* AZƏRBAYCAN *
Tehran Neft Emalı Zavodundakı yanğın

Tehran Neft Emalı Zavodunda yanğın olub, 11 yaralı - FOTO

18
(Yenilənib 14:47 03.06.2021)
Çərşənbə günü axşam saatlarında Tehran NEZ-də genişmiqyaslı yanğın başlayıb. Hadisə yerinə xilasetmə qrupları cəlb edilib.

BAKI, 3 iyun — Sputnik. Tehranın Neft Emalı Zavodundakı (NEZ) yanğın nəzarət altına alınıb və bir-iki saat ərzində tamamilə söndürüləcək. Bu barədə Sputnik Azərbaycan Rusiya mediasına istinadla məlumat yayıb. Məlumatda bildirilir ki, jurnalistlərə xəbəri NEZ-in rəsmi nümayəndəsi Şəkər Həfayi verib.

“Çənlərdən birində baş vermiş yanğın nəzarət altına alınıb. Bir-iki saat ərzində yanğın tamamilə söndürüləcək", – deyə qeyd edib.

Həfayi əlavə edib ki, NEZ-in digər obyektləri yanğından zərər görməyib.

  • Tehran Neft Emalı Zavodundakı yanğın
    © Tasnim News Agency/Handout via REUTERS
  • Tehran Neft Emalı Zavodundakı yanğın
    © AFP 2021 / ATTA KENARE
  • Tehran Neft Emalı Zavodundakı yanğın
    © Majid Asgaripour/WANA (West Asia News Agency
  • Tehran Neft Emalı Zavodundakı yanğın
    © AFP 2021 / ATTA KENARE
1 / 4
© Tasnim News Agency/Handout via REUTERS
Tehran Neft Emalı Zavodundakı yanğın

Qeyd edək ki, çərşənbə günü axşam saatlarında Tehran NEZ-də genişmiqyaslı yanğın başlayıb. Hadisə yerinə xilasetmə qrupları cəlb edilib.

Bir qədər bundan əvvəl Həfayi bəyan etmişdi ki, yanğından yalnız 20 min barel həcmindəki bir çən zərər görüb.

Tehrandakı Neft Emalı Zavodundan baş vermiş yanğında 11 nəfər xəsarət alıb. Bu barədə ISNA agentliyi Tehran Fövqəladə Hallar Xidmətinin rəhbəri Peyman Saberiana istinadla məlumat yayıb. "İndiyə kimi 11 nəfər xəsarət alıb, onlardan 4-ü xəstəxanaya yerləşdirilib, qalanlarına da tibbi yardım göstərilib", - deyə o bildirib.

Xatırladaq ki, Tehran NEZ İranın ən böyük neft emalı zavodlarndan biridir. Bu ölkədə emal olunan neftin 15% -i həmin zavodun payına düşür. Zavod benzin, dizel yanacağı, mazut və digər neft məhsulları istehsal edir. NEZ Tehran əyalətinin cənub hissəsində yerləşir.

18
Teqlər:
Nez, İran, Tehran
Футболисты сборной Швеции

İsveç millisi Polşa yığmasına qalib gələrək AVRO-2020 pley-off mərhələsinə çıxıb

4
(Yenilənib 22:15 23.06.2021)
İsveçlilər "E" qrupunda İspaniya, Polşa və Slovakiya komandalarını geridə qoyaraq birinci yeri tutublar.

Futbol üzrə İsveç milli komandası Polşa millsini məğlub edərək Avropa çempionatının qrup mərhələsində "E" qrupunda birinci yeri tutub.

Sankt-Peterburqda keçirilən qarşılaşma 3:2 hesabı ilə skandinaviyalıların xeyrinə başa çatıb.

İsveç komandasında qolları Emil Forsberq (2 və 59-cu dəqiqələrdə) və Biktor Klasson (90+4) vurublar. Polşa komandasında isə Robert Levandovski rəqib qapısının torunu iki dəfə silkələyib (61,84).

Stadionda oyuna 14252 azarkeş tamaşa edib.

Beləliklə, İsveç millisi qrupda 7 xal toplayaraq birinci yerdən 1/8 finala çıxıb. Hesabında 1 xal olan Polşa yığması isə qrupda son yerdə qərarlaşaraq turnirdə çıxışlarını başa vurub.

4
Kişi saçlarını darayır, arxiv şəkli

Bizə qənim kəsilən qəzəbli adamlar

326
(Yenilənib 21:41 23.06.2021)
Sputnik Azərbaycan-ın köşə yazarı son illər çox aktual olan sosial şəbəkə dözülməzliyi mövzusuna toxunub.

BAKI, 23 iyun — Sputnik. Sosial şəbəkələrdə bir qrup insan var ki, oturub kimlərisə linç etmək üçün fürsət gözləyir.

Əgər sənin şəxsi fikirin varsa, ümumi fikirə zidd bircə kəlimə yazsan, vay halına. Bu mühafizəkar və qəzəbli adamlar səni didib-parçalayar, məhv edər.

Onlar heç kəsin tənqidi fikrini, şəxsi yanaşmasını qəbul etmir. Ellikcə sevinib, ellikcə kədərlənən bu insanlar onların duyğularına şərik olmayanları bihörmət etməyə məqam gözləyirlər. Onlar üçün azadlıq əxlaqsızlıq, şəxsi fikir tərbiyəsizlik, fərdi düşüncəni bölüşmək mənasızlıqdır.

***

Onların düşməni də, dostu da ümumidir. Qəfildən sözü bir yerə qoymuş kimi kimisə sevə, ya da söyə bilirlər. Həmrəy, həmfikir olmaqda əndazəni aşmış bu adamların gözündən yayınıb azacıq müstəqil fikir yazsan, sənin xalq düşməni olduğunu sübut edənə qədər səndən əl çəkməzlər. Sosial şəbəkələrdəki qaraguruhu müşahidə edəndə, Nemət Pənahlının “Meydan” hərəkatındakı performansını xatırlayıram. Hərçənd, o dönəmdə uşaq olsamda, dumanlı xatirələrim və böyüklərdən eşitdiklərim Nemətin kütləni necə coşdurmasını yaddaşımdan silinməyə qoymur. Nemətin bir kəlməsi ilə oturub-qalxan minlərlə adam vardı illər öncə...

Sonra həmin kütləvi həmrəylik unuduldu getdi, illər sonra o adamların “varisləri” sosial şəbəkələrdə peyda oldu. İndi də onlar kütləvi şəkildə həmrəy və həmfikir olmaqla sosial şəbəkələri “Azadlıq meydanı”na çeviriblər. Onların da öz nemətpənahlısı var – sosial şəbəkə fenomenləri...

Müharibə vaxtı bu kütlənin qəzəbini də, coşğusunu da gördük. Sülh tərəfdarlarının təhqir edilməsi, fərqli düşünənlərin linç edilməsi hələ də davam edir. Bəli, bu adamlar alternativ, müstəqilfikirə hörmət etmir, hətta qəbul etmirlər. Onlar kimi düşünmürsənsə düşmənsən, namərdsən, satılmısan. Şüar birdir: “ya bizdənsən, ya düşmən”.

***

Şübhsiz ki, kütlənin azad fərdlərə qarşı dözümsüzlüyü yenilik deyl. İllər öncə də sosial şəbəkələrdə qəzəbli adamlar, əsəbi kütlə vardı, bu gün də var. Lakin getdikcə onların bölünməsi, qruplaşması fərqli istiqamətdə təşəkkül tapır. Nə qədər bölünüb, parçalanıb, şaxələnib inkişaf etsələr də, onların ortaq nöqtəsi mütləq var: fərdlərə, azad, müstəqil fikirli insanlara qarşı dözümsüzlük. Əgər şəxsi fikirin varsa, bunu ifadə etmək istəyirsən yüz ölçüb, bir biçməlisən. Yoxsa, hücuma, linçə, təhqirə hazır olmalısan.

Onlar klassikləri çıxmaq şərti ilə, heç bir musiqiçini, rejissoru, aktyoru, yutuberi, siyasətçini, yazıçını və şairi bəyənmirlər. Onların fikirincə “bizimkilər” heç nəyi bacarmır. Məsələn, indiki müğənnilər oxuya bilmir, komediya aktyorları güldürə bilmir, rejissorlar çəkməyi bacarmır, yazıçılar isə yazmasa daha yaxşıdır. Nirvanada olduğunu düşünən bu ərənlər, onlar kimi düşünməyənləri cahil, savadsız, savadsız, bacarıqsız hesab edir. Çünki haqqı bilən sadəcə onlardır və onlar da “kövni-məkana sığmırlar”.

***

Xülaseyi-kəlam, bu qəzəbli və əsəbi insanlar arasında yaşamaq, ömür tükətmək əməlli-başlı işgəncədir. Bir yandan pandemiya, bir yandan gündən-günə çətinləşən həyat şərtləri, “bir yandan da havalar...” Açığı hər şeyə birtəhər dözmək, səbr etmək mümkündür. Adamı nə yayın istisi yandırır, nə də susuzluq. Adamı yandıran anlayışsız insanlar arasında yaşayıb, ömür-gün tükətməkdir. Bu qəzəbli, heç nəyi bəyənməyən, hamıya potensial düşmən kimi baxan adamlarla eyni səmanın altında eyni ulduzları seyr etmək o qədər çətindir ki...

326