Bakı məktəblərində əyani tədris prosesi, arxiv şəkli

Sentyabrda ənənəvi dərslər başlamaya bilər: Şagirdlər daşıyıcı ötürücülərdir

1424
(Yenilənib 14:32 09.04.2021)
"Mən özüm bir infeksionist kimi bu suala cavab tapa bilmirəm. Çünki sabah epidemik vəziyyətin necə olacağını bilmirik".

Zülfiyyə Quluyeva, Sputnik Azərbaycan

BAKI, 9 aprel — Sputnik. Ötən gün təhsil naziri Emin Əmrullayev ənənəvi tədrisə qayıtmağın vaxtını açıqlayıb. Nazir bildirib ki, hər hansı məktəbin işçi heyətinin 85%-dən çoxu vaksinasiya prosesindən keçibsə, həmin təhsil ocağı müəyyən mənada təhlükəsiz məktəb kimi qiymətləndirilə bilər: "Əminəm ki, təhsilin bütün sahəsi üzrə 80-90% müəllim və texniki heyət peyvənd olunacaqsa, bu şərtlə sentyabrın 15-də ənənəvi tədrisə qayıda bilərik".

Nazirin bu açıqlaması sosial platformada müəyyən suallara səbəb olub. Müzakirələr əsasən şagird və tələbələrin virusa yoluxma riski ilə bağlıdır.

Sputnik Azərbaycan-a açıqlama verən təhsil üzrə ekspert Kamran Əsədov bildirib ki, ənənəvi tədrisin bərpası üçün şagird və tələbələrin vaksinasiyası şərt deyil. Onun sözlərinə görə, hazırda dünyada iki dövlət şagirdər arasında vaksinasiyaya başlayıb: "Dünya təcrübəsində şagird və tələbələrin vaksinasiyası İsrail və Amerikadadır. Şagirdlər dünyanın əksər ölkələrində vaksin edilməyib. Amerikada ibtidai siniflər açılıb, yuxarı siniflərdə vaksinasiya aparılır".

Ekspert bildirir ki, hazırda koronavirus infeksiyasına yoluxma üzrə daha çox risk qrupuna müəllimlər daxildir:

"Şagirdlər daşıyıcı və ötürücülərdir. Daha çox ağırlaşma yuxarı yaş qrupunda müşahidə olunur. Təbii ki, Azərbaycanda yaşından asılı olmayaraq təhsil sahəsində çalışanların hamısı vaksin ediləcək. Bununla təhsil sahəsində virusa yoluxma riski aşağı düşəcək. Bu mənəda ümumtəhsil müəssisələrində ənənəvi tədrisin bərpasına nail olmaq mümkündür".

K.Əsədov bildirir ki, təhsil sahəsində 18 yaşdan yuxarı olanlar da var: "Əgər onlar vaksin edilirlərsə, deməli ali təhsil müəssisələrindəki tələbələr də bu prosesə cəlb oluna bilərlər".

Ekspert bildirir ki, hazırda ən çox risk ali məktəb müəllimləri ilə bağlıdır: "Ali təhsil müəssisələrində yaşlı müəlimlərin sayı daha çoxdur. Ona görə də orta məktəblərlə müqayisədə ali məktəblərdə müəllimlər arasında virusa yoluxma riski çox böyükdür. Bu səbəbdən, ali məktəblərdə ənənəvi tədrisə başlamazdan öncə bu məqam nəzərə alınmalıdır".

K.Əsədov bununla belə bildirir ki, hələ ki, Azərbaycanda şagird və tələbələrin vaksin edilməsi müzakirə mövzusu deyil.

İnfeksionist Vüqar Cavadzadə Sputnik Azərbaycan-a açıqlamasında bildirib ki, pandemiya dövründə qabaqcadan epidemik proqnoz vermək düzgün deyil:

"Mən özüm bir infeksionist kimi bu suala cavab tapa bilmirəm. Çünki sabah epidemik vəziyyətin necə olacağını bilmirik. Ola bilər ki, sentyabr ayında epidemik vəziyyət sabitləşsin. Yaxud da əksinə. Epidemioloji vəziyyət imkan verərsə, təhsil müəssisələri işləyə bilər. Vaksinasiya müəllimlər arasında, təhsil işçiləri arasında aparılır. Amma nəzərə almalıyıq ki, məktəbyaşlı uşaqlar virusu daha çox yaymaq imkanına malikdirlər. Onlarda xəstəlik özünü büruzə vermir. Bununla belə məktəbyaşlı uşaqlar epidemioloji cəhətdən virusu yaya bilərlər. Şagirdlər arasında virus yayılarsa, onlar da gedib evdə valideynlərini yoluxdura bilərlər. Həmin şəxslər isə iş yoldaşları, öz yaxınları arasında bu virusu yaya bilərlər. Bu zəncirvari şəkildə davam edə bilər. Nəticədə ölkədə epidemik vəziyyət pisləşəcək. Ona görə də hamımız məktəblərdə ənənəvi tədrisin bərpasını istəsək də, vəziyyətin sentyabr ayına qədər necə dəyişəcəyini bilmirik. Bu durumda indidən sentyabrda ənənəvi dərslərin başlanacağı proqnozunu vermək çətindir".

İnfeksionist deyir ki, hazırda 40 yaşdan yuxarı şəxslərin vaksin edilməsi gündəmdədir. Şagirdlərin və tələbələrin vaksinasiyası isə müzakirə mövzusu deyil: "Hətta gələcəkdə şagirdlər arasında peyvəndləmə işi aparılarsa, bu, 15 yaşdan sonra uşaqları əhatə edə bilər. Çünki aşağı yaş qrupunda uşaqlar üzərində vaksinin fəsadları öyrənilməyib. Biz belə halda 6-7 yaşlı uşağı koronavirusa görə peyvənd edə bilmərik".

1424
Erməni əsgərlərin dəbilqələri, arxiv şəkli

Ermənistanda 44 günlük müharibə ilə bağlı çoxlu cinayət işi açılıb

0
(Yenilənib 16:23 06.05.2021)
Ermənistan Baş Prokurorluğunun məhkəmə qərarlarının icrasına nəzarət üzrə nümayəndəsi Edqar Arsenyanın sözlərinə görə, Şuşa və Hadrut yaxınlığındakı döyüşlərlə bağlı istintaqa cəlb olunanlar var.

BAKI, 6 may — Sputnik. Ermənistanda 44 günlük Qarabağ müharibəsi ilə əlaqədar 1580 cinayət işi qaldırılıb. Sputnik Ermənistan bu ölkənin Baş Prokurorluğuna istinadla xəbər verir ki, artıq 628 nəfər təqsirləndirilən şəxs qismində istintaqa cəlb edilib. Onların arasında adları hələ açıqlanmayan yüksək rütbəli zabitlər də var.

İri miqyaslı cinayət işlərinin istintaqı bir neçə əsas istiqamətdə aparılır: hərbi xidmətə çağırış və səfərbərlik zamanı yol verilən pozuntular, müharibədən əvvəl və müharibə zamanı silah alınmasında mümkün korrupsiya sxemləri, silahlı qüvvələrin və ayrı-ayrı bölmələrin rəhbərliyindəki cinayət pozuntuları, taktiki və strateji əməliyyatların həyata keçirilməsi, komandanlığın əmrlərinə tabe olmamaq və s.

Bundan əlavə, Milli Təhlükəsizlik Xidməti Azərbaycanın Şuşa və Hadrutu işğaldan azad etməsi ilə bağlı mediada və sosial şəbəkələrdə yer alan məlumatları da araşdırıb.

Prokurorluğun məhkəmə qərarlarının icrasına nəzarət üzrə nümayəndəsi Edqar Arsenyanın sözlərinə görə, məsələ Şuşa və Hadrut yaxınlığındakı döyüşlərlə bağlıdır.

O bildirib ki, qaldırılan cinayət işlərindən biri də dövlətə xəyanətlə əlaqədardır. Bundan başqa, hərbi qulluqçuların valideynlərindən pul tələb etmə faktı üzrə 5 cinayət işi də qaldırılıb.

 

0

Azərbaycanda sutkalıq yoluxma sayı aşağı düşdü

59
Yeni yoluxma hallarının müəyyənləşdirilməsi ilə əlaqədar 10 717, bu günə qədər isə ümumilikdə 3 300 581 test icra olunub

 

BAKI, 6 may — Sputnik. Azərbaycanda koronavirus (COVID-19) infeksiyasına 844 yeni yoluxma faktı qeydə alınıb, 2 057 nəfər müalicə olunaraq sağalıb. Nazirlər Kabineti yanında Operativ Qərargahdan Sputnik Azərbaycan-a verilən məlumata görə, analiz nümunələri müsbət çıxan 18 nəfər vəfat edib.

İndiyədək ölkədə ümumilikdə 324 685 nəfərin koronavirus infeksiyasına yoluxması faktı müəyyən edilib, onlardan 301 006 nəfər müalicə olunaraq sağalıb, 4 635 nəfər vəfat edib. 19 044 nəfər aktiv xəstə sayını təşkil edib.

Son sutka ərzində yeni yoluxma hallarının müəyyənləşdirilməsi ilə əlaqədar 10 717, bu günə qədər isə ümumilikdə 3 300 581 test icra olunub.

59