Pfizer peyvəndi, arxiv şəkli

"Pfizer" vaksinini kimlər vurdura bilər? Növbə barədə hər şey

2240
(Yenilənib 18:24 29.06.2021)
İcbari Tibbi Sığorta üzrə Dövlət Agentliyi sistemdə bu ayın heç bir təqvim gününə qeydiyyatdan keçə bilməməyin səbəbini açıqlayıb.

BAKI, 29 iyun — Sputnik. Azərbaycanda "Pfizer" peyvəndinə növbə yaranıb. Sputnik Azərbaycan-a bu barədə vaksin vurdurmaq istəyən şəxslər məlumat veriblər. Roza Fərzəliyeva adlı vətəndaş Sputnik Azərbaycan-a açıqlamasında bildirib ki, onun "Pfizer" peyvəndi vurdurması üçün qohumları randevu.its.gov.az saytında qeydiyyatdan keçməyə çalışsalar da, sistemdə bu ayın heç bir təqvim gününə qeydiyyatdan keçə bilməyiblər.

Analoji problemlə "Pfizer" peyvəndi vurdurmaq istəyən hər kəs rastlaşır. Hətta "Pfizer" peyvəndinin artıq ölkədə tətbiq edilməyəcəyi, iyul ayında bu peyvəndin ancaq ikinci dozasından istifadənin mümkün olacağı barədə məlumatlar dolaşır.

Sputnik Azərbaycan "Pfizer" peyvəndinə yaranmış növbənin nə vaxt aradan qalxacağını araşdırıb.

İcbari Tibbi Sığorta üzrə Dövlət Agentliyindən Sputnik Azərbaycan-ın sorğusuna verilən cavabda bildirilir ki, randevu.its.gov.az saytında "Pfizer" peyvəndinə qeydiyyat üçün bu aya yer qalmayıb. Bu səbəbdən də insanlar "Pfizer" peyvəndi üçün iyun ayına qeydiyyatdan keçə bilmirlər. Agentlikdən bildirilib ki, yer ancaq hansısa qeydiyyata düşən şəxs imtina edərsə boşala bilər. Qurumdan bildirdilər ki, "Pfizer" peyvəndinə insanlar ancaq gələn aydan növbəyə yazıla bilərlər.

Səhiyyə Nazirliyinin qeydinə görə, "Pfizer" peyvəndi üçün yalnız iyun ayında olan bütün yerlər dolub. Gələn aydan bu vaksinin daha tətbiq edilməyəcəyi barədə məlumatlar əsassızdır.

İnfeksionistlər isə insanların əsasən "Pfizer" peyvəndinə maraq göstərməsinin düzgün olmadığı qənaətindədirlər. İnfeksionist Vüqar Cavadzadə Sputnik Azərbaycan-a açıqlamasında bildirib ki, insanların daha çox "Pfizer" peyvəndinə maraq göstərməsinin kökündə Avropanın bu vaksini qəbul etməsi dayanır:

"Almaniya "Pfizer" peyvəndi vurduranları öz ölkəsinə buraxacaq. Bəzi Avropa ölkələrinin vaksinlər arasında fərq qoyması insanları məcbur edir ki, həmin peyvəndlərə üstünlük versinlər. Amma tibbi baxımdan peyvəndlərin bir-birindən keyfiyyətinə görə elə bir üstünlüyü yoxdur. Vaksinlərin hamısı koronavirus əleyhinə hazırlanıb. Bu məsələyə Ümumdünya Səhiyyə Təşkilatı son qoymalıdır. Ölkələr vaksinlər arasında fərq qoymamalıdır".

"COVID-19 vaksin randevu" elektron xidməti aktiv edilib

Bu yazı çapa hazılanarkən Agentlik iyul ayı üçün "COVID-19 vaksin randevu" elektron xidmətinin aktiv edildiyi barədə məlumat yayıb. Orada qeyd olunub ki, iyul ayında COVID-19 xəstəliyinə qarşı peyvənd olunmaq istəyənlər 29 iyun tarixindən etibarən onlayn qaydada növbə götürə bilərlər. Bildirilib ki, bunun üçün yaşı 18-dən yuxarı olan şəxslər "COVID-19 vaksin randevu" elektron xidmətindən istifadə etməlidirlər.
"Hazırda Azərbaycanda "CoronaVac", "Vaxzevria", "Sputnik V" və "Pfizer" vaksinlərindən istifadə edilir. Məlumat üçün bildirək ki, peyvənd olunmaq üçün növbəti ay üzrə onlayn növbənin götürülməsi cari ayın son günlərindən başlayaraq mümkündür. "COVID-19 vaksin randevu" elektron xidmətindən istifadə qaydası ilə buradan tanış ola bilərsiniz", - məlumatda bildirilib.

Azərbaycanda əhaliyə hansı peyvəndlər vurulur

Hazırda Azərbaycanda koronavirus infeksiyasına qarşı 4 peyvənd tətbiq olunur. Bunlar "CoronaVac", "Vaxzevria", "Sputnik V", "Pfizer" vaksinləridir. Vətəndaşlar peyvənd olunmaq üçün ilk növbədə randevu.its.gov.az saytından qeydiyyatdan keçərək növbə götürməlidirlər.

Xatırladaq ki, "Avropa Dərman Agentliyi ilə Ümumdünya Səhiyyə Təşkilatı tərəfindən hazırda 4 vaksin ("BioNTech/Pfizer", "Moderna", "AstraZeneca" və "Johnson & Johnson") qeydiyyata alınıb.

"Pfizer" peyvəndi molekulyar biologiyanın ən müasir üsulları ilə hazırlanıb. Həmçinin mutasiya olunmuş koronavirusun S zülalının birləşdirilməsi ilə əmələ gəlib. Hazırda "Pfizer" peyvəndinin istifadəsi Bakıda Bakı Sağlamlıq Mərkəzində, Zərifə Əliyeva 5 ünvanında yerləşən Mərkəzi Klinik Xəstəxanada, "Leyla Medical Center", "Caspian İnternational Hospital" və M.Ə.Əfəndiyev adına 2 saylı Şəhər Klinik Xəstəxanasında aparılır.

2240
İvan Tixonov

On nəfərə bir qələbə: Azərbaycanlı idmançıların Tokioda ilk günü

14
Tokio Olimpiadasında ilk yarış gününün nəticələrinə görə, medal sıralamasında üç qızıl və bir bürünc medal qazanan Çin birincidir.

BAKI, 24 iyul - Sputnik. Tokio Yay Olimpiya Oyunlarının ilk yarış günü azərbaycanlı idmançılar üçün uğursuz keçdi. Sputnik Azərbaycan bildirir ki, onlardan yalnız biri uğurlu start götürə bilib.

Cüdo

İlk məyusedici xəbərlər cüdodan gəldi. Kəramət Hüseynov (60 kq) və Aişə Qurbanlı (48 kq) ilk pillələrdən yarışdan ayrıldılar. Hüseynov öncə britaniyalı Eşli Makkenzini udub, gürcü Luxumi Çxvmianiyə uduzdusa, Qurbanova elə ilk görüşündəcə Katarina Koştaya (Portuqaliya) məğlub oldu.

Veloyürüş

Vaxtından əvvəl yarışı dayandıranlardan biri də velosipedçi Elçin Əsədov oldu. 234 km-lik şosse yürüşünün, demək olar ki, yarısını keçəndən sonra yıxıldı. 

Güllə atıcılığı

Snayperimizi Ruslan Lunyov da uğursuzluğa düçar oldu. 10 metrlik məsafəyə pnevmatik tapançadan atəşdə 20-ci yerə düşərək finala çıxa bilmədi. Ancaq birinci gün çıxış edən idmançılarımızın çoxundan fərqli olaraq, Lunyov hələ Oyunlarda iştirakını yekunlaşdırmayıb - 25 m-lik məsafəyə xırda kaliberli tapançadan atəş yarışında da qüvvısini sınayacaq. 

Üzgüçülük

 

Üzgüçülərimiz Maksim Şemberev və Məryəm Şeyxəlizadəxangah Tokiodakı Olimpiadada uğursuz çıxış ediblər.

400 m məsafədə kompleks üzgüçülükdə çıxış edən Şemberev 4:19.40 dəqiqə nəticə ilə çıxışını yekunlaşdırıb. O, öz yarımqrupunda sonuncu - səkkizinci yer tutub. Ümumi sıralamada isə 29 iştirakçı arasında 26-cı ola bilib. Yarımfinala çıxa bilməyən Şemberev Olimpiadadakı işini yekunlaşdırıb.

Şemberev üçün bu, ikinci Olimpiadadır. 2012-ci ildə Londonda o, Ukrayna bayrağı altında çıxış edirdi.

100 m məsafədə batterflyay üsulu ilə yarışda Məryəm Şeyxəlizadəxangah finişə 1:01,37 dəqiqə nəticə ilə çataraq, üç nəfərdən ibarət yarımqrupda birinci olub. Yekun hesabda isə 33 yarışçı arasında 30-cu olub və o da Tokiodakı çıxışını bitirib.

 

Məryəmdən kimsə nəticə gözləmirdi, o, Beynəlxalq Federasiyanın kvotası ilə Olimpiadaya gəlib, Şemberev isə lisenziya normativini yerinə yetirmişdi və ən azı, onun yarımfinala çıxacağına ümid edirdik.

Boks

İdman həvəskarlarına ən böyük məyusluğu isə boks yarışları yaşatdı. Titullu idmançı, Riodakı 2016-cı il Olimpiadasının gümüş mükafatçısı Lorenso Sotomayordan (69 kq), heç olmasa, medallar uğrunda mübarizə gözlənilirdi, birinci dövrədən kənarda qalmaq yox. O isə 1/16 finalda Gürcüstan təmsilçisi Əsgərxan Madiyevə uduzdu. Görüşü üçüncü raundda Sotomayorun zədəsi səbəbindən (qanaxma) saxladılar, ancaq Azərbaycan yığmasının kubalı legioneri üçün qələbə ümidi heç yox idi də: ilk iki raundu o uduzmuşdu.

57 kq çəki dərəcəsində çıxış edən boksçumuz - Tayfur Əliyev növbəti mərhələyə adlamağa layiq idi. Çünki 1/16 mərhələdə Vyetnam təmsilçisi Duaonq Van Nquenə qarşı yaxşı döyüşürdü. Ancaq hakimlər mübahisəli qərar verərək qələbəni vyetnamlının adına yazdılar (2:3).

 

Boksçumuz Məhəmməd Abdullayev (91 kq çəki dərəcəsi) isə Azərbaycan təmsilçiləri arasında Tokiodakı Olimpiadada qələbə qazanan yeganə idmançı oldu. 1/16 finalda o, Bəhreyn təmsilçisi Denis Latipovla görüşündən 3:1 hesabı ilə qalib ayrıldı. Düzdür, püşkatmada onun heç bəxti gətirməyib: növbəti mərhələdə o, dünya çempionu, Özbəkistan təmsilçisi Bahodir Calolovla görüşəcək. Bu görüş iyulun 29-da olacaq.

İdman gimnastikası 

Təmsilçilərimizdən Tokiodakı ilk yarış günündə sonuncu çıxış edən isə idman gimnastı İvan Tixonov oldu. O, təsnifatda 45-ci yer tutaraq, adını finala yazdıran 24 nəfərin arasına düşə bilmədi.

Medal hesabı

Tokio Olimpiadasında ilk yarış gününün nəticələrinə görə, medal sıralamasında üç qızıl və bir bürünc medal qazanan Çin birincidir. İkinci yerdə Yaponiya ilə İtaliya qərarlaşıblar: hərəyə bir qızıl və bir gümüş medal. İlk onluğa həmçinin 4. Koreya (1, 0, 2), 5. Macarıstan, Kosovo, Tailand, Ekvador, İran (1, 0, 0), 10. Serbiya, Rusiya (0, 1, 1) daxildir.

14
Teqlər:
atıcılıq, gimnastika, cüdo, şosse velosipedi, üzgüçülük, boks, idmançılar, azərbaycanlı, Tokio Yay Olimpiya Oyunları

Təhsil naziri müəllimlərin imtahanı ilə bağlı söz verdi

10
Təhsil naziri əmin edib ki, araşdırmaların nəticəsinə əsasən növbəti 3 gün ərzində müvafiq qərarlar qəbul ediləcək və ictimaiyyətə açıqlanacaq.

BAKI, 24 - iyul - Sputnik. Azərbaycanın Təhsil naziri Emin Əmrullayev müəllimlərin işə qəbulu ilə əlaqədar keçirilmiş imtahanlardan narazılıqlara dair açıqlama verib.

"2021-2022-ci tədris ili üzrə müəllimlərin işə qəbulu imtahanlarında namizədlərə təqdim olunmuş test tapşırıqları haqqında sosial mediada yayılmış narazılıqlardan məlumatlıyıq. Bunları nəzərə alaraq, ekspert komissiyası tərəfindən test tapşırıqlarının müxtəlif seanslar üzrə müqayisəli elmi-statistik təhlili aparılacaq", - deyə nazir sosial şəbəkə hesabında qeyd edib.

O əmin edib ki, araşdırmaların nəticəsinə əsasən növbəti 3 gün ərzində müvafiq qərarlar qəbul ediləcək və ictimaiyyətə açıqlanacaq.

 

Qeyd edək ki, imtahanda iştirak edən müəllimlər sosial şəbəkələrdə xüsusilə ədəbiyyatdan verilən sualların məzmunundan, ümumilikdə isə suallar üçün az vaxt ayrılmasından şikayət ediblər.

Eləcə də oxuyun:

10
Teqlər:
imtahan, işə qəbul, müəllim, Emin Əmrullayev, təhsil naziri, təhsil