Avtomobil, arxiv foto

Diqqətli olun, cərimələnə bilərsiniz

787
(Yenilənib 12:38 28.03.2019)
Texniki baxışdan keçməyən nəqliyyat vasitəsini idarə edən sürücü üçün 50 manat cərimə nəzərdə tutulur

BAKI, 28 mart — Sputnik. "Avtmobillərin texniki baxış vaxtı ilə bağlı edilən dəyişikliklərə dair suallar tez-tez səslənir. Bir qədər geniş alınsa da, bunu bir daha sürücülərə xatırlatmaq istədim. Ötən ilin yayından qüvvəyə minən dəyişikliklərə əsasən, texniki baxış vaxtının avtomobilin istehsal ölkəsi və növü ilə bağlılığı ləğv edildi. Ona görə də ötən il sizə verilmiş texniki baxış talonunda göstərilən tarixə fikir verməyin (hətta həmin talonları artıq avtomobilinizin şüşəsindən qoparıb ata da bilərsiniz)".

Bu barədə hüquqşünas Ərşad Hüseynov öz "Facebook" səhifəsində qeyd edib. Onun sözlərinə görə, hazırda qüvvədə olan qanuna (YHQ-nin 30-cu maddəsi) əsasən, istənilən ölkədə istehsal olunmuş minik avtomobilinin, avtobusun, yük avtomobilinin, qoşqunun və motosikletin texniki baxış vaxtı bundan əvvəlki texniki baxış tarixi ilə bağlıdır. Nəqliyyat vasitəsi əvvəlki dəfə texniki baxışdan hansı tarixdə keçmişdirsə, həmin tarixin üzərinə 20 gün əlavə etməklə növbəti texniki baxışın son günü müəyyən olunur.

"Məsələn, ötən il 5 apreldə texniki baxışdan keçirilmiş avtomobil bu il 15 maydan gec olmayaraq texniki baxışdan keçirilməlidir. Amma istəsəniz, avtomobilinizi baxışdan daha tez, məsələn, martda, apreldə və s. keçirdə bilərsiniz. Ona görə də əsas məsələ əvvəlki texniki baxış tarixini yadda saxlamaqdır. Əgər unutmusunuzsa, onda əvvəlki texniki baxışın tarixini belə dəqiqləşdirə bilərsiniz:

- asanpay.az portalında özünüz üçün yaratdığınız elektron kabinetdə xüsusi "texniki baxış" pəncərəsinə baxmaqla (qanuna əsasən DYP hər bir sürücünün elektron kabinetinə onun nəqliyyat vasitəsinin texniki baxışdan keçməli olduğu son tarix barədə məlumat yerləşdirməlidir);

- bunu DYP orqanlarından (şöbələrdən, postlardan, texniki baxış məntəqələrindən), hətta yolda xidmət edən DYP əməkdaşlarından soruşa bilərsiniz və onlar Mərkəzi İnformasiya Sisteminə baxaraq texniki baxışdan keçmənin son tarixini sizə deyə bilərlər".

Hüquqşünasın sözlərinə görə, ilk dəfə texniki baxıışdan keçiriləcək avtomobillərin texniki baxışının son tarixi ilə bağlı məsələ isə qanunvericilikdə açıq qalıb. Belə ki, minik avtomobilləri, icazə verilən maksimal kütləsi 3,5 tonadək olan yük avtomobilləri, onların qoşquları və motosikletlər ilk dəfə texniki baxışdan istehsaldan sonrakı 5-ci il, avtobuslar, icazə verilən maksimal kütləsi 3,5 tondan artıq olan yük avtomobilləri və onların qoşquları isə 2-ci il keçirilməlidir.  

"Belə hallarda əvvəlki texniki baxış olmadığına görə cari texniki baxışın son tarixini ümumi qaydada müəyyən etmək mümkün deyil. Ona görə də həmin nəqliyyat vasitələrini müvafiq (yəni 5-ci və 2-ci) ilin sonunadək (dekabrın 31-dək) texniki baxışdan keçirmək qanunauyğun sayılacaq. Lakin sürücülərə tövsiyə edirəm ki, ilin sonunu gözləməsinlər və yaxşı olar ki, daha əvvəlki aylarda öz nəqliyyat vasitələrini baxışa təqdim etsinlər. Bununla belə, qanunvericilikdə həmin məsələlərə də aydınlıq gətirilməlidir" - deyə o qeyd edib.

Onu da bildirib ki, texniki baxışın dövriliyi dəyişməyib və aşağıdakı kimidir:

"- minik avtomobilləri, icazə verilən maksimal kütləsi 3,5 tonadək olan yük avtomobilləri, onların qoşquları və motosikletlər - istehsal olunduğu ildən sonrakı 5-ci, 7-ci, 9-cu, 11-ci və sonrakı hər il texniki baxışdan keçirilməlidir;

- avtobuslar, icazə verilən maksimal kütləsi 3,5 tondan artıq olan yük avtomobilləri və onların qoşquları istehsal olunduğu ildən sonrakı 2-ci və sonrakı hər il texniki baxışdan keçirilməlidir.

Texniki baxış sürücünün yaşayış yerindən asılı olmayaraq DYP-nin istənilən texniki baxış məntəqəsində keçirilə bilər.

Texniki baxışın dövlət rüsumu avtomobilin növündən və digər göstəricilərindən asılı olmayaraq eynidir – 20 manatr. Qoşqular üçün isə 10 manat". 

"Ötən il edilmiş başqa bir dəyişikliyə əsasən, avtomobilləri, icazə verilən maksimal kütləsi 3,5 tonadək olan yük avtomobilləri, onların qoşquları və motosikletlər texniki baxışa təqdim edilərkən onlarda hər hansı texniki nasazlıq aşkar olunsa da, texniki baxışdan keçirilməli və texniki baxış talonu verilməlidir (yəni bu halda nazaslığa görə talon verilməsindən imtina oluna bilməz). Nazaslıqlar barədə sürücüyə sadəcə bildiriş verilməli və onları aradan qaldırmaq tövsiyə edilməlidir. Lakin sürücü nəqliyyat vasitəsini eyni nasazlıqla növbəti il texniki baxışa təqdim etdikdə həmin nasazlıq aradan qaldırılmadan talon verilməyəcək" - hüquqşünas bildirib.

Əlavə edib ki, texniki baxış talonu kağızda deyil, elektron tərtib edilir (alın şüşəsinə yapışdırılan talon verilmir) və sürücünün elektron kabinetinə yerləşdirilir. Yalnız beynəlxalq daşımalarda iştirak edən nəqliyyat vasitələrinin sürücülərinin xahişi ilə onlara kağızda talon verilir.

"Texniki baxışdan keçməyən nəqliyyat vasitəsini idarə edən sürücü üçün 50 manat cərimə nəzərdə tutulur. Cərimə elektron qərarla, baxışdan keçməmiş nəqliyyat vasitəsi kamera ilə aşkar edildikdə də tətbiq oluna bilər. Sürücü barəsində cərimə yazıldıqdan sonra 20 gün müddətində həmin nəqliyyat vasitəsi baxışdan keçirilmədən idarə edilərsə, yenə də cərimə yazıla bilər (yəni hər 20 gündən bir cərimə yazıla bilər). Ona görə də diqqətli olun, öz nəqliyyat vasitələrinizi baxışdan vaxtında keçirin" - deyə o əlavə edib.

787
Teqlər:
Ərşad Hüseynov, cərimə, texniki baxış
Əlaqədar
Bakıda avtomobil oğrusu yaxalanıb
Ödənişli avtomobil yolları ilə bağlı qərar verilib
FHN-dən xəbərdarlıq: Avtomobil şinlərini tonqala atmaq olmaz
Avtomobillərə vurulan texniki baxış talonu ilə bağlı yeni qayda müəyyənləşdirildi
İsraildə epdimioloji vəziyyət

İsraildə “Pfizer” vaksini vurulan 13 nəfər üz iflici olub

0
Ötən ilin 20 dekabr tarixində İsraildə yeni növ koronavirus (COVID-19) infeksiyasına qarşı kütləvi vaksinasiya prosesinə başlanılıb.

BAKI, 17 yanvar - Sputnik. İsraildə yeni növ koronavirus infeksiyasına qarşı “Pfizer” vaksini ilə peyvənd olunan 13 nəfər üz iflici olub.

“Report”un məlumatına görə, bu barədə “The Jerusalem Post” İsrail Səhiyyə Nazirliyinin hesabatına istinadən xəbər verib.

Nazirlik bildirib ki, üz iflici olanların sayı daha çox ola bilər.

Qeyd edək ki, ötən ilin 20 dekabr tarixində İsraildə yeni növ koronavirus (COVID-19) infeksiyasına qarşı kütləvi vaksinasiya prosesinə başlanılıb. İlk olaraq İsrailin Baş naziri Binyamin Netanyahu peyvənd olunub.

0
Kürdəxanında çirkab sular

Kürdəxanıda çirkab suları dənizə axıdılır, nazirlik öz işini görür, nəticə isə yoxdur

7
(Yenilənib 20:12 17.01.2021)
Xəzər sahili ərazilərdə quraşdırılan bu qurğular sayəsində bu ərazilərdə dənizə çirkab su axıdılmır.

İradə Cəlilova, Sputnik Azərbaycan

BAKI, 17 yanvar — Sputnik. Bakının Sabunçu rayonu Kürdəxanı qəsəbəsində uzun illərdir ki, dənizə kanalizasiya suları axıdılır. Qəsəbə sakinlərinin sözlərinə görə, qəsəbədə kanalizasiya sistemi olmadığı üçün vətəndaşlar kanalizasiya sularının axıdılması üçün xüsusi qazılmış "şambo"lardan istifadə edir.

Adətən çirkab sular dənizə axıdılır. Bununla yanaşı Kürdəxanı və Pirşağı qəsəbələrində kanalizasiya sularının axıdılığı göllər də var. Bu problemin qarşısını almaq üçün qəsəbələrə kanalizasiya sistemi çəkilməlidir. Ötən il Bakı qəsəbələrinə kanalizasiya sisteminin çəkilməsi üçün qərar verilsə də, görünən odur ki, qeyd olunan qəsəbələrdə hələ heç bir iş görülməyib.

© Sputnik / Irade JELIL
Kürdəxanında çirkab sular

Memarlıq və İnşaat Universitetinin (AzMİU) dosenti Fərzəli Həsənov Sputnik Azərbaycan-a açıqlamasında bildirib ki, Bakı qəsəbələrinə kanalizasiya sisteminin çəkilməsi planda olsa da, yəqin ki, bundan sonra məsələyə birbaşa məsul olan qurum "Azərsu" ASC işğaldan azad edilmiş ərazilərdə müvafiq işlər görəcək. Bakı qəsəbələrinə kanalizasiya sisteminin çəkilməsi məsələsi hələ bir müddət qalacaq. Çünki bu gün əsas prioritet məsələ işğaldan azad edilmiş torpaqların bərpasıdır.

Onun sözlərinə görə, Pirşağıda Cənubi Koreya şirkəti tərəfindən kanalizasiya sularının təmizlənməsi ilə bağlı stansiya tikilir. Stansiya istifadə verildikdən sonra Mehdiabad, Ceyranbatan və s. yaxın qəsəbələrin kanalizasiya boruları həmin stansiyaya qoşulacaq.

© Sputnik / Irade JELIL
Kürdəxanında çirkab sular

F.Həsənov qeyd edib ki, kanalizasiya suları təmizləndikdən sonra dənizə axıdılmalıdır: "Qonşu Türkiyədə kanalizasiya suları təmizləndikdən sonra dənizə axıdılır. Kanalizasiya suyu o qədər təmizlənir ki, Azərbaycanda olsa, içməli sudan fərqləndirmək mümkün olmaz. Bu qədər təmizlənməsinə baxmayaraq, həmin sular xüsusi borularla dənizin daxilində 5 kilometr məsafəyə buraxılır".

Professor bildirib ki, içməli suyun bir litrində 1 qram, Xəzər dənizinin suyunun 1 litrində 13-15 qram duz var. Kanalizasiya suları təmizlənib dənizə axıdıldığı təqdirdə, dənizin suyunun tərkibinə təsir etmir. Təmizlənmədiyi halda isə kanalizasiya suyunun tərkibində olan zərərli maddələr dəniz suyuna qarışır. Belə olan təqdirdə həmin ərazilərin çimərlik kimi istifadə edilməsi sağlamlıq üçün təhlükəlidir.

© Sputnik / Irade JELIL
Xəzər dənizinin suyunun 1 litrində 13-15 qram duz var

"Çirkab sularının birbaşa təmizlənmədən dənizə axıdılması müxtəlif dəri, mədə-bağırsaq və s. xəstəliklərə səbəb olur. Vətəndaşlar sağlamlıqları üçün bu ərazilərdən çimərlik kimi istifadə etməməlidirlər", - deyə F.Həsənov bildirib.

Dövlət Ekoloji Təhlükəsizlik xidmətinin rəis müavini Ramal Bağırovun sözlərinə görə, Ekologiya və Təbii Sərvətlər Nazirliyi 2007-ci ildən bu günə qədər 17 ədəd su təmizləyici qurğu quraşdırıb.

Bu problemin qalmasının səbəbi isə müvafiq ərazilərdə kanalizasiya sisteminin olmamasıdır. Dənizə açılan axar 2000-ci ildə çəkilib və keçən dövr ərzində mütəmadi olaraq monitorinqlər aparılıb, analizlər götürülüb. Nəticələr barədə "Azərsu" ASC-yə məlumat verilib.

© Sputnik / Irade JELIL
Kürdəxanında çirkab sular

Ekoloq Telman Zeynalovun fikrincə, çirkab və kanalizasiya sularının dənizə axıdılması insan sağlamlığı ilə yanaşı, Xəzərin biomüxtəlifliyi üçün də təhlükəlidir. Onun sözlərinə görə, Kürdəxanı ərazisində dənizə çirkab sularının axıdılmasına nəzarət yerli icra orqanları və Ekologiya və Təbii Sərvətlər Nazirliyindədir. Belə ki, qurumlar həmin ərazilərdə mütəmadi olaraq monitorinqlər aparmalı, bu kimi vəziyyətləri açıqlamalı və müvafiq tədbirlər görməlidir.

Məsələ ilə bağlı "Azərsu" ASC ilə əlaqə saxlamaq mümkün olmadı. Ancaq qurumun rəsmisi Şöhrət Süleymanov yerli mətbuata açıqlamasında bildirib ki, bu ərazilərdə mərkəzləşdirilmiş kanalizasiya sistemi mövcud deyil: "Abşeron yarımadası üzrə Master Plana uyğun olaraq Pirşağı hövzəsi üzrə müasir standartlara uyğun bioloji tullantı su təmizləyici qurğusunun inşası aparılıb. Hazırda tamamlanma işləri aparılır".

© Sputnik / Irade JELIL
Dənizə açılan axar 2000-ci ildə çəkilib və keçən dövr ərzində mütəmadi olaraq monitorinqlər aparılıb, analizlər götürülüb

Qeyd edək ki, Xəzər dənizinə antropogen təsir göstərən axarların qarşısının alınması və çirkab suların təmizlənərək Xəzər dənizinə axıdılması məqsədilə Bilgəh, Mərdəkan, Novxanı, Buzovna, Sumqayıtın Xəzər sahili ərazilərində ETSN tərəfindən onlarla modul tipli lokal təmizləyici qurğu quraşdırılıb.

Xəzər sahili ərazilərdə quraşdırılan bu qurğular sayəsində bu ərazilərdə dənizə çirkab su axıdılmır.

7