Əminə Hüşənova

Azərbaycanda bir ilk yazmağa hazırlaşan qız

663
(Yenilənib 15:34 15.03.2021)
"Azərbaycanda gəmiçilik sahəsində ilk mexanik xanım kimi adımı tarixə yazdıracağıma inanıram. Bunun üçün də əlimdən gələni edəcəm. Əsas güvəndir, özümə güvənirəm" - Əminə Hüşənova.

Nigar İsgəndərova, Sputnik Azərbaycan

BAKI, 16 mart — Sputnik. Elə peşələr var ki, onlar sırf kişilər üçün spesifikdir. Bu sahədə zərif cinsin nümayəndəsinin işləyəcəyini düşünmək ağlasığmazdır. Amma bəzən mümkünsüz də mümkün olur, həmsöhbətimiz Əminə Hüşənovanın seçimi kimi. Qarmon üzrə təhsil alan, musiqi təhsilini qırmızı diplomla bitirən Əminə illərdir gəmiqayırma sahəsində mexanik olmağı arzulayır. Bu gün o, uşaqlıq arzularına bir addım daha yaxındır.

Sputnik Azərbaycan gəmiqayırma sahəsində mexanik vəzifəsində çalışan ilk qadın kimi tarixə düşməyə hazırlaşan Əminə Hüşənova ilə söhbətləşib. 18 yaşlı Əminə Azərbaycan Dövlət Dəniz Akademiyasının 1-ci kurs tələbəsidir.

Əminə deyir ki, uzun illərdir, bu sahəyə maraq göstərir: "Azərbaycan Dövlət Dəniz Akademiyası hər zaman diqqətimi çəkib. Demək olar ki, uşaqlıqdan orada təhsil almağı, mexanik olmağı düşünürdüm. Elə ona görə də ixtisas seçimi zamanı ilk növbədə buranı seçdim. Hazırda "Gəmi Mexanikası və Elektromexanikası" fakültəsində "Gəmi energetik qurğularının istismarı mühəndisliyi" ixtisası üzrə 1-ci kurs tələbəsiyəm. Eyni zamanda Tələbə Həmkarlar İttifaqı Komitəsində katibə vəzifəsini icra edirəm. Bu peşədə çalışacağımdan böyük qürur hissi keçirirəm".

O, bu ixtisasla bağlı müəyyən məlumatlar toplayır, iş mexanizmi ilə maraqlanırmış. Xüsusən də dənizçi formasını çox bəyənirmiş: "Anam tibb bacısıdır, o, hərbi sahədə çalışır. Onun hərbi tibb bacısı olması mənim formaya sevgimi daha da artırıb. Forma həm də böyük məsuliyyət deməkdir. İxtisasla bağlı seçim edərkən anamla da məsləhətləşdim. Anamla rəfiqə kimi olduğumdan nəsə qərar verməzdən öncə mütləq onunla məsləhətləşirəm, o da hər zaman mənə dəstək olur. Düzdür, bu qərarıma görə qohumlar arasında bir-iki nəfər mənə qarşı çıxdı, onlar bu peşənin qadına uyğun olmadığını desələr də, həmişəki kimi anam yanımda oldu, dəstək verdi".

Anası ilə yanaşı, atası da onun gəmiqayırma sahəsində mexanik kimi çalışmaq istəyinə etiraz etməyib.

Həm insan sağaldır, həm dəmirçilik edir: Astaralı usta iki peşəni necə birləşdirir
© Sputnik / Rahim Zakiroğlu / Kamilla Əliyeva / Leyla Orucova

Bu peşənin qadınlara xas olmadığı kənardan deyilsə də, həmsöhbətimiz bu fikirlərlə razı deyil. O düşünür ki, bu peşə elə ona görədir. "Düşünürəm ki, mənim üçün bundan gözəl bir peşə ola bilməz. Yəni, özümü başqa bir peşədə, sahədə görə bilmirəm. Çətin olsa da, gəmi mexaniki olmaq həm də qürurvericidir. Həyat elə çətinliklərlə gözəldir", - deyən həmsöhbətimiz düşünür ki, bundan sonra da ailəsi yanında olacaq və hər bir çətinlikdə ona dəstək olacaq.

Əminə deyir ki, peşəsinin çətin olmasının bir səbəbi də "motorxana" adlanan yerdə mühərriklərin və digər mexanizimlərin çox yüksək səslə işləməsidir: "Amma bu məni qorxutmur. Hər bir xanım, mənim fikrimcə, istədiyinə nail ola bilər, bunun üçün sadəcə məqsəd və istək lazımdır".

O, işinin əsas xüsusiyyətlərindən danışır: "Biz bir mexanik olaraq gəminin mühərriyini işə salmalı, onun qaydada olub-olmamasını yoxlamalıyıq. Gəmidə hansısa bir problem varsa, onu aradan qaldırmalıyıq. Gələcək planlarıma gəldikdə isə yenə də peşəmdən danışa bilərəm. Özümü bu sahədə daha da təkmilləşdirəcəyəm. Azərbaycanda gəmiçilik sahəsində ilk mexanik xanım kimi adımı tarixə yazdıracağıma inanıram. Bunun üçün də əlimdən gələni edəcəm. Əsas güvəndir, özümə güvənirəm".

663
Bakı metrosunda

"Bakı Metropoliteni"ndə yeni əsaslarla qurulur

6
Təmir-baxış qanovlarında müasir idarəetmə sisteminin tətbiqi, kommutasiya sistemi mərkəzləşmiş formada yeni əsaslarla qurulur

 

BAKI, 12 aprel — Sputnik. "Bakı Metropoliteni" Qapalı Səhmdar Cəmiyyətinin "Nərimanov" elektrik deposunda qatarların baxış-təmir sahələrində daha bir texniki yenilik tətbiq edilir. Əsaslı təmir edilərək yenidən qurulan bu sahələrin fəaliyyətinin optimallaşdırılması istiqamətində innovativ tədbirlərin həyata keçirilməsi istiqamətində mühüm işlər görülür. Bu barədə "Bakı Metropoliteni" QSC-dən Sputnik Azərbaycan-a verilən məlumatda bildirilib.

Qeyd olunub ki, qanovlarda qatarların hərəkətini təmin edən 825 V-luq kontakt şəbəkəsi yenidən qurulur. Başqa sözlə, şəbəkədə kommutasiya sisteminin müasirləşməsi üzrə işlər aparılır.

Məsələnin aydın olması üçün qeyd edək ki, baxış-təmir qanovlarında qatarlar 825 V-luq sabit gərginliyi olan yollardakı kimi təmas relsindən deyil, qanovlar yerləşən sahənin tavanında quraşdırılmış təmas şəbəkəsindən alır. Bu isə təhlükəsizlik qaydalarının tələbindən irəli gələn bir məsələdir.

1966-cı ildən fəaliyyətdə olan depoda kommutasiya sisteminin dəyişdirilməsi onun daha müasir və etibarlı sistemlə əvəz edilməsi deməkdir. Bununla iş şəraiti də müasir dövrün tələbinə uyğunlaşdırılır. Görülən tədbirlərlə kontakt şəbəkəsi elementləri də yenilənməklə gücləndirilir və qanovlara yüksək gərginliyin verilməsi prosesi tam avtomatlaşdırılır.

Yeni sistemin tətbiqi ilə hər qanov qarşısında xüsusi təyin edilmiş dolablar qoyulub. Bununla baxış-təmir qanovunda dayanmış qatara sabit gərginlik verilməsi üçün çevirici qolları fırlamaq əvəzinə, sadəcə, komanda düyməsini sıxmaq yetərlidir.

Layihə İtaliyanın "Ropla" şirkəti ilə əməkdaşlıq şəraitində həyata keçirilir. Hazırda 10 qanovda yüksək gərginlik şəbəkəsinin bütün avadanlıqları, idarəetmə dolabları quraşdırılıb və sistem istifadəyə verilib. Daha 7 qanovda işlərin aparılması üçün hazırlıq tədbirləri davam etdirilir və bu, qanovların əsaslı təmiri prosesi ilə paralel aparılır.

İşlər bununla tamamlanmır. Bütün qanovlarda yeni sistem eyni mərkəzdən idarə olunacaq. Bu istiqamətdə tədbirlər davam etdirilir. İdarəetmə mərkəzində iş başında olan operator otağı tərk etmədən qatarların istənilən baxış-təmir qanovuna gərginliyin verilib-çıxarılmasını avtomatik yerinə yetirə biləcək.

6
Azərbaycanlı müğənni Rəqsanə İsmayılova, arxiv şəkli

Müğənni Rəqsanə: "Müğənnilər puldan ötrü elə yerdə çıxış edirlər ki"

6
(Yenilənib 00:02 13.04.2021)
"İndi elə xalq artistləri var ki, bir toy idarə edə bilmir. Ad almaq o demək deyil ki, sənəti var. İndi heç bir toydan qıtlıq çəkmirəm. Gedib 50-60 min rubla konsert vermirəm"

 

BAKI, 12 aprel — Sputnik. Rusiyada yaşayan müğənni Rəqsanə İsmayılova  Rusiyada toya gedən müğənniləri tənqid edib. Sputnik Azərbaycan xəbər verir ki, sənətçi özünün "Instagram" səhifəsində canlı yayım açaraq öz həmkarları haqqında bunları deyib: "Azərbaycan müğənnisi, musiqiçisi bu gün öz hörmətini qoruyub saxlaya bilmir, puldan ötrü elə yerdə çıxış edirlər ki. Özlərinə hörmət qoysunlar. Puldan ötrü hər yerdə oxumaq olmaz, ayıbdır. Özlərinə elə bir qiymət qoyublar ki, utanıram. Səhvsiz insan yoxdur. 5-6 ildir ailə qurmuşam, ərim, uşağım var. Mənim də bəzi səhvlərim olub. Onları etdiyim üçün özümü bağışlamıram. Amma bura gələn bəzi müğənnilər, xahiş edirəm, toydan sonra gedin evinizdə yatın, başqa yerə getməyin. Allah sizə bir parça çörək verib. Əri, həyatında kimsə olan insan artıq hərəkət etməməlidir. Edirsənsə, o kişi nəyə lazımdır? Pula görə özünüzü hörmətdən salmayın. Gəlmisiniz məclis oxuyasınız, başqa hərəkətlər etməyə gəlməmisiniz. Sözüm kimədirsə, götürəcək. Üç-dörd gün əvvəl eşitdiyim sözə görə bunları deyirəm. Əgər yenə eşitsəm, həmin insanların adını açıqlayacağam, deyəcəyəm, yiyələri gəlib onları buradan aparsın. Pulu sevməyin, hər zaman olacaq, ruzini Allah verəcək. Mən 10-15 il oxumasam, acından öləsi biri deyiləm. Bəlkə tək olsam gəlib kafedə oxuyardım, amma sizin oxuduğunuz kafelərə baxanda adam utanır".

Müğənni əlavə edir ki, indi elə xalq artistləri var ki, bir toy idarə edə bilmir: "Ad almaq o demək deyil ki, sənəti var. İndi heç bir toydan qıtlıq çəkmirəm. Gedib 50-60 min rubla konsert vermirəm. Konsert kafedə yox, sarayda olar. Burada konsert verən müğənnilərdən əvvəl o təklif mənə gəlib. Nə övladıma imkan vermişəm, nə də özüm etmişəm".

"Bilirəm, bir ildən çoxdur toy, iş yoxdur. Bura pul qazanmağa gəlirsiniz. Ömür boyu pul qazanan musiqiçilər puldan ötrü bir-birini qırır. Bəs, fəhlə nə etsin? Bakıda toy üstündə bir-biri ilə dalaşanlar, hamısını gətirib Rusiyaya çıxarmısınız. Burada dava yox idi, indi Bakıda olanları burada yaşayırsınız. Pul üstündə bir-birilərini qırırlar. Bilirəm, hamınızın övladı, ailəsi, krediti var. Amma gəlin qazanın, ağılla, başla. Damağınızda siqaret, oturursunuz kişilərin içində. Siqareti kişi çəkər. Mən də musiqiçilərlə çalışıram. Hamısını gəlib danışırlar. Yoldaşınıza kənardan kimsə baxıb ələ salmasın".

Qeyd edək ki, pandemiya ərəfəsində Əməkdar artist Mətanət İsgəndərli, müğənnilər Şəbnəm Tovuzlu, Zenfira İbrahimova, Fədayə Laçın, Damla, Kərim Abbasov və başqaları Rusiyaya köçərək, orada işləməyə başlayıblar.

6