BAKI, 18 may — Sputnik. Azərbaycanın xalq artisti Brilliant Dadaşova "Məni axtar darıxanda" kompozisiyasına klip çəkdirib. O, bu kompozisiyanı gənc həmkarı Rəsul Əfəndiyevlə duetdə oxuyub.
Sputnik Azərbaycan-ın məlumatına görə, klipin rejissoru Ceyhun Kərimov, operatoru Soltan Abdullayev, ssenari müəllifi Elnur Cəbrayılov, montaj rejissoru isə Aleks Anişenkodur.
Kərimovun sözlərinə görə, o, klipdə həkim obrazını canlandıran Brilliant Dadaşova ilə işləməkdən zövq alıb. Rejissor qeyd edib ki, ssenari sayəsində sözügedən videoçarxı mini-film də adlandırmaq olar.
"Klipin süjetinə görə, Brilliant Dadaşova sevgilisi — məşhur stilist rolunun ifaçısı Fuad Hacıyevlə birlikdə qəzaya düşür, lakin onu xilas edə bilmir. Amma o, digər cavan adamı sevdiyi qızı ona qaytarmaqla ölümdən xilas etməyə müvəffəq olur" — deyə Kərimov bildirir.
Klip tamamlama işləri başa çatdıqdan sonra yaxın günlərdə istimaiyyətə təqdim ediləcək.
Qeyd edək ki, "Məni axtar darıxanda" mahnısının sözləri İlqar Fəhminin, musiqisi isə Aydin Sani & Suleymanındır.
Bu yaxınlarda KİV və ictimaiyyətə təqdim ediləcək həmin klipin beksteycini oxucuların diqqətinə çatdırırıq.
