkdir. Ümidlərimizi, həyatımızın anlamını, ən nəhayət gələcəyimizi qoruyaq!

Qeyd edək ki, dünən (1 iyun) Uşaqların Beynəlxalq Müdafiəsi Günü idi.

BAKI, 12 aprel - Sputnik. 12 aprel - Dünya Aviasiya və Kosmonavtika Günüdür. 1961-ci ilin bu günündə ilk dəfə olaraq Sovet İttifaqı vətəndaşı Yuri Qaqarin orbitə çıxıb. "Vostok" kosmik gəmisi ilə orbitə çıxan kosmonavt 1 saat 48 dəqiqə ərzində Yer kürəsi ətrafında dövr edib və Rusiyanın Saratov vilayəti ərazisində uğurla yerə enib. Keçmiş SSRİ Ali Sovetinin 1962-ci il 9 aprel tarixli Qərarı ilə 12 aprel - Dünya Aviasiya və Kosmonavtika Günü elan edilib. Hazırda bu gün bir çox ölkələr tərəfindən qeyd olunur.

Yuri Qaqarin dünyanın bir çox ölkəsinin fəxri vətəndaşıdır. “Vostok” eniş etdikdən sonra Qaqarin dərhal bir anda SSRİ-nin ən məşhur insanı oldu.

Məhz bu uçuşdan sonra kosmosun fəth olunması üzrə 250-dən çox proqram həyata keçirilib, orbitdə 32 ölkədən bir neçə yüz kosmonavt və astronavt olub. Kosmosda hamıdan çox qalan da rusiyalı kosmonavt Sergey Avdeyevdir. O, 747 sutka, 17 saat açıq fəzada olub. Bir uçuşun davamiyyətinə görə isə lider ixtisasca həkim olan Valeri Polyakovdur. O, "Mir" stansiyasında bir ildən çox - 437 sutka 17 saat uçuş keçirib.