BAKI, 4 iyun — Sputnik. 2021-2022-ci tədris ili üçün müəllimlərin işə qəbulu üzrə müsabiqənin elektron sənəd qəbulu prosesi başlayıb. Sputnik Azərbaycan xəbər verir ki, elektron sənəd qəbulu prosesi iyunun 11-nə kimi davam edəcək.
Müsabiqə 4 mərhələdən (elektron ərizələrin yoxlanılması, test imtahanı, vakant yerlərin seçimi və müsahibə mərhələsi) ibarətdir. Müsabiqənin ilk – elektron sənəd qəbulu mərhələsində namizədlər miq.edu.az saytına daxil olaraq qeydiyyatdan keçə bilərlər.
Qeyd edək ki, müəllimlərin işə qəbulu müsabiqəsində orta ixtisas və ali təhsil müəssisələrini pedaqoji ixtisaslar üzrə bitirmiş, dövlət nümunəli təhsil sənədi almış və ya xarici ölkədə aldığı ali təhsil haqqında sənədi tanınmış Azərbaycan vətəndaşları və ya ölkəmizdə daimi yaşamaq üçün icazə verilmiş şəxslər iştirak edə bilərlər.
Xatırladaq ki, ötən il dekabrın 14-24-də keçirilən müəllimlərin işə qəbulu müsabiqəsinin onlayn müsahibə mərhələsində ümumilikdə 2 min 197 namizəd iştirak edib, onlardan 2 min 61 nəfəri uğur qazanıb.
