BAKI, 4 apr — Sputnik. Azərbaycan Demokrat Partiyasının (ADP) sədri Sərdar Cəlaloğlu və tanınmış vəkil Qurban Məmmədovun qardaşı oğlu, milli ordumuzun zabiti Rasim Məmmədov şəhid olub. Bu barədə Sputnik-ə Qurban Məmmədov məlumat verib.
Onun sözlərinə görə, Rasim Əbdül oğlu Məmmədov dünən gecə Goranboy istiqamətində yüksəkliklər uğrunda gedən döyüşlərdə həyatını itirib. 40 yaşlarında olan mayor R.Məmmədov batalyon komandiri idi. Mərhumun məktəb yaşlı 2 övladı var.
Q. Məmmədov bildirib ki, hazırda mərhumun yaxınları Sərdar Cəlaloğlunun evində toplaşıblar və onun harada dəfn olunması məsələsini müzakirə edirlər. Onun sözlərinə görə, hazırda R. Məmmədov Müdafiə nazirinin müşayiəti ilə ailəsinə təhvil verilmək üçün Bakıya gətirilir.
R.Məmmədovun Bakıda, ya da Naxçıvanda dəfn olunması məsələsi müzakirə olunur. Qeyd edək ki, R.Məmmədovun atası Əbdül Məmmədov birinci Qarabağ müharibəsinin qazilərindəndir.
