Bakıda qar, 24 fevral 2021-ci il

Gələn dəfə qar yağanadək unutmayın - "Yüz nəfər şikayət edirsə, normaldır"

54
"Biri gedir Badamdarda ev tikir, sonra gəlib deyir ki, mənə xətt çək. Daha düşünmür ki, bunun maliyyə xərci dövlət büdcəsində nəzərdə tutulmayıb. Ya da ki, dövlət deməyib ki, gəl burada qaz çək" - Nüsrət Qasımov

Nigar İsgəndərova, Sputnik Azərbaycan

BAKI, 25 fevral — Sputnik. Bir neçə gündür ki, havanın temperaturu düşüb, respublikanın bir çox ərazilərində, eyni zamanda da Bakı və Abşeronda qar yağıb. Havaların şaxtalı keçməsi ilə əlaqədar fevralın 23-ü axşam saatlarından kommunal xidmətlər üzrə fəaliyyət göstərən qurumlar gücləndirilmiş rejimə keçdiklərini bildirdilər.

Bəs maraqlıdır, əhali göstərilən xidmətlərdən razı qaldımı, hansı ərazilərdə problemlər müşahidə edildi?

Abonent Sevinc xanım deyir ki, aşağı "Güzdək" qəsəbəsində bu günlərdə işıq, qaz, su ilə bağlı çoxsaylı problemlər oldu: "Problemlərimiz bitib-tükənmir. Yoldan, nəqliyyatdan tutmuş işıq, qaz, su ilə bağlı da problemlərimiz var. Xüsusən belə şaxtalı günlərdə bu problemlər bir qədər də artdı, suyu fasilələrlə verdilər".

Ötən gün Lökbatan ərazisində də işığın verilişində müəyyən məhdudiyyətlər olub. Sumqayıtda, "Kristal Abşeron"a məxsus binada isə fevralın 23-ü axşam saatlarından işıqların kəsildiyi deyilir. Abonentlər Yasamal rayonunun bəzi ərazilərində də işıqların sönməsindən şikayətlidirlər. 7-ci mikrorayonda isə qazın adi günlərlə müayisədə zəif olduğu bildirilir. Sakinlər ötən gün müəyyən saatlarda Xırdalanda, Masazırda işıqların sönməsindən gileyli olublar. Abonent Raminə Məmmədova deyir ki, Abşeronda demək olar ki, nə qaz, nə su, nə də işıq var.

Sosial şəbəkədə təşkil etdiyimiz sorğudan isə bəlli olur ki, abonentlərin əksəriyyəti məhz "Azərışıq" Açıq Səhmdar Cəmiyyətinin fəaliyyətindəm narazıdır.

Azad İstehlakçılar Birliyinin (AİB) kommunal xidmətlər üzrə mütəxəssisi Nüsrət Qasımov Sputnik Azərbaycan-a açıqlamasında ümumi vəziyyəti dəyərləndirib. O istehlakçılardan fərqli olaraq vəziyyətin qənaətbəxş olduğunu deyib: "Son günlərlə bağlı elə bir şikayət yoxdur. Kommunal xidmətlər üzrə 2 milyon yarımadək abonent var. Bu xidmətlərlə 10, 50, 100 şikayətin olması normaldır. Köhnə binalara insanlar su üçün motor qoyurlar, gecə də ayaz vurur, partladır. Bunu problem etmək düzgün deyil axı".

Ekspert bölgələrlə bağlı vəziyyəti isə bu cür dəyərləndirir:

"Bölgələrdə şaxta 16 dərəcəyə çatıb. Bizim xidmət sahələri bu şaxtaya hazır deyil. Artıq yüklənmələr olur. Sovet dövründə necə idi?! Evdə 2-3 dənə lampa, televizor, bir soyuducu, bir də radio olurdu, vəssalam. İndi ət maşını, tozsoran, paltaryuyan maşın, qabyuyan maşın, ev üçün qızdırıcılar, soyuducular, televizorlar var. Axı xidmət sahələri buna hazır deyil. Öncələr naqilin en kəsiyini az götürürdülər, indi belə yüklənmədə naqillərin ötürücülük qabiliyyəti zəifləyir, qızır. Bununla da yanğın əmələ gəlir".

Onun sözlərinə görə əsas problem sistemin köhnə olmasından qaynaqlanır. Ekspert deyir ki, bölgələrdə köhnə xətlərin yenilənməsinə ehtiyac var: "Azəriqaz" İstehsalat Birliyi, "Azərişıq" Açıq Səhmdar Cəmiyyəti, "Azərsu" ASC, "Azəristiliktəchizat" ASC satış təchizatçısıdırlar. Onlar qazandıqları pullarla öz xərclərini ödəyirlər. Dövlət tərəfindən isə bu kommunal xətlərin yenilənməsi üçün büdcədən vəsait ayrılmalıdır".

"Biri gedir Badamdarda ev tikir, sonra gəlib deyir ki, mənə xətt çək. Daha düşünmür ki, bunun maliyyə xərci dövlət büdcəsində nəzərdə tutulmayıb. Ya da dövlət deməyib ki, gəl burada qaz çək. Villa tikən şəxs bunun üçün cibinə də baxmalıdır, xətlərin çəkilməsini də düşünməlidir", - deyə ekspert digər problemə toxunub.

O, standartlardan kənara çıxmaların fəsadlarından da danışıb: "Standartlarda yazılıb ki, 1 yarımdüymədən, yəni 15 metrlik qaz borusundan ancaq bir evi təmin etmək olar. Lakin Sabunçuda,  Ramana, Binə kimi ərazilərdə 15 qonşu da 1 yarımdüymədən, qaz borusundan yararlanır. Belə bir vəziyyətdə təzyiqi artırmaq qorxuludur. 0.5 millimetrdən çox alçaq təzyiqdə qaz kəmərinə qaz vermək qadağandır", - deyə o əlavə edib.

Ekspert bildirir ki, tədricən köhnə binalar sökülüb, yeni binalar tikildikcə bu problem aradan qalxacaq.

Qeyd edək ki, "Azəriqaz" İstehsalat Birliyi əhali xətləri üzrə ayın 23-də 32 milyon kub metrə yaxın qaz qəbul etdiyini bildirib. Qurumun mətbuat katibi Ceyhun Səfərov havaların soyuması ilə əlaqədar olaraq son bir neçə gündə qazın verilişində artım olduğunu açıqlamışdı: "Ötən ilin eyni dövrü, 2020-ci ilin 23 fevral tarixi ilə müqayisə etsək, 6 milyon kubmetr artıq qaz qəbul olunub. Havaların daha soyuq olması ilə laqədar olaraq tələbat böyük olduğundan qazın qəbulunda da artım olub. Fevralın 21-də hava mülayim olsa da, ötən ilin eyni dövrü ilə müqayisədə qazın verilişində 8 milyon kubmetr artım olmuşdu".

Fevralın 17-dən 21-dək isə gündəlik olaraq qazın verilişində azı 4 milyon kubmetr artım olub. Lakin görülən bu işlərlə yanaşı bəzi ərazilərdə qazın verilişində məhdudiyyətlər olmuşdu. C.Səfərov bunun səbəbini açıqlayaraq bildirmişdi ki, şaxtalı hava ilə əlaqədar olaraq minik avtomobillərinin qaz xətlərinə çırpılması nəticəsində bəzi ərazilərin qaz təchizatında problemlər yaranmışdı, mindən çox abonentin qaz təchizatında müvəqqəti fasilələr olmuşdu.

"Azərişıq" Tarif Şurasına müraciətlə bağlı açıqlama verdi>>

"Azərişıq" Açıq Səhmdar Cəmiyyətinin mətbuat katibi Vaqif Aydınoğlu bu günlərdə Bakı şəhəri və regionlarda gücləndirilmiş iş və növbətçilik sisteminin təşkil olunduğunu qeyd etmişdi. O bəzi ərazilərdə buzlaşma və yüklənmə səbəbindən baş vermiş qısamüddətli açılmalarla əlaqədar qəza xidmətinin əməkdaşları tərəfindən işlərin görüldüyün qeyd edib.

54
Teqlər:
ekspert, AİB, işıq, qaz, su, Azərbaycan, Bakı, xidmət, kommunal
Mövzu:
Bakı qarın əsarətində (30)
Bakı metrosunda

"Bakı Metropoliteni"ndə yeni əsaslarla qurulur

6
Təmir-baxış qanovlarında müasir idarəetmə sisteminin tətbiqi, kommutasiya sistemi mərkəzləşmiş formada yeni əsaslarla qurulur

 

BAKI, 12 aprel — Sputnik. "Bakı Metropoliteni" Qapalı Səhmdar Cəmiyyətinin "Nərimanov" elektrik deposunda qatarların baxış-təmir sahələrində daha bir texniki yenilik tətbiq edilir. Əsaslı təmir edilərək yenidən qurulan bu sahələrin fəaliyyətinin optimallaşdırılması istiqamətində innovativ tədbirlərin həyata keçirilməsi istiqamətində mühüm işlər görülür. Bu barədə "Bakı Metropoliteni" QSC-dən Sputnik Azərbaycan-a verilən məlumatda bildirilib.

Qeyd olunub ki, qanovlarda qatarların hərəkətini təmin edən 825 V-luq kontakt şəbəkəsi yenidən qurulur. Başqa sözlə, şəbəkədə kommutasiya sisteminin müasirləşməsi üzrə işlər aparılır.

Məsələnin aydın olması üçün qeyd edək ki, baxış-təmir qanovlarında qatarlar 825 V-luq sabit gərginliyi olan yollardakı kimi təmas relsindən deyil, qanovlar yerləşən sahənin tavanında quraşdırılmış təmas şəbəkəsindən alır. Bu isə təhlükəsizlik qaydalarının tələbindən irəli gələn bir məsələdir.

1966-cı ildən fəaliyyətdə olan depoda kommutasiya sisteminin dəyişdirilməsi onun daha müasir və etibarlı sistemlə əvəz edilməsi deməkdir. Bununla iş şəraiti də müasir dövrün tələbinə uyğunlaşdırılır. Görülən tədbirlərlə kontakt şəbəkəsi elementləri də yenilənməklə gücləndirilir və qanovlara yüksək gərginliyin verilməsi prosesi tam avtomatlaşdırılır.

Yeni sistemin tətbiqi ilə hər qanov qarşısında xüsusi təyin edilmiş dolablar qoyulub. Bununla baxış-təmir qanovunda dayanmış qatara sabit gərginlik verilməsi üçün çevirici qolları fırlamaq əvəzinə, sadəcə, komanda düyməsini sıxmaq yetərlidir.

Layihə İtaliyanın "Ropla" şirkəti ilə əməkdaşlıq şəraitində həyata keçirilir. Hazırda 10 qanovda yüksək gərginlik şəbəkəsinin bütün avadanlıqları, idarəetmə dolabları quraşdırılıb və sistem istifadəyə verilib. Daha 7 qanovda işlərin aparılması üçün hazırlıq tədbirləri davam etdirilir və bu, qanovların əsaslı təmiri prosesi ilə paralel aparılır.

İşlər bununla tamamlanmır. Bütün qanovlarda yeni sistem eyni mərkəzdən idarə olunacaq. Bu istiqamətdə tədbirlər davam etdirilir. İdarəetmə mərkəzində iş başında olan operator otağı tərk etmədən qatarların istənilən baxış-təmir qanovuna gərginliyin verilib-çıxarılmasını avtomatik yerinə yetirə biləcək.

6
Azərbaycanlı müğənni Rəqsanə İsmayılova, arxiv şəkli

Müğənni Rəqsanə: "Müğənnilər puldan ötrü elə yerdə çıxış edirlər ki"

6
(Yenilənib 00:02 13.04.2021)
"İndi elə xalq artistləri var ki, bir toy idarə edə bilmir. Ad almaq o demək deyil ki, sənəti var. İndi heç bir toydan qıtlıq çəkmirəm. Gedib 50-60 min rubla konsert vermirəm"

 

BAKI, 12 aprel — Sputnik. Rusiyada yaşayan müğənni Rəqsanə İsmayılova  Rusiyada toya gedən müğənniləri tənqid edib. Sputnik Azərbaycan xəbər verir ki, sənətçi özünün "Instagram" səhifəsində canlı yayım açaraq öz həmkarları haqqında bunları deyib: "Azərbaycan müğənnisi, musiqiçisi bu gün öz hörmətini qoruyub saxlaya bilmir, puldan ötrü elə yerdə çıxış edirlər ki. Özlərinə hörmət qoysunlar. Puldan ötrü hər yerdə oxumaq olmaz, ayıbdır. Özlərinə elə bir qiymət qoyublar ki, utanıram. Səhvsiz insan yoxdur. 5-6 ildir ailə qurmuşam, ərim, uşağım var. Mənim də bəzi səhvlərim olub. Onları etdiyim üçün özümü bağışlamıram. Amma bura gələn bəzi müğənnilər, xahiş edirəm, toydan sonra gedin evinizdə yatın, başqa yerə getməyin. Allah sizə bir parça çörək verib. Əri, həyatında kimsə olan insan artıq hərəkət etməməlidir. Edirsənsə, o kişi nəyə lazımdır? Pula görə özünüzü hörmətdən salmayın. Gəlmisiniz məclis oxuyasınız, başqa hərəkətlər etməyə gəlməmisiniz. Sözüm kimədirsə, götürəcək. Üç-dörd gün əvvəl eşitdiyim sözə görə bunları deyirəm. Əgər yenə eşitsəm, həmin insanların adını açıqlayacağam, deyəcəyəm, yiyələri gəlib onları buradan aparsın. Pulu sevməyin, hər zaman olacaq, ruzini Allah verəcək. Mən 10-15 il oxumasam, acından öləsi biri deyiləm. Bəlkə tək olsam gəlib kafedə oxuyardım, amma sizin oxuduğunuz kafelərə baxanda adam utanır".

Müğənni əlavə edir ki, indi elə xalq artistləri var ki, bir toy idarə edə bilmir: "Ad almaq o demək deyil ki, sənəti var. İndi heç bir toydan qıtlıq çəkmirəm. Gedib 50-60 min rubla konsert vermirəm. Konsert kafedə yox, sarayda olar. Burada konsert verən müğənnilərdən əvvəl o təklif mənə gəlib. Nə övladıma imkan vermişəm, nə də özüm etmişəm".

"Bilirəm, bir ildən çoxdur toy, iş yoxdur. Bura pul qazanmağa gəlirsiniz. Ömür boyu pul qazanan musiqiçilər puldan ötrü bir-birini qırır. Bəs, fəhlə nə etsin? Bakıda toy üstündə bir-biri ilə dalaşanlar, hamısını gətirib Rusiyaya çıxarmısınız. Burada dava yox idi, indi Bakıda olanları burada yaşayırsınız. Pul üstündə bir-birilərini qırırlar. Bilirəm, hamınızın övladı, ailəsi, krediti var. Amma gəlin qazanın, ağılla, başla. Damağınızda siqaret, oturursunuz kişilərin içində. Siqareti kişi çəkər. Mən də musiqiçilərlə çalışıram. Hamısını gəlib danışırlar. Yoldaşınıza kənardan kimsə baxıb ələ salmasın".

Qeyd edək ki, pandemiya ərəfəsində Əməkdar artist Mətanət İsgəndərli, müğənnilər Şəbnəm Tovuzlu, Zenfira İbrahimova, Fədayə Laçın, Damla, Kərim Abbasov və başqaları Rusiyaya köçərək, orada işləməyə başlayıblar.

6