Yeni doğulmuş körpə, arxiv şəkli

Azərbaycanda yeni doğulmuşun üzərində unikal əməliyyat

216
Çəkisi 3,5 kq olan yeni doğulmuş körpədə mürəkkəb ürək qüsuru əməliyyat edilərək uğurla aradan qaldırılıb.

BAKI, 27 avqust — Sputnik. Azərbaycan Ürək və Damar Cərrahiyyəsi Cəmiyyətinin sədri, Mərkəzi Klinik Xəstəxananın Baş həkimi, ürək-damar cərrahı Prof. Dr. Kamran Musayev və komandası tərəfindən çəkisi 3,5 kq olan yeni doğulmuş körpədə mürəkkəb ürək qüsuru əməliyyat edilərək uğurla aradan qaldırılıb. Əməliyyatdan bir həftə sonra körpə evə yazılıb.

Sputnik Azərbaycan-ın məlumatına görə, bu barədə Prof.Dr.K.Musayevin özü məlumat verib: “Ürək cərrahiyyəsində məşğul olduğumuz problemlərdən biri də anadangəlmə ürək qüsurları ilə bağlıdır. Anadangəlmə ürək qüsurlarının müalicəsi cərrahi metodlarla yerinə yetirilir. Yenidoğulmuş və çəkisi cəmi 3.5 kq olan Atilla balamız da bu günlərdə bizə mürəkkəb anadangəlmə ürək qüsuru ilə müraciət edib. Şikayətləri ciddi göyərmə, qaralma və təngnəfəslikdən idi. Apardığımız müayinələrin nəticəsində “Böyük Arteriyaların Transpozisiyası” adlanan mürəkkəb ürək qüsurunun olduğu təsdiqləndi. Yəni normal anatomiyanın tam tərsinə, ürəyin sağından çıxmalı olan böyük damar (ağciyər arteriyası) soldan, ürəyin solundan çıxmalı olan böyük damar (aorta) isə sağdan çıxırdı. Eyni zamanda tac damarlarında da nadir anomaliya mövcud idi. Bütün tac damarları bir mənbədən çıxırdı, elmi dildə buna tək koronar arteriya deyilir. Lazımi hazırlıq proseduralarından sonra körpəmizi təcili əməliyyata götürdük. Çünki körpənin oksigen saturasiyası 30-40%-ə qədər azalırdı. 5 saat çəkən uğurlu əməliyyatla körpənin ürəyindəki problem aradan qaldırıldı. Jaten əməliyyatı və ya arterial dəyişdirmə əməliyyatı adlandığımız cərrahi prosedur ilə həm böyük damarlar normal yerinə qaytarıldı, həm də tac arteriya normal yerinə reimplantasiya edildi. Əməliyyatdan sonrakı gedişatda problem yaşamadığımız xəstəni artıq evə yazdıq. Bu əməliyyatın uğurla həyata keçirilməsində ürək-damar cərrahları ilə yanaşı, uşaq kardioloqları, anesteziloq-reanimatoloqlar, neonatoloqlar birgə çalışırıq. Onların hamısına minnətdarlığımı bildiriəm. Onu da qeyd etmək istəyirəm ki, xəstəmiz icbari sığortanın göndərişi ilə bizə yönləndirilmişdi. Fürsətdən istifadə edərək, İcbari Tibbi Sığorta üzrə Dövlət Agentliyinə də bu cür ağır patologiyaların müalicəsinə verdiyi dəstəyə görə təşəkkürümü bildirirəm. Ümumiyyətlə, düşünürəm ki, körpələrdə Jaten əməliyyatı kimi mürəkkəb əməliyyatların ölkəmizdə milli kadrlar tərəfindən icra olunması, səhiyyəmizin və ürək-damar cərrahiyyəsinin inkişafını göstərən ən yaxşı göstəricidir.”

© Photo : Courtesy of Kamran Musayev
Həkim Kamran Musayev qucağında əməliyyat olunmuş körpəni tutur

Anadangəlmə ürək qüsuru ilə doğulan uşaqların sonrakı ömrünü sağlam davam etdirə bilməsi üçün erkən diaqnostikanın və müdaxilənin çox vacib olduğunu qeyd edən Prof. Dr. Kamran Musayev, bu zaman valideynlərin daha diqqətli olmasının əhəmiyyətinə diqqət çəkib.  “Bizə çox məlum olmayan səbəblərə görə, ana bətnində inkişafın düzgün getməməsi nəticəsində ürəyin quruluşunda anormallıq əmələ gəlir. Anadangəlmə ürək qüsurları əsasən iki qrupa bölünür: asiyanotik (ağ qüsurlar) və siyanotik (göy qüsurlar). Ölkəmizdə də ürək qüsuru ilə uşağı doğulan ailələr var və təəssüf ki, bəzən bu problemin həlli olmadığı fikirləşilir. Halbuki, dünyada və Azərbaycanda anadangəlmə ürək qüsurlarının demək olar ki, hamısı korrektiv əməliyyatlarla müalicə oluna bilir. Bu baxımdan valideynlər çox diqqətli olmalı, uşaqlarında ürək qüsuru olduğunu bilən kimi (göyərmə, tez yorulma, təngənəfəslik, tez-tez ağciyər infeksiyası keçirməsi, ümumi inkişafdan geri qalma və s.) həkimə müraciət etməli və uşaqlarını lazımi müayinələrdən keçirməlidirlər.” 

Qeyd edək ki, ürək-damar cərrahiyyəsinin bu günkü imkanları ilə cərrahi kömək göstərilə bilinməyən ürək qüsuru çox nadirdir. Xəstələr bu əməliyyatlardan sonra normal insan kimi həyatlarına davam edirlər.

https://audcc.org.az/wp-content/uploads/2020/08/IMG_7416-1.jpg

216
Türkiyə Prezidenti Rəcəb Tayyib Ərdoğan koronavirusdan peyvənd vurdurur

Ərdoğan koronavirus peyvəndindən sonra: "Sapsağlamam"

8
(Yenilənib 00:05 16.01.2021)
Türkiyə Prezidentinə yanvarın 14-də Çinin "Sinovac" şirkətinin istehsalı olan "CoronaVac" vaksini vurulub.

BAKI, 16 yanvar — Sputnik. Bu ana qədər hər hansı bir yan təsiri olmayıb. Sputnik Azərbaycan "Hurriyet" nəşrinə istinadən xəbər verir ki, bunu Türkiyə Prezidenti Rəcəb Tayyib Ərdoğan jurnalistlərə açıqlamasında bildirib.

"Bu ana qədər hər hansı bir yan təsiri olmayıb. Sapsağlamam. 28 gün sonra ikinci iynəmizi vurduracağıq", - deyə Ərdoğan qeyd edib.

Qeyd edək ki, Türkiyə Prezidenti Rəcəb Tayyib Ərdoğan canlı yayımda koronavirusa qarşı peyvənd edilib.

Türkiyə Prezidentinə Çinin "Sinovac" şirkətinin istehsalı olan "CoronaVac" vaksini vurulub.

8
Pyotr Velikiy ağır atom raket kreyseri, arxiv şəkli

Qərb onu əsas təhdid sayır: Rusiya donanmasının flaqmanı dəyişir

5
Modernləşdirməyə qədər “Admiral Naximov” kreyseri “Fort” S-300F uzun mənzilli hava müdafiə sistemi ilə təchiz olunmuşdu, indi isə gəmidə hərbi-dəniz müdafiəsinin daha təkmil variantı olan S-400 kompleksi qurulacaq.

BAKI, 15 yanvar — Sputnik, Andrey Kots. Yeni raketlər, müasir gövdə avadanlıqları, misilsiz döyüş imkanları – Rusiya Hərbi Dəniz Qüvvələrinin flaqmanı mövqeyində "Pyotr Velikiy" kreyserinin yerini 1144 "Orlan" layihəsinin "Admiral Naximov" ağır nüvə raket kreyseri tutacaq. Bunun 2022-ci ildə baş verəcəyi gözlənilir. Modernləşdirilmiş gəminin donanmanı necə gücləndirəcəyi haqqında - RİA Novosti-nin növbəti materialında.

Birinci dərəcəli gəmilər

1144 "Orlan" layihəsinin kreyserləri təyyarə gəmilərindən sonra dünyanın ən böyük hərbi gəmiləri hesab olunur. Tonnajı – 25,8 min ton, uzunluğu - 250 metr, eni - 28,5 metrdir, heyəti - 760 nəfərdən ibarətdir.

Rusiyanın bu tipli iki vımpeli var – onlardan ikincisi olan "Pyotr Velikiy" Şimal donanmasının tərkibində fəaliyyət göstərir, lakin "Naximov" işə başlayan kimi modernləşdirməyə göndəriləcək. Hər iki kreyser, necə deyərlər, təpədən dırnağa kimi silahlanmış və istənilən hədəfi məhv etməyə qadir ağır nüvə gəmiləridir.

Standart dəstə – "Qranit" 20 P-700 gəmi əleyhinə raketləri, "Osa-M" zenit raket kompleksləri, "Kinjal" və uzaq mənzilli "Fort" S-300F raketləri, "Metel" və "Vodopad" sualtı raket-torpedaları, reaktiv bomba atanlar və avtomatik cüt lüləli AK-130 topu daxildir.

Hərəkət məsafəsi praktik olaraq məhdudlaşmayıb. Kreyserlər Uzaq Şimal şəraitində işləməyə qadirdir və Rusiyanın Arktika bölgəsindəki hərbi mövcudluğunu təmin edə bilər; bir çox analitiklər bu ərazinin yaxın gələcəkdə təbii ehtiyatlar uğrinda potensial döyüş sahəsinə çevriləcəyini istisna etmir.

Bununla belə, gəmilər tədricən köhnəlməyə başlayır. Əgər ötən əsrin 80-ci illərinin sonu, 90-cı illərinin əvvəllərində "Orlan"lar istənilən düşmənə müqavimət göstərə bilirdisə, indi vəziyyət dəyişib. Rusiya Müdafiə Nazirliyi birinci dərəcəli iri hərbi gəmilərin inşası ilə bağlı çətinliklərin olduğunu nəzərə alaraq, mövcud kreyserlərin modernləşdirilməsini, xüsusən də, onların yeni silahlarla təchizatını daha məqsədəuyğun hesab edir.

Hava Hücumundan Müdafiə platforması

"Admiral Naximov" 1999-cu ildə təmirə göndərilib, ancaq faktiki olaraq, kreyser üzərində işə yalnız 2013-cü ildə, nəhayət, müdafiəyə sahəsinə ciddi şəkildə vəsait ayrılandan sonra başlanılıb. Modernləşdirmə işlərinin 2018-ci ilə kimi başa çatdırılması nəzərdə tutulsa da, bu tarix bir neçə dəfə irəli çəkilib. Hələ ötən ilin may ayında Rusiya müdafiə nazirinin müavini Aleksey Krivoruçko məlumat vermişdi ki, ağır kreyser "Zirkon" hipersəsli raketləri ilə təchiz olunacaq ilk hərbi gəmilərdən biridir. Həmin raketlər hədəfə doğru səs sürətindən doqquz dəfə daha böyük sürətlə uçur ki, bu da onları istənilən hava hücumundan müdafiə sistemi üçün toxunulmaz edir. Mənzili 1000 kilometrə yaxındır. Beləliklə, "Zirkon" Amerikanın "Harpun" səsə qədər sürətə malik (130 kilometr mənzilli) gəmi əleyhinə raketlərini praktiki olaraq üstələyir.

"Orlan"lar hər zaman güclü hava hücumundan müdafiə sisteminə görə fərqləniblər. Modernləşdirməyə qədər "Naximov" kreyseri "Fort" S-300F uzun mənzilli hava müdafiə sistemi ilə təchiz olunmuşdu, indi isə gəmidə hərbi-dəniz müdafiəsinin daha təkmil variantı olan S-400 kompleksi qurulacaq.

Müxtəlif növ zenit hərbi sursatları ilə atəşə açan bu kompleks gizli təyyarələri və digər hava hədəflərini, o cümlədən qanadlı və ballistik raketləri tutmağa qadirdir.

40N6 raketi 400 kilometrə qədər məsafədəki obyektləri vura bilir. "Admiral Naximov" gəmisinə 96 ədəd S-400 zenit raket kompleksi buraxılış şaxtasının yerləşdiriləcəyi güman edilir ki, bu da onun bütün dünyada hava hücumundan ən yaxşı qorunan gəmi olmasına gətirib çıxaracaq.

80 oyuq

Bundan başqa, "Kortik" yaxın zonalı hava hücumundan müdafiə sistemi daha müasir "Pantsir-ME", "Osa-M" zenit raketləri isə yeni "Redut" sistemləri ilə əvəz olunacaq.

Bununla belə, modernləşmə müəyyən qədər hücum komplekslərini də əhatə edəcək. "Admiral Naximov" "Zirkon"larla yanaşı, gəmi əleyhinə P-800 raketləri, "Oniks" və 2500 kilometrə qədər mənzilli "Kalibr" qanadlı raketlərlə silahlandırılıcaq. Onların hamısı 80 oyuqlu 3 S14 şaquli buraxılış qurğusundan atılacaq. Bu qurğunu gəmiyə montaj etmək üçün P-700 "Qranit" kompleksinin gəmidən çıxarılması lazım gəlir.

Kreyserin sualtı silahlardan müdafiə sistemi də yenilənəcək. "Admiral Naximov" qısa məsafələrdə torpedalar və sualtı qayıqlardan qoruyan "Paket-NK" kompleksi ilə də təchiz olunacaq. Bu sistemdə iki tip hərbi sursat var: MTT istilik torpedaları və M-15 reaktiv torpeda əleyhinə silahlar.

Birincisi, sualtı qayıqları 600 metrə qədər dərinlikdə 20 kilometrə qədər məsafədə vura bilir, ikincisi isə gəmiyə 1,4 kilometrə qədər və 800 metrədək dərinlikdə hücum edən torpedaları dəf etmək qabiliyyətinə malikdir.

"Paket-NK" kompleksi maksimum dərəcədə avtomatlaşdırılıb, hədəfi müstəqil olaraq aşkarlayır və təsnif edir, hərəkət parametrlərini müəyyənləşdirir, torpeda və ya torpeda əleyhinə hədəf təyinatını verir. Hər iki döyüş sursatı kifayət qədər sürətlidir – 50 dəniz mili (saatda 92 kilometr).

Aydın məsələdir ki, kreyserin elektron "içliyi" ən müasirləri ilə əvəz ediləcək və bu da gəmi heyətinin vəziyyət barədə məlumatlandırılmasını ciddi şəkildə artıracaq, eləcə də təyyarə silahlarından istifadə imkanlarını əhəmiyyətli dərəcədə genişləndirəcək.

Bununla yanaşı, kreyser inkişaf etmiş rabitə və naviqasiya, elektron döyüş sistemləri və üç təkmilləşdirilmiş "Ka-27M" göyərtə helikopterlərindən ibarət hava sistemi ilə təmin ediləcək. Bütün bu vasitələr ekipajın potensial düşmən sualtı qayıqlarını aşkar etməsini xeyli asanlaşdıracaq.

5