Vətən müharibəsi iştirakçısı Yusif Cabirzadə nişanlısı ilə

Astaralı qazinin top-tüfənglə başlayıb toy-nişanla bitən döyüş yolu

891
(Yenilənib 00:37 11.03.2021)
"Bizim rayonlar arasında məsafənin çox olmasına baxmayaraq mənim Ceyran xanıma evlilik təklifimi ailəm çox xoş qarşıladı".

Rahim Muradov, Sputnik Azərbaycan

BAKI, 11 mart — Sputnik. "Astaranın ucqar Sım kəndində anadan olmuşam. 2016-cı il Aprel döyüşlərində iştirak etmişəm. Hərbi xidməti bitirdikdən sonra isə bir müddət Bakıda daş karxanasında işlədim". Bunları Sputnik Azərbaycana Vətən Müharibəsi zamanı Füzulidən Şuşanın Daşaltı kəndinə qədər döyüş yolu keçən Astaranın Sım kənd sakini Yusif Ramiz oğlu Cabirzadə danışır. Qazi Yusif yaralandıqdan sonra öz sevgisini tapıb. Cabirzadə 2020-ci ilin Tovuz döyüşləri zamanı döyüşlərdə könüllü iştirak etmək üçün onlayn qeydiyyatdan keçib:

© Photo : From personal archives Yusif Dzhabirzade
Vətən müharibəsi iştirakçısı Yusif Cabirzadə hərbçi yoldaşları ilə

"Həmin vaxt məni döyüşə aparmadılar, amma 21 sentyabr 2020-ci ildə isə təlimlərə getdik. 27 sentyabr tarixindən isə N saylı hərbi hissənin kəşfiyyat bölüyünün tərkibində Füzuli rayonu ərazisindən Vətən müharibəsində döyüşlərə qoşuldum. Döyüşlərin ilk günündən 2020-ci ilin noyabrın 1-dək müharibədə iştirak etmişəm. Füzuli və Xocavənd rayonlarının azad olunmasında iştirak etmişəm. Xocavənd uğrunda döyüşlər gedə-gedə bizi ayırdılar və Xüsusi Təyinatlı Qüvvələrin tərkibində döyüşmək əmr olundu. Daşaltı kəndində gecə saat 01:00 radələrində avtomobildə düşmən üzərinə hərəkət edərkən mənfur düşmən bizi minaatanlardan atəş açdı. Nəticədə bizim maşın vuruldu və aşdı. Allaha şükür, orada şəhidimiz olmadı, amma avtomobilin içərisində mənimlə bərabər 9 nəfər yaralandıq. Ayağımdan qəlpə yarası aldım, sağ əlim isə maşının dəmirləri arasında qalıb bərk əzildi. Həmin gün dərhal məni Füzuli Rayon Mərkəzi Xəstəxanasına təxliyə etdilər, oradan da Ağsu Rayonu Mərkəzi Xəstəxanasına gətirdilər. Ağsuda bir dəfə əməliyyat olunandan sonra noyabrın 16-da məni Gəncə Mərkəzi Kliniki Xəstəxanasına gətirdilər. Gəncə Mərkəzi Kliniki Xəstəxanasında həkimlər, tibb bacıları və demək olar bütün personal bizim qulluğumuzda canla-başla dururdular. 20 noyabr tarixində isə xəstəxanada tibb bacısı işləyən Ceyran adlı xanımla tanış oldum. Dekabrın 26-a kimi mən həmin xəstəxanada müalicədə oldum. Bu müddət ərzində onun mənə qarşı daha çox diqqət etdiyini gördükdə, mənim də ona qarşı diqqətim artdı və sonra ona qarşı sevgim başladı".

© Photo : From personal archives Yusif Dzhabirzade
Vətən müharibəsi iştirakçısı Yusif Cabirzadə qazi yoldaşları ilə

Qazimiz bir gün palata yoldaşı əməliyyat olunan zaman palatada tək olub: "Həmin vaxt dediyim tibb bacısı bizim palataya gəldi. Mən ona olan sevgimi etiraf edib evlilik təklifini etdim. Birinci "hə" cavabını vermədi, "yox" da demədi. İki gün keçəndən sonra ona qarşı olan sevgimi və onunla ailə qurmaq istədiyimi bildirdikdən sonra Ceyran xanım mənə "hə" cavabını verdi. Xəstəxanada müalicə olduğum vaxt mənim həmin qızı sevdiyimi ikimizdən başqa kimsə bilmirdi. Amma biz nişanlandıqdan sonra hamı xəbər tutdu. Mənimlə bir palatada qalan uşaqlar, xəstəxananın həkimləri və tibb bacıları mənə zəng edib təbrik etdilər. Bu xəbəri eşidən əsgərlik yoldaşlarım, iş və döyüş yoldaşlarım indi də mənə zəng edib xeyir-dualarını bildirirlər".

Qazi Yusifin valideynləri isə oğullarının onlardan xəbərsiz,uzaq rayondan olan bir qıza evlilik təklifinə xoş baxıblar: "Bizim rayonlar arasında məsafənin çox olmasına baxmayaraq mənim evə demədən Ceyran xanıma evlilik təklifimi ailəm çox xoş qarşıladı. Valideynlərim bu xəbəri eşidəndən sonra hətta bizim tez zamanda nişanlanmağımızı istədilər və 7 mart tarixində biz Yevlaxda nişanlandıq".

© Photo : From personal archives Yusif Dzhabirzade
Vətən müharibəsi iştirakçısı Yusif Cabirzadə nişanlısı ilə

Qazimiz öz sevgisini tapsa da, yaralanmağına sevinməyib: "Mən yaralanan zaman azad olunmamış ərazilər qalmışdı. Mən axıra qədər getməli idim, çünki Kəlbəcəri işğaldan azad etmək uşaqlıq arzum idi".

Məlumat üçün bildirək ki, Yusif Cabirzadə "Füzulinin azad olunmasına görə", "Xocavəndin azad olunmasına görə", "Cəsur döyüşçü" medallarına layiq görülüb. Əlavə edək ki, qazimiz ailə qurduqdan sonra bir müddət doğma kəndində, daha sonra isə Bakıda yaşayıb iş qurmağı planlaşdırır.

891
Qandal, arxiv şəkli

Keçmiş komitə sədri Nazim İbrahimovun qardaşı həbs olundu

5
Hazırda Sahib İbrahimovun digər qanunsuz hərəkətləri barədə daxil olmuş çoxsaylı müraciətlər əsasında intensiv istintaq hərəkətləri aparılır.

BAKI, 17 aprel - Sputnik. Bakı şəhəri Xətai rayon məhkəməsinin "STS" şirkəti, "Sahil-D Kompani" MMC-nin təsisçisi, dələduzluq faktlarına görə əvvəllər məhkum edilmiş İbrahimov Sahib Hüseyn oğlunun yenidən oxşar xarakterli cinayət əməlləri törətməsinə dair xüsusi qərardadı əsasında 2021-ci ilin yanvar ayından başlayaraq Baş prokuror yanında Korrupsiyaya qarşı Mübarizə Baş İdarəsində araşdırma aparılmaqla Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.

Bu barədə Azərbaycan Respublikası Baş Prokurorluğunun Mətbuat xidmətindən məlumat verilib.

Eyni zamanda, həmin özəl təşkilatların vəzifəli şəxsləri barəsində kommersiya bankından daxil olmuş materiallar da qeyd edilən cinayət işinə əlavə edilməklə iş üzrə zəruri istintaq hərəkətləri həyata keçirilmişdir.

Cinayət işi üzrə aparılmış istintaq-əməliyyat tədbirləri ilə "STS" şirkəti və "Sahil-D Kompani" MMC-nin təsisçisi Sahib İbrahimovun qeyd edilən təşkilatların digər vəzifəli şəxsləri ilə qabaqcadan əlbir olaraq verdiyi tapşırıqlar əsasında əvvəlcədən vəd edilmiş əmlakı alıcıya vermək niyyəti olmadan tikintisi aparılan binalarda qeyri-yaşayış sahələrinin satılması görüntüsünü yaratmaq məqsədi ilə yalan vəd verərək saxta sənədlərin tərtib edilməsi yolu ilə ayrı-ayrı vaxtlarda vətəndaşdan ümumilikdə 1 milyon 735 min manat məbləğində pul vəsaitini alaraq şəxsi ehtiyaclarına sərf etməsinə, rəsmi sənədlərə bilə-bilə yalan məlumatları daxil etməklə vəzifə saxtakarlığı törətməsinə əsaslı şübhələr müəyyən edilmişdir.

Bundan başqa, Sahib İbrahimovun xidməti vəzifələrinin icrası ilə əlaqədar özü üçün qanunsuz üstünlük əldə etmək məqsədilə fərdi sahibkar kimi tikinti işlərinin aparılması üçün xərclərin ödənilməsi adı ilə kommersiya bankından 300 min manat məbləğində pul vəsaitini ələ keçirib şəxsi ehtiyaclarına sərf edərək təkrarən dələduzluq etməsinə əsaslı şübhələr müəyyən edilmişdir.

İş üzrə toplanmış kifayət qədər sübutlar əsasında, 17 aprel 2021-ci il tarixdə Sahib İbrahimova Cinayət Məcəlləsinin 178.3.2 (külli miqdarda ziyan vurmaqla dələduzluq), 308.2 (ağır nəticələrə səbəb olmaqla vəzifə səlahiyyətlərindən sui-istifadə etmə) və 313-cü (vəzifə saxtakarlığı) maddələri ilə ittiham elan edilmiş, sonuncu istintaq orqanının çağırışlarına gəlmədiyindən və müxtəlif üsullarla ibtidai istintaqın normal gedişinə mane olduğundan məhkəmənin qərarı ilə barəsində həbs qətimkan tədbiri seçilmişdir.

Hazırda Sahib İbrahimovun digər qanunsuz hərəkətləri barədə daxil olmuş çoxsaylı müraciətlər əsasında intensiv istintaq hərəkətləri aparılır.

İstintaqın gedişatı və nəticəsi barədə ictimaiyyətə ətraflı məlumat veriləcək.

Qeyd edək ki, Sahib İbrahimov Diasporla İş üzrə Dövlət Komitəsinin sabiq sədri Nazim İbrahimovun qardaşıdır. Sahib İbrahimov bir müddət ATV şirkətinin prezidenti olub. 

5

Azərbaycanda bir gündə 2287 nəfər COVID-19-dan sağalıb

11
İndiyədək ölkədə ümumilikdə 298522 nəfərin koronavirus infeksiyasına yoluxması faktı müəyyən edilib, onlardan 262480 nəfər müalicə olunaraq sağalıb, 4107 nəfər vəfat edib, aktiv xəstə sayı 31935 nəfərdir.

BAKI, 17 aprel - Sputnik. Azərbaycan Respublikasında koronavirus (COVID-19) infeksiyasına 2148 yeni yoluxma faktı qeydə alınıb, 2287 nəfər müalicə olunaraq sağalıb.

Nazirlər Kabineti yanında Operativ Qərargahdan verilən məlumata görə, COVID-19 üçün götürülən analiz nümunələri müsbət çıxmış 30 nəfər vəfat edib.

İndiyədək ölkədə ümumilikdə 298522 nəfərin koronavirus infeksiyasına yoluxması faktı müəyyən edilib, onlardan 262480 nəfər müalicə olunaraq sağalıb, 4107 nəfər vəfat edib, aktiv xəstə sayı 31935 nəfərdir.

Son sutka ərzində yeni yoluxma hallarının müəyyənləşdirilməsi ilə əlaqədar 14583, ötən müddət ərzində isə ümumilikdə 3096740 test aparılıb.

11
Erməni qüvvələrinin açdıqları atəşdən sonra Bərdədə vəziyyət

Ermənistanın Bərdəyə raket zərbəsi barədə reportaj beynəlxaq mükafat ala bilər

0
(Yenilənib 18:18 17.04.2021)
"VICE News"un Ermənistanın Bərdəyə raket zərbəsi barədə reportajı beynəlxaq mükafata namizəd irəli sürülüb.

BAKI, 17 aprel - Sputnik. "VICE News" informasiya agentliyinin jurnalisti Hind Həsənin Ermənistan qoşunlarının Bərdə şəhərinə raket zərbəsindən sonra hazırladığı reportaj "The One World Media" beynəlxaq mükafatına namizəd irəli sürülüb.

Trend bu barədə mükafatın rəsmi saytına istinadən məlumat verir.

Məlumata əsasən, "VICE News"un ikinci Qarabağ müharibəsində döyüş bölgəsindən kənarda yerləşən Bərdə şəhərinə edilən raket hücumunun fəsadlarını əks etdirən reportajı "News Award" kateqoriyasında mübarizə aparacaq.

Xatırladaq ki, ötən il müharibə zamanı Ermənistan qoşunları Bərdəyə raket zərbələri endirmişdi. Nəticədə 20-dən çox şəxs həlak olmuş, 70 nəfər yaralanmışdı.

0