Prezident İlham Əliyev Xaçmaz rayonuna səfər edib

BAKI, 4 may — Sputnik. Prezident İlham Əliyev Xaçmaz rayonuna səfərə edib. Sputnik Azərbaycan dövlət başçısının rəsmi saytına istinadən xəbər verir ki, Prezident İlham Əliyev əvvəlcə xalqımızın ümummilli lideri Heydər Əliyevin Xaçmaz şəhərinin mərkəzində ucaldılmış abidəsini ziyarət edib, önünə gül dəstəsi qoyub.

Daha sonra Xaçmaz Rayon İcra Hakimiyyətinin başçısı Şəmsəddin Xanbabayev Prezident İlham Əliyevə rayonda həyata keçirilən layihələr və qarşıda duran vəzifələr barədə məlumat verib.

Prezidenti Xaçmaza səfəri çərçivəsində Çarxı-Qalağan-Hacılar-Xanlıqoba-Sayad-Məmmədxanlı avtomobil yolunun yenidənqurma və bərpadan sonra açılışını da edib. Azərbaycan Avtomobil Yolları Dövlət Agentliyi (AAYDA) İdarə Heyətinin sədri Saleh Məmmədov yeni yolun texniki göstəriciləri barədə dövlət başçısına məlumat verib. Prezident İlham Əliyev yolun rəmzi açılışını bildirən lenti kəsib.

Ölkə başçısı "Azərxalça" Açıq Səhmdar Cəmiyyətinin Xaçmaz filialının açılışında da iştirak edib. "Azərxalça" Açıq Səhmdar Cəmiyyətinin İdarə Heyətinin sədri Vidadi Muradov Prezident İlham Əliyevə müəssisə barədə məlumat verib. Azərbaycan Prezidenti müəssisənin rəmzi açılışını bildirən lenti kəsdikdən sonra filialın kollektivi ilə görüşüb. Müəssisənin işçisi Zahirə Beydullayeva və filialın direktoru Sevda Xəlilova göstərilən diqqət və qayğıya görə dövlətimizin başçısına minnətdarlıqlarını bildiriblər.

Prezident İlham Əliyev səfəri çərçivəsində Xaçmaz şəhərinin su təchizatı və kanalizasiya sistemlərinin istismara verilməsi mərasimində və "Azərsu" Açıq Səhmdar Cəmiyyətinin Xaçmaz idarəsinin inzibati binasının açılışında iştirak edib. "Azərsu" ASC-nin sədri Qorxmaz Hüseynov dövlət başçısına "Xaçmaz şəhərinin su təchizatı və kanalizasiya sistemlərinin yenidən qurulması" layihəsi barədə məlumat verib. Sonra Prezident İlham Əliyev Xaçmaz şəhərinə içməli suyun verilməsini bildirən düyməni işə salıb.

Dövlət başçısı Xaçmaz-Xudat avtomobil yolunun 24 kilometrlik hissəsinin yenidənqurma və bərpadan sonra açılışında da iştirak edib. AAYDA İdarə Heyətinin sədri Saleh Məmmədov yeni yolun texniki göstəriciləri barədə prezidentə məlumat verib. Ölkə başçısı İlham Əliyev yolun rəmzi açılışını bildirən lenti kəsib.