Gəncədə erməni terroru nəticəsində dağılan evlər bərpa olunur

Raket düşən küçənin sakinləri: “Burada uşaqlıq xatirələrimiz var, hər daşı doğmadır”

481
(Yenilənib 18:55 25.04.2021)
Ötən il oktyabrın 17-də Gəncəyə atılan raket Samir Xasıyev küçəsini də yerlə-yeksan edib. Həmin ünvanda hazırda bərpası mümkün olmayan evlər sökülür, yerində yenisi inşa edilir.

Rahim Məmmədov, Sputnik Azərbaycan

BAKI, 25 aprel — Sputnik. Qalib əsgər, möhtəşəm Azərbaycan Ordusu qələbəyə doğru irəlilədikcə erməni silahlıları geri çəkilib, müharibə gedən ərazidən 70-80 kilometr kənarda yerləşən şəhərlərimizi, dinc sakinləri istifadəsi qadağan olunan silahlarla hədəfə alırdılar. Bu cür vəhşiliklər etməklə insanları qorxutmaq, şəhərləri boşaltmaq xülyasında idilər. Gəncəyə atılan raketlər günahsız sakinləri, körpələri qanına qəltan etdi. Erməni terroru ananı balasız, balanı anasız qoysa da, heç kəs şəhəri tərk etmədi. Sanki insanlar daha da möhkəmləndi, qələbənin yaxınlaşdığını, düşmənin acı məğlubiyyətini görməyə tələsdilər.

Ötən il oktyabrın 17-si gecə saat 00:50-də ermənilər tərəfindən Gəncə şəhərinə endirilən raket zərbələri şəhərin bir neçə ünvanına düşüb evləri, avtomobilləri, obyektləri yararsız hala saldı. Günahsız şəhər sakinləri, qocalar, cavanlar, uşaqlar arasında dünyasını dəyişən, ağır yaralanan oldu. Samir Xasıyev küçəsinə düşən raket oranı yerlə yeksan etdi. Həmin gecənin şahidlərindən olan Şövqi Nağıyev Sputnik Azərbaycan-ın müxbiri ilə söhbətində raketin onların yaşadığı yerdən iki ev yuxarıya düşdüyünü, bərk titrəyişə yuxudan oyanıb hər tərəfin dağıldığını, toz-duman içində olduğunu gördüklərini deyib:

© Sputnik / Rahim Mammadov
Şövqi Nağıyev

“Gecə yarı idi, bərk səs gəldi, ev titrədi, sanki zəlzələ baş verdi. Yuxudan ayılanda gördük ki, pəncərə şüşələri sınıb, evin damı uçub üzərimizə tökülüb. Raket bizdən iki ev yuxarıya düşmüşdü, zərbənin gücündən mənzilimiz yararsız hala gəldi. Atam, anam və iki bacımla birgə yaşayırdıq bu mənzildə. Birtəhər evdən küçəyə çıxa bildik. Hər tərəf toz, duman, tüstü içindəydi. Qərar vermək olmurdu ki, nə edəsən. Hazırda kirayədə yaşayırıq. Evimizin bərpası mümkün deyil. Söküntü işləri gedir. Yenisi inşa ediləcək. Öz küçəmizdə, evimizin yerində tikilməsi daha yaxşıdır, çünki gözümüzü burada açmışıq, buraya öyrəşmişik”.

Samir Xasıyev küçəsi ilə irəlilədikcə düşmənin dinc sakinlərə, günahsız insanlara qarşı törətdiyi vəhşiliyi, barbarlığı açıq-aydın görmək mümkündür. Evlərin divarları uçub, dam örtüyünün hara düşdüyü məlum deyil. Sputnik Azərbaycan xəbər verir ki, küçənin başqa bir sakini Arzu Cəfərovun yaşadığı evdə hadisə zamanı 9 nəfər xəsarət alıb:

© Sputnik / Rahim Mammadov
Arzu Cəfərov

“Həyəcandan indi də danışanda titrəyirəm. Gecə elə dəhşətli səs gəldi, gözümü açanda gördüm, evin damı uçub, çarpayıda qalmışam altda. Başıma, qoluma şüşələr girib, qan axa-axa birtəhər çıxa bildim. Gördüm, bacım uşaqları qaranlıqda qorxub ağlayırlar. İstədim, çıxam həyətə, gördüm, evin qabağındakı çardaq uçub, çıxmaq mümkün deyil. Pəncərədən birtəhər uşaqları təcili tibbi yardım əməkdaşlarına verə bildim.

Qardaşımın üç yaşlı qızının başına çilçıraq düşmüşdü, ondan çox qorxdum, şükür ki, sağ qaldı. Evlərimiz tamam dağılıb, baxış keçirdilər, hazırda söküntü işləri aparılır. Əsas odur, sağ-salamat qurtula bildik. Ölkə rəhbərimizə minnətdaram, universitetin yataqxanasında qalırıq, hər bir şəraiti var. Tezliklə də yeni mənzillərimiz hazır olar, inşallah. Hər gün bu küçəyə gəlib dəyməsəm, dura bilmirəm. Çox öyrəşmişik buralara”.

Tərlan Sadıqova da Gəncəyə atılan raket zərbələrindən zərər çəkənlərdəndir. Həmin gecə yaşadığı evin dağıntıları altından onu nəvəsi xilas edib. Bunu T.Sadıqova Sputnik Azərbaycan-ın müxbirilə söhbətində bildirib:

  • Tərlan Sadıqova
    © Sputnik / Rahim Mammadov
  • Gəncədə erməni terroru nəticəsində dağılan evlər bərpa olunur
    © Sputnik / Rahim Mammadov
  • Gəncədə erməni terroru nəticəsində dağılan evlər bərpa olunur
    © Sputnik / Rahim Mammadov
  • Gəncədə erməni terroru nəticəsində dağılan evlər bərpa olunur
    © Sputnik / Rahim Mammadov
1 / 4
© Sputnik / Rahim Mammadov
Tərlan Sadıqova

“Gecə qəfil səs-küy qopdu. Qəlpələr yana-yana həyətimizə, evin içinə tökülürdü. Məni dağıntılar altından nəvəm çıxarıb. Ətrafa baxmaq olmurdu, pis qoxu, qara tüstü hər tərəfi bürümüşdü, boğulurdum. Altı nəfər yaşayırıdıq bu evdə, dağılıb, heç nə qalmayıb. Gəlib baxıblar, dedilər, bunu bərpa etmək mümkün deyil. Yəqin, yenisini tikəcəklər”.

Qeyd edək ki, Gəncənin Ermənistan silahlı qüvvələri tərəfindən raket atəşinə tutulması nəticəsində 1000-dən artıq fərdi yaşayış evi qismən zədələnib və ya tamamilə dağılıb. Gəncə Şəhər İcra Hakimiyyətinin başçısı Niyazi Bayramov Dövlət Şəhərsalma və Arxitektura Komitəsinin nümayəndələri ilə birlikdə təmir-tikinti prosesinin getdiyi ərazilərə baş çəkib, işlərin gedişatı ilə yerində tanış olub. Şəhər rəhbərinə məlumat verilib ki, qismən ziyan dəymiş 253 evin təmiri artıq başa çatıb, 893 evdə isə işlər davam edir. Bununla yanaşı, 24 qəzalı evdən 10-nun tikintisi həyata keçirilir, 14 evin isə fərdi layihəsi hazırlanır.

481
Teqlər:
bərpa, dağıntı, evlər, dinc sakinlər, raket zərbələri, erməni terroru, Gəncə
Mövzu:
Müharibə adamları
Məmur, arxiv şəkli

Dövlət Əmək Müfəttişliyi Xidməti 477 hüquq pozuntusu aşkar edib

6
(Yenilənib 18:21 09.05.2021)
Hüquq pozuntuları əsasən əmək müqavilələrinin bağlanılmaması və ya onun şərtlərinin yerinə yetirilməməsi, məzuniyyət hüquqlarının pozulması, qanunvericiliyin tələbləri pozulmaqla əmək müqavilələrinə xitam verilməsi və s. ilə bağlı olub.

BAKI, 9 may — Sputnik. Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti daxil olmuş müraciətlərin araşdırılması zamanı 477 hüquq pozuntusu aşkar edib.

Sputnik Azərbaycan xəbər verir ki, bu barədə Xidmətin yanvar-aprel ayına olan hesabatında qeyd olunub.

Bildirilib ki, hüquq pozuntuları əsasən əmək müqavilələrinin bağlanılmaması və ya onun şərtlərinin yerinə yetirilməməsi, məzuniyyət hüquqlarının pozulması, qanunvericiliyin tələbləri pozulmaqla əmək müqavilələrinə xitam verilməsi və s. ilə bağlı olub.

Aşkar olunan hüquq pozuntularının aradan qaldırılması üçün qanunvericilik çərçivəsində tədbirlərin görülməsi təmin olunub. Eyni zamanda, hüquq pozuntularına yol vermiş işəgötürənlərə əmək qanunvericiliyinin müvafiq məsələlərə dair tələbləri barədə məlumatlar verilib.

6

Bu gün 25 mindən çox insan vaksin vurdurub

7
Birinci mərhələ üzrə peyvənd olunanların ümumi sayı 1 005 678, ikinci mərhələ üzrə vaksinasiya edilənlərin sayı 681 719 nəfər təşkil edir.

BAKI, 9 may - Sputnik. Azərbaycanda bu gün 25 625 nəfər vaksinasiya olunub.

Sputnik Azərbaycan xəbər verir ki, bu barədə Nazirlər Kabineti yanında Operativ Qərargah məlumat yayıb.

Qeyd olunub ki, gün ərzində birinci mərhələ üzrə vaksinasiya olunanların sayı 3 710, ikinci mərhələ üzrə vaksinasiya olunanların sayı 21 915 nəfər təşkil edib.

Azərbaycanda bu günə qədər vurulan vaksinlərin ümumi sayı 1 687 397, birinci mərhələ üzrə peyvənd olunanların ümumi sayı 1 005 678, ikinci mərhələ üzrə vaksinasiya edilənlərin sayı 681 719 nəfər təşkil edir.

7
Fillər, arxiv şəkli

Nyu-York məhkəməsi filin müraciətinə baxacaq

0
Heyvanların hüquq müdafiəçiləri ümid edirlər ki, Heppi dünyada azadlıq hüququ məhkəmə qaydasında təsbit olunmuş ilk heyvan olacaq.

BAKI, 9 may — Sputnik. ABŞ-ın Nyu-York şəhər məhkəməsində Heppi adlı dişi filin adından irəli sürülmüş iddiaya dair məsələ araşdırılacaq. Sputnik Azərbaycan xəbər verir ki, Bronks heyvanxanasında yaşayan dördayaqlının adından iddianı məhkəməyə "Nonhuman Rights Project" (İnsan olmayan canlıların hüquqları layihəsi) fondu təqdim edib.

Təşkilatın saytında yerləşdirilmiş məlumatda deyilir ki, bu, tarixdə ingilisdilli məhkəmənin insan olmayan canlı adından verilmiş ərizəni araşdıracağı ilk proses olacaq. Qeyd edək ki, adı çəkilən təşkilat artıq 2018-ci ildən bəri Heppinin adından məhkəmələrə rəsmi müraciətlər ünvanlayıb. Lakin məhkəmələr hər dəfə bu ərizələri geri göndərib.

Məsələ bundadır ki, adı çəkilən fil heyvanxanaya 1970-ci ildə yerləşdirilib. Hazırda o sahəsi 0,81 hektar olan bir qahalda saxlanılır. Zoopark işçiləri onu Peqqi adlı digər dişi fildən ayırmalı olublar. Belə ki, onlar tez-tez dalaşıblar.

"Nonhuman Rights Project" isə hesab edir ki, Heppinin ayrıca qahalda saxlanması onun hüquqlarını pozur. Təşkilat fəalları məhkəmənin filin xüsusiləşdirilmiş fil qoruğuna köçürülməsi barədə qərar çıxarmasına nail olmaq istəyirlər. Heyvanların hüquq müdafiəçiləri ümid edirlər ki, Heppi dünyada azadlıq hüququ məhkəmə qaydasında təsbit olunmuş ilk heyvan olacaq.

Xatırladaq ki, bir müddət əvvəl Pakistandakı Kaavan adlı fil dünyada ən tənha fil adlandırılıb. Belə ki, dişi tayı öldükdən sonra həmin fil təklikdə və dar qəfəsdə saxlanıb. Burada onun digər heyvanlarla yanaşı olmasına imkan verilməyib və o heyvanxana ziyarətçiləri qarşısında çıxış etməyə məcbur edilib. Hüquq müdafiəçiləri beş ildən sonra Kaavanın Kambocadakı fil qoruğuna köçürülməsinə nail olublar. Onların qələbəsinə məşhur müğənni Şerin danışıqlarda iştirak etməsi də kömək edib.

0