* AZƏRBAYCAN *
Ayan

Süpürülən talelər - Bir fotodan daha artıq

118
(Yenilənib 18:28 20.05.2021)
"Mən heç kimə əyilən, baş əyən insan deyiləm. O çətin günlərimdə də kiməsə ağız açmadım. Qaynanmış suyumuz, bir də quru çörəyimiz olub. Kimsə gətirib qapımdan quru çörək asıb, gizlincə o çörəyi götürmüşəm".

BAKI, 20 may — Sputnik, Nigar İsgəndərova. Bəlkə də bu tənha qadının çəkdiyi əzablarının nə olduğunu anlamaq çoxumuza çətin olar... Bəlkə də onu ancaq özü kimiləri anlayar - anası, qardaşı, bacısı, həyat yoldaşı olmuş şəxs, bu nikahdan doğulan iki övladı və qaynanası tərəfindən atılanlar, tərk edilənlər...

"Bəs görəsən, belə qadınları daha məğrur, daha qürurlu və yıxılmaz edən nədir?" deyə düşündükdə yenə də övlad sevgisinin hər şeyə üstün gəldiyini görürsən. Həmsöhbətimiz Şövkət Kəlbiyeva kimi... O, bu gün yanında saxladığı övladı, gəlinciyi olan Ayanla həyatdan bərk-bərk yapışıb, onunla böyüyür, onunla gülür, onunla əylənir. Ayan dünyaya gələndən ananın da gülüşləri dəyişib, həyata onun gözləri ilə baxır...

1987-ci il təvəllüdlü Şövkət Kəlbiyeva uşaq ikən ana olanlardandır. Bəlkə də onun kimi birisi üçün ana olmağı, bu hisslərin doğurduğu məsuliyyəti anlamaq çətin olardı. Qəhrəmanımız isə tamamilə fərqlidir. Ayanın gözündən bunu açıq-aşkar görmək, Ayanın dilindən bunu eşitmək mümkündür.

Söhbət artıq bir müddətdir ki, sosial şəbəkədə fotoları yayılan, qısa zamanda hər kəsin ən sevimli qəhrəmanlarına çevrilən Ayan-Şövkət, daha dəqiq desək, ana-bala cütlüyündən gedir. Məlum fotoda süpürgəçi işləyən ananın sadəcə olaraq çarəsizlikdən övladını özü ilə yollarda gəzdirdiyi görünür.

© Sputnik / Nigar Iskanderova
Şövkət Kəlbiyeva qızı Ayanla

Bir fotonun danışdığından daha artıq nələr var, görəsən? Ana və gəlinciyi görmək üçün hazırda onların yaşadığı ünvana - "Azərbaycan Uşaqlar Birliyi"nə üz tuturuq. Qarşımızda əzabkeş ana ilə hər şeyə dözən, aclıq, yoxluq, kimsəsizliyin dadını, bəlkə də hər kəsdən daha yaxşı anlayan Ayan dayanıblar.

Ayan öncə çəkiliş heyətimizə yaxın gəlmir, ərköyünlük edərək qışqırır, "yox, yox..." deyir.

Qızcığazın anası Şövkət xanımın həyatı atasını itirdikdən sonra dəyişib. Bir sözlə, atası dünyadan köçdükdən sonra heç kəs ona arxa-dayaq durmayıb. Böyüdüyü ailədəki münasibətdən yaxa qurtarmaq üçün 16 yaşında ailə həyatı qurub. 14 illik evlilik həyatından 3 övladı dünyaya gəlib:

"Keçmiş həyat yoldaşım ailəyə baxan deyildi, ancaq özünü düşünürdü. O, övladlarını heç düşünən deyildi. Dözdüm, dözdüm, amma artıq bacarmadım, boşandım. Kağız üzərində 14 il evli olsaq da, təxminən 5-6 il birgə yaşadıq. Sonra anasının yanına, rayona getdi, elə orada da yaşadı. Mən isə Bakıda qalıb övladlarımı böyütdüm.

Birgə yaşadığımız müddətdə, ayrıldıqdan sonra da mənim üçün çətinlik elə eyni dərəcədə olub. Çünki evli olduğumuz müddətdə də mən işləyirdim, ailəyə özüm baxırdım. Onun üçün iş tapırdım, gedib ev tikirdi. Amma nə olsun, evin pulunu alandan sonra rayona gedirdi, yenə də bütün yük mənə düşürdü. Ailəli ola-ola evlərə getmişəm, günü 10 manata, ev-eşikləri təmizləmişəm, uşaqlarımın qarnını doyurmağa çalışmışam".

© Sputnik / Nigar Iskanderova
Ayan

Deyəsən, söhbətin bu yerində Şövkət xanımın yarasını təzələmiş olduq. Keçmiş həyat yoldaşı iki övladını ondan ayırıb: "İki böyük oğlum 13-14 yaşlarındadır. Əvvəl zəng edirdim, əlaqə saxlayırdım, danışırdım. Amma son zamanlar artıq onlar məni təhqir edirlər deyə danışmıram, əlaqəni kəsmişəm".

Ana deyir ki, heç onlar üçün darıxmır da: "Çünki övladlarım özlərini dərk edəndən nə qədər əziyyət çəkdiyimi görüblər. Birini belimə bağlamışam, birini yanımda daşımışam, o əziyyətlə onları böyütmüşəm. Hər şeyi onlara görə etdiyimi görürdülər, bununla belə onların mənə belə münasibət göstərməsini qəbul edə bilməzdim. Onları o boyda edim, əziyyətimi heçə vurub atalarını seçsinlər, onun sözü ilə məni təhqir etsinlər, bunu heç zaman qəbul etmərəm".

Artıq iki il yarımdır ki, övladları atalarındadır: "Rəsmi olaraq təxminən 1 ildir ki, boşanmışıq. Mən uşaqları özüm saxlamaq istəyirdim. Amma görünür ki, ataları uşaqlarla kənarda danışıb və onlar atalarında qalmağı seçiblər. Amma qonşularım şahiddirlər ki, övladlarım heç zaman atalarını istəməyiblər.

Aradakı soyuqluq cehiz problemindən başlayıb: "Anam mənə cehiz verməmişdi. Ona görə keçmiş həyat yoldaşım hər dəfə mənimlə dava edirdi, təhqir edirdi, qaynanam adam içində məni pərt edirdi ki, get, anan verən cehizləri çıxart qonaqların qabağına. Bir sözlə, evlilik həyatında günüm heç xoş deyildi. Ailəsi də keçmiş həyat yoldaşımı mənə qarşı qızışdırırdı".
© Sputnik / Nigar Iskanderova
Şövkət Kəlbiyeva qızı Ayanla

"Anam əvvəldən demişdi ki, cehiz verməyəcəm. Yoldaşım da bunu bilirdi. Əslində çox da imkansız ailədən gəlməmişəm. Hətta o biri qızına verdiyi cehizlərin ard-arası kəsilmirdi. Amma mənə vermədi", - deyə o əlavə edib.

Hazırda isə qadın tənhadır, yəni, dar günündə kömək, imdad umacaq bir kimsəsi yoxdur: "Öz ailəm, yəni anamgillə tamamilə soyuğam, heç həyatımda da olmalarını istəmirəm. Onları görmək belə istəmirəm. Hər zaman sözün düzünü dediyim üçün ailəm məni istəməyib. Evimiz anamgillə yanaşıdır, amma onu görmək istəmirəm. Onlar məni heç indi də axtarmırlar. Bilirsiniz necədir, yıxılana balta vuranlar çox olur".  

O, boş divarlar arasında günlərlə övladı ilə birgə səssiz, ac qalıb, kimsənin də bundan xəbəri olmayıb: "Bu günlərdə övladımı səhər tezdən özümlə işə aparmağımın səbəbkarı da anamdır. Çünki uşağıma baxmadılar, yandırdılar. Məsuliyyətsizlik etdilər, övladımın ayaqları yandı. Demirəm ki, bilə-bilə ediblər, amma ən azından səhlənkarlıq olub. Bu neçə il bir yerdə qalmışam balamla, bir dəfə də başına bir iş gəlməyib, yəni, yanmayıb.

Anamgil domino oynayıb, uşağa baxmayıblar, uşaq da sobaya düşüb. İndiyədək də mənə köməklik edən yox idi ki, uşağımı sağaldım. Ayan göbəkdən aşağı yanıb, şah damarı yanıb, şikəstliyə doğru gedir. Övladımı müalicə etdirmək üçün kredit götürdüm, onu xəstəxanada yatızdırdım, iynə-dərmanını elətdirdim. Maaşımı da bank çıxırdı deyə dolanmaq üçün heç bir vəsaitimiz qalmırdı.

Artıq uşağı həkimə aparmışıq, Kəmalə xanım (sığınacağın rəhbəri Kəmalə Ağazadəni nəzərdə tutur - red.) lazım olan hər şeyi, dava-dərmanını alıb. Özü həkimə aparıb-gətirəcəyini deyib. Bir il müddətində uşağı həkimə aparıb-gətirmək lazımdır. Müalicə 1 il müddətində mütəmadi aparılmalıdır. Ən azı uşağım sağalanadək buradayam".

© Sputnik / Nigar Iskanderova
Ayan

O nə sosial yardım, nə də övladına görə müavinət alır. Maaşı 480 manat civarında olsa da, onun da böyük hissəsi bank kreditinə gedir. Övladı növbəti dəfə biganəliyin qurbanı olmasın deyə ana hər səhər qızcığazı özü ilə işə aparır. Səhər tezdən Ayan özünün ən gözəl geyimlərini geyinib-keçinir, saçına düzən verəndən sonra anası ilə yola çıxır, anası küçə süpürür, o isə yanında sakitcə oturur, oynayır.

"Axşam 8-ə işləmiş gəlib evə çatırıq. Elə olur ki, yorulur, daşın üstündə oturub yatır. Aparıb onu mağazaların birində piştaxtanın üstündə yatırdırdım. Amma Ayan bir dəfə də olsa balaca canı ilə "ana, yoruldum" demirdi. Heç mən özüm də yoruldum demirdim", - deyə Şövkət xanım köks ötürərək danışır.

Artıq qarşımızdakı məğrur, əyilməz qadının obrazını daha aydın görməyə başlamışdıq: "Mən heç kimə əyilən, baş əyən insan deyiləm. O çətin günlərimdə də kiməsə ağız açmadım. Qaynanmış suyumuz, bir də quru çörəyimiz olub. Kimsə gətirib qapımdan quru çörək asıb, gizlincə o çörəyi götürmüşəm. Onu suya batırıb üstünə şəkər tozu qatıb övladımla yemişəm. Amma heç kəsə deməmişəm ki, acam, çörək ver. Övladım, "məni parka apar" deyib, amma pulum olmadığı üçün başını qatıb geri qaytarmışam. Maşın sürmək istəyib, bilirəm ki, onlar bahadır, gücüm çatmaz, yalandan aldadıb demişəm ki, "maketdir, əsl maşın deyil"".

© Sputnik / Nigar Iskanderova
Ayan

Şövkət xanım özü geyinməyib övladını geydirən analardan biridir: "Övladımı onun-bunun paltarları ilə böyütməmişəm. Özüm onun-bunun paltarını geysəm də, hər zaman övladıma təzə geyim almışam".

O, həm çöldə fəhləlik edir, həm də ev adlandırdığı, damından su daman evində. Yağış yağanda övladının başına su dammasın deyə özünü daha gərgin əməyə verib: "Xətai rayonunda yaşayıram, taxta daşıyıram, daş daşıyıram. Daşı daş üstünə qoyuram ki, yağış yağanda övladımın başına su tökülməsin. Amma artıq gücüm çatmır. Yağış yağanda qısılırdıq bir divara ki, Alahım, yağış tez kəssin".

Qəhrəmanımız ən çox övladının istəklərini qarşılaya bilməməsinə görə peşmandır: "Tam dürüst valideyn olmamağıma üzülürəm. Övladımın çox arzularını yerinə yetirə bilməməyimə peşmanam, üzülürəm".

Tənha qadın nə etməlidir? Şövkət xanım özü kimi olan belə qadınlara səslənir: "Mənim kimi, tamamilə köməksiz qadınlar hədsiz azdır. Düzdür, adıma ləkə yaxmaq istəyən, başqa təkliflər verənlər də olub. Deyiblər, "gəl səni saxlayaq", razı olmamışam. "Ev tut, evinin kirayəsini verim" deyənlər də olub. Nə məqsədlə dediklərini bildiyim üçün imtina etmişəm. Özüm kimi tənha qadınlara arzu edirəm ki, mən necə əziyyətlərə qatlanmışamsa, onlar da qatlansın, pis yolun yolçusu olmasınlar. Hər zaman adım təmiz, başım dik gəzmişəm. Nə etmişəmsə, övladıma görə etmişəm. Sabah qapımı döyməmiş deməsinlər ki, onun anası filankəsdir".

© Sputnik / Nigar Iskanderova
Şövkət Kəlbiyeva qızı Ayanla

Bir qədər öncə bizimlə dostlaşan Ayanla artıq parkdayıq. Parkı körpə səsi, qığıltısı bürüyüb... Bəlkə də insanların ən xoşbəxt ola biləcəyi yer məhz uşaq parklarıdır. Çünki heç bir səbəb olmadıqda belə, onlar bizim yaşamaq üçün tək səbəblərimiz olur, ən böyük dayaqlarımız olur, yıxılmamaq üçün ən güclü, etibarlı əlimiz olur.

Elə biz də bir qədər orada uşaqlarla birgə xoş zaman keçiririk... Bu arada Ayanla söhbətləşirik də...

- Ayan, ən böyük arzun nədir?

- Reklama çəkilmək istəyirəm...

 

Eləcə də oxuyun:

* Sosial şəbəkədə fotosu ilə məşhurlaşan Ayanın problemi var

* "Uşaqların yerini deməyəcəm" - sığınacaq rəhbəri

* İşsizlik bir əzab, işləmək başqa - Tək valideyn övladlarını hara qoymalıdır

 

118
Teqlər:
süpürgəçi, tale, qız, sığınacaq
Yusif Eyvazov və Anna Netrebko, arxiv şəkli

Yusif Eyvazov Anna Netrebkodan niyə övladının olmadığını açıqladı

5
Rusiyada yaşayan məşhur azərbaycanlı opera müğənnisi karyeraya necə başlamasından, həyat yoldaşı ilə tanışlığından və niyə ondan uşaq sahibi ola bilməməsindən danışıb.

BAKI, 23 iyun — Sputnik. Xalq artisti Yusif Eyvazov müğənni Valeriyanın "Aramızda qalsın" adlı layihəsinə qonaq olub. Azərbaycanlı solist proqramda həyat yoldaşı, Rusiyanın Xalq artisti Anna Netrebkodan niyə övlad sahibi ola bilmədiyinə aydınlıq gətirib.

Peşə seçimi

Uşaq vaxtı mahnı oxumurdum. Oxumaq istədiyimi anlayanda isə təxminən 17-18 yaşım vardı. Bizim ailədə texnoloq və həkimlər üstünlük təşkil edir. Amma mənim bu peşələrə marağım yox idi. Atam onun yolu ilə getməyimi istəyirdi. Hazırlaşıb universitetə daxil oldum. Ali məktəbdə oxuduğum vaxt Şən və Hazırcavablar Komandası ("KVN") yaratmışdılar, mən də üzv oldum. Amma yaxşı "KVN"-çi ola bilmədim.

Çıxışlarımızdan birində mahnı oxumaq lazım idi. Həmin vaxt məni müşayiət edən pianoçu xanım səsimin olduğunu görüb məsləhət verdi ki, Üzeyir Hacıbəyov adına Bakı Musiqi Akademiyasına daxil olum. Ancaq valideynlər bu fikirdə idilər ki, mahnı oxumaqla ailə dolandırmaq olmaz, ona görə də məni bu fikirdən daşındırmağa çalışdılar. Buna baxmayaraq, konservatoriyaya daxil oldum və qərara gəldim ki, estrada müğənnisi olum. Heç indi də notları yaxşı bilmirəm.

Anatoli Qusev adlı bir pedaqoq var, İtaliyada təhsil almış ilk bakılıdır. İndiyə kimi onunla dostluq edirik. İldə bir dəfə Bakıya gəlirdi. Növbəti səfərlərin birində onun yanına getdim. O, mənə dedi: "Əgər oxumaq istəyirsənsə, İtaliyaya getməlisən".

Valideynlərimin məni xaricə göndərmək imkanı yox idi. Onlar mənim İtaliyaya getmək istəyimi sakit qarşıladılar, fikirləşdilər ki, bir müddət sonra bu həvəsim keçəcək. Amma keçmədi. Axırda atam məcbur olub məni İtaliyaya göndərmək üçün tələb olunan dörd min dolları düzəltdi. İki ay İtaliyada yaşayandan sonra bir qəpiyim də qalmamışdı. Evə qayıda bilməzdim. Onda 20 yaşım var idi. İndiki kimi yadımdadır, 1997-ci il idi, qərara gəldim ki, baristalıq edim. Sutkada cəmi dörd saat yatsam da, o dövr həyatımın ən gözəl vaxtları idi. Yaxşı qazanırdım. Bütün Avropanı gəzdim.

İlk çıxış

Bu, İtaliyada baş verdi. Əməlli-başlı biabırçılıq oldu. Üç saat oxudum, hər şey normal idi, ancaq yuxarı not götürmək istəyəndə alınmadı. Xəcalət içində səhnəni tərk etdim. Bu, mənim üçün böyük biabırçılıq idi. Ancaq xaraktercə tez ruhdan düşən insan deyiləm. Bütün dünya mənə deyirdi ki, səndən ifaçı olmaz.

Anna Netrebko ilə tanışlıq

Milanda tanış olduğumuz vaxt o mənə dedi ki, burada heç nə öyrənə bilməyib. Fikirləşdim ki, ya dəlidir, ya da dahi. Bir həftədən sonra onun çıxışını izləyəndə başa düşdüm ki, dahi vokalistdir. Bilirdim ki, premyeradan sonra ayrılacağıq. Agent də ona yaxınlaşmağı qadağan eləmişdi. O vaxt "WhatsApp" yox idi, biz əsasən, elektron poçt vasitəsilə ünsiyyət saxlayırdıq. Premyeradan sonra məni otağından qovdu, səhəri gün isə yazdı ki, artıq mənə olan həvəsi keçib. O, Vyanaya uçdu, amma biz yazışmağa davam elədik.

Sonra o yenidən çıxış etmək üçün Milana gəldi. Xahiş elədim ki, əlavə bir neçə gün də qalsın, razılaşdı. Ayrılıq anı çətin keçdi: başa düşürdüm ki, bəlkə də biz bir daha görüşməyəcəyik. O gedəndən sonra darıxmağa başladım. Onda mənim 35 yaşım var idi, həyatım barədə demək olar ki, fikirləşmirdim. Anna həyatıma yeni nəfəs gətirmişdi. 2014-cü ildə Vyanaya getdim və orada qaldım.

Netrebkonun həyat yoldaşı olmaq...

Anna güclü qadındır, amma mənə onunla yaşamaq asandır. O, kişinin yanında heç vaxt güclü tərəflərini göstərməz. Bu mənada eynilə azərbaycanlı xanımlara bənzəyir. O, heç vaxt kişini alçatmaz. Alçaldılmağa qətiyyən göz yummazdım. Mənim üçün qəbuledilməz iki şey var: xəyanət və hörmətsizlik. Biz ailə qurduğumuz vaxt hamı deyirdi: "Bu, Netrebkonun əridir". Bunu normal qarşılayırdım, bilirdim ki, bundan qaçmaq mümkün deyil, çünki o, ulduzdur. Başladım öz üzərimdə işləməyə. Anna mənim həyatımda ilhamverici qüvvədir. Biz bir-birimizdən çox şey öyrənmişik. İndi mənim yanımdakı qadın yeddi il bundan əvvəlki Anna deyil. Əgər mən ona 25-30 yaşında rast gəlsəydim, yəqin heç bir il də birlikdə yaşaya bilməzdik. Biz onunla övladı dünyaya gələndən sonra tanış olmuşduq. O, axtardığını məndə tapmışdı.

Niyə Netrebkodan övladı yoxdur

Şükür Allaha ki, Tyaqo eynən Annaya bənzəyir. O, xeyirxah və mehriban uşaqdır. İlk dəfə məktəbdə olanda mənə ata dedi. Çox təsirlənmişdim. Həmin an başa düşdüm ki, o mənim ögey deyil, elə doğma oğlumdur. Onun mənim qanımdan, canımdan olmadığını ağlıma belə gətirmirəm. O, həm də mənim ən yaxın dostumdur.

Tyaqo – bizim yeganə övladımızdır, başqa uşağımız olmadı. Anna ilə genetik cəhətdən uyuşmazlığımız var, yəni ayrı-ayrılıqda uşaq sahibi ola bilərik, amma birlikdə bu mümkün deyil. Hər şeyi sınaqdan keçirtsək də, alınmadı. Hətta mənə surroqat anadan övlad sahibi olmaq da təklif edildi. Amma başqa qadından olan övlad istəmirəm. Ona görə də qərar verdik ki, hər şey necə varsa, o cür də qalsın...

5
Футболисты сборной Украины празднуют забитый мяч.

Ukrayna millisi AVRO-2020 pley-off mərhələsində

5
(Yenilənib 22:41 23.06.2021)
Ukraynalılar artıq öz qruplarında üçüncü yeri tutmuş komandalar arasında ilk dördlüyə düşə biliblər.

Futbol üzrə Ukrayna yığma komandası "E" qrupunda bu gün keçirilmiş iki oyundan sonra Avropa çempionatının 1/8 final mərhələsində mübarizəni davam etdirmək hüququ qazanıb.

Çərşənbə günü "E" qrupunda İsveç milisi 3:2 hesabı ilə Polşa yığmasına qalib gəlib, ispanlar isə slovaklara 5 cavabsız top vurublar.

Qruplarda üçüncü yer tutmuş altı komandadan dördü pley-of mərhələsinə çıxır.

Ukrayna millisi "C" qrupunda üç xalla üçüncü yeri tutub, komandanın top fərqi "-1".

Beləliklə, ukraynalılar dəqiqliklə Finlandiya ("В" qrupu, 3 xal, top fərqi "-2") və Slovakiya komandasını ("Е" qrupu, 3 xal, top fərqi "-5") geridə qoyublar.

5