Bu gün Azərbaycanda 250-dən çox muzey fəaliyyət göstərir və bu muzeylər profillərinə uyğun olaraq özündə tarixi yaşadır. Belə muzeylərdən biri də, dünya şöhrətli azərbaycanlı vokal ifaçısı, xalq artisti Bülbülün ev muzeyidir. Sputnik-in əməkdaşı bu muzeydə gördüklərini və orada yaşadılan tarix haqda duyduqlarını qələmə alıb.
Bülbül Azərbaycanda ilk vokal ustası, geniş səs imkanlarına malik olan xanəndə, xalqın sevimlisi olub. Azərbaycan KP MK-nın, Respublika Nazirlər Sovetinin 16 iyun 1976-cı il, №223 qərarı ilə, 10 iyun 1982-ci ildə Bakıda, Azərbaycan professional vokal sənətinin banisi, SSRİ Xalq artisti, Stalin Mükafatı laureatı, ictimai xadim, professor Bülbülün Memorial Muzeyi açılıb.
Bu, ölkəmizdə vokalçı üçün yaradılan ilk muzeydir. Muzey mərhum prezident Heydər ƏIiyevin şəxsi təşəbbüsü ilə yardılıb. Bu günə kimi də qapıları azərbaycanlıların, eyni zamanda bütün turistlərin üzünə açıqdır.
Bülbül Şuşa şəhərində doğulub və yaşayıb. Sonradan Gəncəyə, oradan da Bakıya köçüb. Hazırda muzey olan evdə 1937-ci ildən ömrünün sonunadək, yəni 1961-cil sentyabr ayının 26-dək yaşayıb.
Muzeyin direktoru Fərqanə Cabbarovanın dediyinə görə, zəngin Bülbül irsinin əvəzsiz tədqiqatçısı, Bülbülün xanımı, uzun illər Bülbülün Memorial Muzeyinə rəhbərlik edən Adelaida Məmmədova ömrünün sonunadək Bülbül irsini mühafizə etməklə, Azərbaycan musiqi mədəniyyətinin təbliği sahəsində təqdirəlayiq xidmətlər göstərib. Məhz onun fədakarlığı sayəsində bu gün muzeydə Bülbülün ömür yolunu, yaradıcı, pedaqoji, elmi və ictimai fəaliyyətini işıqlandıran 9000-ə yaxın eksponat qorunub saxlanır.
"Muzeyin fondlarında toplanmış materiallar Bülbülün yarım əsrdən artıq bir müddətdə Azərbaycan mədəniyyətində, incəsənətində əvəzsiz xidmətlərini aydın şəkildə göstərir", —deyə direktor bildirdi.
Muzeydəki eksponatlardan yataq otağındakı çarpayı xüsusi diqqət çəkir. Onun üzərində Hötenin "Faust" facisəsinin obrazları işlənıb. Çarpayı alman istehsalıdır, əl işidir, qoz ağacından hazırlanıb.
Milan vitrini adlanan muzeyin guşəsində xarici passport, maestro Rafaelle Qraninin məktubları və vizit vərəqəsi, daimi tramvay bileti, italyan dilini fərdi öyrənmək üçün Bülbülün qeydləri olan "Berlits məktəbinin" kitabı, Arturo Toskaninin konsert proqramı, Deli Pontinin təbrik açıqcası yer alır.
Qonaq otağında qızılı rəngdə saat da diqqət çəkir. Saat Fransa istehsalıdır və tuncdan hazırlanıb. Sanki yenicə istehsaldan çıxıb. Nəzərə çəkən əşyalardan biri də "Edison" fonoqrafıdır. Görkəmli xalq sənətkarlarının ifası Bülbülün 1932-ci ildə Leninqraddan gətirdiyi "Edison" fonoqrafı vasitəsilə fonovaliklərə yazılıb. Həmçinin, Azərbaycanın rayonlarına musiqi folklorunun toplanması üçün ekspedisiyalar təşkil olunurdu.
Xalq artistinin qrim əşyaları da maraqla qarşılanır. 40 il Opera və Balet Teatrında istifadə etdiyi qrim və kiçik çamadan indi də muzeydə qorunub saxlanır. 80-dən artıq yaşı olan Ripoletto operasının afişası da muzeyə xüsusi gözəllik verir.
Bir sözlə, Bülbülün sehrinə düşmək, xalq artistinin yaşadığı dövrə ekskursiya edib, həmin dövrü yaşamaq istəyənlər bu muzeydə arzularına çata bilərlər. Ayrıca, muzeyə giriş də ödənişsizdir…
