Gömrük-keçid məntəqəsi, arxiv şəkli

Sərhədlərin açılması ilə bitmir, gərək bunun fəsadlarına hazır olaq

1308
(Yenilənib 14:29 23.07.2020)
Deputat Arzu Nağıyev: Sərhədi açıb vətəndaşları neytral zonada qoymaq yoluxma sayını daha da artıra bilər.

Zülfiyyə Quluyeva, Sputnik Azərbaycan

BAKI, 23 iyul — Sputnik. Ötən gün Gürcüstan-Azərbaycan sərhədinin birtərəfli qaydada açılacağı barədə məlumatlar yayılıb. Gürcüstan vətəndaşlarının yaxın günlərdə Azərbaycandan qonşu ölkəyə keçmələrinə icazə veriləcəyi bildirilib. Artıq 140 nəfər "Sınıq körpü" sərhəd-keçid məntəqəsinin yaxınlığında toplaşıb. Sputnik Azərbaycan pandemiya dövründə Azərbaycanın hansı qonşu dövlətlərlə sərhədlərini açmasının mümkünlüyünü araşdırıb.

Dövlət Miqrasiya Xidməti yanında İctimai Şurasının sədri, miqrasiya məsələləri üzrə ekspert Azər Allahverənov Sputnik Azərbaycan-a açıqlamasında bildirib ki, Azərbaycan sərhədi birtərəfli açıqdır. Azərbaycan da öz vətəndaşlarını qəbul edir. Həssas təbəqədən olan vətəndaşlarımız quru yolla ölkəmizə sərhəddən keçərək gəlirlər. Amma onlar iki həftə karantində qalırlar: “Bu gün Azərbaycanla sərhəddə minlərlə vətəndaşımız var. Onların hamısının ölkəmizə birdən-birə gəlməsi mümkün deyil. Çünki, həmin şəxslər qaydalara əsasən iki həftə karantində qalmalıdırlar. Bu qədər insana yer çatdırmaq da mümkün deyil. Ona görə də, düşünürəm ki, həmin vətəndaşlarımız hissə-hissə ölkəmizə keçə bilərlər".

Allahverənovun sözlərinə görə, sərhədlərin açılması ikitərəfli razılaşma əsasında olmalıdır: "Azərbaycan tərəfinin digər ölkə ilə sərhədi açması diplomatik razılaşma əsasında həyata keçirilir. Sərhədi açıb vətəndaşları neytral zonada qoymaq yoluxma sayını daha da artıra bilər. Amma test etməklə ola bilər ki, sərhəddə gözləyən vətəndaşlar ölkəmizə, bizdən digər qonşu ölkələrə gedə bilsinlər. Bunun üçün mütləq qonşu ölkə də sərhədi açıb vətəndaşı qəbul etməlidir".

Milli Məclisin deputatı, Azərbaycan-Gürcüstan parlamentlərarası əlaqələr üzrə işçi qrupunun üzvü Arzu Nağıyev Sputnik Azərbaycan-a açıqlamasında bildirib ki, sərhədlərin açılması kortəbii şəkildə baş tuta bilməz. Bu, dövlətin himayəsində həyata keçirilməlidir:

"Sərhəddə gözləyən vətəndaşların hamısını karantinə almaq onları üç dəfə yeməklə, yaşayış yeri ilə təmin etmək elə də asan deyil. Xarici İşlər Nazirliyi əvvəlcə sərhəddə gözləyənlərin siyahısını hazırlamalıdır. Bundan sonra ancaq dövlət qurumlarının nəzarəti altında həmin vətəndaşlar ölkəmizə gətirilə bilər”.

Arzu Nağıyev qeyd edib ki, sərhədləri açmaq üçün hər iki ölkə buna hazır olmalıdır. “Biz sərhədi birtərəfli açmaqla iş düzəlmir. Gərək digər tərəf sərhəddən keçənləri qəbul etsin", - deputat əlavə edib.

1308
Məktəblərin birində, arxiv şəkli

Azərbaycanda koronavirusa yoluxan müəllim şagirdlərin sayı açıqlandı

3
Yanvar ayının 1-də virusa yoluxan şagirdlərin sayı 20 nəfər olubsa, təhsil işçiləri arasında bu rəqəm həmin dövrdə 5 nəfər təşkil edib.

BAKI, 22 yanvar — Sputnik. Azərbaycanda sentyabr ayından bu günədək koronavirusa yoluxmuş müəllim və şagird kontinentinin sayı açıqlanıb. Sputnik Azərbaycan bildirir ki, bu barədə təhsil nazirinin müşaviri Rüstəm Ağayev xüsusi karantin rejimi dövründə təhsil müəssisələrinin fəaliyyətinin təşkilinə dair keçirilən brifinqdə məlumat verib. O bildirib ki, sentyabr ayından indiyədək 14 758 nəfər şagird koronavirusa yoluxub. Təhsil işçiləri arasında yoluxma sayı isə 7090 olub. I-IV siniflərin arasında yoluxan şagirdlərin sayı 2246 idi. Bu da ümumi virusa yoluxan şagirdlərin cəmi 15%-dir. V-IX siniflərdə 4411, X-XI 7525 olub. Bu da ümumi şagirdlərin 51%-dir" .

Onun sözlərinə görə, yanvar ayının 1-də virusa yoluxan şagirdlərin sayı 20 nəfər olubsa, təhsil işçiləri arasında bu rəqəm həmin dövrdə 5 nəfər təşkil edib.

3
Teqlər:
Koronavirus, şagirdlər, müəllimlər
Mövzu:
Azərbaycanda koronavirus: son xəbərlər

Şuşa Azərbaycanın ümumi enerji sisteminə qoşulur - VİDEO

5
Yaxın vaxtlarda işğaldan azad edilmiş Füzuli, Cəbrayıl, Qubadlı və Zəngilan rayonlarında da 110 kilovoltluq yeni yarımstansiyaların inşasına başlanılacaq

BAKI, 22 yanvar — Sputnik. Şuşa şəhərinin Azərbaycanın ümumi enerji sisteminə qoşulması, şəhərin etibarlı, dayanıqlı və fasiləsiz elektrik enerjisi ilə təchiz edilməsi üçün "Azərenerji" Şuşada 110/35/10 kilovoltluq yeni yarımstansiya tikir.

Sputnik Azərbaycan-ın məlumatına görə, Şuşa şəhərinin girişində müasir avadanlıqlarla təchiz edilərək tikilən yeni yarımstansiya məsafədən idarəolunan SCADA Dispetçer İdarəetmə sisteminə qoşulacaq. Burada 110 kilovoltluq açıq, 35 və 10 kilovoltluq qapalı paylayıcı qurğular yaradılır. Şuşanın milli ornamentləri qorunmaqla müasir üslubda inşa ediləсək yarımstansiyanın idarəetmə binasında bütün parametrlər nəzərə alınıb. Havanın dumanlı, qarlı və şaxtalı olmasına baxmayaraq işlər sürətlə davam etdirilir.

Qeyd edək ki, işğaldan azad olunan ərazilərin böyük hissəsinin, o cümlədən "Şuşa" yarımstansiyasının Azərbaycanın ümumi enerji sisteminə qoşulması üçün Füzulidəki "Şükürbəyli" yarımstansiyası genişləndirilərək tam yenidən qurulur və yarımstansiyaya İmişlidən 110 kilovoltluq 51 km məsafədə yeni xətt gətirilir. Ən əsası isə Füzulidən Şuşaya 75 km məsafədə 110 kilovoltluq ikidövrəli "Şuşa-1", "Şuşa-2" hava elektrik xətləri çəkilir. Artıq hava elektrik verilişi xəttində 70 faiz işlər görülüb, yaxın müddətdə işlər yekunlaşacaq. Füzulinin Şükürbəyli, Xocavəndin Böyüktağlar, Şuşanın Daşaltı kəndindən keçən yüksəkgərginlikli hava xətti ən çətin dağlıq, meşəlik relyefdə, qarlı, dumanlı, yağışlı hava şəraitində növbəli iş prinsipi ilə həyata keçirilir.

Onu da qeyd edək ki, yaxın vaxtlarda işğaldan azad edilmiş Füzuli, Cəbrayıl, Qubadlı və Zəngilan rayonlarında da 110 kilovoltluq yeni yarımstansiyaların inşasına başlanılacaq.

5
Teqlər:
yarımstansiya, sistem, enerji, Azərbaycan, Qarabağ, Şuşa