BAKI, 20 dek — Sputnik. "Türkiyəyə o qədər güvənirdi ki, bir yerə gedəndə mühafizəçilərə ehtiyac görmürdü. Səfir Andrey Karlov bizim həm dostumuz, həm də qonağımız idi. Təəssüf ki, onu qoruya bilmədik". Sputnik Timeturk-ə istinadən xəbər verir ki, bu sözləri Türkiyənin "Hürriyet" qəzetinin köşə yazarı Əbdülqadir Səlvi deyib.
Türk yazar, səfirin öldürülməsindən sonra, keçənilki təyyarə böhranının da yenidən araşdırılmasının vacib olduğunu bildirib:
"Açıq-aşkar görünür ki, kimlərsə rus-türk münasibətlərindən ciddi narahatlıq duyur. İsrarla iki dövlətin arasını vurmaq istəyirlər. 15 iyulda Türkiyəni hərbi çevrilişlə yıxa bilməyənlər bu gün xaos ssenarilərini işə salıblar".
Ə.Səlvi sonda əlavə edib ki, 2015-ci il 24 noyabr hadisəsi zamanı səfir Andrey Karlov əlaqələrin düzəlməsi üçün ciddi səy göstərən ideal bir şəxsiyyət idi.
