BAKI, 23 avq-Sputnik. Türkiyənin Fətullah Gülənin ekstradisiyasına dair sorğusu onun çevrilişlə əlaqəli olması ittihamı ilə bağlı deyil.
Sputnik RİA Novosti-yə istinadla xəbər verir ki, bunu Dövlət Departamentinin rəsmi nümayəndəsi Mark Toner deyib.
Jurnalistlərin Türkiyənin təqdim etdiyi sənədlərə şərh verilməsinə dair xahişinə cavabında o bildirib ki, sözügedən sorğunun çevriliş cəhdi ilə əlaqəsi yoxdur.
Hazırda ABŞ-ın Pensilvaniya ştatındakı mənzil-qərargahında fəaliyyətini davam etdirən "Hizmət" hərəkatının lideri Fətullah Gülən 15 iyulda Türkiyədə baş verən dövlət çevrilişinə cəhddə ittiham edilir. Türkiyə onun ölkəyə ekstradisiyası üçün ABŞ hökumətinə rəsmi müraciət göndərib. ABŞ-ın hüquq-mühafizə orqanları isə Türkiyədən ekstradisiyaya əsas verəcək sənədləri tələb edib. Rəsmi Ankaranın göndərdiyi dəlilləri ABŞ hökuməti ekstradisiya üçün yetərli saymayıb.
