Xəstəxanada uşaq, arxiv şəkli

Daha bir uşaq zorakılıq qurbanı oldu, prokurorluq işə qoşuldu

673
(Yenilənib 16:45 08.06.2021)
"Azərbaycan Uşaqlar Birliyi"nin sədri Kəmalə Ağazadə zorakılığa məruz qalan azyaşlı ilə bağlı məlumatlar paylaşıb. Sputnik Azərbaycan-ın müxbiri Nigar İsgəndərova hadisə ilə bağlı müəyyən detalları öyrənməyə çalışıb

BAKI, 8 iyun — Sputnik. Daha bir azyaşlı zorakılıq qurbanı olub. Bu barədə "Azərbaycan Uşaqlar Birliyi"nin sədri Kəmalə Ağazadə Sputnik Azərbaycan-a açıqlamasında deyib.

Ağazadə qeyd edib ki, video ona sosial şəbəkələr vasitəsilə göndərilib. Videoda görünən şəxsin adı Vəliyev Rauf İsgəndər oğludur. Onun işgəncə verərək döydüyü isə 9 yaşlı qızı Məlikzadə Milanadır. Rauf "Whatsapp" vasitəsi ilə həyat yoldaşı Rzayeva Təranə Arif qızı ilə danışır. Onlar qeyri-rəsmi şəkildə 10 il birgə yaşasalar da, artıq ayrılıblar:

"Təranə Rzayeva hazırda Moskvada yaşayır. O, 7 aydır ki, Rauf Vəliyevdən ayrılıb. Qadın ayrılıb getməsinə səbəb olaraq bildirir ki, Raufun işgəncələrinə artıq tab gətirə bilməyərək başını götürüb evdən çıxıb. Qızı Milana isə atası Raufla qalıb. Təranə Rzayeva bildirir ki, Rauf indi də keçib 9 yaşlı qızı Milanaya işgəncələr verməyə. Hətta uşağın anası Təranə Rzayevaya "Whatsapp"la zəng edərək uşağa verdiyi işgəncələri canlı şəkildə göstərir. Aidiyyəti orqanlardan xahiş edirik ki, bu məsələni diqqətdə saxlayaraq lazımi tədbirlər görsünlər".

AUB sədri deyir ki, naməlum adamı belə video ilə tapmaq mümkündür və hüquq-mühafizə orqanları ad-soyadı, ünvanı bəlli olan adamı asanlıqla tapa bilərlər.  

"Nə anaya, nə ataya haqq verirəm. Uşaq sadəcə ortalıqda qalıb. O uşaq hər ikisindən alınmalıdır. Onlar sadəcə olaraq bir-birlərinin acığını uşaqdan çıxırlar. İşgəncələrə dözməyib qaçıbsa, uşağını götürüb qaçardı da", - deyə K.Ağazadə vurğulayıb.

Prokurorluq araşdırır

Baş Prokurorluğun Mətbuat xidmətinin rəhbəri Günay Səlimzadə Sputnik Azərbaycan-ın sorğusuna cavab olaraq bildirib ki, bəzi kütləvi informasiya vasitələri və sosial media səhifələrində Rauf Vəliyevin 9 yaşlı qızı Milana Məlikzadəyə döyərək işgəncə verməsi və bunu keçmiş həyat yoldaşı Təranə Rzayevaya “Whatsapp” vasitəsilə zəng edərək nümayiş etdirməsi ilə bağlı yayılmış videogörüntülərlə əlaqədar hazırda Baş Prokurorluğun Cinayət təqibindən kənar icraatlar idarəsi tərəfindən araşdırma aparılır. Nəticəsindən asılı olaraq qanuni qərarın qəbul edilməsi və ictimaiyyətə əlavə məlumatın verilməsi təmin ediləcək.

Qeyd edək ki, bundan öncə də məişət zorakılığının qurbanı olan uşaqlarla bağlı müəyyən məlumatlar yaymışdıq.

Belə ki, Bərdə rayon prokurorluğunda araşdırma aparılmaqla müəyyən edilib ki, Bərdə şəhər sakini Raya Həsənova tanışı Mahmud Mehraliyev ilə birlikdə 2013-cü il təvəllüdlü oğlunu mütamadi olaraq döyüb və 21.05.2021-ci il tarixdə qızdırılmış qaşıqla qollarına xəsarət yetirib.

Faktla bağlı Bərdə rayon prokurorluğunda Cinayət Məcəlləsinin 133.2.3 (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən əzab vermə) və 133.2.4-cü (təqsirkar şəxs üçün aşkar surətdə yetkinlik yaşına çatmayan, habelə köməksiz vəziyyətdə olan şəxsə qarşı əzab vermə) maddələri ilə cinayət işi başlanaraq istintaqın aparılması rayon polis şöbəsinin İstintaq şöbəsinə tapşırılıb.

673
DTX əməkdaşları, arxiv şəkli

DİN DTX Şuşada birgə əməliyyat keçirdi

0
(Yenilənib 14:28 19.06.2021)
Ötən ilin noyabrında işğaldan azad olunmuş Daşaltı kəndində yeddi tondan artıq çətənə kolu məhv edilib.

 

BAKI, 19 iyun — Sputnik. Daxili İşlər Nazirliyinin mətbuat xidmətinin Bərdə regional qrupundan verilən məlumata görə, polis əməkdaşları tərəfindən keçirilən "Xaş-xaş-2021" şərti adlı kompleks əməliyyat-axtarış və profilaktik tədbirlər nəticəsində yabanı halda bitən narkotik tərkibli bitkilər aşkar olunub.

Şuşa Rayon Polis Şöbəsinin və Dövlət Təhlükəsizliyi Xidmətinin əməkdaşlarının birgə keçirdiyi əməliyyat-axtarış tədbirləri nəticəsində Daşaltı kəndi ərazisində yabanı halda bitmiş çəkisi 1,6 tondan artıq olan 2437 ədəd çətənə kolu aşkar edilərək məhv edilib.

Qubadlı Rayon Polis Şöbəsinin və Dövlət Sərhəd Xidməti əməkdaşlarının birgə keçirdikləri əməliyyat-axtarış tədbirləri nəticəsində Əliquluuşağı kəndi ərazisində yabanı halda bitmiş 2,9 tondan artıq çəkidə 5630 ədəd çətənə kolu aşkar edilərək götürülüb.

Dəmir Yolu Nəqliyyatında Polis İdarəsinin Yevlax stansiyası Xətt Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində Qax rayonunun Uzuntala kəndi ərazisində dəmir yolunun kənarında yabanı halda bitmiş çəkisi 3,2 ton olan 3780 ədəd çətənə kolu aşkar edilərək məhv edilib.

0
Toyuq əti

Azərbaycana gətirilən 1,2 ton hind quşu dərisi yararsız çıxdı

84
Məhsulda patogen mikroorqanizm olan salmonella aşkar edilib. Aşkar olunmuş faktla bağlı qanunvericiliyin tələbləri çərçivəsində müvafiq qərar qəbul edilib və istehlak üçün yararsız 1.2 ton hind quşu dərisi məhsulunun satış şəbəkəsinə daxil olunmasının qarşısı alınıb.

BAKI, 19 iyun — Sputnik. Azərbaycan Qida Təhlükəsizliyi Agentliyinin (AQTA) həyata keçirdiyi nəzarət tədbirləri zamanı Türkiyədə fəaliyyət göstərən "Briterra Gida İç Ve Dış Ticaret Anonim Şirketi" tərəfindən istehsal olunan və "Ladess Group" MMC tərəfindən ölkəmizə idxal edilən hind quşu dərisi məhsuluna Agentliyin müfəttişləri tərəfindən baxış keçirib.

AQTA-dan Sputnik Azərbaycan-a verilən məlumata görə, baxış zamanı idxal olunan məhsullardan nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub.

Müayinələr nəticəsində məhsul partiyasında patogen mikroorqanizm olan salmonella aşkar edilib. Aşkar olunmuş faktla bağlı qanunvericiliyin tələbləri çərçivəsində müvafiq qərar qəbul edilib və istehlak üçün yararsız 1,2 ton hind quşu dərisi məhsulunun satış şəbəkəsinə daxil olunmasının qarşısı alınıb.

AQTA əhalinin sağlamlığının qorunması və təhlükəsiz qida məhsulları ilə təmin edilməsi istiqamətində ardıcıl tədbirlərini davam etdirir və istehlakçı hüquqlarının pozulmasına yönəlmiş qanunsuz halların qarşısının alınması istiqamətində müvafiq tədbirlər görüləcək.

84