Bakı 2015 Avropa Oyunları

Müxalifət liderləri Avropa Oyunlarının açılışında iştirak edəcəklər

82
(Yenilənib 11:46 12.06.2015)
Siyasi partiyaların liderləri Birinci Avropa Oyunlarında iştirak və Azərbaycan idmançılarından gözləntiləri ilə bağlı fikirlərini Sputnik-lə bölüşüblər.

BAKI, 12 iyun — Sputnik. Bu gün Azərbaycanda Birinci Avropa Oyunlarına start verilir və rəsmi açılış mərasimi keçiriləcək. Açılış mərasimində 20-dək ölkənin  və hökumətin başçısı, o cümlədən, çoxsaylı xarici qonaqlar iştirak edəcək. Artıq idmançılar və nümayəndə heyətləri Azərbaycana gəlməkdədirlər. Rəsmi açılış mərasimində ölkənin rəsmiləri, millət vəkilləri, məmurlar, vətəndaş cəmiyyətinin, siyasi partiyaların nümayəndələri, sıravi vətəndaşlar iştirak edəcək. Müxalifət partiyalarının əksəriyyəti də açılış mərasimində iştirak etmək barədə qərar verib. Siyasi partiyaların liderləri Birinci Avropa Oyunlarında iştirak və Azərbaycan idmançılarından gözləntiləri ilə bağlı fikirlərini Sputnik-lə bölüşüblər.

Demokratik İslahatlar Partiyasının sədri, millət vəkili Asim Mollazadə oyunların yüksək səviyyədə keçməsini arzulayıb. O bildirib ki, Avropa Oyunları bir daha Azərbaycanın Avropaya inteqrasiyasının bariz göstəricisidir: “Avropa Oyunları təkcə ölkədə idmanın inkişafı baxımından deyil, eyni zamanda gəncliyin sabaha baxışı, cəmiyyətdə daha aktiv mövqe tutması baxımından da mühüm hadisədir. Çünki bu oyunlarda daha çox Azərbaycan gəncliyi iştirak edəcək. Bu da onların özlərini formalaşdırması baxımından müstəsna rol oynayacaq.”

Yarışlarda Azərbaycan idmançılarına uğurlar arzulayan Mollazadə deyib ki, əsas məsələ kimin qalib olması deyil, əsas məsələ uğurlu iştirakdır: “Kimin birinci yeri tutub tutmaması önəmli deyil, əsas məsələ uğurlu çıxışdır.”

ADP sədri Sərdar Cəlaloğlu da açılış mərasimində iştirak edəcəyini bildirib və idmançılarımıza uğurlar arzulayıb. “Hesab edirəm ki, kifayət qədər bacarıqlı idmançılarımız var və onlar bayrağımızı uca edəcəklər” — deyə Cəlaloğlu bildirib.

AMİP sədri Yusif Bağırzadə partiya rəhbərliyinin Avropa Oyunlarının rəsmi açılış mərasimində iştirak edəcəyini bildirib. Onun sözlərinə görə, bu yarışın Azərbaycanda təşkil olunması mühüm bir tarixi hadisədir. “Biz partiya olaraq bu yarışlarda idmançılarımıza qələbə arzulayırıq. Onların ölkəmizin idman şərəfini layiqincə qoruyacaqlarına əminik. Ümid edirik ki, idmançılarımız Azərbaycan bayrağını uca edəcəklər. Biz idmançılarımızın yarışlarını müxtəlif arenalarda izləyəcəyik və onlara öz dəstəyimizi verəcəyik” — deyə Bağırzadə bildirib. 

Aydınlar Partiyası sədrinin birinci müavini Qorxmaz İbrahimli deyib ki, partiya rəhbərliyi açılış mərasimində iştirak edəcək: “Biz bu mötəbər idman yarışının sonadək yüksək səviyyədə keçməsini arzulayırıq. İdmançılarımızdan ancaq uğurlar, qələbə gözləyirik. İstəyirik ki, layiqli və güclü olan qazansın. Əsas məsələ yarışlarda hansı yeri tutmaq deyil, bu yarışların yüksək səviyyədə  keçməsidir. İstər-istəməz Avropa Oyunları ölkəmizdə idmanın inkişafına və gənclərin  beynəlxalq aləmə inteqrasiyasına öz müsbət töhfəsini verəcək.”

İbrahimli onu da əlavə edib ki, bacardığı qədər idmançıların yarışnı izləyib, onlara dəstək olacaq.

AKP sədri Rauf Qurbanovsa Azərbaycan idmançılarının ümumi komanda hesabında ən öncül yerlərdən birini tutacağını əmin olduğunu bildirib. “İnanıram ki, idmançılarımız ən çox qızıl və gümüş medalçılar sırasında olacaq. İstərdim ki, idmançılarımız ev sahibi kimi ümumi komanda hesabında birinci yerdə olsunlar. Belə bir idman yarışının ölkəmizdə keçirilməsindən qürur duyuruq və bunu təqdirəlayiq hadisə hesab edirik.”

ASDP sədri Araz Əlizadə açılış mərasimində iştirak etməklə idmançılarımıza dəstək olacağını qeyd edib. “Mən idmançılarımızdan uğurlu çıxışlar gözləyirəm. Əsas məsələ qalib olmaq deyil, gözəl idman oyunu nümayiş etdirməkdir. Bu gün kimin qalib gələcəyi barədə fikir söyləmək və ya proqnoz vermək çətindir. Ancaq idmançılarımıza qələbə arzulayıram” — deyə Əlizadə bildirib.

 

82
Teqlər:
mühüm hadisə, açılış mərasimi, idmanın inkişafı, oyunlar, partiya liderləri, Birinci Avropa Oyunlarının açılışında iştirak, Demokratik İslahatlar Partiyası, ADP, AMİP, Aydınlar Partiyası, AKP, ASDP, Yusif Bağırzadə, Rauf Qurbanov, Araz Əlizadə, Qorxmaz İbrahimli, Asim Mollazadə, Sərdar Cəlaloğlu, Azərbaycan, Bakı
Avropa Liqasının qrup mərhələsinin 2-ci tutu çərçivəsində Qarabağ - Vilyareal matçı

"Qarabağ" azarkeşlərini məyus etdi

42
(Yenilənib 23:52 29.10.2020)
Azərbaycanın "Qarabağ" və İspaniyanın "Vilyarreal" komandaları arasındakı UEFA Avropa Liqasının I qrupunun II tur matçı keçirilib.

BAKI, 29 oktyabr — Sputnik. "Qarabağ" və İspaniyanın "Vilyarreal" komandaları arasındakı UEFA Avropa Liqasının I qrupunun II tur matçı keçirilib.

Sputnik Azərbaycan xəbər verir ki, görüş Türkiyənin İstanbul şəhərindəki "Başakşehir Fatih Terim" stadionunda baş tutub.

Komandalar oyunun birinci hissəsini heç-heçə başa vurublar. İkinci hissədə isə "Qarabağ"ın oyunçusu Kvabena Ovusu fərqlənib. O, 78-ci dəqiqədə hesabı açıb. Lakin Ağdam klubunun azarkeşlərinin sevinci uzun çəkməyib. 2 dəqiqə sonra "Vilyarreal" Yeremi Pinonun vurduğu qolla hesabı bərabərləşdirib. Matçın 84-cü dəqiqəsində Pako Alkaser Ağdam klubunu cəzalandırıb. "Vilyarreal" ikinci qolla önə çıxıb. 

Oyuna əlavə edilən dəqiqələrdə "Vilyarreal" 3-cü topu "Qarabağ"ın qapısından keçirib. Üçüncü topu da 90+6-cı dəqiqədə penaltidən Pako Alkaser vurub.

Beləliklə, "Qarabağ"-"Vilyarreal" matçında oyun ispan klubunun qələbəsi ilə başa çatıb.

Bu oyunun nəticəsi olaraq xallarını 6-ya çatdıran "Vilyarreal" qrupda liderliyini möhkəmlədib. "Qarabağ" isə 1 xalla 3-cü pillədə qalıb.

42
Türkiyə Böyük Millət Məclisinin sədri Mustafa Şentop

Azərbaycan Türkiyə spikerləri: "Bu iki qardaş xalq həmişə bir-birinin yanında olacaq"

20
(Yenilənib 23:27 29.10.2020)
Türkiyə Böyük Millət Məclisinin Sədri Mustafa Şentop Türkiyənin bundan sonra da Azərbaycanın yanında olacağını və Azərbaycan torpaqlarının tezliklə tamamilə düşmən tapdağından azad olunacağı günü səbirsizliklə gözlədiklərini diqqətə çatdırıb.

BAKI, 29 oktyabr — Sputnik. Oktyabrın 29-da Milli Məclisin Sədri Sahibə Qafarova Türkiyə Böyük Millət Məclisinin Sədri Mustafa Şentopla telefonla danışıb.

Sputnik Azərbaycan-ın məlumatına görə, Milli Məclisin Sədri türkiyəli həmkarına 29 oktyabr - Cümhuriyyət Günü münasibətilə təbriklərini çatdırıb, qardaş türk xalqına tərəqqi və firavanlıq arzulayıb.

Milli Məclisin Sədri qardaş Türkiyə Respublikasının Ermənistan-Azərbaycan Dağlıq Qarabağ münaqişəsi ilə bağlı ölkəmizə göstərdiyi dəstəyə görə bir daha minnətdarlığını bildirib, iki qardaş xalqın həmişə bir-birinin yanında olacağına əminliyini ifadə edib.

Sahibə Qafarova Ermənistanın son dövrlər döyüş meydanında məruz qaldığı uğursuzluqlarla barışmayaraq mülki əhalini hədəfə aldığını və bunun insanlıq əleyhinə yönələn müharibə cinayəti olduğunu ifadə edib.

Sahibə Qafarova telefon söhbətinin sonunda bildirib ki, bütün Azərbaycan xalqı öz dövlətinin və Prezidentinin yanındadır. "Möhtərəm Prezidentimiz İlham Əliyevin rəhbərliyi ilə Azərbaycanda bərqərar olmuş güclü idarəçilik sistemi, iqtidarla xalq arasında mövcud olan sarsılmaz birlik Dağlıq Qarabağ məsələsinin tamamilə həllini təmin edəcək".

Təbriklər və xoş sözlər üçün təşəkkürünü bildirən Türkiyə Böyük Millət Məclisinin Sədri Mustafa Şentop Türkiyənin bundan sonra da Azərbaycanın yanında olacağını və Azərbaycan torpaqlarının tezliklə tamamilə düşmən tapdağından azad olunacağı günü səbirsizliklə gözlədiklərini diqqətə çatdırıb.

20