Avtobusla qatar toqquşub

Bakıda baş verən qorxunc hadisə çox ciddi təhlükəni üzə çıxarıb

396
(Yenilənib 10:28 03.10.2018)
"Dəmiryolun mühafizə zonasında tikintiyə icazə vermək və tikinti aparmaq cinayətdir"

BAKI, 3 oktyabr — Sputnik. "Faciəli avtobus qəzası yollarımızda çox ciddi bir təhlükəni də üzə çıxardı. Şübhəsiz ki, bu qəzanın əsas zəmini əksər avtobus sürücülərinin ifrat intizamsızlığı, bəzi adamların onlara yaratdığı cəzasızlıq mühitidir. Bu barədə çox danışılıb. Amma dəfələrlə qaldırdığımız və bu hadisədə də qabarıq görünən başqa bir faciə mənbəyi də unudulmamalıdır". 

Bu barədə hüquqşünas Ərşad Hüseynov öz "Facebook" səhifəsində yazıb. O qeyd edib ki, bu faciə mənbəyi dəmiryol keçidlərindəki ciddi qüsurlardır.

"Hadisənin baş verdiyi keçidi (oradan çəkilmiş fotoları, videoları, görənlərin dediklərini) təhlil etdikdə, aşağıdakı əsas qüsurlar aydınca görünür:

Keçiddəki svetofor işləmir və ya ən pisi — qanunvericiliyə uyğun rejimdə işləmir. Hətta hadisə yerindən dünən çəkilmiş videoreportajdan görünür ki, keçidin yaxınlığında heç bir qatar olmaya-olmaya həmin svetoforun qırmızı işığı yanıb-sönür. Bu eybəcər mənzərə ölkəmizin ərazisindəki bütün dəmiryol keçidlərindədir.

Amma bu svetoforun qanunda yazılan iş rejimi var. Həmin qurğu bu rejimdə işləməlidir, camaatı aldatmamalıdır Rejim də belədir: qırmızı işıq yanırsa və ya yanıb sönürsə, keçiddə avtomobil və piyada hərəkəti qadağandır, qatar gəlir deməkdir. Qatar yoxdursa, ya svetofor sönməlidir, ya da svetoforda ağ işıq yanmalıdır. Amma bizim keçidlərdəki svetoforlar ya heç vaxt işləmir, ya da günlərlə qatar olmasa da, qırmızı işığı yanıb sönür".

Hüseynovun təhlilinə görə, həmin keçiddə 2.5 nişanı yoxdur və stop-xətt də çəkilməyib: "Bu iki tənzimləmə vasitəsi çox vacibdir. Ən intizamsız sürücü də onları görəndə daha diqqətli olur".

"Hadisə yerində ilk çəkilən fotolardan görünür ki, həmin keçiddə şlaqbaum adına bir sarı taxta parçası var (hadisədən sonra onu boyayıb qaydaya salmağa cəhd ediblər, amma yenə də yetərli deyil). Amma şlaqbaumun qanunda dəqiq qeyd edilən rəng tərtibatı var (növbələşən ağ və qırmızı rəng, ortada qırmızı dairə, özü də bunlar hamısı işıqqaytarıcı olmaqla). Hadisə baş verən yerdə olanlar deyirlər ki, bu sarı taxtadan olan şlaqbaum da düz-əməlli işləmirmiş (hadisə anının qeydə alındığı videoda onun bağlı olması görünmür)" — deyə ekspert vurğulayıb. 

Ərazidəki təcili tibbi yardım və post patrul xidməti avtomobilləri
© Sputnik / Murad Orujov

Hüseynovun yazdığına görə, keçidin ərazisində və dəmiryolun mühafizə zonasında tikili var: "Həmin tikili yaxınlaşan qatarın görünməsini ciddi surətdə məhdudlaşdırır. Xatırladıram ki, dəmiryolun mühafizə zonasında tikintiyə icazə vermək və tikinti aparmaq cinayətdir. (CM-in 222-2-ci və 314-2-ci maddələri)".

"Detallar araşdırılsa, xeyli başqa qüsurlar da görünər. Bir neçə il əvvəl Lökbatanda da keçiddə sərnişin avtobusu ilə qatar toqquşaraq ölənlər və yaralananlar olmuşdu. Belə hadisələrdə intizamsız avtobus sürücləri ilə yanaşı dəmiryol işçiləri də məsuliyyət daşıyırlar. Xatırladıram ki, dəmiryol keçidlərinin qeyd etdiyim qaydada təchizatı dəmiryol idarəsinin vəzifəsidir. Amma bu təchizatın yerində və qaydasında olmasına nəzarəti DYP və avtomobil yolunun sahibi də etməlidir. Çox təəssüf ki, belə sitemli məsuliyyətsizlik faciələrə gətirib çıxarır. Xüsusən də 13 yaşlı yeniyetmə oğlanın həlak olması, körpə uşaqların şikəst olması daha ürəkağrıdıcıdır. Çox heyf".

396
Teqlər:
hüquqşünas, Ərşad Hüseynov, qatar, avtobus, qəza
Əlaqədar
Daha bir qorxunc qəza xəbəri gəldi
Dəhşətli qəza ilə bağlı tutulan var
Sumqayıtda ağır qəza olub, çoxlu sayda ölənlər və yaralananlar var
Bərdədə ağır qəza oldu, sürücü öldü
Bakıda dəhşətli qəza: Eyni anda 4 nəfər öldü
Paytaxtda ağır qəza oldu, orta yaşlı piyada vuruldu - VİDEO
Sumqayıtda ağır qəza: Avtobus "Kamaz"la toqquşub, çoxlu yaralı var