Protez-Ortopedik Bərpa Mərkəzinin İstehsalatın Keyfiyyətinə Nəzarət və İdarəolunması üzrə mütəxəssisi Kənan Pirizzadə

On yaşında üzərindən "KamAZ" keçən hüquqşünas - O indi qazilərin xilasedicisinə çevrilib

70
(Yenilənib 00:35 22.02.2021)
"Bilirsiniz, yaşamaq üçün, irəliyə doğru getmək üçün insan gərək həyatda itirdiyinə heyfsilənməsin, əlindəki zamanı, şansı dəyərləndirsin" - Kənan Pirizadə.

Nigar İsgəndərova, Sputnik Azərbaycan

BAKI, 22 fevral — Sputnik. Hədəf olmadan həyatda yaşamaq, ondan zövq almaq çox çətindir. Bəzən hər bir imkanı, şəraiti olan insanlar belə, hədəfsiz yaşayaraq həyatlarının mənasız olmasından şikayətlənirlər. Ən çıxılmaz vəziyyətdə belə hədəfin olmalıdır ki, yaşaya biləsən, nəyəsə nail ola biləsən.

Sputnik Azərbaycan-ın həmsöhbəti Kənan Pirizadə uşaqlıq yaşlarından həyatın amansız üzü ilə rastlaşsa da, heç zaman ümidini kəsməyib, hədəflərlə yaşayıb və onlara çatmağa nail olub. Hazırda Protez-Ortopedik Bərpa Mərkəzinin İstehsalatın Keyfiyyətinə Nəzarət və İdarəolunması üzrə mütəxəssisi olan K.Pirizadə uşaqlıqdan protez ayaqla gəzir.

Öncə fəaliyyətindən danışan K.Pirizadə deyir ki, buradakı əsas işi xəstəyə baxaraq onun hansı amputasiya dərəcəsində olduğunu qiymətləndirməkdir: "Bundan sonra həmin şəxsə hansı protezin təyin olunacağı öyrənilir. Prosesin bu hissəsi xüsusi diqqət tələb edən bir məsələdir". 

© Sputnik / Nigar Iskanderova
Protez-Ortopedik Bərpa Mərkəzinin İstehsalatın Keyfiyyətinə Nəzarət və İdarəolunması üzrə mütəxəssisi Kənan Pirizadə

İyirmi ildir ki, protez istifadəçisi olduğunu deyən Kənan Pirizadə bizə uşaqkən başına gələn bədbəxt hadisə haqda danışır: "On yaşımda valideynlərinmi deyim, yoxsa özümünmü deyim, ehtiyatsızlığımdan ağır qəza baş verdi, üzərimdən "KamAZ" keçdi. Yolu keçərkən valideynlərim məndən bir qədər uzaqda idilər". 

Həmsöhbətimiz deyir ki, 10-12 yaşlarında, yəni yeniyetməlik çağında belə hadisələrin baş verməsi psixoloji olaraq müəyyən sarsıntıya səbəb olur: "Başıma gəldiyi üçün bunu hər zaman etiraf edirəm ki, müəyyən çətinliklər olur. Xüsusən də psixoloji olaraq. Çünki o dövrdə beyində bir-birindən fərqli fikirlər olur. Vəziyyətdən çıxış yolu kimi əsas odur ki, belə şəxslərin həyatda ümidləri, hədəfləri olsun. Beləcə, idmanı özümə hədəf seçdim. On iki yaşımdan üzgüçülüyə getdim. 19 yaşımda İslandiyada Avropa çempionatına qatıldım. Düşünürəm ki, 19 yaşlı gənc üçün bu, böyük uğur idi. Bundan sonra Almaniya, İngiltərə, Danimarka və digər ölkələrdə beynəlxalq yarışlara qatıldım".

© Sputnik / Nigar Iskanderova
Protez-Ortopedik Bərpa Mərkəzində qazilər

"Bilirsiniz, yaşamaq üçün, irəliyə doğru getmək üçün insan gərək həyatda itirdiyinə heyfsilənməsin, əlindəki zamanı, şansı dəyərləndirsin", - deyə həmsöhbətimiz əlavə edir.

O, 2013-cü ildə təhsili ilə əlaqədar üzgüçülüyü dayandırıb: "Dövlət hesabına Moskvada hüquq təhsili almağa başladım. Artıq hüquqşünas kimi magistr təhsilimi davam etdirirəm".

İstifadə etdiyi protez ən mürəkkəbi hesab olunur: "Protezin quruluşunda istifadə olunan oynaqların sayı nə qədər çox olarsa, bir o qədər mürəkkəb olar. Mənim çanaqdan taxdığım protez hip-protezdir, yəni çanaqdan disartikulizasiya olunmuş protezdir. Ən mükəmməl protezlər elektron protezlərdir ki, bu gün onlar bütün II Qarabağ müharibəsi qazilərinə təqdim edilib. Bunlar Almaniyadan gətirilən "Ottobock" protezləridir".

© Sputnik / Nigar Iskanderova
Protez-Ortopedik Bərpa Mərkəzinin İstehsalatın Keyfiyyətinə Nəzarət və İdarəolunması üzrə mütəxəssisi Kənan Pirizadə

K.Pirizadənin əsas hədəfi isə II Qarabağ müharibəsi iştirakçılarına əlindən gəldiyi qədər yardım etmək, onlara təlimlərdə kömək göstərməkdir: "Hər kəs kimi, mənim də böyük hədəflərim var. Amma sırf bu günə olan əsas hədəfim II Qarabağ müharibəsi qaziləri, bir sözlə, qəhrəmanlaırımızla bağlıdır. Tezliklə onları ayaq üstdə görmək istəyirəm".

Mərkəzdə müxtəlif prosedurlara, təlimlərə qatılan II Qarabağ müharibəsi qazilərinin hər birini ayrı-ayrılıqda tanıyan K.Pirizadə ilə söhbət əsnasında onların təlimlərində də olduq. Və bir daha əmin olduq ki, həyat gözəldir, onu yaşamaq üçünsə vuruşmaq, çırpınmaq lazımdır, hədəflərlə...

70
Teqlər:
həyat hekayəsi, Protez-Ortopedik Bərpa Mərkəzi, mərkəz, bərpa, qazi, hüquqşünas, protez, mütəxəssis
Mövzu:
Müharibə adamları
Netflix şirkətinin loqosu, arxiv şəkli

Çağatay Ulusoyun "Netflix"dəki filmindən ilk treyler - VİDEO

9
(Yenilənib 23:01 02.03.2021)
Filmdə kağız və karton toplayaraq yaşayan, səhhəti vaxt ötdükcə pisləşən Mehmet tərk edilən bir uşaq tapır. Onun həyatına girən Ali Mehmetə öz uşaqlığını xatırladır.

BAKI, 2 mart — Sputnik. Türkiyəli aktyor Çağatay Ulusoyun baş rolu oynadığı növbəti "Netflix" filmi "Kağıttan hayaller"in ilk treyleri yayımlanıb.

Sputnik Azərbaycan xəbər verir ki, 12 martda yayımlanacaq ekran işi 190-dan çox ölkədə, 204 milyondan çox istifadəçiyə göstəriləcək.

Filmdə kağız və karton toplayaraq yaşayan, səhhəti vaxt ötdükcə pisləşən Mehmet tərk edilən bir uşaq tapır. Onun həyatına girən Ali Mehmetə öz uşaqlığını xatırladır.

9
Formula-1 üzrə Azərbaycan Qran-prisi, arxiv şəkli

Ciddi məhdudiyyət: Bakıda "Formula-1"də azarkeşlər yerli TV olmayacaq

4
(Yenilənib 22:58 02.03.2021)
Azərbaycan Qran-prisinin təşkilatçıları bu il paytaxtımızda "kral yarışları"nın necə keçiriləcəyindən danışıblar.

BAKI, 2 mart — Sputnik, Teymur Tuşiyev. "Formula 1"in Azərbaycan Qran-prisinin reqlamentində bir sıra dəyişikliklər baş verib. Sputnik Azərbaycan xəbər verir ki, bu barədə Baku City Circuit (BCC) əməliyyat şirkətinin brifinqində məlumat verilib.

"Formula 1" Azərbaycan Qran-prisi bu ilin 4-6 iyun tarixlərində Bakı küçələrində təşkil olunacaq. Keçən il yarış koronavirus pandemiyası səbəbindən baş tutmamışdı. Epidemiya əleyhinə tədbirlərlə əlaqədar olaraq, yarışın Bakı mərhələsi tamaşaçısız keçiriləcək, buna görə stendlərin və əyləncə zonasının inşası nəzərdə tutulmur və konsertlər də təxirə salınır. Bundan başqa, həftəsonları mükafatlandırma mərasimləri sadələşdirilmiş formada, yarış iştirakçıları üçün mətbuat konfransları isə onlayn keçiriləcək.

Azərbaycan Qran-prisinin təşkilatçıları azarkeşlər olmasa da yarışın Bakıda keçirilməsinin vacibliyini vurğulayıblar.

"Bu qədər ciddi məhdudiyyətləri nəzərə alsaq, ortaya belə bir sual çıxa bilər: bu şəraitdə yarışı keçirməyin nə mənası var? Bildiyiniz kimi, "Formula 1" yarışları ölkənin turizm potensialını nümayiş etdirir, buna görə də onun keçirilməsi böyük əhəmiyyət daşıyır ", – deyə BCC-dən bildirilib.

Yeri gəlmişkən, BCC-nin Azərbaycan Qran-prisini keçirməkdən imtina etməməsinin daha bir səbəbi əks halda təşkilatçıların cərimə ödəməli olmasıdır. Cərimənin məbləği isə açıqlanmayıb.

Məhdudiyyətlər KİV nümayəndələrindən də yan keçməyib. Sosial məsafəyə riayət olunması qaydalarına görə, mətbuat mərkəzində jurnalistlər üçün yerlərin sayının 400-dən 150-yə endirilməsi nəzərdə tutulub. Həmin yerlər xarici və yerli jurnalistlər arasında bərabər şəkildə bölünəcək. Bununla belə, yerli telekanallar və radiolar Azərbaycan Qran-prisi üçün akkreditasiya əldə edə bilməyəcəklər.

Təşkilatçılar treklərin hazırlanması ilə bağlı əsas işlərin bu ilin may ayında yerinə yetiriləcəyi, bununla əlaqədar paytaxtın bəzi küçələrində nəqliyyatın hərəkətinin məhdudlaşdırılacağını də bildiriblər.

Eyni zamanda, qeyd ediblər ki, könüllülərdən müraciətlərin qəbulu artıq başa çatıb. Bu prosesə start veriləndən sonrakı 60 saat ərzində könüllülərdən təxminən yeddi min ərizə daxil olub. Marşallardan da ərizə qəbulu yekunlaşıb.

Qeyd edək ki, bu il marşalların sayı 150 nəfər artırılacaq.

4
Teqlər:
Formula-1 yarışı, Formula 1
Erməni pasportu

Doğulduğu yer - Azərbaycan? Qarabağ ermənisinin pasportu Ermənistanda qalmaqal yaradıb

130
(Yenilənib 00:01 03.03.2021)
"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam" - Arsen Karapetyan.

BAKI, 2 mart - Sputnik. Qarabağda doğulan Ermənistan vətəndaşlarının yeni pasportlarında doğum yeri hissəsinə “Azərbaycan” yazılmağa başlanılıb.

Sputnik Ermənistan xəbər verir ki, bu barədə Yerevan Ağsaqqallar Şurasının “Mənim addımım” fraksiyasından olan keçmiş üzvü, memar Arsen Karapetyan öz Facebook hesabında yazıb. 

Karapetyan qeyd edib ki, dostu 80-ci illərin ortalarında Ağdərədə (Mardakertdə) anadan olub. Daha sonra isə Rusiyada yaşayıb və hazırda Ermənistan vətəndaşlığı almaq üçün müraciət edib. Onun pasportunda doğum yeri kimi isə Azərbaycan göstərilib.

"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam. Nədir bu?", - deyə Karapetyan sosial şəbəkədə yazıb.

Məsələ ilə bağlı Ermənistan polisinin pasport və viza şöbəsinin rəis müavini Məryəm Gevorkyan açıqlama verib.

"Bu vətəndaş Sovet İttifaqı dövründə anadan olub, Azərbaycan SSR-də anadan olub. Ermənistan Respublikasının pasportu səyahət sənədidir, beynəlxalq standartlara uyğundur, ona görə keçmiş SSRİ ölkələri üçün kodlar yoxdur. Başqa sözlə, əgər bir insan keçmiş SSRİ-nin bir ölkəsində anadan olubsa, onun doğulduğu yer pasporta ölkənin indiki adı ilə qeyd olunur, yəni Gürcüstan SSRİ deyil, Gürcüstan", - deyə Məryəm Gevorkyan bildirib.

O əlavə edib ki, "bu, köhnə təcrübədir". 

Qeyd edək ki, Arsen Karapetyan şərh bölümündə dostunun doğulduğu yerin "Azərbaycan SSR" kimi göstərildiyi Rusiya pasportunu da yerləşdirib. 

130