Toy stolu, arxiv şəkli

"Gəlsin, xələt versin..." - Müğənnilərin toy qiymətlərində hansı dəyişiklik gözlənilir?

114
(Yenilənib 18:29 27.06.2021)
Bu günü təkcə nişanlı cütlüklər deyil, toy musiqiçiləri də gözləyirdilər. Nəhayət, bir ildən çoxdur, davam edən həsrət iyul ayının 1-də sona yetəcək. Qiymətlərdə dəyişiklik olacaqmı?

BAKI, 27 iyun — Sputnik. Toy çoxlarının həyatında baş verən ən sevincli və romantik hadisələrdən biridir. Azərbaycanda gənclər artıq bir ildən çoxdur ki, Nazirlər Kabineti yanında Operativ Qərargahın onlara toy çaldırıb vüsala çatmalarına icazə verəcəyi günü gözləyirdilər. Bu günün həsrətində olanlar təkcə nişanlı cütlüklər deyil, həm də toy musiqiçiləridir.

Nəhayət, 1 ildən çox davam edən qadağa iyul ayının 1-də sona yetəcək. Bəzi KİV-lərdə müğənnilərin toy qiymətlərinin artırılması ilə bağlı xəbərlər yayılıb. Sputnik Azərbaycan bunun doğru olub-olmadığını öyrənmək üçün şou əhli arasında sorğu aparıb.

Mövzu ilə bağlı danışan, şou-biznesdə "Əjdaha" ləqəbi ilə tanınan müğənni Nadir Qafarzadə bildirir ki, toy qiymətlərində nə endirim, nə də artım olacaq: “Əslində Rusiyaya gəlməyimin əsas səbəbi toy deyildi. Bakıda olanda bir neçə toy üçün təklif almışdım. Orta qiymətə getmişəm. Oğlum burada fəaliyyət göstərir. Uşaq vaxtından oxuyurdu, indi isə professional şəkildə fəaliyyət göstərir. Oğlumla birlikdə layihələr edirik. Onu tək qoymamaq üçün gəldim.

Çox şadam ki, artıq Bakıda da toylar başlayır. Təkliflər alıram. Qiymətlərə gəldikdə isə heç bir dəyişiklik olmayacaq. Əvvəlki qiymətlər olacaq. Mən Bakıya da gedib-gələcəyəm. Nə qədər ki, canımda can var, tələbatlıyam, oxuyacağam. Çünki bu bir il ərzində çox əziyyət çəkdik".

Populyar müğənni Damlanın meneceri Şəhriyar Abışov qiymət artımın olmadığını söyləyib: "Heç bir qiymət artımı gözlənilmir. Damla xanım əvvəl hansı qiymətə gedirdisə, indi də o qiymətə gedəcək. Artıq sifarişlər gəlib, ümid edirik ki, pandemiyanın bizə vurduğu zərəri az da olsa kompensasiya edə biləcək".

"Yeni ulduz" müsabiqəsinin qalibi, Azərbaycan Silahlı Qüvvələrinin əks-hücum əməliyyatı başlayanda könüllü olaraq cəbhəyə yollanmış müğənni Vüqar Muradov isə həmkarlarından fərqli olaraq, daha səxavətli davranıb. Belə ki, müğənni qiymətlərdə endirib edib: "Əvvəl ev yiyəsi 300-500 nəfəri dəvət edirdisə, indi 150 nəfərdən artıq adamı dəvət edə bilmir. Qonaqların toy üçün verdiyi nəmərin hesabına toy xərclərini də, müğənninin xərcini də ödəyə bilirdi.

İnsanları da başa düşmək lazımdır ki, insanlar əvvəlki qədər toydan pul götürə bilməyəcəklər. Bunu nəzərə alaraq ümumi qiymətdən 1000-1500 manat aşağı salmışam. 100-150 nəfərlik məclis hara, 300-500 nəfərlik məclis hara. Digər həmkarlarım qaldırırlar, qaldırsınlar. Kimdir onları yüksək qiymətə toya aparan? Yalnız varlı insanlar apara bilərlər. Amma əhalinin böyük bir hissəsi pandemiyadan çox böyük zərər görüb. Əsas odur ki, toy olsun".

Müğənni Kərim Abbasovun meneceri Rusif Hüseynov bildirir ki, müğənni toy qiymətini artırmayacaq, amma: "Kərim hazırda Moskvadadır. Pandemiyadan öncə də, pandemiya vaxtı da Moskvada keçirilən toy şənliklərinə dəvət alıb. Sözsüz ki, buranın qiymətləri ilə oranın qiymətlərində fərq çox böyükdür. K.Abbasov iyuldan etibarən başlayacaq toy mərasimlərində qiymətlərdə endirim etməyəcək. Həmin qiymətlər qalacaq. Amma Moskvada olduğu müddətdə çağırılarsa, o zaman qiymətdə artım ola bilər. Bu sənətə yeni başlayanlar münasib qiymətə gedirlər. Amma Kərim və onun musiqi komandası illərin sənətçiləridir. Həmin musiqiçilər ən məşhur müğənnilərlə çalışıblar. Müğənni onları da düşünmək məcburiyyətindədir. Hələ bunun yol xərcləri də var. Bu səbəbdən qiymətdə endirim gözlənilmir".

Rəqqasə Fatimə Fətəliyeva toylarla bərabər, xına mərasimlərinə də gedir. O, qiymətlərdə nəzərəçarpacaq dərəcədə dəyişikliyin olmadığını söyləyib: "Artıq il yarımdır ki, biz bu qərarı gözləyirdik. Allah hər zaman xalqımıza gözəl günlər nəsib etsin. Bizim millətimizə toy-düyün yaraşır. Qiymətlərdə elə də böyük dəyişiklik yoxdur. Bildiyiniz kimi, mənim xına studiyam var. Qiymətlər sifarişə görə dəyişir. Dekorlara görə, xına mərasimində iştirak edən insanın sayına uyğun qiymət tənzimlənir. Elə insanlar var ki, dekorda istifadə olunan gülləri təbii istəyirlər. O zaman qiymət daha baha olacaq".

Toy qadağasını götürdülər

Xatırladaq ki, dünyanı cənginə almış koronavirus (COVİD-19) pandemiyası ilə əlaqədar Nazirlər Kabineti yanında Operativ Qərargah ötən ilin martın 14-dən etibarən ölkə daxilində tətbiq olunan sosial təcrid tədbirlərini həyata keçirib. Bu tədbirlərə toy, yas mərasimləri və digər kütləvi toplantıların qadağan edilməsi daxil idi. Bu yaxınlarda - iyunun 22-də "Xüsusi karantin rejiminin müddətinin uzadılması və bəzi məhdudiyyətlərin aradan qaldırılması ilə bağlı tədbirlər barədə" Nazirlər Kabinetinin qərarında dəyişiklik edilib.

Şənliklər necə keçiriləcək

Dəyişikliyə əsasən, iyulun 1-dən etibarən COVID-19 pasportu tələb olunan iş və xidmət sahələri işçilərinin azı 80 faizinin COVID-19-a qarşı birinci doza peyvənd olunması və ya COVID-19-a qarşı immunitet sertifikatına malik olması, 1 avqust tarixindən etibarən isə COVID-19 pasportunun olması tələb olunacaq.

Mərasimlərdə qonaqların sayı 150 nəfərdən çox ola bilməz, üstəlik, toy gecə yarısından əvvəl bitməlidir. Qonaqların sayı 50 nəfərədək olduqda onların maska taxması (yemədikləri zaman) vacib olsa da, toya COVID-19 pasportu olmayanlar da gələ bilərlər. Ancaq toya 50 nəfər və daha artıq şəxs gəlibsə, onlardan COVID pasportu tələb olunacaq.

Şənlik mərasimlərinin keçirilməsi üçün icazə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzi (EHİM) tərəfindən idarə olunan icaze.e-gov.az portalından əldə olunmalıdır. Portalın fəaliyyəti 26 iyun tarixindən etibarən Mərkəz tərəfindən aktivləşdiriləcək.

Cərimələr

Toyun bütün təşkilatçıları, istər ailələr, istər ivent-şirkətlər, istərsə də şadlıq evləri olsun, əsas məsələni yaddan çıxartmamalıdırlar: personal, qonaqlar və bəylə gəlinin sağlamlığının mühafizəsi hər şeydən vacibdir. Əks halda, qayda pozuntuları hüquqi şəxslərə 5 min manatadək cərimə ilə nəticələnəcək. Əgər restoran və şadlıq evlərinin sahiblərinin bütün xərcləri müştərilərin boynuna qoyduqlarını nəzərə alsaq, cərimə bu və ya digər şəkildə toy sahiblərinə də öz təsirini göstərəcək.

Eləcə də oxuyun:

114
Mövzu:
Azərbaycanda toylar (35)
Koronavirusa qarşı peyvənd vurulmasında dair sertifikat, arxiv şəkli

Azərbaycanda "Əks-göstəriş sertifikat"ı veriləcək

5
(Yenilənib 10:42 02.08.2021)
Vaksinasiya ilə yanaşı, fiziki məsafənin saxlanılması, maskalardan istifadə və əl təmizliyi kimi qaydalara riayət olunmalıdır.

 

BAKI, 2 avqust — Sputnik. "Azərbaycan Respublikasında "COVID-19 xəstəliyi əleyhinə 2021-2022-ci illər üçün Vaksinasiya Strategiyası"na uyğun olaraq ölkə üzrə peyvəndlənmə prosesi davam edir. Avqust ayının 9-dan etibarən ölkədə istifadəsinə icazə verilən vaksinlərə qarşı əks-göstərişləri olan şəxslərə "Əks-göstəriş sertifikat"ının verilməsinə başlanılır.

Sputnik Azərbaycan-ın xəbərinə görə, bu barədə Azərbaycan Respublikasının Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin birgə məlumatında belə deyilir.

Məlumatda qeyd olunur ki, "Əks-göstəriş sertifikat"ı almaq üçün ərazi üzrə poliklinikalara müraciət edilməlidir. Poliklinika həmin şəxslərin məlumatlarını Səhiyyə Nazirliyi tərəfindən yaradılmış xüsusi komissiyaya təqdim edəcək. Komissiyanın rəyi əsasında vətəndaşa "Əks-göstəriş sertifikat"ı veriləcək.

"Əks-göstərişləri olmayan vətəndaşların nəzərinə çatdırmaq istəyirik ki, dünyada və ölkəmizdə aparılan tədqiqatlardan əldə olunmuş nəticələrin təhlili bir daha göstərir ki, virusun yeni və sürətlə yayılan təhlükəli növlərindən qorunmağın ən effektiv yolu vaksinasiyadır.

Vaksinasiya ilə yanaşı, fiziki məsafənin saxlanılması, maskalardan istifadə və əl təmizliyi kimi qaydalara riayət olunmalıdır", - deəy məlumatda qeyd olunur.

Eləcə də oxuyun:

5
Teqlər:
vaksin, vaksinasiya, COVID-19 pasportu, sertifikat
Mövzu:
Azərbaycanda COVID-19 əleyhinə vaksinasiya
 Eldəniz Səlimov

Bu gün Milli Məclis Eldəniz Səlimovun işinə baxacaq

7
(Yenilənib 10:32 02.08.2021)
Milli Məclis sədri Sahibə Qafarova 53 deputatının tələbi ilə parlamentin növbədənkənar sessiyasının çağırılması haqqında sərəncam imzalayıb.

BAKI, 2 avqust — Sputnik. Milli Məclisin İntizam Komissiyasının bu gün keçiriləcək iclasında deputat Eldəniz Səlimovun toxunulmazlığına xitam verilməsi məsələsinə baxılacaq.

Bu barədə Sputnik Azərbaycan-a Milli Məclisdən məlumat verilib. Məlumata görə, bu barədə Milli Məclisə təqdimat baş prokuror Kamran Əliyev tərəfindən daxil olub.

Rəsmi məlumata əsasən, iyulun 29-da saat 01 radələrində Xaçmaz şəhərində yerləşən "Starıy Dvor" restoranında Milli Məclisin deputatı Eldəniz Səlimov xidməti vəzifəsini yerinə yetirən polis əməkdaşına zor tətbiq edib. Daxili İşlər Nazirliyindən daxil olan material Baş Prokurorluqda araşdırılıb. Toplanan material üzrə Cinayət Məcəlləsinin 309.2-ci (vəzifə səlahiyyətlərini aşma) maddəsi ilə cinayət işi başlanıb və istintaqın aparılması Baş Prokurorluğun İstintaq İdarəsinə tapşırılıb. Milli Məclis sədri Sahibə Qafarova 53 deputatının tələbi ilə parlamentin növbədənkənar sessiyasının çağırılması haqqında sərəncam imzalayıb. Növbədənkənar sessiyanın gündəliyinə Azərbaycan Respublikası Milli Məclisinin deputatı Eldəniz Səlimovun toxunulmazlığına xitam verilməsi haqqında məsələ daxil edilib.

Qeyd edək ki, hazırda iş üzrə intensiv istintaq hərəkətləri aparılır.

Eləcə də oxuyun:

7
Teqlər:
deputat, Milli Məclis, komissiya, iclas, toxunulmazlıq