Polis əməkdaşı vətəndaşa cərimə yazır, arxiv şəkli

Karantinə görə ödənməmiş cərimələr ləğv edilir: Gürcüstan Azərbaycan reallığı

49
(Yenilənib 23:03 02.07.2021)
Gürcüstanın Baş naziri İrakli Qaribaşvili bildirib ki, karantin qaydalarının pozulmasına görə tətbiq edilən, lakin ödənməmiş cərimələr əfv ediləcək. Ekspertlər iqtisadiyyatı Gürcüstandan güclü olan Azərbaycanda cərimələrin ləğvinin mümkün olduğunu söyləyir.

BAKI, 2 iyul — Sputnik. Gürcüstanda karantin qaydalarının pozulmasına görə tətbiq edilən, lakin ödənməmiş cərimələr əfv ediləcək. Bu barədə Gürcüstanın Baş naziri İrakli Qaribaşvili çıxış edib. Baş nazir əlavə edib ki, özünütəcrid və karantin qaydalarının pozulmasına, tibbi maska taxmamağa görə barələrində cərimə tətbiq edilən şəxslər parlamentə təqdim edilən iki qanun layihəsi əsasında ödənişdən azad ediləcək. Bu qərardan Gürcüstanda 245 min vətəndaş, habelə 344 hüquqi şəxs yararlanacaq. Əfv olunan cərimələrin ümumi məbləği 76 milyon lari (41 milyon manat) təşkil edəcək.

Bəs görəsən, qonşu Gürcüstanda karantin cərimələri ilə bağlı qəbul edilən qərarın ölkəmizdə də tətbiq olunma ehtimalı varmı?

Milli Məclisin deputatı Fazil Mustafa Sputnik Azərbaycan-a açıqlamasında bildirib ki, karantin qaydalarının pozulmasına görə tətbiq edilən cərimələrin ölkəmizdə də tətbiqi vacibdir: "Bu cür qərarın Azərbaycanda da verilməsi mümkündür. Azərbaycanda cərimələrin yığılması effektli deyil. Bu məsələyə loyal yanaşılır. Pandemiya dövründə onsuz da insanların sosial-iqtisadi vəziyyəti ağırlaşıb. Ölkəmizdə də əhali dövlətin çağırışına əməl edib vaksinasiyada aktiv iştirak edir. Buna görə də koronavirusa yoluxmada azalma müşahidə olunur. Bunları nəzərə alaraq cərimələrin bağışlanması çox yaxşı olardı", - deyə deputat bildirir.

F.Mustafa həmçinin qeyd edib ki, bu gün cərimələri ödəməkdə fiziki şəxslərlə yanaşı, hüquqi şəxslər də çətinlik çəkir: "Hüquqi şəxslər arasında 3-4 min manat cərimələnən var. Onları bağışlamaq lazımdır. Çünki pandemiyadan sahibkarlar da çox ziyan çəkdilər", - deyə F.Mustafa bildirib.

Hüquq müdafiəçisi Çingiz Qənizadə də mətbuatın bu məsələni gündəmdə saxlamalı olduğunu, karantin qaydalarının pozulmasına görə tətbiq edilən cərimələrin ləğvini ictimailəşdirməyin vacibliyini vurğulayıb. Ç.Qənizadə Sputnik Azərbaycan-a açıqlamasında bildirib ki, belə bir qərar Azərbaycanda da verilsə, çox yaxşı olar:

"Bu humanist bir addım olar. Hüquq müdafiəçisi olaraq çox istərdim ki, belə addım atılsın. Karantin qaydalarını pozan şəxslər qanuna tabe olmasalar da, bu o demək deyil ki, mütləq o cərimələri ödəməlidirlər. İnsanlar pandemiya dövründə mənəvi, maddi psixoloji sarsıntı keçirdilər. Qazın qiymətinin artması insanlar arasında müəyyən narahatlıq yaradıb. Bu vəziyyətdə cərimələrin ləğvi yerinə düşərdi. Ümid edirdik ki, Azərbaycan bu humanist qərarı verəcək. Çünki Gürcüstan iqtisadiyyatı bizdən zəifdir. Bizim iqtisadiyyatımız onlardan qat-qat güclü olduğundan karantin qaydalarının pozulmasına görə tətbiq edilən cərimələrin ləğvi qərarı verilə bilər".

Qeyd edək ki, Azərbaycanda karantin qaydalarının pozulmasına görə pandemiya dövründə İnzibati Xətalar Məcəlləsində bir sıra dəyişikliklər edilib. Məcəllənin 211-ci maddəsində epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslər yüz manatdan iki yüz manatadək məbləğdə, vəzifəli şəxslər min beş yüz manatdan iki min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, hüquqi şəxslər iki min manatdan beş min manatadək məbləğdə cərimə edilir. Həmçinin 388-1.1-ci maddənin sanksiyasındakı dəyişikliyə görə, fiziki şəxslər beş yüz manatdan min manatadək, vəzifəli şəxslər min manatdan min beş yüz manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, bir ayadək müddətə inzibati həbs tətbiq edilir, hüquqi şəxslər min beş yüz manatdan iki min manatadək məbləğdə cərimələnir.

Azərbaycanda 2020-ci ilin iyun ayının 1-dən qapalı məkanlarda maska rejimi tətbiq edilib, 2020-ci ilin noyabrın 21-dən isə tibbi maska həmçinin açıq havada da məcburi olub. İnzibati Xətalar Məcəlləsinə edilən dəyişikliyə əsasən, karantin rejimində maska taxmaq tələbinin pozulmasının qarşısının alınmamasına görə cərimə məbləği artırılaraq fiziki şəxslər üçün 100 manat, vəzifəli şəxslər üçün 300, hüquqi şəxslər üçün 600 manat məbləğində müəyyənləşib. Ölkəmizdə bu qaydaları pozduğuna görə cərimələnənlərin sayı açıqlanmasa da, bu rəqəmin kifayət qədər böyük olduğu danılmazdır.

Həmçinin oxuyun:

* "Delta" ştammı qapıdadır: Hande Harmancı karantin tədbirlərini sərtləşdirməyə çağırdı

* Toyların ilk günü: Bir neçə restoran cərimələndi

* Nura Suri: "Toyların açılması yenə camaatı ucdantutma cərimələmək üçün tələdir?"

49
İvan Tixonov

On nəfərə bir qələbə: Azərbaycanlı idmançıların Tokioda ilk günü

13
Tokio Olimpiadasında ilk yarış gününün nəticələrinə görə, medal sıralamasında üç qızıl və bir bürünc medal qazanan Çin birincidir.

BAKI, 24 iyul - Sputnik. Tokio Yay Olimpiya Oyunlarının ilk yarış günü azərbaycanlı idmançılar üçün uğursuz keçdi. Sputnik Azərbaycan bildirir ki, onlardan yalnız biri uğurlu start götürə bilib.

Cüdo

İlk məyusedici xəbərlər cüdodan gəldi. Kəramət Hüseynov (60 kq) və Aişə Qurbanlı (48 kq) ilk pillələrdən yarışdan ayrıldılar. Hüseynov öncə britaniyalı Eşli Makkenzini udub, gürcü Luxumi Çxvmianiyə uduzdusa, Qurbanova elə ilk görüşündəcə Katarina Koştaya (Portuqaliya) məğlub oldu.

Veloyürüş

Vaxtından əvvəl yarışı dayandıranlardan biri də velosipedçi Elçin Əsədov oldu. 234 km-lik şosse yürüşünün, demək olar ki, yarısını keçəndən sonra yıxıldı. 

Güllə atıcılığı

Snayperimizi Ruslan Lunyov da uğursuzluğa düçar oldu. 10 metrlik məsafəyə pnevmatik tapançadan atəşdə 20-ci yerə düşərək finala çıxa bilmədi. Ancaq birinci gün çıxış edən idmançılarımızın çoxundan fərqli olaraq, Lunyov hələ Oyunlarda iştirakını yekunlaşdırmayıb - 25 m-lik məsafəyə xırda kaliberli tapançadan atəş yarışında da qüvvısini sınayacaq. 

Üzgüçülük

 

Üzgüçülərimiz Maksim Şemberev və Məryəm Şeyxəlizadəxangah Tokiodakı Olimpiadada uğursuz çıxış ediblər.

400 m məsafədə kompleks üzgüçülükdə çıxış edən Şemberev 4:19.40 dəqiqə nəticə ilə çıxışını yekunlaşdırıb. O, öz yarımqrupunda sonuncu - səkkizinci yer tutub. Ümumi sıralamada isə 29 iştirakçı arasında 26-cı ola bilib. Yarımfinala çıxa bilməyən Şemberev Olimpiadadakı işini yekunlaşdırıb.

Şemberev üçün bu, ikinci Olimpiadadır. 2012-ci ildə Londonda o, Ukrayna bayrağı altında çıxış edirdi.

100 m məsafədə batterflyay üsulu ilə yarışda Məryəm Şeyxəlizadəxangah finişə 1:01,37 dəqiqə nəticə ilə çataraq, üç nəfərdən ibarət yarımqrupda birinci olub. Yekun hesabda isə 33 yarışçı arasında 30-cu olub və o da Tokiodakı çıxışını bitirib.

 

Məryəmdən kimsə nəticə gözləmirdi, o, Beynəlxalq Federasiyanın kvotası ilə Olimpiadaya gəlib, Şemberev isə lisenziya normativini yerinə yetirmişdi və ən azı, onun yarımfinala çıxacağına ümid edirdik.

Boks

İdman həvəskarlarına ən böyük məyusluğu isə boks yarışları yaşatdı. Titullu idmançı, Riodakı 2016-cı il Olimpiadasının gümüş mükafatçısı Lorenso Sotomayordan (69 kq), heç olmasa, medallar uğrunda mübarizə gözlənilirdi, birinci dövrədən kənarda qalmaq yox. O isə 1/16 finalda Gürcüstan təmsilçisi Əsgərxan Madiyevə uduzdu. Görüşü üçüncü raundda Sotomayorun zədəsi səbəbindən (qanaxma) saxladılar, ancaq Azərbaycan yığmasının kubalı legioneri üçün qələbə ümidi heç yox idi də: ilk iki raundu o uduzmuşdu.

57 kq çəki dərəcəsində çıxış edən boksçumuz - Tayfur Əliyev növbəti mərhələyə adlamağa layiq idi. Çünki 1/16 mərhələdə Vyetnam təmsilçisi Duaonq Van Nquenə qarşı yaxşı döyüşürdü. Ancaq hakimlər mübahisəli qərar verərək qələbəni vyetnamlının adına yazdılar (2:3).

 

Boksçumuz Məhəmməd Abdullayev (91 kq çəki dərəcəsi) isə Azərbaycan təmsilçiləri arasında Tokiodakı Olimpiadada qələbə qazanan yeganə idmançı oldu. 1/16 finalda o, Bəhreyn təmsilçisi Denis Latipovla görüşündən 3:1 hesabı ilə qalib ayrıldı. Düzdür, püşkatmada onun heç bəxti gətirməyib: növbəti mərhələdə o, dünya çempionu, Özbəkistan təmsilçisi Bahodir Calolovla görüşəcək. Bu görüş iyulun 29-da olacaq.

İdman gimnastikası 

Təmsilçilərimizdən Tokiodakı ilk yarış günündə sonuncu çıxış edən isə idman gimnastı İvan Tixonov oldu. O, təsnifatda 45-ci yer tutaraq, adını finala yazdıran 24 nəfərin arasına düşə bilmədi.

Medal hesabı

Tokio Olimpiadasında ilk yarış gününün nəticələrinə görə, medal sıralamasında üç qızıl və bir bürünc medal qazanan Çin birincidir. İkinci yerdə Yaponiya ilə İtaliya qərarlaşıblar: hərəyə bir qızıl və bir gümüş medal. İlk onluğa həmçinin 4. Koreya (1, 0, 2), 5. Macarıstan, Kosovo, Tailand, Ekvador, İran (1, 0, 0), 10. Serbiya, Rusiya (0, 1, 1) daxildir.

13
Teqlər:
atıcılıq, gimnastika, cüdo, şosse velosipedi, üzgüçülük, boks, idmançılar, azərbaycanlı, Tokio Yay Olimpiya Oyunları

Təhsil naziri müəllimlərin imtahanı ilə bağlı söz verdi

10
Təhsil naziri əmin edib ki, araşdırmaların nəticəsinə əsasən növbəti 3 gün ərzində müvafiq qərarlar qəbul ediləcək və ictimaiyyətə açıqlanacaq.

BAKI, 24 - iyul - Sputnik. Azərbaycanın Təhsil naziri Emin Əmrullayev müəllimlərin işə qəbulu ilə əlaqədar keçirilmiş imtahanlardan narazılıqlara dair açıqlama verib.

"2021-2022-ci tədris ili üzrə müəllimlərin işə qəbulu imtahanlarında namizədlərə təqdim olunmuş test tapşırıqları haqqında sosial mediada yayılmış narazılıqlardan məlumatlıyıq. Bunları nəzərə alaraq, ekspert komissiyası tərəfindən test tapşırıqlarının müxtəlif seanslar üzrə müqayisəli elmi-statistik təhlili aparılacaq", - deyə nazir sosial şəbəkə hesabında qeyd edib.

O əmin edib ki, araşdırmaların nəticəsinə əsasən növbəti 3 gün ərzində müvafiq qərarlar qəbul ediləcək və ictimaiyyətə açıqlanacaq.

 

Qeyd edək ki, imtahanda iştirak edən müəllimlər sosial şəbəkələrdə xüsusilə ədəbiyyatdan verilən sualların məzmunundan, ümumilikdə isə suallar üçün az vaxt ayrılmasından şikayət ediblər.

Eləcə də oxuyun:

10
Teqlər:
imtahan, işə qəbul, müəllim, Emin Əmrullayev, təhsil naziri, təhsil