Müğənni Vüqar Muradov, arxiv şəkli

Tanınmış müğənni yerlilərindən incidi: “Bir daha Qax barədə danışmayacağam”

1445
(Yenilənib 20:02 05.09.2019)
“Ona görə də, düşündüm ki, daha bəsdir və “Qax” mahnımı oxumaqdan imtina etdim”

Leyla Abdullayeva, Sputnik Azərbaycan

BAKI, 5 sentyabr — Sputnik. "Yeni ulduz" müsabiqəsində qalib gələndən sonra şəxsi həyatındakı qalmaqallarla daha da məşhurlaşmış müğənni Vüqar Muradov doğulduğu Qax rayonuna həsr etdiyi mahnıdan imtina edib. O, bu barədə Facebook səhifəsində məlumat verib.

Sputnik Azərbaycan-a açıqlamasında isə Muradov bu addımının səbəblərinə aydınlıq gətirib. 

“Mən tanınmağa başladığım 2007-ci ildən indiyə qədər hər dəfə efirə çıxanda Qax və qaxlılar haqqında danışmışam. Minlərlə insana Qaxı tanıtmışam və onları ölkəmizin bu dilbər guşəsini görməyə cəlb etmişəm. Eyni zamanda Qaxda saysız-hesabsız verilişlər çəkdirmişəm. İnsanlarda Qax haqqında müsbət təəssürat yaratmışam. Ən reytinqli televiziya verilişlərinə aşpaz gətirib Qax mətbəxinə məxsus xörəkləri bişirtdirib reklam etmişəm. Hətta elə olub ki, yemək proqramlarında özüm Qaxın məşhur sürhüllü yeməyini bişirmişəm. Düşünürəm ki, doğulub-böyüdüyüm torpaqla bağlı üzərimə düşən borcu artıqlamasıyla yerinə yetirmişəm. Amma təəssüflə bildirirəm ki, 12 ildir "Yeni ulduz" müsabiqəsində yerlilərim tərəfindən mənə göndərilən SMS-lər hələ də mənim və ailəmin başına qaxılır” – deyən müğənni həmyerlilərinin onu toylara aparmamasından, xeyri başqalarına verməsindən də gileylənib.

“Kifayət qədər adamın toyunda təmənnasız oxumuşam. Nadir hallarda, demək olar, ildə bir dəfə Qax toyunda oxuyaram, orda da qonorarın yarısını alıram ki, yerlilərimə maddi ziyan dəyməsin. Lakin onlar xeyri mənə yox, başqalarına verirlər. Biz özümüzü sevmirik və bundan da bezmirik. Başqalarının paxıllığını çəkməkdən, qeybət eləməkdən, irəli gedənə şəbədə qoşmaqdan bezmədik” - deyə müğənni yerlilərinin hər fürsətdə onu aşağıladığını, ona söz qoşduğunu bildirib.

İlk dəfə Qax ləhcəsində qaxlılara mahnı qoşduğunu xatırladan müğənni, bunu rayonun reklamı üçün etdiyini də etiraf edib: “Ölkəmizdə ilk dəfə bir rayonun ləhcəsində mahnı yazılıb ki, onu da mən yazmışam. Bu mahnı bütün radiolarda səslənib. Bu elə Qaxın reklamıdır. 

Amma bu mahnımı da bəyənməyənləri, ağız büzənləri, özlərini “cool” göstərməyə çalışanları gördüm. Hətta bəzi qaxlılar mənim Rusiyada döyülməyimə belə sevindilər. Qax və qaxlılar üçün bu qədər iş görsəm də, ona dəyər verən olmadı. Əksinə, yerlilərimdən hörmətsizlik gördüm. Ona görə də, düşündüm ki, daha bəsdir və “Qax” mahnımı oxumaqdan imtina etdim”.

Müğənni bir də heç vaxt heç bir verilişin efirində Qaxla bağlı danışmayacağına and içib: “Mən söz vermişəm ki, bir daha efirdə Qax və qaxlılar barədə danışmayacağam. Fikrimə sayğı duyub-duymamaq tamaşaçılarımın və yerlilərimin öz işidir. Buna baxmayaraq, Qaxı və yaxşı qaxlıları dəlicəsinə sevirəm və hər şeyə rəğmən də sevməkdə davam edəcəyəm”.

1445

İlham Əliyev: "Milli iradəmizin zəfər çaldığı gün - 20 Yanvar"

16
1990-cı il yanvarın 19-dan 20-nə keçən gecə Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə qoşun hissələri Bakıya və Azərbaycanın bir neçə rayonuna yeridilib.

BAKI, 20 yanvar - Sputnik. Prezident İlham Əliyevin "Facebook" səhifəsində 20 Yanvar faciəsinin 31-ci ildönümü ilə əlaqədar paylaşım edilib.

Sputnik Azərbaycan-ın məlumatına görə, paylaşımda deyilir: "Milli iradəmizin zəfər çaldığı gün - 20 Yanvar".

16
Аллея Шехидов в Баку

20 Yanvar faciəsindən 31 il ötür

9
(Yenilənib 00:10 20.01.2021)
Yanvar faciəsi ümumxalq hüznü olmaqla yanaşı, həm də Azərbaycan xalqının iradəsinin sarsılmazlığını, mətinliyini göstərdi.

BAKI, 20 yanvar - Sputnik. Azərbaycanda 1990-cı il yanvarın 20-də baş vermiş faciədən 31 il keçir.

1990-cı il yanvarın 19-dan 20-nə keçən gecə Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilib. Sovet ordusunun xüsusi təyinatlı dəstələrinin və daxili qoşunların iri kontingentinin Bakını zəbt etməsi xüsusi qəddarlıq və misli görünməmiş vəhşiliklə müşayiət edilib. Fövqəladə vəziyyətin tətbiqi əhaliyə elan olunanadək hərbçilər 82 nəfəri amansızcasına qətlə yetirib, 20 nəfəri ölümcül yaralayıb. Fövqəladə vəziyyət elan edildikdən sonra isə bir neçə gün ərzində Bakı şəhərində 21 nəfər öldürülüb. Fövqəladə vəziyyətin elan olunmadığı rayon və şəhərlərdə - yanvarın 25-də Neftçalada və yanvarın 26-da Lənkəranda daha 8 nəfər qətlə yetirilib.

Beləliklə, qoşunların qanunsuz yeridilməsi nəticəsində Bakıda və ətraf rayonlarında 131 nəfər öldürülüb, 744 nəfər yaralanıb. Həlak olanların arasında qadınlar, uşaqlar və qocalar, həmçinin təcili yardım işçiləri və milis nəfərləri olub.

Qoşunların qanunsuz yeridilməsi həm də dinc əhali arasında kütləvi həbslərlə müşayiət olunub. Əməliyyatların gedişi boyunca paytaxt Bakı və respublikanın digər şəhər və rayonlarından 841 nəfər qanunsuz həbs edilib, onlardan 112-si SSRİ-nin müxtəlif şəhərlərindəki həbsxanalara göndərilib. Hərbi qulluqçular tərəfindən 200 evə, 80 avtomobilə, o cümlədən təcili yardım maşınlarına atəş açılıb, yandırıcı güllələrin törətdiyi yanğınlar nəticəsində külli miqdarda dövlət və şəxsi əmlak məhv edilib.

1990-cı il yanvar qurbanları simvolik olaraq “20 Yanvar şəhidi” adlanır. Ümumilikdə, Azərbaycanın 150 nəfər “20 Yanvar şəhidi” var.

Yanvar faciəsi ümumxalq hüznü olmaqla yanaşı, həm də Azərbaycan xalqının iradəsinin sarsılmazlığını, mətinliyini göstərdi. Sovet ordusunun amansızlığına və qəddarlığına, Bakıda fövqəladə vəziyyət tətbiq edilməsinə baxmayaraq, Azərbaycan xalqı yanvarın 22-də paytaxtın “Azadlıq” meydanında 20 Yanvar şəhidlərinin dəfni ilə əlaqədar matəm yürüşü keçirib. Şəhidlər xiyabanındakı dəfn mərasimində 2 milyona yaxın insan iştirak edib. Xalqın tələbi ilə Azərbaycan SSR Ali Sovetinin fövqəladə sessiyası çağırılıb və Bakı şəhərində fövqəladə vəziyyətin ləğv edilməsi haqqında qərar qəbul edilib, lakin xalqın qəzəbindən qorxuya düşən respublikanın əksər rəhbər vəzifəli şəxsləri həmin sessiyada iştirak etməyib.

1994-cü il martın 29-da 20 Yanvar faciəsinə ali qanunvericilik orqanı – Milli Məclis səviyyəsində ilk dəfə hüquqi-siyasi qiymət verilib.

O vaxtdan 20 yanvar Azərbaycanda hər il Ümumxalq hüzn günü kimi qeyd olunur. Hər il yanvarın 20-də rəsmi şəxslər, sıravi vətəndaşlar Şəhidlər xiyabanında 20 Yanvar faciəsi qurbanlarını ziyarət edirlər.

Xüsusi tədbirlər planına uyğun olaraq, ziyarətçilərin təhlükəsizliyini təmin etmək məqsədilə yanvarın 20-si saat 07:00-dan mərasim başa çatanadək Şəhidlər xiyabanı istiqaməti üzrə küçə və prospektlərdə nəqliyyat vasitələrinin hərəkəti məhdudlaşdırılacaq.

Bu istiqamətdə şəxsi avtomobillərdən mümkün qədər az istifadə edilməsi, ictimai nəqliyyata üstünlük verilməsi tövsiyə olunur.

Yanvarın 20-də Bakı vaxtı ilə saat 12.00-da ölkə ərazisində şəhidlərin xatirəsi bir dəqiqəlik sükutla yad ediləcək, gəmilər, avtomobillər və qatarlar səs siqnalları verəcək. Həmin gün ölkə ərazisində matəm əlaməti olaraq Azərbaycanın dövlət bayraqları endiriləcək.

Dünya ictimaiyyətinin diqqətini Qanlı Yanvar faciəsinə yönəltmək üçün Azərbaycanın xarici ölkələrdəki səfirlikləri, diplomatik nümayəndəlikləri, Azərbaycan icmaları tərəfindən də müvafiq tədbirlər həyata keçirilir.

9