Bayram Kərimov

Bayram Kərimovun problemi həll olundu

53
(Yenilənib 12:25 29.04.2021)
Bayram Kərimovla bağlı narazılıq doğuran məlumatlar yayıldıqdan sonra o, Müdafiə Nazirliyi tərəfindən yenidən xəstəxanaya çağrılıb və onun bütün problemləri artıq həllini tapıb

Nigar İsgəndərova, Sputnik Azərbaycan

BAKI, 29 aprel — Sputnik. Keçmiş əsir Bayram Kərimovun problemləri həllini tapıb. Bu barədə B.Kərimov özü Sputnik Azərbaycan-a məlumat verib. Həmçinin onun problemlərinin həlli istiqamətində müəyyən töhfələrini verən, hüquqi baxımdan yardımlarla təmin edən könüllü xanım Nigar Aslanova da bu barədə Sputnik Azərbaycan-a məlumat verib. O bildirib ki, Bayram Kərimovla bağlı narazılıq doğuran məlumatlar yayıldıqdan sonra o Müdafiə Nazirliyi tərəfindən yenidən xəstəxanaya çağrılıb və onun bütün problemləri artıq həllini tapıb. 

B.Kərimovun əlliliklə bağlı müraciətinə də baxılıb.

Qeyd edək ki, bir neçə gün öncə 44 günlük Vətən müharibəsindən sonra ermənilərə əsir düşən və əsirlikdən qayıtmış Bayram Kərimov Silahlı Qüvvələrin Baş Klinik Hospitalında onun səhhətinə diqqətsiz yanaşılması ilə bağlı Sputnik Azərbaycan-a açıqlama vermişdi. O açıqlamasında bildirmişdi: "İynə vurdururam, ağrılarım keyiyir, gedirəm "Papanin" xəstəxanasına. Allaha and olsun, çox əziyyət çəkirəm. Həkimlərə deyirəm ki, sənədlərimlə bağlı nə deyirsiniz? Deyirlər ki, sən yararlısan. Deyirəm axı necə yararlıyam?! Yararlıyamsa, o zaman mənə necə orta-ağır diaqnozu ilə 2 min 700 manat pul verildi? Durub üzümə baxırlar. Məni göndərirlər psixoloqun yanına, deyirəm, ay kişi, mən dəli deyiləm. Deyirəm ki, necə ola bilər ki, mənim sənədlərim psixoloqun otağından çıxır, axı mən dəli deyiləm".

Onunla bağlı sosial şəbəkələrdə də çoxsaylı etiraz doğuran paylaşımlar yer almışdı.

53
Qanvermə, arxiv şəkli

Mütəmadi olaraq qan vermək infarkt xərçəng riskini azaldır

5
(Yenilənib 23:15 07.05.2021)
Mütəmadi qan vermək həm də vaxtaşırı mini check-up-dan keçmək deməkdir. Çünki qan verməmişdən əvvəl donordan müxtəlif analizlər götürülür.

BAKI, 7 may — Sputnik. Mütəmadi şəkildə qan vermək infarkt və xərçəng riskini azaldır, ürək-damar xəstəliklərinin qarşısını alır, xolesterolu və qandakı şəkərin səviyyəsini normallaşdırır. Bu barədə Türkiyə Səhiyyə Elmləri Universitetinin müəllimi, hematologiya üzrə mütəxəssis, professor Erdal Kurtoğlu Anadolu Agentliyinə müsahibəsində bildirib. Onun sözlərinə görə, qan vermək hüceyrələrin yenilənməsinə səbəb olur.

Donorlardan alınan qanın fərqli komponentlərə ayrıldığını bildirən professor qeyd edib ki, beləliklə, könüllü şəkildə verilən hər vahid qan eritrosit, trombosit və plazma şəklində üç nəfərin həyatını xilas edir.

Kurtoğlu onu da bildirib ki, qan vermək üçün maneə yaratmayan hər hansı bir sağlamlıq problemi olmayan 18-65 yaş arası hər kəs donor kimi qan verə bilər.

Temperaturun yüksəlməsi ilə müşayiət olunan xəstəlik keçirən insanlardan isə ən azı 2 həftə qan alınmamalıdır. Bundan başqa, cərrahiyyə əməliyyatı keçirənlərin, akupunktura, döymə, və pirsinq etdirənlərin də 12 ay ərzində donor kimi qan verməsi qadağandır.

"Kişilər 90 gündən bir, qadınlar isə 120 gündən bir donor kimi qan verə bilərlər", – deyə professor qeyd edib.

Mütəxəssis onu da bildirib ki, COVID-19-a qarşı peyvənd olunanlar da donor kimi qan verə bilərlər. Özü də bunun üçün peyvəndin üstündən müəyyən müddətin keçməsinə ehtiyac yoxdur.

Kurtoğlu qan donorluğunun insanlara mənəvi rahatlıq bəxş etdiyini də bildirib.

"Mütəmadi qan donorluğunu tövsiyə edirik. Çünki bunun infarkt və xərçəng riskini azaltması, qan-damar xəstəliklərinin qarşısını alması, xolesterolu və qan şəkərini balanslaşdırmasına dair tibbi məlumatlar mövcuddur. Bundan başqa, mütəmadi qan vermək həm də vaxtaşırı mini check-up-dan keçmək deməkdir. Çünki qan verməmişdən əvvəl donordan müxtəlif analizlər götürülür. Ən əsası isə qan vermək, beləliklə də, insanlara faydalı olduğunu bilmək adama mənəvi rahatlıq bəxş edir", – deyə o vurğulayıb.

5
Min bir gecə baleti, arxiv şəkli

"Min bir gecə" baleti beynəlxalq festivalda

5
(Yenilənib 23:11 07.05.2021)
Balet mayın 13 və 14-də göstəriləcək. Tamaşanı Azərbaycan Dövlət Akademik Opera və Balet Teatrının baş dirijoru, Əməkdar artist Əyyub Quliyev idarə edəcək.

BAKI, 7 may — Sputnik. Görkəmli Azərbaycan bəstəkarı Fikrət Əmirovun "Min bir gecə" baleti mayın 13-dən iyunun 2-dək Tatarıstanın paytaxtı Kazanda keçiriləcək Rudolf Nureyev adına 36-cı Beynəlxalq klassik balet festivalında nümayiş olunacaq. Sputnik Azərbaycan xəbər verir ki, Tatarıstan Dövlət Akademik Opera və Balet Teatrının səhnəsində reallaşacaq festival Rusiyanın Əməkdar incəsənət xadimi, həmvətənimiz Eldar Əliyevin xoreoqrafik quruluşunda Mariinski Teatrının Primorsk səhnəsinin (Vladivostok) "Min bir gecə" tamaşası ilə açılacaq. Balet mayın 13 və 14-də göstəriləcək. Tamaşanı Azərbaycan Dövlət Akademik Opera və Balet Teatrının baş dirijoru, Əməkdar artist Əyyub Quliyev idarə edəcək.

Eldar Əliyevin quruluşunda "Min bir gecə" baletinin premyerası 2020-ci ilin avqustunda olub.

Dünyaca məşhur balet artistləri, xoreoqraf və dirijorları bir araya gətirən Rudolf Nureyev adına festival 1987-ci ildən keçirilir.

5