Bakının mərkəzi küçələrinin birində nəqliyyatın hərəkatı, arxiv şəkli

Bakını “iniltidən” qurtarmaq lazımdır - "Carfree" gəlməsə, vəziyyətimiz daha pis olacaq

1327
(Yenilənib 09:57 29.11.2019)
"Paytaxtda olan hazırkı vəziyyət "carfree" ərazilərinin yaradılmasını tələb edir. Çünki bəzi mərkəzi ərazilərə artıq avtomobillə girmək mümkünsüz hala gəlib" - Hüseyn Abdullayev

Nigar İsgəndərova, Sputnik Azərbaycan

BAKI, 29 noyabr — Sputnik. Proqnozlara görə, yaxın 100 ildə avtomobillər şəhər həyatına dominantlıq edəcək, böyük şəhərlərdə rahat hərəkət, təmiz hava almaq imkanı məhdud olacaq. Artıq Çində və Yaponiyada belə hallarla qarşılaşırlar.

Bu gün dünyanın bir sıra aparıcı ölkələri böyük şəhərlərin mərkəzində avtomobillərin, avtobusların, motosikletlərin hərəkətini məhdudlaşdırmaq üçün müxtəlif layihələr hazırlayırlar. Burada əsas məqsəd avtomobillərin havaya tulladığı zərərli qazların həcmini azaldaraq, ekoloji təmizliyi qorumaq, həm də avtomobil qəzaları və ölümlərin sayını azaltmaqdır. Bu layihə çərçivəsində parkinq yerləri və avtomobil dayanacaqları ortadan qaldırılaraq şəhər yüngülləşdirilir, onları yaşıllıqlar, uşaqlar üçün parklar, oyun meydançaları əvəzləyir. Artıq mürəkkəb infrastruktura malik olan bir sıra şəhərlərdə bu layihə icra olunub. Bu şəhərlər sırasında Norveçin paytaxtı Oslo və İspaniyanın paytaxtı Madridi misal çəkmək olar.

Oslo merinin müavini bildirir ki, onlar bununla həm də əhalinin yenidən küçələrə çıxmasını təmin edəcəklər: "Burada məqsədimiz əslində onu göstərməkdir ki, bizim küçələr heç də avtomobillər üçün deyil, əhalinin rahat gəzməsi üçün nəzərdə tutulub".

Mayis Ağayev: “BNA avtomatlaşdırılmış parklanma sistemi quracaq”>>

Azərbaycanda necə, bu təcrübəni reallaşdırmaq mümkündür? Nəqliyyat məsələləri üzrə ekspert Azər Allahverənov Sputnik Azərbaycan-a açıqlamasında bildirib ki, təkmil şəkildə işləyən ictimai nəqliyyat sektorunda bu cür mexanizmlər tətbiq olunur. Nəticədə ictimai nəqliyyat sektorunda təmsil olunan nəqliyyat növləri bir-birinə inteqrasiya olunur: "Lakin Azərbaycanda bu baş verərsə, nə ola bilər? Əsas yaranan sual budur ki, bir nəfər ünvan başına çatmaq üçün bir neçə nəqliyyat dəyişməlidir, yoxsa bir? Dünyadakı praktikaya görə, əsasən bir, yaxud da iki marşrutdan istifadə etməklə təyinat ünvanına çatmaq effektiv hesab edilir. Lakin bu məsələ mexaniki olaraq həllini tapa bilməyəcək".

"Bunun üçün kompleks yanaşmaya və bir-birinə inteqrasiya olunan nəqliyyat növlərinə ehtiyac var. Bundan başqa, insanlar şəhərə avtomobilsiz daxil olmaq üçün onu mühafizə olunan yerdə saxlamalıdırlar. Bu isə o deməkdir ki, avtomobillərin mühafizəsi üçün də müəyyən yerlər olmalıdır. Bir ünvana çatmaq üçün 3 marşrutun dəyişilməsi isə artıq düzgün deyil", - deyə həmsöhbətimiz bildirir.

O qeyd edir ki, bir-birinə inteqrasiya olunmuş ictimai nəqliyyat sektoru da əhalinin cibinə uyğun, onlar üçün sərfəli olmalıdır: "Bundan başqa, nəqliyyatlararası vaxt itkisi də minimuma endirilməlidir".

Ekspert Hüseyn Abdullayev də bildirib ki, bu gün bir çox ölkələr avtomobil istifadəsini azaltmağı qarşılarına məqsəd qoyublar: "Bunun üçün həmin ölkələr yeni termin yaradıblar – piyadalaşma, yaxud da ingiliscə desək, "carfree" ərazilər formalaşdırırlar. Bakıda da bunu etmək mümkündür. Paytaxtda olan hazırkı vəziyyət "carfree" ərazilərinin yaradılmasını tələb edir. Çünki bəzi mərkəzi ərazilərə artıq avtomobillə girmək mümkünsüz hala gəlib. Mərkəzi ərazilərdə piyadalaşma olsa, həmin ərazilərin potensialını artırmaq olar. Təbii ki, bunun üçün ictimai nəqliyyat daha effektiv işləməlidir. Belə olan halda çox adam avtomobildən imtina edərək ictimai nəqliyyatdan istifadə edəcək. Əks halda isə əhalinin mobilliyi azalacaq. Bunun üçün tramvayların yenidən şəhərə qayıtması da müsbət ideya kimi dəyərləndirilə bilər".

Qeyd edək ki, paytaxtda 80 ilə yaxın tarixi olan tramvay xətlərinin yenidən bərpası nəzərdə tutulur. Məlumatlara görə, artıq Bakıda ictimai nəqliyyatda tramvay və elektriklə çalışan avtobusların istifadəyə verilməsi ilə bağlı müzakirələr aparılır.

1327
Elektrik yarımstansiyası, arxiv şəkli

Azərbaycanda yeni istilik elektrik stansiyalarının tikilməsinə ehtiyac yaranıb

35
(Yenilənib 00:22 21.10.2020)
"Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

BAKI, 21 oktyabr — Sputnik. "Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

Sputnik Azərbaycan xəbər verir ki, bunu Energetika naziri Pərviz Şahbazov 20 oktyabr - Azərbaycan energetiklərinin peşə bayramı günü münasibətilə rəsmi mətbuatda dərc etdirdiyi məqalədə bildirib.

Onun sözlərinə görə, bu ilin 9 ayı ərzində elektrik enerjisinin istehsalı ötən ilin müvafiq dövrü ilə müqayisədə 0,8% azalaraq, 19,4 milyard kVt·st təşkil edib.

P.Şahbazov bildirib ki, qarşıdakı illərdə isə elektrik enerjisinə tələbat və istehsal həcmləri ilə bağlı dinamikada əhəmiyyətli dərəcədə artım gözlənilir:

"2025-ci ilə qədər ölkəmizdə elektrik enerjisinə tələbatın 25,5 milyard kVt·st-a qədər artacağı, ixrac da nəzərə alınmaqla elektrik enerjisi istehsalının isə ötən ilə nisbətən 15% artımla 30 milyard kVt·st-a çatacağı proqnozlaşdırılır. Bu istehsal həcmlərinin bir qismi ötən il istismara verilmiş, qoyuluş gücü 409 МVt olan "Şimal-2" elektrik stansiyası, bu il təməli qoyulmuş və 2022-ci ildə istifadəyə verilməsi planlaşdırılan 385 МVt gücündə "Qobu" elektrik stansiyası hesabına əldə ediləcək".

Nazirin fikrincə, həmçinin bu prosesdə "Azərenerji" ASC-nin istehsal güclərinin optimallaşdırılması və bərpası nəticəsində yenidən istismara cəlb edilən 1300 MVt imkan gücündən istifadə ediləcək: "Eyni zamanda, təhlillər göstərir ki, tələbatın tam qarşılanması üçün yeni istilik elektrik stansiyalarının tikilməsinə də ehtiyac var".

35
Su təhcizatı işləri, arxiv şəkli

Həm Azərbaycanın, həm İranın arzusu reallaşır - "Xudafərin" hidroqovşağından şad xəbər

69
(Yenilənib 23:50 20.10.2020)
Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir.

BAKI, 20 oktyabr — Sputnik. "Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir.

Sputnik Azərbaycan xəbər verir ki, bunu Energetika naziri Pərviz Şahbazov deyib.

O vurğulayıb ki, Azərbaycan, İran və Rusiyanın enerji sistemlərinin əlaqələndirilməsi üzrə proses davam edir: "Hər üç ölkənin müvafiq enerji şirkətlərinin razılığı ilə müəyyən edilmiş məsləhətçi şirkət tərəfindən layihənin texniki-iqtisadi əsaslandırılmasının hazırlanmasına başlanılıb. Eyni zamanda, "Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində "Xudafərin" və "Qız Qalası" hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında Saziş"dən irəli gələn vəzifələr də yerinə yetirilməkdədir.

"Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir. "Xudafərin" hidroqovşağı üzrə tikinti xərclərinin və dəymiş ziyanın hesablanması, habelə su elektrik stansiyalarının qurğu və avadanlıqlarının alınması və quraşdırılması məsələlərinə baxılır. 1,6 milyard kubmetrdən çox sututumuna malik bu hidroqovşaqlar və ümumi qoyuluş gücü 280 meqavat gücündə olan bu stansiyalar Araz çayının su və enerji ehtiyatlarından hər iki tərəfin birgə istifadəsinə imkanlar yaradır".

O bildirib ki, bu layihələr iqtisadi və strateji aspektdən ölkəmiz üçün çox əhəmiyyətlidir:

"Bu layihələrin reallaşması Azərbaycana illik 368 milyon kilovat/saat elektrik enerjisi istehsalı, mövcud 252 min hektar torpaq sahəsi üzrə suvarmanın yaxşılaşdırılması və 8 min hektar yeni əkin sahələrinin suvarılması imkanı yaradacaq. Azərbaycanın suverenliyi, ərazi bütövlüyü əsas götürülməklə 2016-cı ildə bu layihələr üzrə sazişin imzalanması işğal olunmuş ərazilərimizin geri qaytarılacağına böyük inamın ifadəsi idi".

"Bu günlərdə müzəffər Ordumuzun Cəbrayıl şəhəri və rayonunun bıra sıra kəndlərini azad etməsi də Azərbaycan Prezidentinin uzaqgörən siyasətini, həmin ərazilərin bərpası zamanı bu hidroqovşaqlar və stansiyaların istifadəsinə əvvəlcədən hazırlıqla bağlı strateji baxışlarını bir daha nümayiş etdirdi. Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir", - deyə nazir bildirib.

69
Əlaqədar
İranla Azərbaycan arasında tarixi "Xudafərin Sazişi" imzalandı
İlham Əliyev: Xudafərin körpüsünün üzərində Azərbaycan bayrağı qaldırıldı
Nazirlikdən sərhədlərimizi qoruyanlara Xudafərin naminə zirehli hədiyyə - FOTO
Xudafərin körpüsünün üzərində Azərbaycan bayrağı - VİDEO
Ermənistan Xudafərin istiqamətində əməliyyat keçirməyə qadir deyil - MN