Boş sinif otağı, arxiv şəkli

"Çalıquşu" romantikası ilə Cəbiş müəllim imici: kəndlərə ziya aparanlar necə dolanırlar?

828
(Yenilənib 00:27 05.04.2021)
"Fevrala qədər 60 manat alırdım. Əvvəl aldığım kompensasiyanın üzərinə 40, indi isə 10 manat qoyub kirayə haqqı ödəyirəm”.

Zülfiyyə Quluyeva, Sputnik Azərbaycan

BAKI, 5 aprel — Sputnik. Yanvarın sonunda pedaqoji profilli ixtisaslar üzrə ali və orta ixtisas təhsili müəssisələrini bitirmiş və ümumi təhsil müəssisələrində işə başlamış gənc mütəxəssislər üçün kompensasiyanın həcmi artırıldı. Kənd rayonlarının təhsil müəssisəsində fəaliyyətini davam etdirən gənc mütəxəssislərə kommunal xidmətləri və yaşayış yerinin kirayə haqqını ödəmək üçün ödənilən kompensasiya 60 manatdan 90 manata çatdırıldı. Azərbaycanda kəndlərdə çalışan müəllimlərə kompensasiya məbləği artırılsa da, bu onların yaşadıqları yerdən çox-çox uzaqda fəaliyyətləri üçün yetərli deyil.

© Photo : Courtesy of Bahtiyar Shukurov
Bəxtiyar Şükürov

Məsələn, hazırda Qusar rayon Urva kəndində tarix fənnini tədris edən müəllim Bəxtiyar Şükürov aldığı kompensasiyanın üzərinə 10 manat da qoyaraq kirayə haqqı ödəyir. B.Şükürov Sputnik Azərbaycan-a açıqlamasında bildirib ki, Tərtər rayon sakini olsa da, 2017-ci ildən Qusar rayon Yuxarı Kalunxur kənd məktəbində müəllim fəaliyyətinə başlayıb. 2020-ci ildən yerədəyişmə ilə Qusar rayon Urva kənd məktəbində tarix fənnini tədris edir. Qeydiyyatda olduğu Tərtər rayonu ilə işlədiyi kənd arasında məsadə 500 kilometrdir. Buna baxmayaraq 491 manat əməkhaqqı alır: “25 yaşımdan pedaqoji fəaliyyətə başlamışam. Hazırda 29 yaşım var. Subay olsam da ailəmdən uzaqda işləmək çətindir. Çünki məktəbdən gəldikdən sonra evdə özümə yemək hazırlamalı, evdə digər işləri görməli oluram. Burada hər ay kirayə 100 manat pul ödəyirəm. Aldığım kompensasiyanın məbləği isə 90 manatdır. Fevrala qədər 60 manat alırdım. Əvvəl aldığım kompensasiyanın üzərinə 40, indi isə 10 manat qoyub kirayə haqqı ödəyirəm”.

© Photo : Courtesy of Bahtiyar Shukurov
Bəxtiyar Şükürov

B.Şükürov peşəsini sevsə də, ucqar kənd yerlərində dərs keçən müəllimlərin bütün kompensasiyalardan bəhrələnmədiyini söyləyir. Onun sözlərinə görə, ona qanunla işlədiyi ərazidə torpaq sahəsi verilməli olsa da, bu günə qədər verilməyib.

Bütün bunlara rəğmən B.Şükürov işini məsuliyyətlə yerinə yetirir. Hətta Qusar rayonunda etnik azlıqların Azərbaycan dilini yaxşı bilməməsi müəllimi onların dilini öyrənməyə də vadar edib:

“Ailədən uzaqda işləmək çətin olsa da, bu məsuliyyəti öz üzərimə götürmüşəm. Hətta Qusarda işə başlayandan ləzgi dilini də öyrənmişəm. Əvvəl işlədiyim kənddə uşaqlar Azərbaycan dilini tam bilmirdilər. Onlara dərsi izah etmək üçün mən də ləzgi dilini öyrəndim”.
© Photo : Courtesy of Bahtiyar Shukurov
Bəxtiyar Şükürov

Təhsil eksperti Kamran Əsədov bildirir ki, kənd məktəblərində fəaliyyətə başlayan gənc müəllimlər üçün stimullaşdırıcı tədbirlər tətbiq edilsə də hal-hazırda verilən vəsaitlər onların xərclərini tam ödəmir:

“İlk növbədə qeyd edim ki, gənc müəllimlərin stimullaşdırılması üşün ciddi addımlar atılıb. Rayon mərkəzindən 3 km-dən 20 km-ə qədər məsafədə yerləşən kənd məktəbləri üçün müəllimlərə aylıq 90 manat, 20 km-dən artıq məsafədə yerləşən kənd məktəbləri üçün 180 manat vəsait ödənilir.

Bundan başqa, kəndlərdə əmək fəaliyyətinə başlamaq üçün konkret iş yerlərinə göndəriş almış gənc mütəxəssislərə, həmçinin yol xərci, əmlakın daşınması üçün nəqliyyat xərci və ilkin yaşayış şəraitinin yaradılması məqsədi ilə əməkhaqqının iki misli həcmində birdəfəlik yardım da ödənilir. Təhsil Nazirliyi son illər müəllimlərin sosial vəziyyətinin yaxşılaşdırılması istiqamətində mühüm addımlar atır. Həmin müəllimlər işlədikləri ərazidə daimi yaşamaq istəyirlərsə, icra hakimiyyəti bu məllimlərə torpaq sahəsi də ayırmalıdır. Onlara güzəştli kreditlər də verilir. Bununla belə, mən də hesab edirəm ki, kənd yerlərində işləyən müəllimlər üçün ödənilən kompensasiya məbləği artırılmalıdır. Amma bununla yanaşı, kənd yerlərində təhsilin səviyyəsi də yüksəldilməldir”. 

© Photo : Courtesy of Bahtiyar Shukurov
Bəxtiyar Şükürov

Qeyd edək ki, bu ilin yanvar ayının 29-da baş nazir Əli Əsədov “Pedaqoji profilli ixtisaslar üzrə ali və orta ixtisas təhsili müəssisələrini bitirmiş və ümumi təhsil müəssisələrində işə başlamış gənc mütəxəssislər üçün əlavə güzəştlər və stimullaşdırıcı tədbirlərin müəyyən edilməsi haqqında” Nazirlər Kabinetinin qərarına müvafiq dəyişiklik edib. Son dəyişikliyə əsasən, pedaqoji profilli ali və orta ixtisas təhsili müəssisələrini bitirmiş yaşı 35-dək olan gənc mütəxəssislərin kənd rayonlarında yerləşən ümumi təhsil müəssisələrinə işə cəlb olunmasının stimullaşdırılması və həmin müəssisələrdə pedaqoji kadr tələbatının ödənilməsi məqsədilə dövlət sifarişinə əsasən ümumi təhsil müəssisələrində əmək fəaliyyətinə başlayan və 3 (üç) il müddətində həmin və ya digər kənd rayonlarının təhsil müəssisəsində fəaliyyətini davam etdirən gənc mütəxəssislərə kommunal xidmətləri və yaşayış yerinin kirayə haqqını ödəmək üçün 90 manat məbləğində kompensasiya verilir. 

828
Teqlər:
kompensasiya, problemlər, kənd, müəllim

Bakıda minik maşını avtobusa çırpılıb, yaralı var

7
(Yenilənib 23:24 14.04.2021)
Nərimanov rayonunda dayanacaqda saxlamış "Bakubus" MMC-yə məxsus avtobusa yüksək sürətlə hərəkət edən minik maşını çırpılıb.

BAKI, 14 aprel - Sputnik. Bakının Nərimanov rayonunda yol-nəqliyyat hadisəsi baş verib.

Sputnik Azərbaycan APA-ya istinadən xəbər verir ki, hadisə Koroğlu Rəhimov küçəsində qeydə alınıb.

“Bakubus” MMC-yə məxsus 13 nömrəli marşut avtobusu dayanacaqda duran zaman yüksək sürətlə hərəkətdə olan “Hyundai” markalı avtomobil ona çırpılıb. Qəza nəticəsində minik avtomobilinin sürücüsü ağır bədən xəsarəti alıb.

Hadisə yerinə Nərimanov Rayon Polis İdarəsinin əməkdaşları cəlb ediliblər.

 

7
Teqlər:
"BakuBus" MMC, yaralı, avtobus, qəza
Kino lenti, arxiv şəkli

"Fəryad-2" filmində hansı dəyişikliklər olacaq?

154
"Ssenarini oxuyan kimi müəllifin kim olduğunu o saat bilmək olur. Hesab edirəm ki, bu film Azərbaycan kinematoqrafiyasına ən yaxşı töhfələrdən biri olacaq".

Şahpəri Abbasova, Sputnik Azərbaycan

BAKI, 14 aprel — Sputnik. Mədəniyyət Nazirliyinin sifarişi ilə C.Cabbarlı adına "Azərbaycanfilm" kinostudiyasında "Fəryad-2" adlı bədii filmi çəkiləcək.

Bu barədə Sputnik Azərbaycan-a danışan C.Cabbarlı adına "Azərbaycanfilm" Kinostudiyasının direktoru Fariz Əhmədov bildirir ki, Azərbaycan Prezidenti, Ali Baş Komandan İlham Əliyevin rəhbərliyi ilə Müzəffər Azərbaycan Ordusu tərəfindən 44 günlük Vətən müharibəsində qazanılmış qələbəyə həsr olunan filmin ssenari müəllifi və quruluşçu rejissoru tanınmış kinorejissor, Xalq artisti Vaqif Mustafayevdir: 

"Mən ssenarini oxuyan bir adam kimi, yaradıcı şəxs kimi deyə bilərəm ki, çox yaxşı bir film olacaq. Orada Vaqif Mustafayev markası var. Vaqif Mustafayevin digər filmlərindəki xətt bu filmdə də hiss olunur. Vaqif Mustafayevin özünün dəst-xətti var.

Ssenarini oxuyan kimi müəllifin kim olduğunu o saat bilmək olur. Hesab edirəm ki, bu film Azərbaycan kinematoqrafiyasına ən yaxşı töhfələrdən biri olacaq. Məkanlar və aktyorlar hələlik məlum deyil. Birinci "Fəryad"la ikinci "Fəryad" arasında fərq var. Digərlərini isə filmə baxdıqlarında görə biləcəklər".

Qeyd edək ki, filmin çəkilişlərinin bu ilin iyul-avqust aylarında, əsasən Vətən müharibəsi zamanı döyüş əməliyyatlarının aparıldığı ərazilərdə həyata keçirilməsi planlaşdırılır. Xatırladaq ki, ilk "Fəryad" filmi 1993-cü ildə çəkilib. Film Birinci Qarabağ müharibəsinə həsr olunub. Baş qəhrəmanın prototipi var və burada təsvir olunan hadisələr real faktlara əsaslanır. Ekran əsəri Qarabağ müharibəsində döyüşən əsgərlərdən birinin başına gətirilən əhvalatdan bəhs edir.

154
Teqlər:
"Azərbaycanfilm" kinostudiyası, Azərbaycan, film
ABŞ prezidneti Co Bayden, arxiv şəkli

Baydenlə Putinin görüşü yaxın həftələrdə baş tuta bilər

0
"Biz Rusiya ilə stabil və təxmin edilən münasibətləri üstün tuturuq. Bu, öz növbəsində kommunikasiya xətlərinin açıq olmasını tələb edir ki, biz baxışlarımız, siyasət, Rusiyanın hərəkətlərinə qarşı etirazımız barədə aydın danışa bilək" - Blinken.

BAKI, 15 aprel - Sputnik. ABŞ Prezidenti Cozef Bayden rusiyalı həmkarı Vladimir Putinə "yaxın həftələrdə" görüşməyi təklif edib.

Sputnik Azərbaycan-ın məlumatına görə, bunu ABŞ dövlət katibi Entoni Blinken deyib. Bir qədər öncə isə Ağ Ev görüşün yaxın bir neçə ay ərzində baş tuta biləcəyini bildirmişdi.

​"Biz Rusiya ilə stabil və təxmin edilən münasibətləri üstün tuturuq. Bu, öz növbəsində kommunikasiya xətlərinin açıq olmasını tələb edir ki, biz baxışlarımız, siyasət, Rusiyanın hərəkətlərinə qarşı etirazımız barədə aydın danışa bilək. Bu, yanlışlardan qaçmaq üçün vacibdir. Bunu da siz dünən gördünüz: Bayden prezident Putinə zəng vuraraq yaxın həftələrdə görüşməyi təklif etdi", - Blinken Brüsseldə təşkil olunmuş mətbuat konfransında deyib.

0
Teqlər:
görüş, Cozef Bayden, Vladimir Putin