Leyla Abdullayeva, Sputnik Azərbaycan
BAKI, 7 may — Sputnik. Şabran rayon sakini Camal Həsənova məxsus təsərrüfatdan qoyun oğurlayan şəxs saxlanılıb.
Şabran rayonu Dəvəçi kənd sakini Füzuli Ocaqov C.Həsənova məxsus təsərrüfatdan iki dəfə qoyun oğurluğu edib. O, məşhur el məsəlində olduğu kimi, "Koroğlu üçdən deyib" deyərək eyni obyektə növbəti dəfə oğurluğa girib.
Üçüncü oğurluğunda isə Şabran rayon Polis İdarəsinin əməkdaşları tərəfindən saxlanılıb.
Saxlanılan şəxs bundan öncə oğurladığı qoyunlardan birincisini 200 azn, ikincini isə 250 azn dəyərində satdığını etiraf edib.
Füzuli Ocaqov əvvəllər də məhkum olunub.
Şabran rayon Polis İdarəsindən Sputnik Azərbaycan-a verilən məlumata görə, hazırda AR Cinayət Məcəlləsinin müvafiq maddələri ilə cinayət işi açılıb və araşdırmalar davam etdirilir.
