Rusiya Federasiyası İstintaq Komitəsinin avtomobili, arxiv şəkli

Lotu Qulinin əleyhdarı Moskvada azərbaycanlı biznesmeni niyə öldürüb?

2283
(Yenilənib 18:06 21.09.2017)
"Qanuni oğru" Nadir Səlifovla düşmənçilik edən kriminal avtoritet həmyerlisini özünə tabe etdirmək və ondan xərac almaq istəyib

BAKI, 19 sentyabr — Sputnik. Azərbaycan əsilli moskvalı iş adamı Əliyev Rəhman Muxtar oğlunun Ağcabədi rayon Yeni Qaradolaq kəndində anadan olmuş 1985-ci il təvəllüdlü, kriminal aləmdə Dato Ağcabədinski ləqəbi ilə tanınan "qanuni oğru" Cavid Məmmədovun adamları tərəfindən qətlə yetirilməsi istintaqa görə daha inandırıcı versiyadır. Yeri gəlmişkən, qətlə yetirilən şəxs də həmin rayonda anadan olub.

Bu barədə Sputnik Azərbaycan-a Moskvadakı Azərbaycan diasporunun hüquq-mühafizə orqanları ilə əməkdaşlıq edən və adının açıqlanmasını istəməyən fəal nümayəndəsi məlumat verib. 

Beləliklə, sentyabrın 18-i axşam Moskvanın cənubundakı Biryulevo Zapadnoe paytaxt rayonunda odlu silahdan açılmış atəş nəticəsində çoxsaylı güllə ilə qətlə yetirilmiş Rəhman Əliyevin cəsədi tapılıb. Adam yaxın məsafədən vurulub. Hadisənin baş vermə şəraiti göstərir ki, qətl sifariş xarakterli olub. RF Daxili İşlər Nazirliyinin mətbuat xidmətinin məlumatına görə, hazırda baş vermiş hadisənin təfərrüatları açıqlanmır.

Rusiya KİV məlumat yayıb ki, Rəhman Əliyev mütəşəkkil qruplaşmalardan birinin üzvü ola bilər.

Bununla belə, istintaq orqanlarının əldə etdiyi ilkin məlumata görə, Əliyevin qətlinin izləri onunla Dato Ağcabədinskinin adamları arasındakı münaqişəyə gedib çıxır.

Əliyev öz həmyerliləri ilə birlikdə metal toplamaq və satmaqla məşğul olub. Dato Ağcabədinski azərbaycanlı sahibkarlardan aylıq xərac toplayır və Əliyevi də özünə tabe etdirmək istəyib. Lakin Əliyev öz biznesinin "himayə edilməsi" üçün qanuni oğruya xərac verməkdən imtina edib.

Bizim əldə etdiyimiz informasiyaya görə isə Əliyev heç bir cinayətkar qruplaşmaya daxil olmayıb. Xərac verməkdən imtina həmyerlilər arasında "nifaq alması" rolunu oynayıb. Münaqişə onunla nəticələnib ki, Əliyev yaxın məsafədən dəlmə-deşik edilib. 

Cavid Məmmədovun adı son vaxtlar qanlı münaqişələrdə tez-tez hallanır. Eyni zamanda Ağcabədinskinin azərbaycanlı "qanuni oğru" Nadir Səlifovla (Lotu Quli) da münasibətləri gərginləşib. Bu iki avtoritet çoxdandır bir-biriləri ilə düşmənçilik edir. Bu düşmənçiliyin tarixi hələ Cavid Məmmədov "Vladimirskiy sentral"da vəziyyətə nəzarət etdiyi (2006-2008-ci illər) vaxtlara təsadüf edir.

Bu yaxınlarda Cavid Məmmədov əvvəllər Rövşən Canıyevin (2016-cı ilin avqustunda qətlə yetirilmiş kriminal avtoritet Rövşən Lənkəranski) klanına daxil olan Suxumi "qanuni oğruları" qrupunun dəstəyini əldə edib və Quli klanına qarşı müqavimətə rəhbərlik edir. Dato Ağcabədinski David Sebiskveradze (Dato Kutaisski), Laşi Celadze (Raça) və Zaza Ambroladze (Zaza) kimi nüfuzlu "qanuni oğrular"ın simasında yunan klanı ilə dostlaşıb.

Bir sıra məlumatlara görə, Dato Ağcabədinskinin bu yaxınlarda Tbilisidə Nadir Səlifovun sağ əli hesab edilən Elşad Məmmədovun öldürülməsində də əli var.

2283
Bıçaq

Qətl hadisəsi ilə bağlı məhkəmə qərarı verildi

2
(Yenilənib 16:47 13.04.2021)
Pünhan Hüseynov Cinayət Məcəlləsinin 221.3, 29, 120.2.2, 120.2.2 və 120.2.10 maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.

BAKI, 13 aprel — Sputnik. 11 avqust 2020-ci il tarixdə İmişli rayonu, Göbəktala kəndi ərazisində 1985-ci il təvəllüdlü Amid Əmirahovun öldürülməsi, 1990-cı il təvəllüdlü Səbuhi Əmirahovun isə öldürülməsinə cəhd edilməsi faktı üzrə Cinayət Məcəlləsinin müvafiq maddələri ilə İmişli rayon prokurorluğunda cinayət işi başlanaraq istintaq aparılıb. Bu barədə İmişli rayon prokurorluğundan Sputnik Azərbaycan-a verilən məlumatda bildirilib.

Qeyd olunub ki, istintaqla 1984-cü il təvəllüdlü Pünhan Hüseynovun həmin gün saat 20 radələrində kənd ərazisində yerləşən kafelərin birində alkoqol sərxoşluğu vəziyyətində əsaslı səbəb olmadan, ictimai qaydanı kobud surətdə pozan hərəkətlər edib, Səbuhi Əmirahova bıçaqla xəsarətlər yetirib qəsdən öldürməyə cəhd etməsinə, sonuncunun qohumu Amid Əmirahova isə bıçaqla bədən xəsarətləri yetirərək öldürməsinə, həmçinin ətrafdakı şəxslərə müxtəlif dərəcəli bədən xəsarətləri yetirməsinə və  nəqliyyat vasitələrinə ziyan vurmasına əsaslı şübhələr müəyyən edilib.

Pünhan Hüseynov Cinayət Məcəlləsinin 221.3 (silah qismində istifadə olunan əşyalar tətbiq etməklə xuliqanlıq etmə), 29, 120.2.2 (xuliqanlıq niyyətilə qəsdən adam öldürməyə cəhd), 120.2.2 (xuliqanlıq niyyətilə qəsdən adam öldürmə) və 120.2.10 (təkrarən qəsdən adam öldürmə) maddələri ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.

Cinayət işi üzrə müvafiq ekspertizalar təyin edilib, hadisə yerinə və meyitə baxış keçirilib, maddi sübutlar götürülüb, şahidlər dindirilib və digər zəruri prosessual hərəkətlər yerinə yetirilib.

Hazırda cinayət işi üzrə istintaq yekunlaşdırılaraq, baxılması üçün aidiyyəti üzrə Lənkəran Ağır Cinayətlər Məhkəməsinə göndərilib.

2
 Tovuzun Aşağı Öysüzlü kəndinin məktəbində

Bölgələrdəki məktəblərlə bağlı hansı qərar veriləcək? Nazirlik açıqladı

6
(Yenilənib 16:32 13.04.2021)
"Hazırda hansısa bölgədə yerləşən məktəblərdə yoluxma faizinin daha yüksək olduğunu söyləmək mümkün deyil".

Zülfiyyə Quluyeva, Sputnik Azərbaycan

BAKI, 13 aprel — Sputnik. Son günlər bölgələrdə yerləşən təhsil ocaqlarında koronavirusa yoluxma hallarının qeydə alınması rayonlarda da təhsilin distant formaya keçəcəyinə dair məlumatların yayılmasına səbəb olub. Xəbərlərə görə, Bakı, Abşeron, Sumqayıt, Gəncə, Şəkidən sonra koronavirusa yoluxma qeydə alınan məktəblərin yerləşdiyi rayonlarda da təhsilin distant formaya keçəcəyi bildirilir.

Qeyd edək ki, bir neçə gün öncə koronavirusa yoluxmaya görə bir sıra bölgələrdə əyani tədris dayandırılıb.

Ağdamda 7 məktəb koronavirusa görə distant tədrisə keçib. Ağdam rayon Gigiyena və Epidemiologiya Mərkəzinin direktoru Rəhman Məmmədov deyib ki, rayonun Birinci Yüzbaşılı, Alıbəyli, Əfətli, Mahrızlı, Baharlı-2, Dörd yol-2 və 150 saylı orta məktəblərdə əyani tədris prosesi müvəqqəti olaraq dayandırılıb. Həmin məktəblərdə müəllim və şagirdlərdən bəzilərinin COVID-19 testi pozitiv çıxıb. Eyni zamanda Əhmədağalı kənd tam orta məktəbində 2 sinif, Qaradağlı tam orta məktəbində 1 sinif, 87 saylı tam orta məktəbdə 1 sinif, 97 saylı tam orta məktəbdə 1 sinif fəaliyyətini dayandırıb. Tovuz, Qazax, Mingəçevir, Şəmkir rayonlarında da koronavirusa yoluxmaya görə ənənəvi tədrisi dayandırılan məktəblər var.

Təhsil üzrə ekspert Kamran Əsədov Sputnik Azərbaycan-a açıqlamasında bildirib ki, hazırda şagird sıxlığı yüksək olan məktəblərdə əyani tədris dayandırılıb. Yoluxma qeydə alınan digər bölgələrdə isə şagird sıxlığı çox deyil:

"Bakıda 440 min şagird var. 1,6 milyon şagirdin yarısı bağlanan məktəblərdə yerləşir. Digər rayonlarda şagird sayı çox aşağıdır. Sıxlıq, demək olar ki, o qədər də çox deyil. Bundan əlavə, bölgələrdə intensivlik aşağıdır. Odur ki, virusa yoluxma qeydə alınan rayonlarda təhsili tam dayandırmağa ehtiyac yoxdur. Məktəblərdə tədrisin dayandırılması lokal xarakter daşımalıdır".

K.Əsədov bildirir ki, koronavirusa yoluxma qeydə alınan məktəblərdə ənənəvi təhsilin tam dayandırılması bölgələrdə təhsildən yayınmaya yol açır: "Əgər bölgələrdə bir neçə məktəbdə yoluxmaya görə rayon üzrə təhsil dayandırılsa, şagirdlər üçün problemlər yaranacaq. Çünki rayonların çoxunda alternativ təhsil almaq imkanı çox aşağıdır. Dərslər distanta keçərsə, bölgələrdə dərsə qoşulanların sayı azalır. Ona görə də bölgələrdə tədrisin dayandırılmasına ehtiyac yoxdur".

Ekspert deyir ki, hazırda virusa yoluxma Ağdam, Tovuz, Kürdəmir və Ucar rayonlarındakı təhsil müəssisələrində rast gəlinir: "Elə rayonlar var ki, oradakı ümumtəhsil müəssisələrində ümumiyyətlə virusa yoluxma yoxdur".

Təhsil Nazirliyinin mətbuat katibi Cəsarət Valehov Sputnik Azərbaycan-a açıqlamasında bildirib ki, bölgələrdəki məktəblərdə koronavirusa yoluxma barədə rayon gigiyena və epidemiologiya mərkəzləri tərəfindən mütəmadi məlumat verilir. C.Valehov bölgələrdəki koronavirusa yoluxma qeydə alınan məktəblərdə tədrisin lokal dayandırıldığını söyləyib:

"Koronavirusa yoluxma qeydə alınan məktəblərdə tədris həmin bölgə üzrə yox, yoluxma olan məktəblər üzrə distant formaya keçir".

C.Valehov deyib ki, hazırda hansısa bölgədə yerləşən məktəblərdə yoluxma faizinin daha yüksək olduğunu söyləmək mümkün deyil. Bütün bölgələr üzrə ümumtəhsil ocaqlarında virusa yoluxma qeydə alınır. Əgər yoluxma halları çoxdursa, məktəb müvəqqəti distant formaya keçir.

6
Teqlər:
Təhsil Nazirliyi, yoluxma, bölgələr, təhsil, distant, məktəb
Mövzu:
Azərbaycan karantində: nikbinlər, bədbinlər, xeyirxahlar və ixtiraçılar