Narkoloji Reabilitasiya Mərkəzində

"İçəridə" - Narkomaniyadan azad olmaq mümkün imiş

2870
(Yenilənib 23:27 27.07.2021)
Narkomaniyadan əziyyət çəkənlərin böyük qismi, o cümlədən də cəmiyyət bu bəladan xilas yolunun olmadığını düşünsələr də, bu yoldan 9 il sonra qayıdanlar da var.

BAKI, 27 iyul — Sputnik. Buradakı insanlar bizdən tamamilə fərqlidirlər, otuz, qırx, əlli il bu bəla ilə yaşayanlar var. Onların əsas məqsədi məhz bizim kimi olmaq, bizim kimi yaşamaq - öz dilləri ilə desək, "ayıq qalmaq"dır. 

Bu gün narkomaniya cəmiyyət arasında sonu olmayan bir yol kimi tanınır. Əksəriyyət düşdüyü bu yoldan dönüşün olmadığını düşünür və bəladan xilas olmaq üçün heç bir mübarizə aparmır. Amma təcrübə bunun əksini sübut edir. Sputnik Azərbaycan narkomaniyadan əziyyət çəkən şəxslər üçün Mərdəkanda yerləşən "Həyat naminə" reabilitasiya mərkəzinə baş çəkib.

© Sputnik / Nigar Iskanderova
Narkoloji Reabilitasiya Mərkəzində

Doqquz illik əsarətdən sonra verilən qərar

Reabilitasiya mərkəzinin rəhbəri, 33 yaşlı Kənan Hacıyev həkim ailəsində böyüyüb və doqquz il ağır narkotik istifadəçisi olub. Daha sonra o, Belarusda "Gənclərin Sağlamlıq Mərkəzi"ndə reabilitasiyadan keçərək normal həyata qayıdıb. K.Hacıyev vaxtilə özü kimi olan insanlara yardım etmək üçün bu yolda addımlamağa qərar verib. "Narkotik asılılığı olan birinə ancaq bu problemi yaşamış şəxs kömək edə bilər", - fikirləşən K.Hacıyev Mərdəkanda yerləşən bağ evini məhz bu şəxslərin reabilitasiyası üçün mərkəzə çevirib. Ümumi ərazisi 13 sot olan reabilitasiya mərkəzi 7 otaqdan ibarətdir.  

© Sputnik / Nigar Iskanderova
Reabilitasiya mərkəzinin rəhbəri, 33 yaşlı Kənan Hacıyev

İçəridəyik, onlar kimi... Təxminən iyirmi nəfər birgə televizora baxır, söhbətləşir. Mərkəzi gəzirik: normal, səliqə-sahmanlı yataq otaqları, mətbəx və zal, bir sözlə, normal həyat yaşamaq üçün hər şərait var.

Zəmanətli, ödənişli "dönüş"

Mərkəz rəhbəri bizə fəaliyyətləri haqda məlumat verir: "Reabilitasiya mərkəzi kimi üç aydır, fəaliyyət göstəririk. Özüm isə bu sahə ilə artıq beş ildir, məşğulam. Əvvəl Azərbaycanda reabilitasiya mərkəzləri olmadığı üçün son üç il ərzində mənə kömək üçün müraciət edənləri xarici ölkələrə yollayırdım. Hazırda mərkəzimizdə iyirmi iki xəstə var. Burada sırf psixoloji yardım göstərilir, heç bir tibbi üsuldan istifadə edilmir. Mərkəzdə bir psixoloq və bu sahə üzrə çalışan mütəxəssislər var".

© Sputnik / Nigar Iskanderova
33 yaşlı Kənan Hacıyev

K.Hacıyev deyir ki, mərkəzdə həftədə üç dəfə böyük qruplar halında söhbətlər təşkil olunur, iki qrupu həmsöhbətimiz özü, bir qrupu isə müavini aparır. Həftədə bir dəfə psxioloji kurs və bir dəfə yoqa dərsləri olur. Psixoloji dəstək alan şəxslər gündəlik cədvəllə, rejimlə yaşayırlar: "İstədiyim vaxt həyətə çıxım, istədiyim vaxt televizora baxım, yaxud da başqa bir iş görüm - bunlara yol verilmir. Burada hər şey gündəlik cədvəl əsasında olur. Bizdə məcburi müalicə, məcburi olaraq kimisə saxlamaq yoxdur. Qeyd edim ki, hazırda burada olan xəstələr arasında üç ay müalicə alanlar da var".

Mərkəzdə psixoloji yardım ödənişlidir: "Aylıq ödəniş 1500 manatdır. Bu qiymətə daxildir: psixoloji müalicə, yemək və mərkəzdə yaşayış. Bəzən olur ki, kimisə ödənişsiz də müəssisəmizə qəbul edirik. Lakin hazırda ödənişsiz müalicə üçün yer yoxdur. Xeyriyyəçiliklə məşğul olan bir nəfər var, o da bizə yardım edir. Bundan başqa, qeyd edim ki, dövlət tərəfindən də dəstəyimiz var. Biz gördüyümüz işə zəmanət veririk. Tətbiq etdiyimiz proqram işləyir. Bu gün dünyada milyonlarla insan var ki, məhz bu proqram vasitəsilə bəladan xilas olub. Əgər şəxs içəridə öyrəndiyini buranı tərk edəndən sonra həyatında tətbiq edəcəksə, bu zaman, təbii ki, nəticə əldə edə biləcək".

© Sputnik / Nigar Iskanderova
Narkoloji Reabilitasiya Mərkəzində

Həmsöhbətimiz bizə müalicə proqramı haqda da danışır: "Bu proqram 1935-ci ildə Amerikada yaranıb. Lakin sırf Azərbaycanda tətbiq etdiyimiz proqram Belarusun Minsk şəhərində həyata keçirilən proqramın eynisidir. O, "12 addım" adlanır. Minskdə "Gənclərin Sağlamlıq Mərkəzi" var və orada bu proqram əsasında narkomaniyadan əziyyət çəkənlər xilas yolu tapırdılar. Mərkəzimizdə reabilitasiyanın birinci mərhələsi altı aydır. Sonra isə reabilitasiyanın eyni müddət təşkil edən ikinci mərhələsi gəlir. İlk altı ayda biz pasiyentlərə buradan çıxandan sonra necə həyat tərzi yaşanmalıdır, bunu öyrədirik. Növbəti altı ay ərzində isə şəxs könüllü işçi olur. O, iki gün öz evində yaşayır. İki gündən sonra buraya gələrək erkən mərhələdə olan şəxslərə yardımçı olur. Həm öz təcrübəsini bölüşür, həm də "ayıqqalma həyatı"nın bünövrəsini bərkidir".

İradəsizlik, yoxsa xəstəlik?

K.Hacıyev deyir ki, narkomaniyanın iradəsizliklə heç bir əlaqəsi yoxdur: "Bu bir xəstəlik olduğundan düzgün maariflənməyə ehtiyac var. Bəzən deyirlər ki, "sən kişisən, kişi ol, istifadə etmə, iradəli ol, canını qurtar". Bu belə deyil. Hər xəstəliyin simptomu olduğu kimi, asılı xəstəliyin də özünəməxsus simptomu var. Keçmiş narkotik istifadəçisi olaraq deyə bilərəm ki, narkotiki istəyib-istəməmək adamın əlində deyil. Sadəcə olaraq belə ifadə edə bilərəm ki, asılı şəxs kompleksli olur. O, özünə qapanan olur, təkliyi sevən olur, tez qıcıqlanır, tez özündən çıxır. Lakin narkotiki istifadə etdikdə bu kompleksləri azalır. Bu xəstəlik bir növ hissiyyatla bağlıdır. Qeyd edim ki, tətbiq etdiyimiz bu proqram insanlara narkotiksiz yaşamağı öyrədir".

© Sputnik / Nigar Iskanderova
Narkoloji Reabilitasiya Mərkəzində

"Son üç il ərzində yüz nəfəri xaricə müalicəyə göndərmişəm ki, onlardan 20-si bu bəladan xilas yolu taparaq ayıq həyat tərzinə qayıda bilib. Əslində, "12 addım" proqramı çətin deyil, sadəcə olaraq tələblərə əməl etmək lazımdır ki, bu insan sonrakı həyatını ayıq olaraq yaşasın. Buraya təzə gələn şəxs danışmasa da, hansı hisslər keçirir, onu bilirəm. Çünki o hissləri mən özüm də yaşamışam. Müəssisəmizə kimsə təzə gəlirsə, hər kəs ona yardım etməyə çalışır və həmin şəxs mərkəzin ən sevimli adamı olur. Burada hər kəs bir-birinə kömək edir ki, ayıq qalsın", - deyə o əlavə edir.

Asılı insan narkotiklə yanaşı, bəzi vərdişlərdən də imtina etməlidir

Həmsöhbətimiz bildirir ki, reabilitasiya daxilində proqramdan söhbət gedirsə, burada dava, söyüş, aqressiya yolverilməzdir: "Buradakı sakinlər köhnə vərdişlərdən, xasiyyətlərdən əl çəkərək yeni həyat tərzi yaşamağa vərdişkar olurlar. Burada sakinlərimiz əsəbləşərkən emosiyaları idarə etməyi, cilovlamağı öyrənirlər. Asılı insan narkotiklə yanaşı, bəzi vərdişlərdən də imtina etməlidir. Məsələn, belə şəxs narkotiki tərgidərkən, həm də araqdan imtina etməlidir. Çünki içki qorxu hissini aradan qaldırır. Qorxu hissi olmadıqda adi normal insan belə, içəndə, loru dillə desək, şirə dönür. Qorxu hissi olmadıqda insan yenidən narkotiklə olan həyatına qayıda bilər. Belə şəxslər nə psixotrop dərman ata, nə də yüngül narkotik istifadə edə bilərlər".

© Sputnik / Nigar Iskanderova
Narkoloji Reabilitasiya Mərkəzində

Mərkəz sakinləri "ayıq həyat" yaşamağın zövq verdiyini bildirirlər. Onlar artıq gül-çiçəyin qoxusunu hiss etdiklərini, rəngləri seçə bildiklərini, həyatın nə qədər şirin olduğunu, o cümlədən də narkomaniyanın səbəb olduğu itki və bəlaların mahiyyətini anlamağa başladıqlarını deyir, həyat hekayələrini dilə gətirirlər. Bu barədə isə daha ətraflı növbəti yazılarda...

Göründüyü kimi, narkomaniyadan azad olmaq mümkün imiş. Amma bu sadəcə boş bir təsəlli, gərəksiz bir ümid deyil. On iki addımla yeni həyata qədəm atmaq olar. Narkomaniya "ağ ölüm"dür. Hər şey əlinizdə ikən bu bəlaya düçar olmayın, özünüzü, övladlarınızı qoruyun!

Eləcə də oxuyun:

2870
Teqlər:
narkotik, narkotik maddə, narkotik asılılığı, narkotik istifadəçisi, bərpa, reabilitasiya, mərkəz, müsahibə

Rusiyalı dənizçilər Şüvəlanda həmkarlarının xatirəsini yad ediblər

2
Xəzər dənizinin tam xəritəsini hazırlamaq üçün məlumat toplayan gəmi 1857-ci ildə Abşeron yarımadasının sahilində pis hava şəraiti üzündən qəzaya uğrayıb, 22 nəfər həlak olub.

BAKI, 18 sentyabr - Sputnik. Dostluq səfəri ilə ölkəmizdə olan Rusiya Federasiyası Hərbi Dəniz Donanmasının nümayəndə heyətinin üzvləri Abşeronun Şüvəlan kəndində "Kuba" gəmisinin dənizçilərinin abidəsini ziyarət edərək 164 il əvvəl həlak olmuş həmkarlarının xatirəsini yad ediblər.

1857-ci il sentyabrın 14-də qəzaya uğrayan "Kuba" paroxodu Xəzər Astronomiya və Hidroqrafiya ekspedisiyasının rəhbərliyi ilə Xəzər dənizinin tədqiqatı ilə məşğul idi. İyirmi iki nəfərin həlak olduğu qəzada əlli yeddi nəfərin həyatını qurtarmaq mümkün olub. 

© Sputnik
Rusiya Federasiyası Hərbi Dəniz Donanmasının nümayəndə heyəti batmış "Kuba" gəmisinin dənizçilərinin xatirəsinə ucaldılmış abidə önündə

Təxminən bir əsr yarım əvvəl Həştərxandan yola salınan gəmi Xəzər dənizinin hərtərəfli və tam təsviri, onun dəqiq xəritəsinin hazırlanması tapşırığını almışdı. Ancaq qəza günü hava dumanlı, yağışlı idi, qasırğa gəmini Şüvəlan burnunda əvvəllər qeydə alınmayan sualtı daşlara çırpdı.

Bir qədər sonra qəza yerinin yaxınlığında memar İohann Edelin müəllifi olduğu abidə ucaldıldı. Azərbaycan müstəqillik əldə edəndən sonra, 2005-ci ildə, Böyük Vətən Müharibəsində Qələbənin 60 illiyi ərəfəsində abidə bərpa olundu.

© Sputnik
Batmış "Kuba" gəmisinin dənizçilərinin xatirəsinə ucaldılmış abidə.

"Astraxan" və "Anatoli Qujvin" hərbi gəmiləri ilə şənbə günü Bakıya gələn Rusiya HHD dənizçiləri qəza qurbanlarının abidəsi önünə güllər düzərək hərbi salam veriblər.

  • Batmış "Kuba" gəmisinin dənizçilərinin xatirəsinə ucaldılmış abidə.
    © Sputnik
  • Rusiya Federasiyası Hərbi Dəniz Donanmasının nümayəndə heyəti batmış "Kuba" gəmisinin dənizçilərinin xatirəsinə ucaldılmış abidə önündə
    © Sputnik
  • Rusiya Federasiyası Hərbi Dəniz Donanmasının nümayəndə heyəti batmış "Kuba" gəmisinin dənizçilərinin xatirəsinə ucaldılmış abidə önündə
    © Sputnik
1 / 3
© Sputnik
Batmış "Kuba" gəmisinin dənizçilərinin xatirəsinə ucaldılmış abidə.

Qeyd edək ki, şənbə günü, sentyabrın 18-də dostluq səfəri ilə ölkəmizdə olan Rusiya Federasiyası Xəzər Donanmasının hərbi nümayəndə heyətinin rəhbəri ilə Azərbaycan Hərbi Dəniz Qüvvələrinin (HDQ) komandanlığı arasında işçi görüşü keçirilib.
Azərbaycan HDQ-nin komandanı kontr-admiral Sübhan Bəkirov Rusiya HDD-sı Xəzər flotiliyasının gəmilərin dəstə komandiri 2-ci dərəcəli kapitan Vladimir Zaytsevin rəhbərlik etdiyi nümayəndə heyətini qəbul edib.
Görüşdə Azərbaycan HDQ ilə Rusiya Federasiyası Xəzər Flotilyası arasında dostluq münasibətləri və qarşılıqlı maraq doğuran digər məsələlər müzakirə olunub.

Səfər sentyabrın 20-dək davam edəcək.

 

2
Teqlər:
rusiyalı, hərbi dənizçilər, Bakı, Şüvəlan, xatirə, abidə
Əməkdar İncəsənət xadimi, professor Amin Novruzov

Film çəkənlərlə çəkməyənlərin dediyi dərs: "O, Azərbaycan kinosunu qara günə qoydu"

73
(Yenilənib 22:32 18.09.2021)
"Özgə vaxt", "Qızıl qaz", "Cin mikrarayonda", "Şərikli çörək" və s. kimi filmlərə ekran həyatı verən Amin Novruzov Sputnik Azərbaycan-a müsahibəsində kinomuzun hazırkı və əvvəlki durumunu müqayisə edib, köhnə filmlərin çəkiliş meydançasından maraqlı anları yada salıb.

BAKI, 18 sentyabr — Sputnik. Amin Novruzov - Azərbaycanın əməkdar incəsənət xadimi, 60-dan artıq filmin operatorudur. İndiki adla desək, təsvir rejissorudur. ÜDKİ-nin kinooperatorluq fakültəsində V. Yusovun emalatxanasında təhsil alan sənətkar 1983-cü ildən "Azərbaycanfilm" kinostudiyasında quruluşçu operator kimi fəaliyyət göstərib. Uzun illər Azərbaycan Dövlət Mədəniyyət və İncəsənət Universitetində müəllim kimi fəaliyyət göstərən Novruzovun qonağı olduq.

Səhhəti ilə əlaqədar sənətdən və universitetdən uzaqlaşıb. Azərbaycan kinosunun dünəni və bugünkü problemlərindən Sputnik Azərbaycan-a bəhs edən Amin müəllim bildirir ki, son dövrlər səhhətilə bağlı Azərbaycan kinosunu izləmir. Televiziyada yayımlanan seriallara gəldikdə isə, sənətkar düşünür ki, onlara da baxmasa, yaxşıdır: "O seriallara baxıb zövqümü korlamaq istəmirəm. Bir "Yuxu kimi" serialına baxıram, o da tələbəmin işidir deyə baxıram. Digərlərinə baxanda, ona "yaxşı" demək olar".

Ötən illərin xiffətini çəkən kinooperator kinostudiyanın Sovet dönəmindəki fəaliyyətindən söhbət açarkən bildirir ki, bir vaxtlar kinostudiya kino adamları ilə aşıb-daşırdı. İndi isə tərk edilmiş xarabalığa bənzəyir. Hərdən bir-iki heç kəsə lazım olmayan şou proqramları buranın pavilyonunda çəkirlər, vəssalam. Halbuki Sovet dönəmində o pavilyonda filmlər çəkilərdi.

Amin müəllim vurğulayır ki, kinonun bugünki hala gəlib çatmasında ən böyük günahkar keçmiş mədəniyyət naziri Əbülfəz Qarayevdir: "Qarayev Azərbaycan kinosunu qara günə qoydu. Bu sahə tamamilə çökdü onun dövründə. O illər üçün çox darıxıram. Bugünkü kimi deyildi o vaxt. Dəhlizlərdə o qədər insan olurdu ki, iynə atsan, yerə düşməzdi. Ən əsası da hər kəs başını aşağı salıb öz işini görürdü. Və insanlar işlərini məsuliyyətlə yerinə yetirirdilər. Ümid edirəm ki, yeni nazir bu sahəni dirçəldər.

Kinostudiyanın bütün maddi- texniki bazası məhv oldu köhnə nazirin dövründə. Evim kinostudiyanın yaxınlığındadır. Həkimim mənə hər gün piyada gəzməyi məsləhət görüb. Mən də hər gün, demək olar ki, kinostudiyanın həyətini gəzirəm. Ürəyim ağrıyır, heç cür oranın o vəziyyəti ilə barışa bilmirəm. Yeni direktor Fariz Əhmədov nəisə etməyə çalışır, amma maddi-texniki baza yoxdur".

2018-ci ildən Azərbaycan Dövlət Mədəniyyət və İncəsənət Universitetindən uzaqlaşan həmsöhbətimiz bildirir ki, film çəkməyən müəllimin univeristetdə dərs deməsi doğru deyil: "İndi bilmirəm, orada kim var, kim yox. Amma eşitdiyimə görə, film çəkməyən insanlar dərs deyirlər. Kino sahəsində tələbə yetişdirən müəllimin gərək film sahəsində praktikası olsun. Savadı olmayan, heç bir film çəkməyən müəllimin ixtiyarı yoxdur auditoriyaya girməyə".

""Azərbaycan kinosu" deyiləndə nədənsə insanların ağlına ilk Sovet dönəmində çəkilən filmlər gəlir. Halbuki son dönəmlər də film çəkilir. Sizcə, bu nədən qaynaqlanır?" sualına Novruzovun cavabı belə oldu: "Bizim dövrümüzdə film çəkməyə gedəndə 7 maşın gedirdik – operatorun, rejissorun, qrimyorların, aktyorların maşınları ayrı-ayrı olardı. İndi isə kino avadanlıqları və kinonun bütün yaradıcı heyəti bir maşında gedir. Ona görə də aləm qarışır bir-birinə. Film də keyfiyyətsiz alınır. Həm də komanda olaraq çox mehriban olurduq".

Amin müəllim söhbət zamanı onu da bildirdi ki, o dövrdə sənət adamına xüsusi diqqət, hörmət var idi. Hansısa ucqar kəndə gedəndə təmtəraqla qarşılanırdılar. Bunun səbəbi sənət adamlarının sənətlərinə olan sevgisindən irəli gəlirdi. İndi isə filmlər efirə gedir, tamaşaçı da baxır ki, film olduqca bayağıdır. Elə ona görə də həmin filmdə çəkilən aktyorun cəmiyyətdə nüfuzu olmur:

"İndikilər çox müştəbehdilər, elə ona görə də insanlar onlara hörmət eləmirlər. Ramiz Əzizbəyli ilə iki film çəkmişəm – "Yalan" və "Bəxt üzüyü". "Yalan" filminin bəzi kadrlarını Qubada çəkmişdik. Bizi çox hörmətlə qarşılamışdılar. Biz bir həyətə girdik. Orada istədiyim fakturanı almaq üçün dəyişikliklər etdik. Filmdən sonra hər şeyi əvvəlki vəziyyətinə qaytardıq. Amma gənc həmkarlarımız gedirlər hansısa rayona, ziyanlıq vururlar, heç üzürxahlıq da eləmirlər. İnsanlar onlara necə dəyər versinlər?"

Müsahibimiz ekran müəllifi olduğu filmlərin pərdəarxası məqamaları, başına gələn ekstrimləri, məhrum sənətkarla olan xatirlərini bizimlə bölüşüb: ""Qatır Məmməd" filmində Teyyub Axundovun köməkçisi idim. Şahmar Ələkbərov mənə dedi ki, "Atam, (mənə "atam" deyirdi) gedək atları gətirək, gələk. Dedim, ay Şahmar, mən at sürə bilmirəm axı, qorxuram atdan. Dedi, sən qorxma, mən yanında olacağam. Mən, aktyor Rafiq Əzimov, Ceyhun Mirzəyev və Şahmar mindik maşına, getdik atları gətirməyə. O vaxt film üçün atları Dağıstandan gətirirdilər. Atları mindik, gəlib Biləcəri tərəfə çatanda Şahmarın atı hürkməyə başladı. Mənim də atım ona qoşuldu. Bir də baxdım ki, camaat başıma yığılıb. Sən demə, at məni yerə çırpıb. Şahmar dedi, qalx ayağa, min ata, gedək. Daha yıxılmayacaqsan. Dedim, yox, mən bir də ata minmərəm".

Amin müəllim 1978-ci ildə lentə alınan "Qaynana" filminin çəkiliş prosesindən söhbət açıb:

"Nəsibə Zeynalova "Qaynana" filminə qədər başqa filmlərdə çəkilmişdi, amma onlar epizodik idi. "Qaynana" filmində isə baş rolu ifa edirdi. Nəsibə xanım çox peşəkar teatr aktrisası idi. Teatr aktyorları da həmişə improvizə edirdilər. Bu da filmin rejissoru Hüseyn Seyidzadənin xoşuna gəlmirdi. Aralarında həmişə mübahisə olurdu. Nəsibə xanım oturub ağlayırdı, sonra Hüseyn müəllim onun könlünü alırdı, barışırdılar və çəkiliş davam edirdi".

İllərdir ki, Azərbaycan tamaşaçısının sevə-sevə izlədiyi "Bəxt üzüyü" filmində də maraqlı məqamlar olub. Həmsöhbətimiz filmlə bağlı bəzi faktları bölüşüb: "Tanrıverdinin ad günü olan səhnəni əl kamerası ilə çəkirdik. Dava səhnəsini çəkməzdən öncə Ramiz Afaq xanıma deyib ki, yıxılanda sazı at yerə. Üç dubl çəkdik, sazı əlindən buraxmadı ki, buraxmadı. Ramiz də hirsləndi ki, burax da sazı. Sən demə, sazın sahibi Afaq xanıma əvvəlcədən deyib ki, sazı əlinizdən buraxmayın, sınar. Axır biz elə çəkdik ki, Afaq xanım yıxılır və sazı qarnının üstündə çalır. İndi düşünürəm ki, yaxşı ki, sazı buraxmayıb, ona da bir don geyindirəcəkdilər".

"Başqa bir maraqlı fakt, Sevda dənizdə zırpının batdığını xəbər verir, Afaq da qaçır. Mən və assistentim onun dalınca qaçırdıq. Ayağı daşa dəyir, yıxılır, mən və assistentim də onun üstünə yıxıldıq. Qorxdum ki, kamera sınar, xoşbəxtlikdən, salamat idi. Həmin səhnəni çəkən vaxt kameranı qurdum, Afaq da kameraya tərəf qaçırdı. O da kök idi axı, dedim, ay Allah, gəlib kameraya dəysə, kamera sınacaq. Baxmayaraq ki, dolu bədənli idi, amma həddindən artıq sürətlə qaçırdı. Gəlib kameraya çatanda uşaqlar arxadan tutdular ki, gedib kameranı yıxmasın. Həm də yuxarıdan aşağıya tərəf qaçdığından sürət daha da artır.

Oradakı araq səhnəsi də təbii idi, həqiqətən də arağın tapılmayan vaxtı idi. Rəhmətlik Ramizə dedim, əşşi, neyləyirsən arağı, gəl içinə su tökək. Dedi yox, araq olmalıdır. Güc-bəla ilə araq tapdıq", - deyə A. Novruzov əlavə edib.

"Özgə vaxt", "Qızıl qaz", "Cin mikrarayonda", "Ləqəbi "İka"dır", "Şərikli çörək", "Son döyüş", "Arxada qalmış gələcək" və s. kimi filmlərə ekran həyatı verən Amin Novruzov hazırda təqaüd almır. O təqaüdlə bağlı hələ Əbülfəz Qarayevin dövründə altı il Mədəniyyət Nazirliyinə müraciət edib, amma cavab verməyiblər. Məsələ ilə bağlı Mədəniyyət Nazirliyinə müraciət etdik. Nazirlikdən bildirdilər ki, son iki ildə heç bir sənət adamına təqaüd təyin olunmayıb.

Eləcə də oxuyun:

73