Şəki xan sarayı — Azərbaycanın Şəki şəhərində yerləşən keçmiş xan sarayı

Yayda daxili turizmi necə inkişaf etdirmək olar - Yollar var

937
(Yenilənib 22:07 02.05.2021)
"Bizim 10 milli parkımız var. Kənd həyatını istisna etməklə digər fəaliyyətlər elə milli parkların ərazisində baş verməlidir. Amma əfsuslar olsun ki, infrastruktur çox zəifdir"

Nigar İsgədərova, Sputnik Azərbaycan

BAKI, 2 may — Sputnik. "Açıq etiraf edək ki, biz son illərdə daxili turizmə deyil, gəlmə turizmə daha çox maraq göstərmişik. Daxili turizmi də yaddan çıxartmaq olmaz. Çünki bu yerli əhalinin rifahıdır. Son illərdə biz bunları unutmuşduq, daxili turizmdə bir ləngimə yaranmışdı. Artıq dövlət qurumları da daxili turizmə diqqəti artırmaq üçün müəyyən addımlar atmağa hazırlaşır. Biz isə bu haqda çoxdan danışırdıq". Bu barədə Sputnik Azərbaycan-a açıqlamasında "DAİR" Hotellər və Restoranlar Assosiasiyasının sədri Samir Dübəndi deyib.

Artıq yay mövsümünün başlanmasına az müddət qalıb. "Ötən ildən fərqli olaraq yayda daxili turizmdən gəlir əldə etmək üçün nə kimi addımlar atmaq olar?" sualına cavab olaraq Samir Dübəndi təkliflərini səsləndirib: "Qobustanda palçıq vulkanları ərazisində yeni kompleksin təməli qoyuldu ki, bu həm xarici, həm də daxili turizm üçün töhfələr verəcək. Eyni zamanda da yaşıl turizmi inkişaf etdirmək lazımdır. Pandemiya dövründə insan sağlamlığının hər şeydən vacibliyi bir daha sübuta yetirildi. Açıq havada olan fəaliyyətlər, idman turizmi, aktiv, ekstrim turizmi də bu baxımdan faydalı hesab etmək olar. Belə turlar sağlamlıqla yanaşı, həm də müəyyən biliklərin əldə edilməsinə, təcrübələrə yiyələnməyə səbəb ola bilər. Kənd turizminə də diqqət çəkmək olar. Yəni, aqrar fəaliyyətlərdə də turizm imkanlarını genişləndirmək olar. Ev heyvanlarına baxım, biçim, məhsul yığımı, yaxud da hansısa məhsulun hazırlanma, emalı prosesində iştirak etməklə də fərqli turizm imkanları yaratmaq mümkündür. Bizim 10 milli parkımız var. Kənd həyatını istisna etməklə digər fəaliyyətlər elə milli parkların ərazisində baş verməlidir. Amma əfsuslar olsun ki, infrastruktur çox zəifdir".

"Biz 2019-cu ilin dekabrında Azərbaycan Ekoturizm Assosiasiyasını əbəs yerə yaratmamışıq. Bu fəaliyyət növlərinə diqqət yetirməyin zamanı çatıb. Onların turistlər üçün elektron xəritələri, düşərgələri belə, yoxdur. Cığırlar, marşrutlar çox zəifdir. Bütün bunlar yoxlanılmalıdır, baxılmalıdır. Çalışırıq ki, bu sahənin perspektivini Ekologiya və Təbii Sərvətlər Nazirliyinə çatdıra və əməkdaşlıq qura bilək", - deyə o əlavə edib.

Onun sözlərinə görə, təəssüflər olsun ki, ölkəmizdə beynəlxalq sertifikat almış dağ turizm marşrutları üzrə bələdçilər yoxdur: "Müxtəlif çətinlik dərəcəsi olan zirvələrimizin olmasına baxmayaraq, ölkədə belə dağ bələdçilərinin olmaması problemi var".

O bildirir ki, iyunda Bakıda "Formula 1" yarışının keçirilməsi də turizm bazarının canlanmasına gətirib çıxaracaq.

937
Qanvermə, arxiv şəkli

Mütəmadi olaraq qan vermək infarkt xərçəng riskini azaldır

2
(Yenilənib 23:15 07.05.2021)
Mütəmadi qan vermək həm də vaxtaşırı mini check-up-dan keçmək deməkdir. Çünki qan verməmişdən əvvəl donordan müxtəlif analizlər götürülür.

BAKI, 7 may — Sputnik. Mütəmadi şəkildə qan vermək infarkt və xərçəng riskini azaldır, ürək-damar xəstəliklərinin qarşısını alır, xolesterolu və qandakı şəkərin səviyyəsini normallaşdırır. Bu barədə Türkiyə Səhiyyə Elmləri Universitetinin müəllimi, hematologiya üzrə mütəxəssis, professor Erdal Kurtoğlu Anadolu Agentliyinə müsahibəsində bildirib. Onun sözlərinə görə, qan vermək hüceyrələrin yenilənməsinə səbəb olur.

Donorlardan alınan qanın fərqli komponentlərə ayrıldığını bildirən professor qeyd edib ki, beləliklə, könüllü şəkildə verilən hər vahid qan eritrosit, trombosit və plazma şəklində üç nəfərin həyatını xilas edir.

Kurtoğlu onu da bildirib ki, qan vermək üçün maneə yaratmayan hər hansı bir sağlamlıq problemi olmayan 18-65 yaş arası hər kəs donor kimi qan verə bilər.

Temperaturun yüksəlməsi ilə müşayiət olunan xəstəlik keçirən insanlardan isə ən azı 2 həftə qan alınmamalıdır. Bundan başqa, cərrahiyyə əməliyyatı keçirənlərin, akupunktura, döymə, və pirsinq etdirənlərin də 12 ay ərzində donor kimi qan verməsi qadağandır.

"Kişilər 90 gündən bir, qadınlar isə 120 gündən bir donor kimi qan verə bilərlər", – deyə professor qeyd edib.

Mütəxəssis onu da bildirib ki, COVID-19-a qarşı peyvənd olunanlar da donor kimi qan verə bilərlər. Özü də bunun üçün peyvəndin üstündən müəyyən müddətin keçməsinə ehtiyac yoxdur.

Kurtoğlu qan donorluğunun insanlara mənəvi rahatlıq bəxş etdiyini də bildirib.

"Mütəmadi qan donorluğunu tövsiyə edirik. Çünki bunun infarkt və xərçəng riskini azaltması, qan-damar xəstəliklərinin qarşısını alması, xolesterolu və qan şəkərini balanslaşdırmasına dair tibbi məlumatlar mövcuddur. Bundan başqa, mütəmadi qan vermək həm də vaxtaşırı mini check-up-dan keçmək deməkdir. Çünki qan verməmişdən əvvəl donordan müxtəlif analizlər götürülür. Ən əsası isə qan vermək, beləliklə də, insanlara faydalı olduğunu bilmək adama mənəvi rahatlıq bəxş edir", – deyə o vurğulayıb.

2
Min bir gecə baleti, arxiv şəkli

"Min bir gecə" baleti beynəlxalq festivalda

2
(Yenilənib 23:11 07.05.2021)
Balet mayın 13 və 14-də göstəriləcək. Tamaşanı Azərbaycan Dövlət Akademik Opera və Balet Teatrının baş dirijoru, Əməkdar artist Əyyub Quliyev idarə edəcək.

BAKI, 7 may — Sputnik. Görkəmli Azərbaycan bəstəkarı Fikrət Əmirovun "Min bir gecə" baleti mayın 13-dən iyunun 2-dək Tatarıstanın paytaxtı Kazanda keçiriləcək Rudolf Nureyev adına 36-cı Beynəlxalq klassik balet festivalında nümayiş olunacaq. Sputnik Azərbaycan xəbər verir ki, Tatarıstan Dövlət Akademik Opera və Balet Teatrının səhnəsində reallaşacaq festival Rusiyanın Əməkdar incəsənət xadimi, həmvətənimiz Eldar Əliyevin xoreoqrafik quruluşunda Mariinski Teatrının Primorsk səhnəsinin (Vladivostok) "Min bir gecə" tamaşası ilə açılacaq. Balet mayın 13 və 14-də göstəriləcək. Tamaşanı Azərbaycan Dövlət Akademik Opera və Balet Teatrının baş dirijoru, Əməkdar artist Əyyub Quliyev idarə edəcək.

Eldar Əliyevin quruluşunda "Min bir gecə" baletinin premyerası 2020-ci ilin avqustunda olub.

Dünyaca məşhur balet artistləri, xoreoqraf və dirijorları bir araya gətirən Rudolf Nureyev adına festival 1987-ci ildən keçirilir.

2