Beyləqan rayonunun girişi, arxiv şəkli

Kosmos əsrində marşrut dərdi: Şəhəri gəzməkdən ayaqları qabar olub

1218
(Yenilənib 14:49 11.12.2019)
Bəzi rayonlarımızda avtobusların fəaliyyəti yaxşı təşkil olunsa da, Beyləqan heç bir zaman bu xidmətin üzünü belə görməyib

Leyla Abdullayeva, Sputnik Azərbaycan

BAKI, 11 dekabr — Sputnik. Uzun müddətdir ki, Azərbaycanın rayonlarının bir çoxunda Dövlət Avtomobil Nəqliyyatı Xidmətinin (DANX) rəsmi icazəsi əsasında rayondaxili (şəhərdaxili) xətlər üzrə avtobuslar fəaliyyət göstərir. Statistikaya əsasən, rayonlarımızın 90 faizində bu xidmətə rast gəlmək mümkündür.

Rayondaxili avtobusların fəaliyyət göstərməsi əhali tərəfindən yüksək qiymətləndirilir. Bu, həm onların rayonun bir tərəfindən digər tərəfinə tez və asan şəkildə getməsinə, həm də pula qənaət etməsinə səbəb olur.

Bəzi rayonlarımızda bu xidmət yüksək səviyyədə təşkil edilsə də, Beyləqan rayonunda rayondaxili avtobusların fəaliyyəti heç də ürəkaçan deyil. Bununla bağlı rayon sakinləri öz narazılıqlarını Sputnik Azərbaycan-a bildiriblər.

Rayon sakini Günəş Soltanovanın sözlərinə görə, Beyləqan rayonunda rayondaxili avtobuslar heç bir zaman olmayıb: “Artıq 37 ildir ki, bu rayonda yaşayıram. 37 il ərzində rayonumuzda heç vaxt rayondaxili avtobus işləməyib. Qonşu rayonlarımızda rayondaxili marşrutlar müntəzəm şəkildə fəaliyyət göstərir. Biz həmin rayonlara rayondaxili avtobusları olduqları üçün həsəd aparırıq. Bizim rayonumuzun ərazisi kifayət qədər böyükdür – bir başından o biri başına 8-9 kilometrdir. Bununla bağlı ciddi problemimiz var. Rayonun bir hissəsindən o biri aşağı hissəsinə getmək istədikdə ya taksi tutmalıyıq, ya da piyada getmək məcburiyyətində qalırıq”.

Digər sakin Mahir Allahyarov da məsələ ilə bağlı çəkdikləri əziyyətdən danışır.

“Beyləqan sakinlərinin çoxu kənd təsərrüfatı ilə məşğul olur. Bəzən işlə bağlı rayonun bu başından o biri başına getmək lazım olur. Yaxud da, insanlar bazara satmaq üçün məhsullar aparır. Təsəvvür edin ki, rayon sakini ehtiyac ucbatından 2-3 toyuğu satmağa gətirir. Həmin toyuqları 15 manata satır və bunun da 4 manatını taksiyə verir. Özünə nə qalır? Amma rayondaxili avtobuslar fəaliyyət göstərsə xərci az çıxar. Bu, digər sahələrdə məşğul olan insanlara da sərf edər. Bunun qocası da var, xəstəsi də, uşaqlısı da. Çox xahiş edirik ki, bunları nəzərə alıb bizə rayondaxili sərnişin avtobusları təşkil etsinlər”, – deyə rayon sakini bildirir.

Hər səhər 2 övladını qışın soyuğunda, yayın istisində məktəbə piyada aparan məcburi köçkün Aygün Süleymanova çəkdikləri əziyyətdən dad çəkir: “İnanın ki, haradan başlayıb, harada qurtaracağımı bilmirəm. Neçə ildir ki, övladlarımı soyuqda, istidə məktəbə piyada aparmaq məcburiyyətindəyəm. Biz məcburi köçkünük. Bizdə imkan haradandır ki, hər gün uşaqlarımı taksi ilə məktəbə aparım? Uşaqlar 2 növbədə oxuyurlar. Mən onları aparıb gətirincə çox əziyyət çəkirəm. Yolların soyuğundan qış aylarında övladlarımın canından xəstəlik çıxmır. Boran, qar, yağış olanda ümumiyyətlə məktəb görmürlər. Rayondaxili avtobuslar işləsə, asanlıqla övladlarımı məktəbə aparıb-gətirərəm. Həm əziyyətdən qurtararıq, həm də canları sağlam olar”.

Elçin Əzimov adlı sakin rayonun müxtəlif hissələrində yerləşən idarələrə hər gün ayaqla  gedib-gəlməyin mümkünsüzlüyündən də söhbət açır: “Rayonumuzun ərazisi böyük olduğundan bəzi idarələr və müəssisələr rayonun müxtəlif ərazilərində yerləşdirilib. Məsələn “Azərsu” ASC-nin binası rayonun yuxarı hissəsində, bazar və xəstəxana rayonun mərkəzinə yaxın hissəsində, Kənd Təsərrüfatı idarəsi ,”Azəriqaz” İB-nin binası və başqa idarələr rayonun aşağı – yəni çıxacağında yerləşir. 

Rayonun yuxarı hissəsindən aşağı hissəsində yerləşən idarələrə, ya da əksinə işə gedən insanlar hər gün ayaqla bu yolu necə gedə bilərlər? Bunun üçün ya şəxsi avtomobilin olmalı, ya da ki, hər gün 4-5 manatından keçməlisən. İnsan aylıq 250 manat məvacib alıb, onun 120-150 manatını taksiyə verəcəksə, nəyə görə işləməlidir?”

Məsələ ilə bağlı Dövlət Avtomobil Nəqliyyatı Xidmətinin (DANX) mətbuat katibi Nuridə Allahyarova ilə telefon əlaqəsi saxladıq. Nuridə Allahyarova həqiqətən Beyləqanda rayondaxili marşrutun heç vaxt olmadığını qeyd etdi: “Bizə bu barədə heç vaxt şikayət daxil olmayıb. Rayonda 7 kəndə marşrut xətti işləyir. Lakin rayondaxili marşrut heç vaxt olmayıb. Rayon sakinlərinə bildirmək istəyirəm ki, bununla bağlı Dövlət Avtomobil Nəqliyyatı Xidmətinin (DANX) Yevlax regional şöbəsinə rəsmi müraciət etsinlər. Oradan bildiriş gələn zaman bu məsələnin həllini tapmağa çalışacağıq”.

1218
Bakı məktəblərin birində, arxiv şəkli

Orta məktəbi vaxtından əvvəl bitirmək istəyənlər üçün imkan

2
(Yenilənib 17:57 18.01.2021)
İstedadlı şagirdlər üçün təşkil olunan eksternat imtahanı Təhsil Nazirliyinin müvafiq əmri ilə təsdiq edilmiş "Ümumi təhsil pilləsinin ibtidai, ümumi orta və tam orta təhsil səviyyələrinin vaxtından əvvəl bitirilməsi Qaydaları" əsasında keçirilir.

BAKI, 18 yanvar — Sputnik. Ümumi təhsilin hər hansı səviyyəsini vaxtından əvvəl bitirmək istəyən istedadlı şagirdlər üçün eksternat qaydasında imtahan keçiriləcək. Sputnik Azərbaycan-ın məlumatına görə, Bakı Şəhəri üzrə Təhsil İdarəsinin (BŞTİ) əmrinə əsasən, eksternat imtahanı yanvarın 19-da təşkil olunacaq.

Qeydiyyatdan keçmiş məktəblilərin biliyi test imtahanı vasitəsilə yoxlanılacaq. İmtahan hər fəndən 10 sual olmaqla, fənn proqramlarına uyğun hazırlanacaq və nəticələr müvafiq komissiya tərəfindən 100 ballıq şkala üzrə qiymətləndiriləcək. Test imtahanından uğurla keçən istedadlı şagirdlər müsahibəyə cəlb olunacaqlar.

Qeyd edək ki, istedadlı şagirdlər üçün təşkil olunan eksternat imtahanı Təhsil Nazirliyinin müvafiq əmri ilə təsdiq edilmiş "Ümumi təhsil pilləsinin ibtidai, ümumi orta və tam orta təhsil səviyyələrinin vaxtından əvvəl bitirilməsi Qaydaları" əsasında keçirilir.

2
Uşaqlar, arxiv şəkli

İnsan alverinin hər üç qurbanından biri uşaqdır

4
(Yenilənib 17:58 18.01.2021)
Videoçarxı izləməklə insan alveri cinayətindən zərər çəkmiş şəxslərə yardım məqsədilə fəaliyyət göstərən "qaynar xətt", dünyada insan alverindən gələn gəlirin məbləği və digər detallar barədə məlumatları əldə etmək olar.

BAKI, 18 yanvar — Sputnik. İnsan alveri insan hüquqlarının ciddi pozuntusu və cinayətin ağır formalarından biridir. Həm milli, həm də transmilli cinayət xarakteri daşıyan "insan alveri" istismar məqsədilə insanların cəlb edilməsi, daşınması, hədələyərək, güc tətbiq edərək qorxudulması, oğurlanması, aldadılması kimi üsullarla insana qarşı zorakılıq kimi başa düşülür.

Sputnik Azərbaycan Baş Prokurorluğun məlumatına istinadla xəbər verir ki, aşkar olunan qurbanlar arasında uşaqların faiz nisbəti artmaqdadır: hər üç qurbandan biri uşaqdır.

İnsan alverinə qarşı mübarizə məqsədilə Baş Prokurorluğun Mətbuat xidməti tərəfindən maarifləndirici videoçarx hazırlanıb.

Videoçarxı izləməklə insan alveri cinayətindən zərər çəkmiş şəxslərə yardım məqsədilə fəaliyyət göstərən "Qaynar xətt", dünyada insan alverindən gələn gəlirin məbləği və digər detallar barədə məlumatları əldə etmək olar.

https://www.facebook.com/prokurorluq/videos/118373910083559

4