* AZƏRBAYCAN *
Sirac Abışovun fotosu

"İndi o torpaqlara Siracın gözü ilə baxırıq" - Şəhid həmkarımızın əziz xatirəsinə

3045
(Yenilənib 12:45 10.06.2021)
İyunun 4-də AzTV-nin operatoru Sirac Abışov və AZƏRTAC-ın müxbiri Məhərrəm İbrahimov Kəlbəcərdə minaya düşərək həlak olublar. Sputnik Azərbaycan-ın müxbiri Nigar İsgəndərova ən yeni tarixi qələmləri, kadrları ilə yazan həmkarlarımızın evində olub.

BAKI, 10 iyun — Sputnik. Müharibə uşaqları...  Həmkarlarımız – Azərbaycan Dövlət Televiziyasının operatoru Sirac Abışovun, 20 il AZƏRTAC informasiya agentliyində çalışan Məhərrəm İbrahimovun uşaqlığını məhv edən də elə müharibə idi. Ötən əsrin 80-ci illərinin sonlarında başlayan didərgin həyatı, 90-cı illərin əvvəllərində başlayan qaçqınlıq həyatı çox şeyi bu uşaqlardan qopardı, sağalmaz izlər buraxdı. Bu azmış kimi erməni vandalizmi bu gün onların övladlarının – Sirac Abışovun övladı Özgür, Məhərrəm İbrahimovun övladları Uğur və Toğrulun həyatlarından da bir böyük parçanı aldı, canı canlarından olan atalarını onlardan qopardı və illərin sağalmaz izlərini buraxdı.

Bir qədər öncəyə qayıdaq:

4 iyun 2021-ci il - şəhid xəbəri gəlir. İki şəhidimiz var – Abışov Sirac və İbrahimov Məhərrəm tank əleyhinə minaya düşərək həlak olublar.

Geridə qalanlar isə onlardan xatirələr, kadrlar, iti qələmlə yazılan tarix oldu.

Artıq həmkarlarımızın ölümündən bir həftə ötür. Sputnik Azərbaycan olaraq onların əziz xatirələrini yad etmək üçün həmkarlarımızın yaşadıqları ünvana üz tutduq.

Sumqayıtda “Nasosnu” (Tağıyev qəsəbəsi) adlanan yerdə - Sirac Abışovun ailəsinin evindəyik:

Bir qədər toparlandıqdan sonra xalası Səadət Adıyeva sözə başlayır: “Sirac 7 ay idi ki, evdə deyildi, ailəsini, 1 yaşlı körpəsini qoyub dağlarda, daşlarda idi. Onun ölümü bizim üçün çox ağır oldu. Dünyaca məşhur operator olmaqla isə bir tərəfdən də içimizdə qürur hissi yaratdı. O, bu gün həm də qürur yerimizdir. Bu bizim ilk şəhidimiz deyil, qardaşım da birinci Qarabağ müharibəsində şəhid olub”.

© Sputnik / Nigar Iskanderova
Sirac Abışovun xalası Səadət Adıyeva

“Sirac şəhid olmazdan təxminən 10 gün qabaq bizim, özünün doğma kəndinə - Qubadlı rayonunun Dondarlı kəndinə gedib. Qarabağ müharibəsində dünyasını dəyişən dayısının şəklini illərdir ki, ürəyinin başında gəzdirirdi. 10 gün öncə o şəkli bayraqla birgə apararaq ata evimizə sancıb. İndi o, Sumqayıtda Şəhidlər Xiyabanında dayısı ilə birgə uyuyur”, - deyə xalası əlavə edir.

Xatirələr onu Siracın uşaqlığına aparır: “Uşaqlığı çox ağır oldu, deyərdim. Onun uşaqlığı qaçqınlıq dövrünə təsadüf etdi. Qardaşım şəhid olmuşdu, yas içində idik, yeni qaçqın düşmüşdük. Gəlib Bakıda məkunlaşdıq, qapısı, pəncərəsi olmayan evlərdə yaşamağa başladıq. Sirac da bu evlərdə böyüdü. Bu evlər vaxtilə hərbçilər üçün tikilməsi nəzərdə tutulan yarımçıq evlər idi”.

Ailə olaraq indi-indi xoş günlər görməyə başlayırdılar. İyunun 16-da Siracın ailə həyatı qurmasının iki ili tamam olacaqdı... Xalası deyir ki, heç körpə balasını 5 ay gördü, ya yox: “Övladına Özgür adını qoymuşdu. Körpədir, 1 yaşı təzə olsa da, deməzdim ki, heç nə başa düşmür. Onun gözlərinin dərinliyində böyük bir kədər, iztirab var, heç baxmaq da olmur. Cənazəsi gələnəcən “dədə” deyən uşaq, cənazə evə qoyulandan sonra onun yanında yuxuya getdi. O da babasına "dədə" deyir, amma iki gündür artıq babasına da "ata" deyir”.

İllərin ötməsi, Abışovlar ailəsinin övladlarının zamanla böyüməsi I Qarabağ müharibəsindəki kədəri yavaş-yavaş unutdururdu. Lakin Siracın ölümü bu kədəri yenilədi, silinməz bir iz buraxdı: “Ona demişdilər ki, ana torpağın alınıb, artıq aylarladır ki, burada xidmətdəsən, get, səni başqa operatorla əvəzləyək. Deyib ki, "Yox, bu viranəlikləri, bu vandalizmi özüm çəkəcəyəm". O deyirdi ki, ömrünün ikinci baharını yaşayır, çox sevinirdi. Sirac deyirdi ki, "Mən o torpaqlara 50 milyonluq azərbaycanlının gözü ilə baxıram. Biz isə indi o torpaqlara Siracın gözü ilə baxırıq. Türkiyənin tanınmış jurnalisti də deyirdi ki, Gəncə hadisələrində də Siracla bir yerdə olublar. O deyirdi ki, Sirac onlara kadrlar da verib. Funda bu itkini qardaş itkisi adlandırırdı”. 

© Sputnik / Nigar Iskanderova
Sirac Abışovun ailəsi

Sirac hər kəsin xatirəsində isə həyat eşqi yanan biri kimi qalıb: Yoldaşına deyirdi ki, "Bir Kəlbəcər qalıb, çəkilişləri başa vuraq aparıb uşaqları oralarda gəzdirəcəyəm". Videolarına baxırıq, hər çəkilişə gedəndə “Qismət olsa, qayıdarıq” deyirdi. Sonuncu dəfə övladı ilə görüşəndə də sanki nəsə ürəyinə dammışdı. Eynən I Qarabağ müharibəsində şəhid olan dayısı kimi, çanta ilə düşüb, yoldan qayıdıb, çantaları məhəllədə qoyub evə dönüb ki, Özgürü bir də əzizləsin. Özgürü taxtın üstünə qoyub əzizləyib, oyadıb, doyunca özünə sıxıb. Deyib ki, "Uşağın lap yeməli vaxtıdır, heç ayrıla bilmirəm ondan"".

Həmin günü, iyunun 4-ü sanki ürəyinə nəsə damıb: "Həm anası, həm də atasına ayrıca mesaj yazıb ki, bir-birinizdən muğayat olun. Həmin gün səhəri elə hamı ilə - bibiləri, xalaları, ata-anası ilə danışıb".

Otağın bir küncündə isə səssiz-səssiz ağlayan qara donlu, qara örpəyli qadın oturub. Ürəyi, bağrı qan olan ana... Danışa bilmir, boğulur, səsi batıb... Gözlər isə acısının nə qədər ağır olduğunu anlatmağa çalışır.

Qardaşı kimi operator olan Şirzad Səmədov üçün indi Siracın yoxluğundan danışmaq çox çətindir: “Çəkilişdə idik, Bülbülədə. Yanımdakı iş yoldaşıma ofisdən zəng gəldi. Həmin səs yanımdakına dedi ki, "Çəkil qırağa söz deyirəm". 40 dəqiqə əvvəl ayrıldığım digər iş yoldaşım da mənə yazdı ki, "Hardasan?". Nəsə bundan sonra içimi bir şübhə bürüdü. Amma o da heç nə demədi. AzTV-nin əməkdaşı Mənsur Həsənov zəng etdi, zəngi açan kimi dedim ki, nəsə olubsa, de. Dedi ki,  "mina partlayıb", dedim, bəs nəticə nədir. Heç nə demədi. Digər həmkarım mənə həqiqəti dedi. Çəkilişi başlamadım, dayandıq”.

Qardaşının ölüm xəbərini çatdırmaq ona çətin olur, gizlədir. Buna baxmayaraq həqiqət qısa zamanda onun ailəsinə ayaq açır: “Siracın həyat yoldaşı uşağı yatızdırmağa hazırlaşırdı, düşünüb ki, bir də zəng etsin, yazışsın, sonra uşağı yatızdırsın. Elə internetə daxil olan kimi bu xəbəri görüb, tez anama deyib. Anamda qazın üstündə aş bişirirdi, elə oradaca donub qalıb”.

© Sputnik / Nigar Iskanderova
Sirac Abışovun yaşadığı bina

Siracla bağlı keçmişdə danışmaq, xatirələri yad etmək qardaşına elə də asan olmur: “Elə hər anımız bir xatirə idi. O cüssəli idi, hərdən tutub məni silkələyirdi, mən də onu zarafatyana vururdum. O, həmişə pozitiv olub, yəni, nəyisə hiss elətdirməyib. Hadisədən bir-iki həftə öncə gələndə yığışıb bir məclis təşkil etmişdik. Çəkdiyim videoların hamısında o, qəmgin düşmüşdü. O, ən çox övladı üçün darıxırdı”.

“Onun yoxluğu dayağımın olmamasıdır. Dünya yıxılıb, altında qalmışam. Həmişə bir şey olanda deyirdim ki, qardaşım var. O dünyasını dəyişəndən sonra ilk dəfə valideynlərim və onun ailəsi, övladına baxmaq üçün özümə cansağlığı arzulamışam”, - deyə qardaşı əlavə edir.

Anası danışır: “İnana bilmirəm, elə bilirəm ki, işdədir, indi qapıdan girəcək...”.

“Heç qız anaya elə baxmazdı, o cür anasına baxır, qayğısına qalırdı, ayaqlarını suya qoyurdu...”, - deyə xalaları sözə qoşulurlar.

Əmisinin həyat yoldaşı Aidə Abışova da hönkürə-hönkürə danışır: “Sonuncu dəfə bizə qonaq gəlmişdi. O gedişi ilə bizi elə yandırıb külə döndərdi ki, desəm belə, az demiş olaram. Ölənəcən onun haqqında danışıb yanaram. Onun şəhid canına qurban olaram. Atası onunla nəfəs alırdı. Hadisədən bir gün öncə də mən onunla danışmışdım. Dedim "O mundarlar nə desən etmiş olar, özünü qoru!". Bir səs atmışdım, dedi ki, "İnşallah, xala, qismət olsa, oxuyacağam. Səhəri də 10 olmazdı, bu xəbəri aldıq. İnanmaq istədik, dedik barı əli, ayağı olmasın, amma nəfəsi gəlsin... Bir oğlum dünyasını dəyişib, o həmişə deyərdi ki, "Sənin yenə də iki oğlun var. Mən həmişə yanında olacağam", deyirdi, amma sözünü tutmadı”.

“Balam arzuları ürəyində getdi. Uşağının yeriməyini görmək istəyirdi. Deyirdi ki, məşq elətdirin, yerisin, gələndə qabağıma qaçaraq gəlsin. Amma özü tələsdi, tez gəldi”, - deyə ana sözə qoşulur, bir küncə qısılıb, hönkür-hönkür ağlayır.

© Sputnik / Murad Orujov
Sirac Abışovun anası Azadə Səmədova

Səadət xanım deyir ki, Sirac Kəlbəcərə gedəndən anasının təşvişi artmağa başlayıb. Yuxular da müəyyən işarələr verməyə başlayır: “Bacımın sözlərindən qorxdum. Axı Sirac 6-7 ay idi dağlarda idi, heç anası bu müddətdə belə qorxmamışdı. Dedim, ana ürəyidir, yəqin hansısa təhlükəni hiss edib. Sonra da yuxuda görüb ki, əlinə xına qoyub oynayır, Siracın operator yoldaşları dağın başından onu çəkir. Belə yuxular pisə yozulur. Xına qoymaq, toyda oynamaq səsdir, pis xəbərdir. Təsəvvür edin, qardaşım şəhid olmazdan öncə məni yuxuda oynayan görmüşdü”.

“Yatmıram ki, yuxu da görüm”, - deyən ana, ”İnşallah yuxuma gələr”, - deyə dua edir.

Sirac ölümü ilə onlara əvəzsiz bir miras qoyub - öz övladını. Bütün acılara baxmayaraq hər kəs bu körpə üçün yaşamağı özünə borc hesab edir, Siracsız çətin olsa da...

Həmkarımızın əziz xatirəsinə həsr olunur...

Sputnik Azərbaycan olaraq həmkarımızın ailəsinə dərin hüznlə başsağlığı verir, yaxınlarına səbir diləyirik! Allah rəhmət eləsin!

Həmçinin oxuyun:

Şəhid jurnalistlərin xatirəsi əbədiləşdirildi

İlham Əliyev və Mehriban Əliyeva jurnalistlərin həlak olması ilə bağlı başsağlığı verib

3045
Milli Məclisin

Milli Məclisin növbəti iclasının gündəliyi açıqlanıb

3
Milli Məclisin növbədənkənar sessiyasının iyunun 25-də keçiriləcək növbəti iclasının gündəliyinə 12 məsələ daxil edilib

BAKI, 23 iyun — Sputnik. Milli Məclisin növbədənkənar sessiyasının iyunun 25-də keçiriləcək növbəti iclasının gündəliyi məlum olub.

Sputnik Azərbaycan-ın xəbərinə görə, toplantının gündəliyinə 12 məsələ daxil edilib.

Bunlar aşağıdakılardır:

1. "Enerji resurslarından səmərəli istifadə və enerji effektivliyi haqqında" Azərbaycan Respublikası qanununun layihəsi (ikinci oxunuş).

2. "Əmək pensiyaları haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (ikinci oxunuş).

3. "Əlilliyi olan şəxslərin hüquqları haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (ikinci oxunuş).

4. "Əmək pensiyaları haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (ikinci oxunuş).

5. "Dövlət qulluğu haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (ikinci oxunuş).

6. Azərbaycan Respublikasının Əmək Məcəlləsində, Azərbaycan Respublikasının Mülki Prosessual Məcəlləsində, Azərbaycan Respublikasının Ailə Məcəlləsində, Azərbaycan Respublikasının Mülki Məcəlləsində, Azərbaycan Respublikasının Vergi Məcəlləsində, Azərbaycan Respublikasının Cinayət-Prosessual Məcəlləsində, Azərbaycan Respublikasının İnzibati Xətalar Məcəlləsində, Azərbaycan Respublikasının İnzibati Prosessual Məcəlləsində, "Sosial sığorta haqqında", "Tibbi sığorta haqqında", "Dövlət rüsumu haqqında", "Məhkəmə-Hüquq Şurası haqqında" və "İnzibati icraat haqqında" Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (birinci oxunuş).

7. "Mediasiya haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş).

8. "Dövlət qulluğu haqqında", "Prokurorluq orqanlarında qulluq keçmə haqqında", "Diplomatik xidmət haqqında", "Ədliyyə orqanlarında qulluq keçmə haqqında", "Fövqəladə hallar orqanlarında xidmətkeçmə haqqında" Azərbaycan Respublikasının qanunlarında və Azərbaycan Respublikasının 1999-cu il 7 dekabr tarixli 768-IQ nömrəli Qanunu ilə təsdiq edilmiş "Gömrük orqanlarında xidmət haqqında Əsasnamə"də, 2001-ci il 12 iyun tarixli 141-IIQ nömrəli Qanunu ilə təsdiq edilmiş "Dövlət vergi orqanlarında xidmət haqqında Əsasnamə"də, 2001-ci il 29 iyun tarixli 168-IIQ nömrəli Qanunu ilə təsdiq edilmiş "Azərbaycan Respublikasının daxili işlər orqanlarında xidmət keçmə haqqında Əsasnamə"də və 2009-cu il 4 dekabr tarixli 930-IIIQ nömrəli Qanunu ilə təsdiq edilmiş "Miqrasiya orqanlarında qulluq keçmə haqqında Əsasnamə"də dəyişiklik edilməsi barədə Azərbaycan Respublikası qanununun layihəsi (birinci oxunuş).

9. Azərbaycan Respublikasının Mülki Prosessual Məcəlləsində dəyişiklik edilməsi haqqında Azərbaycan Respublikası qanununun layihəsi (birinci oxunuş).

10. Azərbaycan Respublikasının İnzibati Prosessual Məcəlləsində dəyişiklik edilməsi haqqında Azərbaycan Respublikası qanununun layihəsi (birinci oxunuş).

11. "Dövlət rüsumu haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş).

12. Azərbaycan Respublikasının İnzibati Prosessual Məcəlləsində dəyişiklik edilməsi haqqında Azərbaycan Respublikası qanununun layihəsi (birinci oxunuş).

Qeyd edək ki, iyun ayının 22-də Milli Məclisin növbədənkənar iclası keçirilib və 14 məsələ müzakirə edilib.

Milli Məclisin 2021-ci il yaz sessiyası başa çatıb

Milli Məclisin 2021-ci il yaz sessiyası başa çatıb. Milli Məclisin Daxili Nizamnaməsinə əsasən, yaz sessiyası fevralın 1-də başlayır və mayın 31-dək davam edir. Lakin yaz sessiyasının başa çatmasına baxmayaraq, Milli Məclisin növbədənkənar xüsusi sessiyasının çağrılıb.

Milli Məclisin Daxili Nizamnaməsinə əsasən, parlamentin növbədənkənar sessiyalarını Milli Məclisin sədri Azərbaycan Prezidentinin və ya qanunverici orqanın 42 deputatının tələbi əsasında çağırır. Növbədənkənar sessiyanın gündəliyini müvafiq olaraq onun çağırılmasını tələb edənlər müəyyənləşdirir.

Növbədənkənar sessiya başa çatdıqdan sonra isə deputatlar iyulun 15-dən avqustun 30-dək tətildə olacaqlar.

3
Vətən Müharibəsi qaziləri

Vətən Müharibəsi qazilərinin tibbi müayinəsi aksiyası keçirilib

136
(Yenilənib 19:07 23.06.2021)
Vətən Müharibəsi Əlillərinə Kömək İctimai Birliyinin təşkilatçılığı ilə bu gün Vətən Müharibəsi qaziləri və övladları üçün pulsuz tibbi xidmətlər təşkil olunub

BAKI, 23 iyun — Sputnik. 26 iyun Silahlı Qüvvələr Günü münasibətilə Vətən Müharibəsi qazilərinin tibbi müayinəsi aksiyası keçirilib.

Sputnik Azərbaycan olaraq qəhrəmanlarımızın tibbi müayinə aksiyasında iştirak etdik. Vətən Müharibəsi Əlillərinə Kömək İctimai Birliyinin təşkilatçılığı və Aysmed klinikasının tibbi dəstəyi ilə keçirilən aksiyada qazilər və onların övladlarının tibbi müayinələri, həkim qəbulları, laborator analizləri və pulsuz olaraq digər tibbi xidmətlər təşkil olunub.

İctimai birliyin icraçı direktoru Zamin Zeynal aksiya ilə bağlı məlumat verib və bildirib ki, belə addımın atılmasında əsas məqsədlərdən biri ölkə başçısı İlham Əliyev və birinci xanım Mehriban Əliyeva tərəfindən şəhid ailələri, qazilərlə bağlı həyata keçirilən dövlət proqramına ictimai dəstək göstərməkdir: "Biz bu gün ictimai birlik olaraq üzvlərimiz olan qazilərə sms şəklində aksiya barədə məlumat yollamışıq. Məlumat üçün qeyd edim ki, üzvlərimizlə bağlı vahid baza yaradılıb. Bizim üzvlərimiz arasında qazilərlə yanaşı şəhid ailələri də var. Bizim müxtəlif şəhərlərdə bir neçə nümayəndəliyimiz fəliyyətdədir. Gələcəkdə isə digər regionlarda da nümayəndəliyimizin yaradılması nəzərdə tutulur. Biz artıq Gəncədəki nümayəndəliyimizə də müvafiq tapşırıqlar vermişik ki, orada da yaşayan şəhid ailələri və qazilələrimiz, onların övladları ilə bağlı pulsuz tibbi aksiyalar həyata keçirilsin. Çalışırıq ki, onların səhhətlərinin yaxşılaşdırılması istiqamətində töhfəmizi verək".

  • Vətən Müharibəsi qaziləri
    © Sputnik / Murad Orujov
  • Vətən Müharibəsi qaziləri
    © Sputnik / Murad Orujov
  • Vətən Müharibəsi qazilərinə pulsuz tibbi yardımlar göstərilir
    © Sputnik / Murad Orujov
1 / 3
© Sputnik / Murad Orujov
Vətən Müharibəsi qaziləri

Qeyd olunub ki, birlik tərəfindən şəhid ailələri və qazilərə ictimai, siyasi, sosial dəstək yönümlü tədbirlər davam etdiriləcək.

Qazilər də onlara göstərilən yardımlardan, dəstəkdən razılıqlarını dilə gətiriblər.

Qeyd edək ki, Silahlı Qüvvələr Günü münasibəti ilə 23-25 iyun tarixlərində ümumilikdə 100 qaziyə pulsuz tibbi xidmət göstəriləcək.

 

136
Kişi saçlarını darayır, arxiv şəkli

Bizə qənim kəsilən qəzəbli adamlar

0
(Yenilənib 21:41 23.06.2021)
Sputnik Azərbaycan-ın köşə yazarı son illər çox aktual olan sosial şəbəkə dözülməzliyi mövzusuna toxunub.

BAKI, 23 iyun — Sputnik. Sosial şəbəkələrdə bir qrup insan var ki, oturub kimlərisə linç etmək üçün fürsət gözləyir.

Əgər sənin şəxsi fikirin varsa, ümumi fikirə zidd bircə kəlimə yazsan, vay halına. Bu mühafizəkar və qəzəbli adamlar səni didib-parçalayar, məhv edər.

Onlar heç kəsin tənqidi fikrini, şəxsi yanaşmasını qəbul etmir. Ellikcə sevinib, ellikcə kədərlənən bu insanlar onların duyğularına şərik olmayanları bihörmət etməyə məqam gözləyirlər. Onlar üçün azadlıq əxlaqsızlıq, şəxsi fikir tərbiyəsizlik, fərdi düşüncəni bölüşmək mənasızlıqdır.

***

Onların düşməni də, dostu da ümumidir. Qəfildən sözü bir yerə qoymuş kimi kimisə sevə, ya da söyə bilirlər. Həmrəy, həmfikir olmaqda əndazəni aşmış bu adamların gözündən yayınıb azacıq müstəqil fikir yazsan, sənin xalq düşməni olduğunu sübut edənə qədər səndən əl çəkməzlər. Sosial şəbəkələrdəki qaraguruhu müşahidə edəndə, Nemət Pənahlının “Meydan” hərəkatındakı performansını xatırlayıram. Hərçənd, o dönəmdə uşaq olsamda, dumanlı xatirələrim və böyüklərdən eşitdiklərim Nemətin kütləni necə coşdurmasını yaddaşımdan silinməyə qoymur. Nemətin bir kəlməsi ilə oturub-qalxan minlərlə adam vardı illər öncə...

Sonra həmin kütləvi həmrəylik unuduldu getdi, illər sonra o adamların “varisləri” sosial şəbəkələrdə peyda oldu. İndi də onlar kütləvi şəkildə həmrəy və həmfikir olmaqla sosial şəbəkələri “Azadlıq meydanı”na çeviriblər. Onların da öz nemətpənahlısı var – sosial şəbəkə fenomenləri...

Müharibə vaxtı bu kütlənin qəzəbini də, coşğusunu da gördük. Sülh tərəfdarlarının təhqir edilməsi, fərqli düşünənlərin linç edilməsi hələ də davam edir. Bəli, bu adamlar alternativ, müstəqilfikirə hörmət etmir, hətta qəbul etmirlər. Onlar kimi düşünmürsənsə düşmənsən, namərdsən, satılmısan. Şüar birdir: “ya bizdənsən, ya düşmən”.

***

Şübhsiz ki, kütlənin azad fərdlərə qarşı dözümsüzlüyü yenilik deyl. İllər öncə də sosial şəbəkələrdə qəzəbli adamlar, əsəbi kütlə vardı, bu gün də var. Lakin getdikcə onların bölünməsi, qruplaşması fərqli istiqamətdə təşəkkül tapır. Nə qədər bölünüb, parçalanıb, şaxələnib inkişaf etsələr də, onların ortaq nöqtəsi mütləq var: fərdlərə, azad, müstəqil fikirli insanlara qarşı dözümsüzlük. Əgər şəxsi fikirin varsa, bunu ifadə etmək istəyirsən yüz ölçüb, bir biçməlisən. Yoxsa, hücuma, linçə, təhqirə hazır olmalısan.

Onlar klassikləri çıxmaq şərti ilə, heç bir musiqiçini, rejissoru, aktyoru, yutuberi, siyasətçini, yazıçını və şairi bəyənmirlər. Onların fikirincə “bizimkilər” heç nəyi bacarmır. Məsələn, indiki müğənnilər oxuya bilmir, komediya aktyorları güldürə bilmir, rejissorlar çəkməyi bacarmır, yazıçılar isə yazmasa daha yaxşıdır. Nirvanada olduğunu düşünən bu ərənlər, onlar kimi düşünməyənləri cahil, savadsız, savadsız, bacarıqsız hesab edir. Çünki haqqı bilən sadəcə onlardır və onlar da “kövni-məkana sığmırlar”.

***

Xülaseyi-kəlam, bu qəzəbli və əsəbi insanlar arasında yaşamaq, ömür tükətmək əməlli-başlı işgəncədir. Bir yandan pandemiya, bir yandan gündən-günə çətinləşən həyat şərtləri, “bir yandan da havalar...” Açığı hər şeyə birtəhər dözmək, səbr etmək mümkündür. Adamı nə yayın istisi yandırır, nə də susuzluq. Adamı yandıran anlayışsız insanlar arasında yaşayıb, ömür-gün tükətməkdir. Bu qəzəbli, heç nəyi bəyənməyən, hamıya potensial düşmən kimi baxan adamlarla eyni səmanın altında eyni ulduzları seyr etmək o qədər çətindir ki...

0