Bakıda “Elmlər Akademiyası” stansiyası yaxınlığındakı dayanacaqda avtobus gözləyən sərnişinlər

Dayanacaqlar mitinq meydanını xatırladır, metro da ki, göz dağı

78
(Yenilənib 15:21 17.02.2021)
Deputat: "İnsanlar iş yerlərinə getmək üçün hamı şəxsi minik avtomobilinə sahib deyil. O halda çox sayda vətəndaş doluşur tək ictimai nəqliyyat vasitəsi olan avtobuslara".

Zülfiyyə Quluyeva, Sputnik Azərbaycan

BAKI, 17 fevral — Sputnik. SMS-icazə sistemi ləğv ediləndən sonra paytaxtda pik saatlarda ciddi avtobus çatışmazlığı problemi yaranıb. Sərnişinlər səhər və axşam avtobusa minmək üçün saatlarla dayanacaqda gözləməli olurlar. Yaranmış problemlə bağlı  vətəndaşlar sosial platformada da narazılıqlarını ifadə edirlər.

Sputnik Azərbaycan insanların işdən çıxdığı vaxtda metronun “Elmlər Akademiyası” stansiyası yaxınlığındakı dayanacaqlarda müşahidə aparıb.

Saat 18:21 radələrində metronun “Elmlər Akademiyası” stansiyasının qarşısındakı dayanacaqda sərnişin sıxlığı vardı. Buradakı sərnişinlərin əksəriyyəti M2, M2 A avtobuslarının yolunu gözləyirdi. Sərnişinlər Sputnik Azərbaycan-a açıqlama verərək bildirdilər ki, 30 dəqiqədən çoxdur ki, dayanacaqda gözləsələr də, ekspress marşrut xətləri üzrə avtobuslar gəlmək bilmir. Sərnişin Gülnar Həsənova deyir ki, işdən 17:45-də çıxsa da hələ də M2 avtobusunu gözləyir:

“Mənim evim Həzi Aslanovdadır. Metro bağlanandan hər gün bu problemi yaşayıram. SMS-icazə ləğv olunandan demək olar ki, hər gün yarım saata qədər dayanacaqda avtobus gözləyirik. Dayanacaqda o qədər sərnişin olur ki, bəzən gələn avtobusa minmək mümkün olmur. Çarəsiz növbəti avtobusun gəlməsini gözləyirik”.

Valeh Quliyev adlı sərnişin isə M2 A avtobusunun gec işləməsindən narazıdır. Sərnişin bildirir ki, iş yeri metronun "Elmlər Akademiyası" stansiyasına yaxındır. Ona görə də hər gün “Neftçilər” metrosu yaxınlığından M2 A avtobusu ilə işə gəlib-getməyə məcburdur:

“Biz hər gün soyuqda dayanacaqda bəzən 30, bəzən 40 dəqiqə avtobus gözləyirik. İşdən çıxandan sonra yarım saat vaxtımız da dayanacaqda avtobus gözləməklə keçir. SMS-icazə ləğv olunandan sonra da vəziyyət lap dözülməz həddə çatıb. Avtobuslar yollarda tıxac səbəbindən gecikirlər. Metro bağlı olduğundan, bizim gözləməkdən başqa çıxış yolumuz qalmır. Metronun bağlı qalması barədə qərar verənlər bir gün camaatın işdən çıxan vaxtı gəlib dayanacaqda dayansınlar görək, avtobusa minə bilirlərmi? Bu qədər sərnişini avtobus daşıya bilməz. Bizim tələbimiz odur ki, metro açılsın”.

© Sputnik / Zulfiyya Guluyeva
Bakıda “Elmlər Akademiyası” stansiyası yaxınlığındakı dayanacaqda avtobus gözləyən sərnişinlər

Burada avtobus gözləyən digər sərnişinlər müntəzəm marşrut xətləri üzrə xidmət göstərən avtobusların da gecikdiyini söylədilər.

Metronun “Elmlər Akademiyası” stansiyası ilə əks istiqamətdə yerləşən dayanacaqda da anoloji vəziyyət müşahidə olunurdu. Sərnişin Solmaz Qurbanova deyir ki, 30 dəqiqədən çoxdur ki, 6 nömrəli avtobusu gözləsələr də avtobus gəlib çıxmır: “Biz axşam evə getmək üçün bəzən yarım saat, bəzən də 40 dəqiqə 6 nömrənin gəlməsini gözləyirik. Əvvəl metro işləyəndə Azadlıq prospektinə getmək üçün bu qədər vaxt itirmirdik. İndi qalmışıq avtobusun ümidinə. Avtobus isə gec-gec gəlir. Gələndə də avtobusa minmək üçün camaat bir-birinin üstünə çıxır. Metronu bağlayıblar ki, virusa yoluxma olmasın. Amma avtobuslarda camaatın hansı şəraitdə getdiyindən xəbərləri yoxdur”.

3 saylı avtobusu gözləyən sərnişinlər də eyni problemdən şikayətçidirlər. Onların sözlərinə görə, pik saatlarda avtobus gec-gec işləyir, onlar evə getmək üçün çox vaxt taksi xidmətindən istifadə etməli olurlar.

Bakı Nəqliyyat Agentliyinin mətbuat katibi Mais Ağayev isə Sputnik Azərbaycan-a açıqlamasında bildirib ki, metrostansiyalar istiqamətlərində ekspres xətlər üzrə 100-ə yaxın ehtiyat avtobus cəlb edilib:

“Məqsəd hər gün 20-25% artan sərnişin tələbatını qarşılamaqdır. Son statistik məlumatlara əsasən gün ərzində 2,1/2,2 milyondan artıq sərnişin səfər sayı qeydə alınır. Lakin yollarda olan sıxlıq və tıxac halları birbaşa avtobusların hərəkətini də çətinləşdirir. Belə olan halda xətlərə əlavə avtobusların cəlb olunmasının bir mənası da qalmır. Mövcud vəziyyətdə avtobusların rahat və maneəsiz hərəkəti olduqca vacibdir. Bunu nəzərə alaraq fərdi avtomobil sürücülərindən bu məsələdə anlayışlı olmağı xahiş edirik. Tövsiyə edirik ki, mümkün qədər yollarda avtobusların hərəkətinə üstünlük versinlər, avtobus zolağının tələbinə və dayanma-durma və parklanma qaydalarına mütləq formada əməl etsinlər”.

© Sputnik / Zulfiyya Guluyeva
Bakıda “Elmlər Akademiyası” stansiyası yaxınlığındakı dayanacaqda avtobus gözləyən sərnişinlər

M.Ağayev deyir ki, bu gün 163 marşrut (153 müntəzəm və 10 ekspres) üzrə 2130 ədəd avtobus xətlərə çıxarılıb.

Ekspertlər də çıxış yolunu hazırkı vəziyyətdə metronu açmaqda görürlər. Nəqliyyat məsələləri üzrə ekspert Elməddin Muradlı Sputnik Azərbaycan-a açıqlamasında bildirib ki, pandemiya dövründə metronun bağlanması virusa yoluxmanı azaltmaq məqsədi daşısa da əks vəziyyət müşahidə olunur. Onun sözlərinə görə, xətlərə nə qədər əlavə avtobus cəlb olunsa da, metronun gündəlik daşıdığı sərnişin yükünü avtobuslar çəkə bilməz:

“Hər gün metro ilə bir milyona yaxın sərnişin daşınırdı. Əgər metro bağlı qalırsa, bu yük avtobusların üzərinə düşür. Bakıda gündəlik 2 milyon 200 min sərnişin avtobuslarla daşınırdı. Heç metro işləyən vaxtlarda avtobuslar bu yükün altından çıxa bilmirdi. Sözsüz ki, metro bağlı qaldıqda bu qədər sərnişini təkcə avtobuslar hesabına daşımaq mümkün olmayacaqdı. Düzdür, aidiyyəti qurumlar hesab edir ki, metronun fəaliyyətini məhdudlaşdırmaq daha yaxşıdır. Mən isə əksini düşünürəm. Bu gün avtobuslarda yaranmış sərnişin sıxlığı virusun yayılması üçün əlverişli şərait yaradır”.

E.Muradlı bildirir ki, metroda hər vaqon 3 avtobusun daşıdığı qədər sərnişin daşıyır: “Hər qatara beş vaqon qoşulur. 5 vaqon 15 avtobusa bərabərdir. Onu da nəzərə almaq lazımdır ki, metro işləyəndə yollarda bu qədər sıxlıq olmur. Yaranmış sıxlıq bu gün avtobusların gecikməsinə birbaşa təsir edən amildir”.

© Sputnik / Zulfiyya Guluyeva
Bakıda “Elmlər Akademiyası” stansiyası yaxınlığındakı dayanacaqda avtobus gözləyən sərnişinlər

Deputat Fazil Mustafa isə bildirir ki, son qərarla pandemiya dövründə qaydaları yumşaldaraq sms-icazə ləğv olunub, bəzi sahələrdə xidmətə icazə verilib. Millət vəkili belə halda metronun bağlı qalmasının düzgün olmadığı qənaətindədir:

“Metronu aylardır bağlı saxlayanlar, təsəvvür edin ki, metro bağlı qalır, ancaq iş yerləri açıqdır. Adamların hamısı iş yerlərinə getmək üçün şəxsi minik avtomobilinə sahib deyillər. O halda çox sayda vətəndaş doluşur tək ictimai nəqliyyat vasitəsi olan avtobuslara. Bakı Nəqliyyat Agentliyini də qınamalı deyil, bu avtobusların sayını nə qədər artırsa da yenə də tələbatı ödəmək mümkün deyil.

Yollarda çox avtobusun olması həm də tıxacın çox olması deməkdir. Çünki ayrıca avtobus yolu düşünülməyib. İndi guya ayrıca avtobus üçün zolaqlar ağardılsa da, bu da digər avtomobillərin sıxlığına rəvac vermiş olur. Avtobusun içindəki sıxlıqda, dayanacaqlarda saatlarla gözləməli olan vətəndaşların sıxlığında virusun yayılması üçün tam əlverişli şərait mövcud olur. Demək ki, bu şəraiti yüngülləşdirəcək tək alternativ vasitə metrodur, amma onun açılması məqsədəuyğun sayılmır”.

78
Teqlər:
"Elmlər Akademiyası"
Gülsurə İbadova

Kişilərlə yarışa girib: "Beş yüz min manatlıq maşından əvvəl ehtiyat edirdim" - FOTO

34
(Yenilənib 17:00 08.03.2021)
Üç qız, üç oğul anası olan Gülsurə İbadovaya həyat yoldaşı və ailəsi dəstək olur. On yeddi yaşında ailə quran müsahibimiz bildirir ki, həyat yoldaşı indiyədək heç vaxt işdən evə gec gəldiyinə görə ona irad bildirməyib.

Zülfiyyə Quluyeva, Sputnik Azərbaycan

BAKI, 8 mart — Sputnik. Hər gün sübh tezdən yuxudan oyanır. Həyət-bacada işlərini sahmana salıb, tarlaya yollanır. Texnikanın hər tərəfini yoxlayır, sazlığına əmin olandan sonra kombaynı işə salır. Düz otuz ildən çoxdur ki, kombaynçı işləyən pambıqçı-mexanizator Gülsurə İbadovanın günü belə başlayır. 16 yaşından kombayn sürücüsü işləyən bu qadın 60 yaşı olmasına baxmayaraq, bu gün də işinin başındadır. Sputnik Azərbaycan bir çox kişinin bacarmadığı ağır işin ödəsindən ustalıqla gələn zərif cinsin nümayəndəsini oxucularına təqdim edir. 

Sabirabad rayonunun Kürkəndə kəndindən olan Gülsurə İbadova 8-ci sinfi bitirib bir il Texniki Peşə məktəbində təhsil aldıqdan sonra pambıqçılıq sahəsində işə başlayır. Ona köməkçi kimi işləmək tövsiyə olunsa da, G.İbadova Sevil Qazıyevanın başına gələnlərdən sonra buna razı olmur. Özünün dediyinə görə, pambıq sahəsində işə becərmədən başlayır. Sonra ona sürmək üçün traktor verirlər. Elə həmin ilin avqust ayında yeni pambıqdərən kombayn idarə edir. Sovet dövründə qabaqcıl sürücü-mexanik kimi dəfələrlə mükafatlara layiq görülür. Hətta Ulu öndər Heydər Əliyevlə də görüşərək ondan mükafat alır. Həmin illəri xatırlayan Gülsurə İbadova Heydər Əliyevin onun saçına sığal çəkərək tövsiyə verdiyini də unutmayıb: "Mənim uzun saçım vardı. Heydər Əliyev saçıma sığal çəkib mənə dedi ki, pambıq yığanda mütləq saçımı yığım. O mənə Sevil Qazıyevanın başına gələnləri xatırlatdı".

© Photo : Courtesy of Gyulsura Ibadova
Sabirabad rayonunun Kürkəndə kəndindən olan Gülsurə İbadova 8-ci sinfi bitirib

Sovetlər Birliyi dağıldıqdan sonra bir müddət bələdiyyədə çalışan G.İbadova 2019-cu ildən yenidən sevimli peşəsini davam etdirir. Həmsöhbətimiz deyir ki, Şirvan Şəhər Kənd Təsərrüfatı İdarəsi ona rayona gələn yeni kombaynı sürməyi təklif edir. G.İbadova Kənd təsərrüfatı naziri İnam Kərimovla görüşdə bu istəyini səsləndirir. Nazirin tapşırığı ilə ona yeni gətirilən pambıqdərən kombaynı idarə etmək həvalə olunur. G.İbadova nazirin kənd təsərrüfatı sahəsində çalışanlara qayğısından da ağızdolusu danışır.

Yeni pambıqdərən kombaynın sovet dövründəki kombayndan fərqli olduğunu söyləyən G.İbadova çətin olsa da, bu işin də öhdəsindən gəlir:

"Yeni kombaynı idarə etmək üçün sürücülük vəsiqəm köhnə idi. Bu kombaynı sürmək üçün imtahandan keçib 5 kateqoriyalı sürücülük vəsiqəsi aldım. Kombaynı Şirvandan sürüb Sabirabada gətirdim. Əlbəttə ki, bu  texnika müasir olduğundan, sovet dövründəki kombayndan çox fərqlənir. Bu texnikanın 17 ton ağırlığı var. 500 min manat qiyməti olan texnikanı idarə edəndə əvvəlcə ehtiyat edirdim. Hətta iki gün idi işə çıxmışdım ki, kombaynda şlanq partladı.

Yoldaşım çilingər olduğundan mayenin axmaması üçün "salnik" (kipgəc) qoydu. Kombaynı sürüb Məmişlər kəndinə getdim. Oraya çatmışdım, yenə problem yarandı. Texniki dəstək üçün mühəndisə müraciət etdim. O bildirdi ki, xamutu açıb boşaltmaq lazımdır. Bundan sonra  bəzi xırda detalları özüm bağlamağı öyrəndim. Amma sovet kombaynını sıfırdan - mühərrikinə qədər - özüm yığa bilirdim. Bu kombayn bahalı olduğu üçün problem olanda əlimi vurmağa çəkinirəm. Problem yarananda servisə zəng edirik, gəlib həll edir. Amma yeni kombaynlarda hələ ki ciddi problem yaranmayıb".

© Photo : Courtesy of Gyulsura Ibadova
Gülsurə İbadova

Həmsöhbətimiz deyir ki, sovet dövründəki kombaynlarda yerə şeh düşən kimi pambıqdərənin "şpindeli" (oxu) tutulurdu: "Amma yeni kombaynlar şampunla özü yuyub-təmizlədiyi üçün problem yaranmır".

İşinin incəliklərindən danışan G.İbadova bununla belə, şeh olanda pambıq yığımının çətin olduğunu söyləyir: "Sentyabrın sonuna qədər şeh olmur. Biz o vaxtdan səmərəli istifadə edirik. Elə vaxt olub ki, bir həftə evə getməmişəm. Gecə-gündüz pambıq yığmışam. Elə şam yeməyimizi də sahədə yemişik. Yuxusuz işləmək çətin olsa da, pambıq mövsümündə bu əziyyətə qatlaşmalısan. Çünki sentyabrın sonunda bəzən yağışlar yağmağa başlayır. İnsanların əməyi itməsin deyə biz çalışırıq ki, sahələrdə məhsulu yağış yağanadək yığıb qurtaraq".
  • Gülsurə İbadova kollektivlə
    © Photo : Courtesy of Gyulsura Ibadova
  • Heydər Əliyev Gülsurə İbadovaya mükafat verib
    © Photo : Courtesy of Gyulsura Ibadova
  • Gülsurə İbadova
    © Photo : Courtesy of Gyulsura Ibadova
  • Gülsurə İbadova kollektivlə
    © Photo : Courtesy of Gyulsura Ibadova
1 / 4
© Photo : Courtesy of Gyulsura Ibadova
Gülsurə İbadova kollektivlə

Çox məhsul yığımının onların qazancına da təsir etdiyini söyləyən G.İbadova  sentyabrın 13-dən noyabrın sonuna qədər 380 hektardan pambıq yığdığını, 2600 manata qədər pul qazandığını söyləyir: "Pambıq əsasən yayda yığılır. Saat 6-da yuxudan durub, evdə işləri sahmana salıb, "VAZ 2106" ilə "Aqroservis"ə gedirəm. Pambıqdərənin yağına, mühərrikinə baxıb, avtoyuyucuda aparatını  yuyub-təmizləyirəm. Sonra hansı sahəyə göndərirlərsə, oraya gedirəm. Son illər pambıq istehsalında məhsuldarlıq artıb. Elə vaxt olub ki, 80 hektar sahədən 300 ton pambıq yığmışıq. Bir həftə ərzində bu işə üç kombayn cəlb olunub. Məhsulun çoxluğu həm də bizim qazancımıza təsir edir".

© Photo : Courtesy of Gyulsura Ibadova
İbadova 2019-cu ildən yenidən sevimli peşəsini davam etdirir

G.İbadova bildirir ki, pambıq yığımından qazandığı pulu ailəsinə xərcləyir. Üç qız, üç oğul anası olan G.İbadovaya həyat yoldaşı və ailəsi də dəstək olur. On yeddi yaşında ailə quran müsahibimiz bildirir ki, həyat yoldaşı indiyədək heç vaxt işdən evə gec gəldiyinə görə ona irad bildirməyib: "Yoldaşım narşərab zavodunda çilingər işləyirdi.  Qohumluğumuz olsa da sevib ailə qurmuşuq. Hər ikimiz torpağa bağlı, zəhmətsevər insanlarıq. Övladlarımızı da belə tərbiyə etmişik".

G.İbadova 60 yaşında kombayn sürməyin heç də çətin olmadığını söyləyir. Onun sözlərinə görə, əksinə, bu yaşda işləmək  ona zövq verir. "İş adamı gümrah saxlayır. Bəlkə, elə mənim gümrah qalmağımın səbəbi işimdir", - deyir kombaynçı müsahibimiz.

34
Teqlər:
müsahibə, sürücü, pambıq, kombayn, qadın
COVİD-19-da ölən şəxs, arxiv şəkli

Azərbaycanda koronavirusa yoluxma sayında azalma, ölüm sayında artım baş verib

353
(Yenilənib 18:21 08.03.2021)
İndiyədək ölkədə ümumilikdə 236 963 nəfərin koronavirus infeksiyasına yoluxması faktı müəyyən edilib, onlardan 229 789 nəfər müalicə olunaraq sağalıb, 3 247 nəfər vəfat edib. Hazırda 3 927 aktiv xəstə var.

BAKI, 8 mart - Sputnik. Azərbaycanda koronavirus infeksiyasına 195 yeni yoluxma faktı qeydə alınıb, 71 nəfər müalicə olunaraq sağalıb və evə buraxılıb.

Bu barədə Sputnik Azərbaycan-a Nazirlər Kabineti yanında Operativ Qərargahdan məlumat verilib.

Bildirilib ki, son sutkada 6 nəfər COVID-19-dan vəfat edib.

İndiyədək ölkədə ümumilikdə 236 963 nəfərin koronavirus infeksiyasına yoluxması faktı müəyyən edilib, onlardan 229 789 nəfər müalicə olunaraq sağalıb, 3 247 nəfər vəfat edib. Hazırda 3 927 aktiv xəstə var.

Son sutka ərzində yeni yoluxma hallarının müəyyənləşdirilməsi ilə əlaqədar 4 624, bu günə qədər isə ümumilikdə 2 657 999 test icra olunub.

353
Teqlər:
Nazirlər Kabineti yanında Operativ Qərargah, yoluxma, pandemiya, Koronavirus, COVID-19

Gəncədə polis vətəndaşlara xəbərdarlıq edib

0
(Yenilənib 20:08 08.03.2021)
Dövlət Yol Polisi Şöbəsi qarlı havada təcrübəsi az olan sürücülərə avtomobili idarə etməməyi tövsiyə edib. 

BAKI, 8 mart - Sputnik. Gəncə şəhər Baş Polis İdarəsinin Dövlət Yol Polisi Şöbəsi qeyri sabit hava şəraiti ilə əlaqədar sürücülərə xəbərdarlıq edib.

Sputnik Azərbaycan APA-ya istinadla xəbər verir ki, Dövlət Yol Polisi Şöbəsi qarlı havada təcrübəsi az olan sürücülərə avtomobili idarə etməməyi tövsiyə edib: 

"Sürücülər mövcud şəraiti nəzərə alıb, şəxsi avtomobillərdən mümkün qədər az istifadə etsinlər".

Yol polisi sürücülərə xüsusi qış təkərlərindən istifadə etməyi, nəqliyyat vasitələrini texniki baxışdan keçirməyi, qış üçün təkər və işıq faralarını uyğun hala gətirməyi, avtomobillərində zəncir, dartı kəndiri və s. lazımi avadanlıqların olmasını təmin etməyi, təqib məsafəsinə diqqət edərək məcbur qalmadıqca ötmə hərəkəti etməməyi, dumanlı hava şəraitində gündüz saatlarında yaxını göstərən faraları yandırmağı məsləhət görüb. DYP şöbəsindən bildirib ki, sürücülər qarlı hava şəraitində sürət həddini minimuma endirməli, ara məsafəsini normadan artıq saxlamalıdırlar. Həmçinin sürücülər əyləc sistemindən istifadə edərkən yağış sularının yollarda sürüşmə şəraiti yaratdığını nəzərə almalıdır.

Hava şəraiti ilə bağlı şəhərdə avtomobillərin hərəkətində çətinlik qeyd alınmayıb. Yol polisin əməkdaşları şəhərin küçə və prospektlərində hərəkəti tənzimləyirlər. Hazırda qərb bölgəsində qarın yağması davam edir.

0