İsitrahət mərkəzi, arxiv şəkli

Akvaparklar hovuzlar yoxlanılmır - Ümid sahibkarların insafına qalıb

1353
Akvaparklar, hovuzların və su attraksionlarının yerləşdiyi məkanlar sahibkarlıq subyekti sayılır. Sahibkarlıq subyektlərində yoxlamalar dayandırıldığından, belə məkanlarda ərazi üzrə gigiyena və epidemiologiya idarələri tərəfindən heç bir yoxlama aparılmır.

BAKI, 21 iyul — Sputnik. Havalar isti keçdiyindən dənizlə yanaşı, insanlar dincəlmək üçün hovuzların olduğu istirahət mərkəzlərini də seçirlər. Pandemiya dövründə xaricə səyahət qiymətlərinin bahalaşması və məhdudlaşdırılması su attraksionlarına tələbatı artırıb. Qeyd edək ki, yay fəslində bu məkanların əsas müştəriləri uşaqlar olur. Bəs görəsən, hovuzların olduğu istirahət məkanlarında, akvaparklarda hovuzların gigiyenik vəziyyətinə nəzarət olunurmu?

Dənizkənarı akvaparklarda yoxlamalar dayandırılıb

Sputnik Azərbaycan-a bununla bağlı açıqlama verən Səhiyyə Nazirliyinin Respublika Gigiyena və Epidemiologiya Mərkəzinin şöbə müdiri Ziyəddin Kazımov bildirib ki, akvaparklar, hovuzlar və su attraksionlarının yerləşdiyi məkanlar sahibkarlıq subyekti sayılır. Sahibkarlıq subyektlərində yoxlamalar dayandırıldığından, belə məkanlarda ərazi üzrə gigiyena və epidemiologiya idarələri tərəfindən heç bir yoxlama aparılmır.

Z.Kazımov bildirir ki, ancaq şikayət daxil olarsa, İqtisadiyyat Nazirliyinin razılığı əsasında həmin məkanlarda GEM-lər tərəfindən hovuzların təmizliyi yoxlanıla bilər. Şöbə müdirinin sözlərinə görə, dəniz kənarında yerləşən istirahət mərkəzlərinin hovuzlarında gigiyenik norma və tələblərin yoxlanılması üçün sahibkarlar özləri ərazi üzrə GEM-lərə müraciət etməlidirlər. Yalnız bu halda ərazi üzrə GEM hovuzların sanitar-gigiyenik durumunu yoxlaya bilər:

“Əvvəllər biz belə obyektləri planlı şəkildə yoxlayırdıq. Amma sahibkarlıq subyektlərində yoxlama dayandırıldıqdan sonra bu, ancaq sahibkarla bağlanan müqavilə əsasında baş tuta bilər”.
İstirahət mərkəzlərindən birinin hovuzu
© Sputnik / Zulfiyya Guluyeva
İstirahət mərkəzlərindən birinin hovuzu

Ümid qalıb sahibkarların insafına...

Z.Kazımov deyir ki, sahibkarlar könüllü şəkildə hovuzların təmizliyinin yoxlanılması üçün ərazi üzrə GEM-lərlə müqavilə bağlaya bilərlər. Həmsöhbətimiz deyir ki, bu zaman hovuz suyu kimyəvi-bakterioloji müayinədən keçirilir. Sudan nümunə götürülərək tərkibində xlorun miqdarı, mikroblara görə kimyəvi və bakterioloji müayinələr aparılır.

Şöbə müdiri bildirir ki, hovuzlarda istifadə edilən su mütləq şəkildə içməli su olmalıdır. Həmçinin istirahət mərkəzlərində hovuz suyuna xlor vurulur: "Bunun üçün xlorator vasitəsilə hovuza xlorlu su vurulur. Bu zaman suyun tərkibindəki bakteriyalar məhv olur. Suda bakteriyalar, bağırsaq çöpləri olarsa, bu həmin hovuzda çimən insanda mədə-bağırsaq pozğunluğuna, gözlərdə qızartının, sulanmanın yaranmasına səbəb ola bilər", - deyə Z.Kazımov bildirir.

RGEM səlahiyyətlisinin sözlərinə görə, hovuzlarda suya xlorun normadan artıq qatılmasına yol verilmir. Onun sözlərinə görə, hovuz suyunda xlorun səviyyəsi 0.3-0.5 mq, suyun pH dəyəri isə 7.2-7.6 olmalıdır.

"Hovuz suyuna xlorun az, yaxud çox qatılması hovuzda çimən insanın orqanizmi üçün fəsad verə bilər. Normaya görə, hovuz suyuna 0.3-0.5 mq miqdarda xlor qatılmalıdır. Bu miqdardan az və yaxud çox ola bilməz. Bu zaman hovuzda çimən insanın gözlərinin qızarması kimi hallara rast gəlinə bilər.

Hovuz suyunda koli əmsalı 3-dən çox olmamalıdır. Əks halda, mədə-bağırsaq pozğunluğu yarada bilər. Uşaqların çimdiyi hovuzlarda isə bu normaya nəzarət olmaldır. Çünki uşaqlar çimərkən su daha çox ağızdan mədəyə keçir. Bu zaman hovuz suyunda bağırsaq çöpü, bakteriyalar olarsa, eləcə də koli əmsalı normadan çox olarsa, mədə-bağırsaq pozğunluğuna, ishal hallarına gətirib çıxarda bilər", - deyə Z.Kazımov bildirir.
İstirahət mərkəzlərindən birinin hovuzu
© Sputnik / Zulfiyya Guluyeva
İstirahət mərkəzlərindən birinin hovuzu

Pandemiya dövründə hovuzlardan istifadəyə dair təlimatlar var, amma...

Bundan əlavə, Z.Kazımov pandemiya dövründə hovuzlardan istifadəyə dair təlimatların olduğunu söyləyir. Onun sözlərinə görə, su istirahət mərkəzlərində koronavirus infeksiyasının (COVID-19) profilaktikasına dair metodiki göstərişlər təsdiqlənib. Z.Kazımov deyir ki, həmin metodiki göstərişə görə, akvaparkların girişlərində termometriya təmin edilməlidir. Simptomu olanlar akvaparklara buraxılmamalıdırlar. Fiziki məsafənin qorunması məqsədilə çətirlərin oxlarının arasında minimal məsafə 4 m, insanlar arası fiziki məsafə 2 m (ailə üzvləri istisna olmaqla) saxlanılmalıdır. Hovuzlarda suyun tərkibindəki dezinfeksiyaedici vasitələrin konsentrasiyası beynəlxalq norma və standartlara uyğun olaraq tövsiyə olunan yuxarı hədlərdə saxlanmalıdır.

Vətəndaşların təmasda olduğu əşya və səthlər mütəmadi dezinfeksiya edilməlidir. Təmizlik vasitələri və dezinfeksiyaedici maddələrin fasiləsiz təmin edilməsi vacibdir. Həmçinin hovuz və akvaparkların ərazilərinə əl dezinfektantları üçün nəzərdə tutulmuş dispenserlər qoyulmalı, hovuz və akvaparkların əməkdaşları yetərli sayda tibbi maska və əlcəklərlə təmin olunmalıdırlar.

"Hər şey qaydasındadır" desələr də, sənəd təqdim edən yoxdur

Paytaxtda dəniz kənarında yerləşən istirahət mərkəzlərindən isə sorğumuza cavab olaraq bildirdilər ki, hovuzların təmizliyinə daxili qaydalara uyğun olaraq riayət edilir. Həmçinin COVID-19 pandemiyasına görə tələb olunan şərtlərə əməl edilir. Müştərilərin sağlamlığına zərər dəyməməsi üçün suya lazımi miqdarda xlor qatılır, mütəmadi dərmanlama işləri aparılır. İstirahət mərkəzlərindən həmçinin Respublika Gigiyena və Epidemiologiya Mərkəzinin kommunal gigiyena bölməsi ilə müqavilə bağladıqlarını da söylədilər.

Qeyd edək ki, dəniz kənarında yerləşən akvaparklar hovuzda dərmanlama işlərinin aparıldığını söyləsələr də, ötən həftə üz tutduğumuz akvaparklar arasında bu sənədi təqdim edən olmadı.

Akvaparklarda qiymətlər bahalaşıb

Buna baxmayaraq, dəniz sahilində yerləşən akvaparklarda qiymətlər fantastik dərəcədə bahalaşıb. Əlaqə saxladığımız su attraksionu olan akvaparklarda giriş qiyməti həftə içi 15-20, həftə sonları isə 25-35 manatdır. “Novxanı Aquapark”da 2-12 yaş arası giriş adi günlərdə 15, həftəsonu isə 20, 12 yaşdan yuxarı giriş qiyməti həftəiçi 20, həftəsonu 25 manat təşkil edir. Novxanıda “Spring Hotel”də isə akvaparka giriş qiymətləri həftəiçi 15, həftəsonu 20 manatdır. 5 manat isə adambaşına depozit tələb olunur. Bundan əlavə, akvaparklara giriş zamanı nəinki yemək, içəriyə bir litr içməli su belə, buraxılmır.

İstirahət mərkəzlərindən birinin hovuzu
© Sputnik / Zulfiyya Guluyeva
İstirahət mərkəzlərindən birinin hovuzu

Həkimlər təhlükə barədə xəbərdarlıq edirlər!

Həkimlər isə dəniz sahilində hovuzu olan istirahət mərkəzlərindən, akvaparklardan istifadə zamanı əhalini ehtiyatlı olmağa səsləyirlər. Terapevt Emin Dadaşzadə Sputnik Azərbaycan-a açıqlamasında bildirib ki, belə məkanlarda sahibkar müştəridən ödəniş tələb etdiyi kimi, müştəri də hovuzun sanitar-gigiyenik vəziyyətinə dair sahibkardan sənəd tələb etməlidir:

"Hovuzlarda suya xlor qatılmalıdır. Əks halda, suda bakteriyaların, bağırsaq çöplərinin olması qaçılmazdır. Bundan əlavə, hovuz suyu vasitəsilə keçən ən təhlükəli xəstəliklərdən biri də dəri xəstəlikləridir. Hovuz suyundan dəmrov, dermatit, kontakt dermatitləri, qoturluq kimi təhlükəli xəstəliklər keçə bilər. Ona görə də istirahət məkanlarında hovuzlardan istifadə zamanı ehtiyatlı olmaq vacibdir. Həmçinin də çimərkən su eynəyindən istifadə etmək lazımdır ki, xlorlu su gözün selikli qişasını zədələməsin".

Terapevt bildirir ki, dəniz suyu daha çirkli olsa belə, dəniz suyunun duzlu olması bakteriyaları öldürür. Hovuzlarda isə bakteriyaların məhv edilməsi üçün normaya uyğun xlorlama işləri aparılmalıdır.

Eləcə də oxuyun:

1353
Teqlər:
isti, sahibkar, həkim, xəstəlik, yoxlama, hovuz
İvan Tixonov

On nəfərə bir qələbə: Azərbaycanlı idmançıların Tokioda ilk günü

12
Tokio Olimpiadasında ilk yarış gününün nəticələrinə görə, medal sıralamasında üç qızıl və bir bürünc medal qazanan Çin birincidir.

BAKI, 24 iyul - Sputnik. Tokio Yay Olimpiya Oyunlarının ilk yarış günü azərbaycanlı idmançılar üçün uğursuz keçdi. Sputnik Azərbaycan bildirir ki, onlardan yalnız biri uğurlu start götürə bilib.

Cüdo

İlk məyusedici xəbərlər cüdodan gəldi. Kəramət Hüseynov (60 kq) və Aişə Qurbanlı (48 kq) ilk pillələrdən yarışdan ayrıldılar. Hüseynov öncə britaniyalı Eşli Makkenzini udub, gürcü Luxumi Çxvmianiyə uduzdusa, Qurbanova elə ilk görüşündəcə Katarina Koştaya (Portuqaliya) məğlub oldu.

Veloyürüş

Vaxtından əvvəl yarışı dayandıranlardan biri də velosipedçi Elçin Əsədov oldu. 234 km-lik şosse yürüşünün, demək olar ki, yarısını keçəndən sonra yıxıldı. 

Güllə atıcılığı

Snayperimizi Ruslan Lunyov da uğursuzluğa düçar oldu. 10 metrlik məsafəyə pnevmatik tapançadan atəşdə 20-ci yerə düşərək finala çıxa bilmədi. Ancaq birinci gün çıxış edən idmançılarımızın çoxundan fərqli olaraq, Lunyov hələ Oyunlarda iştirakını yekunlaşdırmayıb - 25 m-lik məsafəyə xırda kaliberli tapançadan atəş yarışında da qüvvısini sınayacaq. 

Üzgüçülük

 

Üzgüçülərimiz Maksim Şemberev və Məryəm Şeyxəlizadəxangah Tokiodakı Olimpiadada uğursuz çıxış ediblər.

400 m məsafədə kompleks üzgüçülükdə çıxış edən Şemberev 4:19.40 dəqiqə nəticə ilə çıxışını yekunlaşdırıb. O, öz yarımqrupunda sonuncu - səkkizinci yer tutub. Ümumi sıralamada isə 29 iştirakçı arasında 26-cı ola bilib. Yarımfinala çıxa bilməyən Şemberev Olimpiadadakı işini yekunlaşdırıb.

Şemberev üçün bu, ikinci Olimpiadadır. 2012-ci ildə Londonda o, Ukrayna bayrağı altında çıxış edirdi.

100 m məsafədə batterflyay üsulu ilə yarışda Məryəm Şeyxəlizadəxangah finişə 1:01,37 dəqiqə nəticə ilə çataraq, üç nəfərdən ibarət yarımqrupda birinci olub. Yekun hesabda isə 33 yarışçı arasında 30-cu olub və o da Tokiodakı çıxışını bitirib.

 

Məryəmdən kimsə nəticə gözləmirdi, o, Beynəlxalq Federasiyanın kvotası ilə Olimpiadaya gəlib, Şemberev isə lisenziya normativini yerinə yetirmişdi və ən azı, onun yarımfinala çıxacağına ümid edirdik.

Boks

İdman həvəskarlarına ən böyük məyusluğu isə boks yarışları yaşatdı. Titullu idmançı, Riodakı 2016-cı il Olimpiadasının gümüş mükafatçısı Lorenso Sotomayordan (69 kq), heç olmasa, medallar uğrunda mübarizə gözlənilirdi, birinci dövrədən kənarda qalmaq yox. O isə 1/16 finalda Gürcüstan təmsilçisi Əsgərxan Madiyevə uduzdu. Görüşü üçüncü raundda Sotomayorun zədəsi səbəbindən (qanaxma) saxladılar, ancaq Azərbaycan yığmasının kubalı legioneri üçün qələbə ümidi heç yox idi də: ilk iki raundu o uduzmuşdu.

57 kq çəki dərəcəsində çıxış edən boksçumuz - Tayfur Əliyev növbəti mərhələyə adlamağa layiq idi. Çünki 1/16 mərhələdə Vyetnam təmsilçisi Duaonq Van Nquenə qarşı yaxşı döyüşürdü. Ancaq hakimlər mübahisəli qərar verərək qələbəni vyetnamlının adına yazdılar (2:3).

 

Boksçumuz Məhəmməd Abdullayev (91 kq çəki dərəcəsi) isə Azərbaycan təmsilçiləri arasında Tokiodakı Olimpiadada qələbə qazanan yeganə idmançı oldu. 1/16 finalda o, Bəhreyn təmsilçisi Denis Latipovla görüşündən 3:1 hesabı ilə qalib ayrıldı. Düzdür, püşkatmada onun heç bəxti gətirməyib: növbəti mərhələdə o, dünya çempionu, Özbəkistan təmsilçisi Bahodir Calolovla görüşəcək. Bu görüş iyulun 29-da olacaq.

İdman gimnastikası 

Təmsilçilərimizdən Tokiodakı ilk yarış günündə sonuncu çıxış edən isə idman gimnastı İvan Tixonov oldu. O, təsnifatda 45-ci yer tutaraq, adını finala yazdıran 24 nəfərin arasına düşə bilmədi.

Medal hesabı

Tokio Olimpiadasında ilk yarış gününün nəticələrinə görə, medal sıralamasında üç qızıl və bir bürünc medal qazanan Çin birincidir. İkinci yerdə Yaponiya ilə İtaliya qərarlaşıblar: hərəyə bir qızıl və bir gümüş medal. İlk onluğa həmçinin 4. Koreya (1, 0, 2), 5. Macarıstan, Kosovo, Tailand, Ekvador, İran (1, 0, 0), 10. Serbiya, Rusiya (0, 1, 1) daxildir.

12
Teqlər:
atıcılıq, gimnastika, cüdo, şosse velosipedi, üzgüçülük, boks, idmançılar, azərbaycanlı, Tokio Yay Olimpiya Oyunları

Təhsil naziri müəllimlərin imtahanı ilə bağlı söz verdi

10
Təhsil naziri əmin edib ki, araşdırmaların nəticəsinə əsasən növbəti 3 gün ərzində müvafiq qərarlar qəbul ediləcək və ictimaiyyətə açıqlanacaq.

BAKI, 24 - iyul - Sputnik. Azərbaycanın Təhsil naziri Emin Əmrullayev müəllimlərin işə qəbulu ilə əlaqədar keçirilmiş imtahanlardan narazılıqlara dair açıqlama verib.

"2021-2022-ci tədris ili üzrə müəllimlərin işə qəbulu imtahanlarında namizədlərə təqdim olunmuş test tapşırıqları haqqında sosial mediada yayılmış narazılıqlardan məlumatlıyıq. Bunları nəzərə alaraq, ekspert komissiyası tərəfindən test tapşırıqlarının müxtəlif seanslar üzrə müqayisəli elmi-statistik təhlili aparılacaq", - deyə nazir sosial şəbəkə hesabında qeyd edib.

O əmin edib ki, araşdırmaların nəticəsinə əsasən növbəti 3 gün ərzində müvafiq qərarlar qəbul ediləcək və ictimaiyyətə açıqlanacaq.

 

Qeyd edək ki, imtahanda iştirak edən müəllimlər sosial şəbəkələrdə xüsusilə ədəbiyyatdan verilən sualların məzmunundan, ümumilikdə isə suallar üçün az vaxt ayrılmasından şikayət ediblər.

Eləcə də oxuyun:

10
Teqlər:
imtahan, işə qəbul, müəllim, Emin Əmrullayev, təhsil naziri, təhsil