BAKI, 14 dekabr - Sputnik. Tehranda Dağlıq Qarabağ və müqavimət şəhidlərinin anım mərasimi keçirilib.

Sputnik Azərbaycan APA-ya istinadla xəbər verir ki, Tehranın Həzrət Əbdüləzim Həsəni (ə) ziyarətgahının Şeyx Səduq konfrans zalında keçirilən mərasimdə İran və Azərbaycanın dövlət himnləri səsləndirilib.

Mərasimdə ölkə rəsmiləri, yüksək rütbəli hərbçilər, parlament sədrinin köməkçisi Hüseyn Əmir Abdullahian, parlamentin üzvləri, İslam İnqilabı Keşikçilər Korpusunun (SEPAH) Qüds Qüvvələrinin komandir müavini general  Məhəmməd Hicazi, cümlədən Tehranın İmam Cüməsi Höccətül-islam Siddiqi, İranda yaşayan azərbaycanlılar, qatılıblar.

Mərasimdə Qarabağda şəhid olmuş bütün azərbaycanlı hərbçilərin siyahısı, İranın Ali Lideri Ayətullah Xameneinin Ermənistanın Azərbaycanın işğal olunmuş torpaqlarını tərk etməsinin vacibliyi ilə bağlı çıxışı iştirakçılara nümayiş olunub.

Höccətül-İslam Siddi Qarabağ müharibəsində şəhid olanların xatirəsini  yad edərək bildirib ki, onlar öz qorxmazlığı və canından keçmələri ilə Azərbaycana izzət və başucalığı gətirdilər:

“Həm də İran azərbaycanlılarını sevindirdilər. Şəhidlər heç vaxt unudulmur, Şəhidin qanı həmişə qaynayır və firavanlıq yaradır. Azərbaycanda  gənclər öz canlarını verdilər və torpaqlarını azad etdilər. Bizim rəhbərimiz Azərbaycanı rəsmi şəkildə dəstəklədi və bildirdi ki, Qarabağ Azərbaycanındır və Azərbaycana qaytarılmalıdır.  Ermənistan işğal etdiyi torpaqları geri qaytarmalıdır. Bu gün bu qələbə yalnız Azərbaycanın qələbəsi deyil, həm də İslamın qələbəsidir”.

BAKI, 22 yanvar - Sputnik. Təhsil naziri Emin Əmrullayev pandemiya ilə əlaqədar şagirdlərin dərslərində bəzi geriləmələrin olması ilə bağlı səsləndirilən fikirlərə münasibət bildirib.

Xəzər Televiziyasında yayımlanan “Vaxt gəldi” proqramında nazir övladlarından birinin 1-ci sinfə getdiyini, digərinin isə məktəbəqədər yaşda olduğunu deyib. O, distant təhsilin problemlərindən bəhs edərkən deyib:  

“Distant təhsil və teledərslər öz-özlüyündə izləmə baxımından maraqlı prosesdir. Eyni zamanda bu, çox çağırışlı məsələdir, o mənada ki, problemlidir. Belə ki, avadanlıqdan istifadə və ya müxtəlif problemlər meydana çıxır. Misal olaraq, hava soyuq olanda işıqlar sönə bilər. Bunu uşağa izah etmək məsələsi var. Odur ki, mövcud problemlərin şagirdin biliyində geriləmə və ya irəliləməyə səbəb olması ilə bağlı müəyyən ölçmələr aparmaq lazımdır”.

Nazir ibtidai siniflərdə şagirdlərin sosial-psixoloji, sosial-emosional inkişafına fokuslaşmalı olduğumuzu da qeyd edib:

“Biz emosiyalara və ya hansısa gümanlara yox, faktlara, ölçmələrə, elmə inanmalıyıq. Hazırda bununla bağlı planlar var və bunlardan biri də şagirdlərin biliyinin qiymətləndirilməsinin aparılmasıdır. Təbii, şagirdlər də dərsə qayıtmalıdır ki, biz bunu edə bilək. Yaxud başqa formatlar da düşünə bilərik. İnandığım budur ki, fokuslanmalı olduğumuz məsələ, xüsusilə də ibtidai sinifdə şagirdlərin sosial-psixoloji, sosial-emosional inkişafıdır. Mənə görə məktəb insanın sosial emosional inkişafını irəli aparan yer olmalıdır. Çünki öyrənmə və motivasiya arasında çox böyük əlaqə var”.