Uşağın doğulduğu taksi

Taksidə doğulan uşağın hekayəsi: "Üzümü çevirəndə o, artıq oturacağın üstündə idi"

706
(Yenilənib 16:32 04.09.2020)
Ailənin ikinci övladı olan körpəyə Fatimə adı qoyulub. Ailəyə bir illik pulsuz gediş hədiyyə edilib. Həmçinin, sürücü də mükafatlandırılıb.

BAKI, 4 sentyabr — Sputnik. Qeyri-adi hadisə Bakıda İsgəndərovlar ailəsinin başına gəlib. Xətai rayonunda yaşayan ailənin gəlini 9 aylıq hamilə olub və ötən gün doğum sancıları başladığından "189" taksi xidmətindən maşın sifariş edərək xəstəxanaya getmək qərarına gəliblər. Sputnik Azərbaycan-ın məlumatına görə, ailənin əvvəlcədən müəyyən etdiyi xəstəxana Yasamal rayonunda olsa da, taksi sərnişinləri oraya çatdıra bilməyib. Elə taksidəcə qız uşağı dünyaya gəlib. Sürücü Mehman Rzayev Sputnik Azərbaycan-a bildirib ki, ilk dəfədir başına bu cür hadisə gəlir və bu olayı ömür-boyu unuda bilməyəcək.

"Gəlib burada, Qara Qarayevdə tıxaca düşdük. Nə qədər fırlatdım ki, haradan gedim, məhəllə aralarına girdim. Bəlkə oralardan çıxaram deyə. Məhəllə arası ilə gedirdik, birdən arxadan səs gəldi. Dedilər ki, uşaq gəlir. Birinci şoka düşdüm. Həmin anı yaşamaq lazımdır. Çevrilib gördüm ki, uşaq oturacağın üstündədir, özümü itirdim. Həm də eşitmişəm ki, uşağın səsi çıxmalıdır. Uşağın səsi də çıxmırdı, qorxdum ki, uşağa bir şey olar".

© Sputnik / Ibrahim Hashimov.
Uşağın atası və nənəsi

Mehman Rzayev ailəni yaxınlıqdakı 7 saylı Doğum Evinə çatdırıb:

"Sürüb gətirdim, maşını xəstəxananın həyətinə saldım. Uşaq artıq doğulmuşdu. Orada da göbəyini kəsdilər, sağ-salamat apardılar".

Çəkisi 3 kiloqram 700 qram olan körpə nənəsi Gülnar İsgəndərovanın qucağında dünyaya gəlib.

© Sputnik / Ibrahim Hashimov.
Mehman Rzayev

"Anada artıq sancılar başlamışdı. Zəng elədik taksi şirkətinə. Gəlib çıxdı. Yarı yolda ananın ağrıları bir az da şiddətləndi və uşaq maşında dünyaya gəldi. Mən də maşındaydım, uşaq elə qucağımda dünyaya gəldi. Sözün düzü biz bunu gözləmirdik. Bizim üçün gözlənilməz hadisə oldu", - deyə Gülnar İsgəndərova qeyd edib.

7 saylı Doğum Evinə yerləşdirilən ananın və körpənin vəziyyəti yaxşıdır. Körpənin atası Ramik İsgəndərov bunun onlar üçün unudulmaz hadisə olduğunu bildirib.

"Sıxlıqla əlaqədar olaraq sürücüyə müraciət etdim ki, yaxınlıqdakı xəstəxanaya bizi dərhal çatdırsın. Amma qismət beləymiş ki, xəstəxanaya çatmamış uşaq maşında dünyaya göz açdı. Belə bir hadisəni biz adətən kinolarda görərik. Amma bu hadisəni özümüz yaşayanda həqiqətən də bizim üçün həm çox maraqlı, həm həyəcanverici oldu. Bizim üçün bu, tarixə, yaddaşlarımıza yazılan gün olaraq qaldı",- deyə körpənin atası vurğulayıb.

© Sputnik / Ibrahim Hashimov.
Fatimə İskəndərova

Ailənin ikinci övladı olan körpəyə Fatimə adı qoyulub. Şirkətdən bildirildi ki, ailəyə bir illik pulsuz gediş hədiyyə edilib. Həmçinin, sürücü də mükafatlandırılıb və uşağı xəstəxanaya çatdırmaq üçün onun etdiyi manevrlərə, qayda pozuntularına görə tətbiq olunan cərimələri şirkət ödəyib.

706
Restoran, arxiv şəkli

Bu yerlərdə karantin şərtləri kobud şəkildə pozuldu

3
(Yenilənib 12:14 19.09.2020)
Nöqsanlara yol vermiş sahibkarlıq subyektləri barədə İnzibati Xətalar Məcəlləsinə uyğun olaraq tədbirlər görülüb.

BAKI, 19 sentyabr — Sputnik. İqtisadiyyat Nazirliyi sahibkarlıq subyektlərində pandemiya dövrünün zəruri qayda və tələblərinə əməl olunmasına nəzarət məqsədilə monitorinqləri davam etdirir. Bu barədə Sputnik Azərbaycan-a nazirlikdən məlumat daxil olub.

Məlumatda həmçinin deyilir ki, son monitorinq zamanı Bakının Binəqədi rayonunda "Bəyaz gecələr kafesi"ndə, "Lider RA" MMC-yə məxsus "Selofan paket istehsalı obyekti"ndə, Rövşən Rzayevə, Miriş Miriyevə məxsus mağazalarda, Xəzər rayonunda "Qastronom market"də, "Həsən şirniyyat evi"ndə, "Qlobus dəftərxana", "Atlas hovuz inşaat" mağazalarında, Sabunçu rayonunda "İstanbul lahmacun"da, İradə Bədəlovaya məxsus şirniyyat mağazasında, Suraxanı rayonunda "Günəşli kafe"də, Rəhman Qurbanova məxsus kafedə, Yasamal rayonunda "Şah market"də, "Buzov dönər"də, "Nanə restoran"da epidemiya əleyhinə rejimin, sanitariya-gigiyena tələblərinin pozulduğu müəyyən edilib.

Bundan başqa, paytaxtın Qaradağ rayonunda "Qardaşlar kafe"də, Eldar Heydərova, Gülsüm Nəbiyevaya məxsus ərzaq mağazalarında, Nərimanov rayonunda "Yaz geyim", "Armada elektrik" mağazalarında, "Gilyançay", "Pivbar", "Şah ət" iaşə obyektlərində, Nizami rayonunda "Rahat market"də, "Sirab market"də, "İstanbul lahmacun restoran"da, Xətai rayonunda Südabə Zamanovaya, Toğrul Səlimzadəyə, İlyas Quliyevə, Mahir Abbaslıya məxsus pərakəndə ticarət obyektlərində, Səbail rayonunda "Firuzə qızıl mağazası"nda, "Hit woman" mağazasında, "Sunset kafe"də, "Palma kafe"də, "Coffee station" iaşə obyektində, "Meh kafe"də, "Dəli Kür kafesi"ndə, "Uğur kafesi"ndə, "Dəniz restoranı"nda, Nəsimi rayonunda "Kafe Praqa"da, "Saraclı kafe"də, Sumqayıt şəhərində "Zirvə restoranı"nda, "Gəmiqaya restoranı"nda, "Tamet istehsalı sexi"ndə, Abşeron rayonunda "Babək kafesi"ndə, "A klub restoranı"nda, ümumilikdə, 128 obyektdə epidemiya əleyhinə rejimin, sanitariya-gigiyena tələblərinin pozulduğu üzə çıxıb.

Nöqsanlara yol vermiş sahibkarlıq subyektləri barədə İnzibati Xətalar Məcəlləsinə uyğun olaraq tədbirlər görülüb.

3
Azərbaycan Ordusunun rəhbər heyəti ilə xidməti müşavirə

"Ordumuz istənilən təxribatın qarşısını almağa hazırdır" - Müdafiə naziri

1
Azərbaycan Ordusunun xüsusilə ön xətdə yerləşən bölmələrinin döyüş qabiliyyətinin, peşəkarlığının daim artırılması, şəxsi heyətin döyüşə hazırolma səviyyəsinin yüksəldilməsi

Eldar Tanrıverdiyev, Sputnik Azərbaycan

BAKI, 19 sentyabr — Sputnik. Sentyabrın 19-da Müdafiə naziri general-polkovnik Zakir Həsənov Azərbaycan Ordusunun rəhbər heyəti ilə xidməti müşavirə keçirib.

Müdafiə Nazirliyindən Sputnik Azərbaycan-a verilən məlumata görə, əvvəlcə Azərbaycan xalqının ümummilli lideri Heydər Əliyevin və ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad edilib.

Müdafiə naziri bildirib ki, son vaxtlar əldə olunan məlumatlar və kütləvi informasiya vasitələrində yayılan xəbərlər, eləcə də Ermənistanın hərbi-siyasi rəhbərlərinin çıxışlarındakı müharibə ritorikası, səfərbərlik tədbirlərini həyata keçirməsi və bölgəyə kənar qüvvələri cəlb etməsi düşmənin genişmiqyaslı təxribatlar törətmək və vəziyyəti gərginləşdirmək niyyətində olduğunu açıq-aydın göstərir. Bunu nəzərə alaraq sərəncamda olan qüvvə və vasitələrimiz nəinki hər hansı təxribatın qarşısını almağa, hətta sərt qabaqlayıcı tədbirlərin görülməsinə tam hazır olmalıdır. Bu məqsədlə kəşfiyyat fəaliyyətinə, döyüş təminatına xüsusi diqqət yetirilməli, bütün istiqamətlərdə mütəşəkkil addımlar atılmalıdır.

Azərbaycan Ordusunun xüsusilə ön xətdə yerləşən bölmələrinin döyüş qabiliyyətinin, peşəkarlığının daim artırılması, şəxsi heyətin döyüşə hazırolma səviyyəsinin yüksəldilməsi, işğal olunmuş torpaqların azad edilməsinə yönələn təlim və məşqlərin keyfiyyətinə nəzarət gücləndirilməlidir.

Müdafiə naziri Azərbaycan Ordusunda silah, döyüş və xüsusi texnikanın istismarının qış mövsümünə keçirilməsi, qışa hazırlıq prosesinin effektivliyi və vaxtında yekunlaşdırılması, bölmələrin hərtərəfli təminatı, hərbi qulluqçuların sağlamlığına, eləcə də COVID-19 pandemiyası ilə mübarizə tədbirlərinə xüsusi diqqət yetirilməsi barədə vəzifəli şəxslərə tapşırıqlar verib.

Sonda general-polkovnik Z.Həsənov fəaliyyət planına uyğun olaraq döyüş hesabatlarının və səfərbərlik ehtiyatlarının müvafiq qurumlarla dəqiqləşdirilməsi və ehtiyatda olan hərbi vəzifəlilər ilə müxtəlif ixtisaslar üzrə toplanışların, çöl çıxışlarının və döyüş hazırlığı məşğələlərinin keçirilməsinə hazırlıqla bağlı göstərişlər verib.

1