Qazaxda kütləvi vətənpərvərlik bayramı keçirilib

BAKI, 14 iyun — Sputnik. Azərbaycan Respublikasının Müdafiə Nazirliyi və Qazax Rayon İcra Hakimiyyətinin birgə təşkilatçılığı ilə Qazax şəhərində ümummilli lider Heydər Əliyevin hakimiyyətə qayıdışının 25-ci ildönümü və Silahlı Qüvvələrin yaradılmasının 100 illik yubileyinə həsr olunmuş kütləvi vətənpərvərlik bayramı keçirilib. Sputnik Azərbaycan xəbər verir ki, bayram tədbiri "Milli Qurtuluşdan Zəfərə doğru" devizi altında baş tutub.

Tədbirdə Milli Məclisin üzvləri Kamran Nəbizadə və Ülviyyə Ağayeva, Müdafiə Nazirliyinin şöbə rəisi, general-mayor Rasim Əliyev, ziyalılar, rəssamlar, yazarlar, media nümayəndələri, incəsənət xadimləri, həmçinin rayon ictimaiyyəti iştirak edib.

© Foto: AR Müdafiə Nazirliyinin mətbuat xidməti

Qazaxda “Milli Qurtuluşdan Zəfərə doğru” devizi altında kütləvi vətənpərvərlik bayramı keçirilib

Tədbir iştirakçıları əvvəlcə Heydər Əliyevin adını daşıyan parka gələrək ulu öndərin abidəsi önünə tər gül dəstələri qoyub, öz ehtiramlarını bildiriblər.
Daha sonra Azərbaycan ordusunun ilk qurucularından olan general-mayor Cavad bəy və polkovnik Rüstəm bəy Şıxlinskilərin yaşadıqları evə vurulmuş xatirə lövhəsinin açılış mərasimi olub.

Layihənin müəllifi, Əməkdar incəsənət xadimi, polkovnik Abdulla Qurbani açılış mərasimində çıxış edərək Cavad və Rüstəm Şıxliniskilərin ordu quruculuğundakı xidmətlərindən danışıb. Həmçinin ilk general rütbəsini almış Süleyman Əfəndiyevin həyatından söz açıb. Bildirib ki, yaxın günlərdə onun adının əbədiləşdirilməsi istiqamətində məqsədyönlü tədbirlər görüləcək.

İlk dəfə hərbi geyim geyinmiş süvari əsgərlərin tədbirə qatılması isə iştirakçılar tərəfindən alqışlarla qarşılanıb.

© Foto: AR Müdafiə Nazirliyinin mətbuat xidməti

Qazaxda “Milli Qurtuluşdan Zəfərə doğru” devizi altında kütləvi vətənpərvərlik bayramı keçirilib

Qazax Rayon İcra Hakimiyyətinin başçısı Rəcəb Babaşov çıxış edərək tədbir iştirakçılarını, bütün qazaxlıları möhtəşəm bayram münasibətilə səmimi qəlbdən təbrik edib. Keçirilən tədbirin qazaxlıların yaddaşında uzun müddət silinməz izlər buraxacağını qeyd edib.

Daha sonra tədbirin qonaqlarına söz verilib. Çıxış edənlər yüksək səviyyədə belə bir tədbirin təşkil olunmasına görə təşkilatçılara minnətdarlıqlarını bildiriblər. Bu cür tədbirlərin gənclərin hərbi vətənpərvərlik ruhunda tərbiyə olunmasında böyük əhəmiyyət daşıdığını vurğulayıblar.

© Foto: AR Müdafiə Nazirliyinin mətbuat xidməti

Qazaxda “Milli Qurtuluşdan Zəfərə doğru” devizi altında kütləvi vətənpərvərlik bayramı keçirilib

Möhtəşəm bayram tədbirində Vətən uğrunda canından keçmiş igid oğul və qızlarımızın da xatirəsi yad edilib, ruhlarına dua oxunub. "Fəxri qazaxlılar" parkı ilə tanış olduqdan sonra qonaqlar Şəhidlər Xiyabanına baş çəkərək memorialın önünə gül dəstələri qoyaraq şəhidlərə ehtiramlarını bildiriblər.
Daha sonra bayramsayağı bəzədilmiş Mədəniyyət Mərkəzinin qarşısında "Milli Qurtuluşdan Zəfərə doğru" devizi altında keçirilən bayram tədbirinə start verilib.

Tədbirin aparıcıları bu il Azərbaycan Xalq Cümhuriyyətinin 100 illik yubileyinin qeyd edilməsini, ulu öndərin xalqın təkidli tələbi ilə ikinci dəfə hakimiyyətə qayıdışının 25 ilinin tamam olmasını, Bakı şəhərinin erməni bolşeviklərindən azad edilməsinin 100 ilinin tamam olmasını xalqımız üçün əsl bayram olduğunu qeyd ediblər.

© Foto: AR Müdafiə Nazirliyinin mətbuat xidməti

Qazaxda “Milli Qurtuluşdan Zəfərə doğru” devizi altında kütləvi vətənpərvərlik bayramı keçirilib

Tədbirdə ümummilli lider Heydər Əliyevin və şəhidlərin xatirəsi bir dəqiqəlik sükutla yad olunduqdan sonra Dövlət Himni səslənib.

"Azərbaycan fanfarası" hərbi orkestr tərəfindən ifa olunub. Ulu öndər Heydər Əliyevin həyat və fəaliyyətini, hakimiyyətə gəldiyi anları, xalqla görüşlərini, Azərbaycan xalqı naminə göstərdiyi misilsiz xidmətləri, ordu quruculuğu sahəsindəki əldə edilən nailiyyətləri özündə əks etdirən kadrlar monitor vasitəsilə nümayiş etdirilib.

Sonra səhnə incəsənət nümayəndələrinin ixtiyarına verilib. Tədbir "Vətən marşı"nın sədaları ilə başa çatıb.