BAKI, 30 yanvar — Sputnik. Qarabağda daha 15 erməni hərbçinin cəsədi tapılıb. Bu barədə Sputnik Ermənistan xəbər verir.
Məlumatda qeyd olunur ki, 13 erməni hərbçisinin cəsədi Cəbrayıl tərəfdə tapılıb. Bir erməni hərbçinin cəsədi Ağdərədə tapılıb, digər erməni hərbçinin cəsədini isə Azərbaycan tərəfi təhvil verib. Onların şəxsiyyəti tibbi-məhkəmə ekspertizası ilə müəyyənləşəcək.
Həmçinin qeyd olunur ki, bu gün axtarış işləri Hadrut və Ermənistanın Sünik vilayəti ilə həmsərhəd ərazisində aparılacaq.
Qeyd edək ki, yanvarın 29-na olan məlumata görə, Ermənistan tərəfi 1344 hərbçinin cəsədini və ya cəsəd qalıqlarını tapıb.
Ümumilikdə isə Ermənistan Səhiyyə Nazirliyi sentyabrın 27-dən noyabrın 9-dək erməni tərəfinin 3330 nəfər itki verdiyini açıqlayıb.
Qeyd edək ki, Azərbaycan, Rusiya və Ermənistan liderlərinin Qarabağ üzrə üçtərəfli bəyanatı 2020-ci il noyabrın 10-da imzalanıb. Bəyanata əsasən, Dağlıq Qarabağ münaqişə zonasında 2020-ci il noyabrın 10-u saat 00:00-dan etibarən bütün hərbi əməliyyatların dayandırılması və tam atəşkəs barədə razılıq əldə olunub.
Bəyanata görə, Ağdam rayonu 2020-ci il noyabrın 20-də, Kəlbəcər rayonu noyabrın 25-də (ilkin olaraq noyabrın 15-i nəzərdə tutulurdu), Laçın rayonu isə dekabrın 1-də Azərbaycana qaytarılıb. Bununla yanaşı, təmas xətti və Laçın dəhlizi boyunca Rusiya Federasiyasının sülhməramlı kontingenti yerləşdirilir. Paralel olaraq Ermənistan silahlı qüvvələri işğal olunmuş ərazilərdən çıxarılmalıdır.
Tərəflərin razılığına əsasən, yaxın üç ildə Laçın dəhlizi üzrə Xankəndi ilə Ermənistanın əlaqəsini təmin edəcək yeni hərəkət marşrutunun tikintisinin planı müəyyən olunacaq. Daxili məcburi köçkünlər və qaçqınlar BMT-nin Qaçqınların işləri üzrə Ali Komissarının nəzarəti altında Dağlıq Qarabağın və ətraf rayonların ərazisinə qayıdacaqlar. İqtisadi və nəqliyyat əlaqələrinin bərpa olunacağı gözlənilir. Ermənistan Respublikası vətəndaşların, nəqliyyat vasitələrinin və yüklərin hər iki tərəfə maneəsiz hərəkətinin təşkil olunması məqsədi ilə Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqəsini təmin edəcək.
