Qəbələ Dəmir yolu Vağzalının və Ləki stansiyası-Qəbələ birxətli dəmir yolu

Stereotipləri sındıran səyahət: Turizm cənnətinə qatarla... Reportaj

134
(Yenilənib 16:56 19.05.2021)
"Dəmir yolu nəqliyyat vasitəsi turistlər üçün çox cəlbedicidir.  Qatarla səyahət edən turistlər ətrafdakı mənzərəni daha rahat seyr edə bilirlər. Bu isə onlara səyahət zamanı zövq verir".

BAKI, 19 may — Sputnik, Zülfiyyə Quluyeva. Qəbələ Azərbaycanda turizmin ən çox inkişaf etdiyi bölgə olsa da, indiyədək turistlərin Qəbələyə əlverişli və rahat ictimai nəqliyyat vasitəsi ilə gedib-gəlməsi mümkün deyildi. Bakıdan Qəbələyə yeni dəmiryol xəttinin çəkilməsi isə artıq turistlərin ölkəmizin bu dilbər guşəsinə qatarla səyahət etməsinə imkan yaradıb.

Dünən "Azərbaycan Dəmir Yolları" QSC və Dövlət Turizm Agentliyinin birgə təşəbbüsü ilə jurnalistlər üçün Qəbələyə qatarla təşkil olunan səfərin məqsədi də elə yeni çəkilən dəmiryol xəttinin bu bölgədə turizmin inkişafında əhəmiyyəti ilə bağlı idi.

Şəxsi maşınla eyni vaxtda

Jurnalistləri Qəbələyə aparacaq sürət qatarı perronda ilk sərnişinlərini gözləyirdi. Qatarın qapısında bizi gözləyən gülərüz bələdçi xanımlarla salamlaşıb, əllərimizi dezinfeksiya edərək ikimərtəbəli qatara daxil oluruq. Təmiz, səliqəli və kondisionerli vaqonlarda hərə öz yerini tutandan sonra "Azərbaycan Dəmir Yolları" QSC-nin Mətbuat katibliyi şöbəsinin müdiri Natavan Bayramova jurnalistlərə məlumat verir ki, indiyədək Bakıdan Ləki stansiyasına qədər dəmiryolu olub. Amma Ləkidən Qəbələyə yeni çəkilən dəmiryol xətti sayəsində artıq Ləkidən Qəbələyə qatarla getmək mümkün olacaq. O bildirir ki, Ləki–Qəbələ birxətli dəmiryolunun tikinti işlərinə 2018-ci ildə başlanılıb.

Dəmiryol xəttinin uzunluğu ox üzrə 42,3 km, yan yollarla birlikdə isə 44,5 km təşkil edir. Ləki-Qəbələ birxətli dəmiryol xətti çətin dağlıq relyefdə layihələndirildiyinə görə torpaq yatağı yüksək qazma (90 m) və tökmələrdən (12 m) keçir. Ümumilikdə layihə üzrə 122 ədəd (o cümlədən 7 körpü, 1 yolötürücü, 6 avtomobil alt keçidi, 2 heyvan keçidi və 106 suötürücü boru) süni mühəndis qurğusu, Ağdaş dəmiryol dayanacağı, Qəbələ dəmiryol stansiyası, Qəbələ dartı yarımstansiyasının tikintisi və Hacıalı yarımstansiyasının təmir işləri aparılıb. N.Bayramovanın bildirdiyinə görə, Bakıdan Qəbələyədək dəmiryol xətti 311 km, qatarın yolda olma müddəti 3 saat 20 dəqiqə təşkil edir. Bu, şəxsi maşınla Qəbələyə çatdığımız vaxta bərabərdir.

Dəmiryol xəttində İsveçrənin "Stadler Rail Group" şirkətinin istehsalı olan dördvaqonlu ikimərtəbəli sürət qatarından istifadə olunur. Qatar standart, biznes və birinci sinif vaqonlardan ibarətdir. Vaqonlardakı yerlərin ümumi sayı 363-dür, bunlardan 293-ü standart, 61-i biznes, 9-u isə birinci sinif yerlərdir. Yağış sularının kənarlaşdırılması və torpaq yatağının dayanıqlığını təmin etmək məqsədilə 16855 paqonmetr beton qanov, 430 paqonmetr drenaj xətti və 277 paqonmetr istinad divarının tikintisi tamamlanıb. Dəmiryoluna paralel olaraq layihə üzrə 10 kV-luq sərbəst yan qidalandırıcı elektirik verilişi xətti və kontakt şəbəkəsi quraşdırılıb. Həmçinin rabitə və işarəvermə işləri istismara hazır vəziyyətə gətirilib. Sürətli qatarın təhlükəsizliyini təmin etmək üçün dəmiryolunun təhkim zolağı boyunca 84600 paqon metr metal hasar quraşdırılıb.

Bakıdan Qəbələyə qatar bileti neçəyə olacaq?

Qurumun sözçüsü hələ ki qatarda gediş haqqının müəyyən olunmadığını söylədi. Onun sözlərinə görə, Bakı-Qəbələ qatarında gediş haqqı tarifi müəyyən olunduqdan sonra bu barədə ictimaiyyətə geniş məlumat veriləcək.

© Sputnik / Zulfiyya Guluyeva
Qəbələ Dəmiryol Vağzalı

Nəqliyyat üzrə ekspert Rauf Ağamirzəyev isə Bakı-Qəbələ qatarında daşınacaq sərnişinlər üçün nəzərdə tutulan bilet qiymətlərinə toxunur. Ekspert deyir ki, qatarda gediş haqqı tarifi barədə indidən qəti fikir söyləmək mümkün olmasa da, dəmiryolu ilə Bakıdan Qəbələyə olan məsafə ilə Bakıdan Gəncəyə məsafə arasında ciddi fərq yoxdur. Ona görə də qiymətlər də Bakı-Gəncə qatarında olduğu kimi müəyyənləşə bilər:

“Təbii ki, bu, mənim proqnozumdur. Standart 10 manat, biznes 25 manat. Amma dəqiq tariflər “Azərbaycan Dəmir Yolları” tərəfindən açıqlanacaq”, - deyə ekspert bildirir.

Wi-fi də var, isti su da...

Qatarla rayonlara səyahət deyəndə hər kəsin ağlında köhnə, alt-üst mərtəbəli yatacaq yerləri olan qatarlar canlansa da, sürət qatarında yatmağa olmasa da, əyləşməyə rahat oturacaqlar var. Hətta bələdçilər qatarda sərnişinlərin darıxmaması üçün wi-fi sistemi olduğunu da söylədilər. Sürət qatarında sanitar qovşaqda əl-üz yumaq üçün isti su, xüsusi zibil qutuları da qoyulub. Qatarda təhlükəsizlik kamerası, əlillərin rahat minib-düşməsi üçün qurğu, geyimlərin asılması üçün asılqan quraşdırılıb. Bu qatarların digərlərindən bir çox xüsusiyyətlərinə görə fərqləndiyi göz önündə idi. Geniş və işıqlı salonu olan vaqonlarda sərnişinlərin yorulduğu halda durub rahat gəzməsi də mümkündür.

© Official website of President of Azerbaijan Republic
Ləki stansiyası-Qəbələ birxətli dəmir yolu

Çoxları sürət qatarına minərkən qısa müddətdə, sürətlə mənzil başına çatacağını düşünsə də, qatar yolunun yaşayış məntəqələrindən keçməsi qatarın sürətini azaltmağa vadar edirdi. Burada bizə məlumat verilir ki, yolların vəziyyətindən asılı olaraq qatar tam sürətlə hərəkət edə bilmir.

Turistlər turizm bölgəsinə qatarla səyahət edəcəklər

Qəbələyə çəkilən dəmiryol xəttinin turizm baxımından əhəmiyyəti barədə elə qatardaca bizimlə səfər edən Dövlət Turizm Agentliyinin Regional Turizm İnkişafı Sektorunun müdiri Elgün Cavadov məlumat verir. O bildirir ki, Ləki-Qəbələ birxətli dəmir yolunun açılışı regional turizm üçün önəmli hadisədir. Onun sözlərinə görə, Azərbaycan kimi coğrafi baxımdan bir o qədər də böyük olmayan ölkələrdə qatarla səyahət çox vacibdir. E.Cavadov bildirir ki, Ləki qatarı Şəki-Zaqatala, Qəbələ-İsmayıllı regionunun turizm potensialının nümayiş etdirilməsi və gücləndirilməsi baxımından böyük önəm daşıyır:

“Qəbələ həm daxili, həm də gəlmə turizm baxımından Azərbaycanın əsas turizm mərkəzlərindən hesab olunur. Bu baxımdan ilin bütün mövsümlərində Qəbələ turist cəlb edən yeganə məkanlardan biri hesab olunur. Çünki burada həm qış turizm növləri, həm də yayda turizm üçün yetərli qədər imkanlar var. Bu gün qatarın məhz Qəbələyə çəkilməsi təsadüfi deyil və olduqca vacibdir”.
© Official website of President of Azerbaijan Republic
Qəbələ Dəmir yolu Vağzalı

Şöbə müdiri Sputnik Azərbaycan-a bildirir ki, dəmiryol nəqliyyat vasitəsi turistlər üçün çox cəlbedicidir. Həmçinin bu nəqliyyat növü  digərlərinə nisbətən daha təhlükəsiz hesab olunur. Onun sözlərinə görə, qatarla səyahət edən turistlər ətrafdakı mənzərəni daha rahat seyr edə bilirlər. Bu isə onlara səyahət zamanı zövq verir.  Agentlik rəsmisi deyir ki, qatar sərnişinlərin getdikləri yerə daha rahat çatma baxımından daha sərfəlidir. Onun sözlərinə görə, Bakı-Qəbələ dəmiryolunun çəkilməsi Qəbələyə turist axınını qoruyub saxlamaq üçün mühüm əhəmiyyət kəsb edəcək.

Qəbələyə turist axını daha da artacaq

Qatarda jurnalist vəzifəmizi unudub bir qədər də sərnişin kimi dincəlmək üçün birinci mərtəbəyə enirik. Sürətini artıran qatar hərəkət etdikcə yamyaşıl əkin sahələri, boy verib qalxan ağacları seyr etmək insana zövq verir. Qatarın həmişə olduğu kimi, sonuncu stansiyada ləngər vurub dayanacağına öyrəşsək də, sürət qatarında bu nostalji hissi yaşamadıq. Komfortlu sürət qatarının mənzil başına çatdığını, demək olar ki, hiss etmədik. Yeni inşa olunan Qəbələ Dəmiryol Vağzalının sərin foyesində jurnalistlərə məlumat verildi ki, pandemiya səbəbindən Abşeron dairəvi dəmiryol xətti istisna olmaqla, ölkədaxili və beynəlxalq istiqamətlərdə ötən ilin mart ayından sərnişin daşımaları dayandırılıb. Dəmiryolu ilə sərnişindaşıma bərpa edildikdən sonra Bakı-Qəbələ qatarı ilə bu bölgəyə səyahət etmək mümkün olacaq.

Qəbələ Dəmiryol Vağzalının yerləşdiyi Kürd kəndinin sakinləri, eləcə də digər qəbələlilər bu günü səbirsizliklə gözləyirlər. Sakinlər Sputnik Azərbaycan-a bildirdilər ki, vağzal fəaliyyətə başladıqdan sonra turizm bölgəsi olan Qəbələyə turist axını daha da artacaq. Bu isə onların güzəranını daha da yaxşılaşdıracaq. 

Vağzalın yaxınlığında öz şəxsi avtomobili ilə taksi fəaliyyəti göstərən Kürd sakinləri isə sərnişinləri qarşılamağa hazır olduqlarını söylədilər. Axı Qəbələ Dəmiryol Vağzalını Qəbələnin mərkəzi ilə 20 kilometrlik məsafə ayırır... Qəbələ Hava Limanına yaxın yerləşən Qəbələ Dəmiryol Vağzalından rayonun mərkəzinə gedən yol isə abaddır. Sürücülər bildirdilər ki, vağzalın gələcək sərnişinlərini 15 dəqiqəyə Qəbələnin mərkəzinə və əks istiqamətə çatdıra bilərlər.

Onu da öyrəndik ki, hazırda rayonun İcra Hakimiyyətilə gələcəkdə Qəbələ Dəmiryol Vağzalından rayonun mərkəzinə sərnişinlərin daşınması üçün marşrut xəttinin açılması da müzakirə olunur.  

Rayon sakinləri qatarla Qəbələyə səyahət edəcək sərnişinlərin yolunu gözləsələr də, bizim gözləməyə vaxtımız az qalmışdı. Odur ki, elə gəldiyimiz sürət qatarı ilə də Bakıya döndük. Turizm cənnəti olan Qəbələyə yenidən qatarla səyahət etmək ümidilə...

Eləcə də oxuyun: 

* Gözəllik qoynunda tələlər: rusiyalı jurnalistin Füzuli təəssüratları - FOTO

* Sənətkarlar və zəhmətkeşlər yurdu Lahıc FOTOLARda

* "Gəlirimiz azalsa da qiyməti endirmişik". Qəbələdə qış turizm mərkəzindən REPORTAJ

134
Teqlər:
foto, video, reportaj, səyahət, qatar, dəmiryolu, Qəbələ
İstanbul şşəhərinə mənzərə, arxiv şəkli

Azərbaycanlıların xaricdə mənzil sevdası

442
(Yenilənib 08:58 18.06.2021)
May ayında Türkiyənin əmlak bazarı azərbaycanlılar üçün xüsusilə cəzbedici olub. Ekspert bunun əsas səbəblərini xırdalayıb.

BAKI, 18 iyun — Sputnik. Yerli əmlak bazarında son bir ildə yaşanan durğunluq qismən aradan qalxmağa başlayıb. Son günlərdə mənzil bazarında müəyyən qədər canlanma nəzərə çarpır. Maraqlıdır ki, Azərbaycan vətəndaşları Türkiyədə mənzil almağa üstünlük verməyə başlayıb.

Statistika nə deyir

Bu ilin may ayı ərzində Azərbaycan vətəndaşları Türkiyədə 47 daşınmaz əmlaka sahib olublar. Türkiyə Statistika İdarəsinin məlumatına görə, azərbaycanlılar sayca Türkiyədə ev alan xaricilərin sırasında 9-cu yerdə qərarlaşıb.

Ötən ilin müvafiq dövründə azərbaycanlılar Türkiyədən 42 mənzil alıblar.

Maraqlıdır, azərbaycanlıların Türkiyə bazarına axın etməsinin əsas səbəbi nədir və qardaş ölkədə mənzil sahibi olanlar əsasən əhalinin hansı təbəqəsini təşkil edir?

Məsələyə ekspert yanaşması

Daşınmaz əmlak üzrə ekspert Elnur Fərzəliyev Sputnik Azərbaycan-a açıqlamasında deyib ki, pandemiyadan öncə də azərbaycanlılar xarici ölkələr içində ən çox Türkiyədə ev alırdılar. Lakin pandemiya dövründə sərhədlər bağlı qaldığı üçün vətəndaşlarımız nəinki ölkədən, heç şəhərdən də çıxa bilmədilər. Belə olan halda xarici ölkələrdə mülkü, əmlakı olan şəxslər arasında ajiotaj yarandı. Prosesin nə zamanadək davam edəcəyi bilinmirdi. Əmlak da vətəndaşlarımız üçün əlçatan deyildi. Odur ki, xaricdə əmlak almaqla bağlı adamlarda qorxu yarandı.

"Çoxları özləri ora gedə bilməsələr də, həmin dövrdə oradakı əmlaklarını satdırmağa çalışdılar. Lakin göründüyü kimi artıq xarici bazara - Türkiyənin mənzil bazarına axın var. Bu mənzillərin əksəriyyətini də Türkiyədə yaşayan, işləyən vətəndaşlarımız alıb. Bundan başqa, övladı orada təhsil alanlar, burada evi, hər şeyi olub orada işləyənlər də Türkiyənin mənzil bazarına axın edir. Övladları Türkiyədə oxuyan imkanlı adamlar düşünürlər ki, orada kirayədə qalmaqdansa, ev alsalar daha yaxşı olar. Bakıda da belədir. Rayonlarda yaşayan imkanlı şəxslər övladı Bakıda oxuduğu üçün ona buradan ev alırlar. Beləcə, gənclər kirayə pulundan azad olurlar, sonra da mənzil onlara qalır. Lazım olanda isə onu istədikləri bazar qiymətinə sata, qoyduqları pulu artıqlaması ilə götürə bilirlər".

Ekspertin sözlərinə görə, Türkiyə xarici vətəndaşların daha asan şəkildə orada ev sahibi ola bilməsi üçün bir sıra qanunları dəyişib: "Əvvəllər xarici ölkə vətəndaşının Türkiyədə əmlak alması qaydaları çox çətin idi. Torpaq sahəsini isə ancaq Türkiyə vətəndaşı ala bilərdi. Lakin qanunlara dəyişiklikdən sonra Tükiyənin daşınmaz əmlak bazarına milyardlarla axın gəldi ki, bu axının böyük qisminin də biz daha çox ərəb ölkələrindən olduğunu görə bilərik. Türkiyə bir dövlət kimi bu vəziyyətdən çox bəhrələndi".

Fərzəliyev Türkiyənin Statistika Komitəsinin xarici ölkə vətəndaşlarınını əldə etdiyi mənzillərlə bağlı statistikanı şəffaf saxladığını qeyd edib. Lakin Rusiya ilə bağlı bunu deməyin çətin olduğunu bildirib.

"Çünki Rusiyada belə statistika yoxdur. Rusiyada 2 milyondan çox azərbaycanlı yaşayır və onların böyük hissəsinin orada evləri var. 2015-2016-cı illərdə devalvasiya baş verdiyi dövrdə Rusiyada maraqlı hadisə baş verdi. Dollar qalxsa da, evlərin qiyməti qalxmadı, elə əvvəlki həddə qaldı", - deyə o, əlavə edib.

Ekspert bildirir ki, 2016-cı ildə Rusiyada yaşayan azərbaycanlıların əksəriyyəti Azərbaycandakı evlərini sataraq dollara çevirib ora aparıblar. Sonra da Rusiyada həmin dollarlara yaxşı evlər alıbar.

Prosesin Azərbaycandakı daşınmaz əmlak bazarına təsiri

Pandemiya dövründə Azərbaycanda mənzillərin qiymətində enmə olmayıb. Ekspertin fikrincə, əksinə qiymət artımı müşahidə olunub ki, bu da tikinti materialları bazarındakı qiymət artımı ilə əlaqədardır.

"Son 1-1,5 il ərzində tikinti materiallarının qiymətində təqribən 30-40 faiz artım olub. Taxtanın qiymətində isə kifayət qədər yüksək artım baş verib. Tikintinin maya dəyərinin artması satışa təsirsiz ötüşməyə bilməz", - deyə Fərzəliyevin sözlərinə görə, pandemiya dövründə bina evlərinə tələbat azalıb. Satılan evlərin əksəriyyəti isə ipoteka ilə satılıb. Ötən ilin may ayında əksəriyyət karantin vəziyyəti ilə əlaqədar olaraq həyət evi alıb. Nəticədə həyətyanı sahələrin, bağ evlərinin qiyməti və kirayə haqqı artıb. Lakin artıq rayonlara gediş-gəliş açıldığı üçün Bakıda həyət evlərinə deyil, rayonlarda mənzil bazarına axının çoxaldığı görünür. Baxmayaraq ki, ötən il bölgələrdə mənzil bazarında 70 faizədək çökmə baş verib.

Əmlak bazarına nəzər saldıqda, paytaxtda mərkəz ətrafında 1 otaqlı evlərin qiyməti 36-105 min manat, 2 otaqlıların qiyməti 63-136 min manat, 3 otaqlıların qiyməti isə yerindən asılı olaraq 235 min manatadək dəyişir.

Qonşu ölkə Türkiyədə vəziyyət necədir?

Pandemiya ilində daşınmaz əmlak bazarında ən çox qiymət artımı olan ölkə Türkiyə olub. Türkiyədə son bir ildə mənzillərin qiymətində 30 faizədək artım olub. Mənzil qiymətlərinin artımına görə, Türkiyədən sonrakı yerdə Yeni Zelandiya və Lüksemburq dayanıb. Bundan başqa, Türkiyədə əcnəbilərə daşınmaz əmlak satışının kəmiyyətində də artım olub - son 4 ayda 19 faizədək.

Türkiyədə 100 kvadratmetrlik 3 otaqlı evlərin qiyməti təxminən 130-145 min Türk Lirəsi arasında dəyişir.

442
Kinolent, arxiv şəkli

Azərbaycanda yeni kino platforması fəaliyyətə başlayıb

18
(Yenilənib 08:48 18.06.2021)
Platformanın yaradılmasında məqsəd Azərbaycan kinosunun, televiziyasının və mədəniyyətinin dünya bazarında, eləcə də dünya auditoriyası arasında populyarlaşması və irəliləməsini təmin etməkdən ibarətdir.

BAKI, 18 iyun — Sputnik. "Narimanfilm" kinostudiyasının xaricdə yaşayan soydaşlarımız üçün xüsusi olaraq hazırladığı https://azcinemaonline.com/ internet kinoteatrı yenilənmiş platformada fəaliyyət göstərməyə başlayıb.

Sputnik Azərbaycan xəbər verir ki, platformanın yaradılmasında məqsəd digər ölkələrdə yaşayan azərbaycanlıların Vətənlə əlaqələrini möhkəmləndirmək, onları mədəniyyət və kino sahəsində baş verən yeniliklərlə tanış etmək, Azərbaycan kinosunun, televiziyasının və mədəniyyətinin dünya bazarında, eləcə də dünya auditoriyası arasında populyarlaşması və irəliləməsini təmin etməkdən ibarətdir. Eyni zamanda, gənc kinematoqrafçılarımıza öz işlərini dünya izləyicilərinə təqdim etmək imkanı yaratmaq və Azərbaycan kinematoqrafçıları ilə digər ölkələrdən olan həmkarları arasında iş birliyinin qurulması üçün şəraitin yaradılmasını təmin etməkdən ibarətdir.

Burada Azərbaycan kinosunun inciləri ilə yanaşı, həmçinin ölkəmizin ərazisində xarici kinematoqrafçılar tərəfindən çəkilmiş filmlərlə tanış olmaq, onlara rəy bildirmək və kinotənqidçilərlə birlikdə müzakirələrə qoşulmaq mümkündür.

Platforma vasitəsilə ölkəmizin kino tarixi boyu yaradılmış müxtəlif bədii, sənədli və animasiya filmlərinin izlənməsi sayt istifadəçilərinə bir növ Azərbaycana açılan pəncərə olaraq gözəl Vətənimizi daha yaxşı tanımalarına imkan yaradır.

18
Politoloq Elşən Manafov

Politoloq: “Parlament üzvlərinin görüşü əlaqələrin dərinləşdirilməsinə töhfə verir”

0
(Yenilənib 09:52 18.06.2021)
Politoloq Elşən Manafov deyir ki, görüşlər hər iki tərəf üçün hüquqi dövlət quruculuğu prosesində müsbət mənada təsir edir
Elşən Manafov: “Bu görüşləri təbii bir prosesin hissəsi hesab edirəm”

Moskvada Azərbaycan Respublikası Milli Məclisinin və Rusiya Federasiyası Federal Şurasının ikitərəfli əməkdaşlığı üzrə parlamentlərarası komissiyasının 15-ci iclası keçirilib.

Politoloq Elşən Manafov Sputnik Azərbaycan-a deyir ki, iki ölkənin parlament nümayəndələri arasında mütəmadi olaraq belə görüşlərin keçirilməsi ölkələr arası münasibətlər üçün faydalıdır: “Belə görüşlər iki ölkə arasındakı əlaqələrin dərinləşdirilməsinə töhfə verməklə yanaşı regional təhlükəsizliyin təmin dilməsinə də öz təsirini göstərir. Görüşlər parlament nümayəndələri üçün təcrübə mübadiləsi baxımından da önəmlidir. Görüşlər hər iki tərəf üçün hüquqi dövlət quruculuğu prosesində müsbət mənada töhfəsini verir. Bu görüşləri tamamilə təbii bir prosesin hissəsi hesab edirəm”.

Politoloqun geniş şərhinə audiofaylda qulaq asa bilərsiniz

0