BAKI, 18 yanvar — Sputnik. 26 min nəfər əhalinin yaşadığı, 7 yaşayış məntəqəsini birləşdirən və respublika əhəmiyyətli Mingəçevir-Bəhrəmtəpə avtomobil yolunun 137-ci km-dən ayrılan III texniki dərəcəli Yuxarı Qarabağ Kanalı-Beyləqan-Daşburun avtomobil yolunun 15 km-lik hissəsi yenidən qurulur.
Azərbaycan Avtomobil Yolları Dövlət Agentliyinin (AAYDA) mətbuat xidmətindən Sputnik Azərbaycan-a verilən məlumata görə, sözügedən avtomobil yolu iki hissə üzrə yenidən qurulur: "1-ci hissə youn 0-10 km-liyini, 2-ci hissə isə 10-15 km-liyini əhatə edir. Avtomobil yolu iki hissə üzrə yenidən qurulur. 1-ci hissə youn 0-10 km-liyini, 2-ci hissə isə 10-15 km-liyini əhatə edir".
"Respublika əhəmiyyətli Yuxarı Qarabağ Kanalı-Beyləqan-Daşburun avtomobil yolunun 0-10 km-lik hissəsi uzun illər təmir olunmadan istifadə edildiyindən və təbii faktorların təsirindən asfalt-beton örtüyündə aşınmalar, tor şəkilli çatlar və çökmələr əmələ gəlmişdi. Çiyinlərdəki materiallar atmosfer yağıntıları nəticəsində yuyulmağa məruz qaldığından çiyinlər aşağı səviyyəyə düşmüşdü" - qurumdan bildirilib.
"Bundan başqa, yolun bəzi hissələrində torpaq yatağı təbii relyef ilə eyni səviyyədə olduğundan dağılmalar və çökmələr əmələ gəlmişdi. Bu səbəbdən də yolun torpaq yatağının qaldırılmasına zərurət yaranmışdı" - deyə AAYDA-dan əlavə olunub.
Məlumata görə, yaranmış problemlərin aradan qaldırılması üçün avtomobil yolu III texniki dərəcəyə uyğun yenidən qurulur. Analoji işlər respublika əhəmiyyətli Yuxarı Qarabağ Kanalı-Beyləqan-Daşburun avtomobil yolunun Beyləqan şəhəri daxilindən keçən 5 km-lik hissəsində də aparılır.
