Bakı metrosunda sərnişinlər, arxiv şəkli

Məktəblər açılır, metro isə hələ bağlıdır - Necə olacaq?

88
(Yenilənib 16:48 04.02.2021)
"Sərnişinlərin bu qədər sayda avtobusla daşınması mümkünsüzdür. Çünki iki min sərnişin də metro ilə daşınırdı".

Zülfiyyə Quluyeva, Sputnik Azərbaycan

BAKI, 4 fevral — Sputnik. Təhsil Nazirliyinin təklifi əsasında fevral ayının 15-dən etibarən Bakı, Abşeron və Sumqayıtda orta məktəblərin, ali təhsil və peşə təhsili müəssisələrinin, eləcə də uşaq bağçalarının fəaliyyəti bərpa olunacaq. Pandemiya dövründə metronun işləməməsi hər kəsin diqqətini nəqliyyat probleminə yönəldib. Artıq sosial platformada da ənənəvi tədris bərpa olunduğu halda metronun işləməməsinin böyük nəqliyyat problemi yaradacağı ilə bağlı narahatlıqlar ifadə olunur.

Sputnik Azərbaycan ənənəvi tədrisin bərpasından sonra ictimai nəqliyyatın necə tənzimlənməli olduğunu araşdırıb.

Nəqliyyat məsələləri üzrə ekspert Elməddin Muradlı Sputnik Azərbaycan-a açıqlamasında bildirib ki, pandemiya dövründə ictimai nəqliyyatın hərəkətinin məhdudlaşdırılması arzuolunan effekti vermir: "Çünki bizdə alternativ ictimai nəqliyyat növləri azdır. Xarici ölkələrdə metro bağlıdırsa, sərnişinlər metrobusdan, tramvaydan istifadə edir. Azərbaycanda isə alternativ ictimai nəqliyyat növləri çox azdır. İntensivlik dövründə Bakıda gündəlik iki milyon iki yüz min sərnişin avtobuslarla daşınırdı. Bu gün xətlərdə 2400 avtobus var. Sərnişinlərin bu qədər sayda avtobusla daşınması mümkünsüzdür. Çünki iki min sərnişin də metro ilə daşınırdı. Əgər metro bağlı qalacaqsa, bu yük avtobusların üzərində qalacaq. Avtobuslar metro işlədikdə bu yükün altından çıxa bilmirdi. Sözsüz ki, metro bağlı qaldıqda bu qədər sərnişini təkcə avtobuslar hesabına daşımaq mümkün olmayacaq. Düzdür, aidiyyəti qurumlar hesab edir ki, metronun fəaliyyətini məhdudlaşdırmaq daha yaxşıdır. Mən isə əksini düşünürəm. Nəzərə almaq lazımdır ki, hər vaqon 3 avtobusun yükünü aparır. 5 vaqon isə 15 avtobus deməkdir. Həmçinin metroda səfər müddəti daha qısadır. Metronun 20-25 dəqiqəyə apardığı yolu, sərnişin avtobusla 1 saata gedir. Pik vaxtlarda vəziyyət daha da qəlizləşir. Hazırda metroda havalandırmanın olmaması virusa yoluxma baxımından təhlükəli sayılsa da, metronun açılmaması tədrisin bərpasından sonra sərnişindaşımada xaos yaradacaq".

"Bakı Metropoliteni" QSC-nin mətbuat katibi Bəxtiyar Məmmədov Sputnik Azərbaycan-a bildirib ki, pandemiya dövründə metronun fəaliyyəti ilə bağlı qərar Nazirlər Kabineti yanında Operativ Qərargah tərəfindən verilir: "Bakı Metropoliteni" QSC metronun fəaliyyətini bərpa etməyə tam hazırdır. Metronun əməkdaşlarının virusa yoluxmaması üçün də işlər aparılıb. Nazirlər Kabineti yanında Operativ Qərargah tərəfindən təhsil müəssisələrində ənənəvi tədrisin bərpası ilə əlaqədar metronun fəaliyyətinə nə vaxt icazə veriləcəksə, metroda sərnişin daşınması da həmin tarixdən bərpa olunacaq".

Xatırladaq ki, sonuncu brifinqdə təhsil naziri Emin Əmrullayev də yuxarı siniflər və ali məktəblərdə əyani tədrisin bərpa olunacağı halda, metronun da açılacağını istisna etməmişdi.

Qeyd edək ki, Bakı, Abşeron və Sumqayıtda fevralın 15-dən ümumi təhsil müəssisələrinin məktəbəhazırlıq mərhələsində tədris həftədə 2 dəfə, ibtidai təhsil səviyyəsində (I-IV siniflərdə) həftədə 3 dəfə, ümumi orta təhsil səviyyəsində (V-IX siniflərdə) həftədə 2 dəfə olmaqla, xüsusi məktəblərdə (I-IX siniflərdə) həftədə 5 dəfə olmaqla bərpa ediləcək. Ali və orta ixtisas təhsili və peşə təhsili müəssisələrində praktiki məşğələlər tələb olunan ixtisaslar üzrə (müvafiq laboratoriya və xüsusi təchiz edilmiş auditoriyalarda) və təhsilalanların fiziki iştirakını tələb edən fənlərin və mövzuların əvvəlcədən müəyyən edilmiş cədvəllər üzrə tədrisi (tibb, yaradıcılıq, mühəndislik və s.) ənənəvi formada bərpa olunacaq.

88
Oğlan, arxiv şəkli

Daha bir telefon mağazasından oğurluq olub

11
Yasamal ərazisindəki mağazaların birindən 10.000 manat dəyərində 20 ədəd mobil telefon oğurlamaqda şübhəli bilinən əvvəllər dəfələrlə məhkum olunmuş A.Yusifov saxlanılıb.

BAKI, 4 mart — Sputnik. Yasamalda telefon mağazasından 10.000 manat dəyərində mobil telefon, moped və 2 ədəd motosiklet oğurlayan şəxslər saxlanılıblar. Bu bardəə Daxili İşlər Nazirliyindən Sputnik Azərbaycan-a verilən məlumatda bildirilib.

Qeyd olunub ki, Yasamal Rayon Polis İdarəsinin (RPİ) 27-ci Polis Bölməsinin (PB) əməkdaşlarının keçirdikləri əməliyyat-axtarış tədbirləri nəticəsində rayon ərazisindəki mağazaların birindən 10.000 manat dəyərində 20 ədəd mobil telefon oğurlamaqda şübhəli bilinən əvvəllər dəfələrlə məhkum olunmuş A.Yusifov saxlanılıb. Saxlanılan şəxsin ətrafında aparılmış tədbirlərlə onun paytaxt sakini Kamil Xasıyevlə birgə Bakı şəhər sakini olan 1 nəfərin mopedini, 2 şəxsin isə “Yamaha” və “Haojue” markalı motosikletlərini qaçırmaları da müəyyən edilib. Bölmə əməkdaşları tərəfindən həyata keçirilən əməliyyat-axtarış tədbirləri nəticəsində K.Xasiyev də saxlanılaraq istintaq təqdim edilib.

Faktla bağlı 27-ci Polis Bölməsində saxlanılan şəxslər barəsində toplanan materiallar Yasamal RPİ-nin İstintaq Şöbəsinə göndərilib, araşdırmalar davam etdirilir. 

11
Koronavirusa qarşı peyvənd Pfizer-BioNTech, arxiv şəkli

İcbari Tibbi Sığorta üzrə Dövlət Agentliyi ÜST-ə etirazını bildirdi

272
Agentlik: Azərbaycanın “Pfizer-BioNTech” vaksinlərini əldə edəcək 18 ölkə siyahısına daxil edilməməsi aydın deyil

BAKI, 4 mart - Sputnik. İcbari Tibbi Sığorta üzrə Dövlət Agentliyi (Agentlik) Azərbaycanın COVAX platforması çərçivəsində “Pfizer-BioNTech” vaksinlərini əldə edəcək 18 ölkə siyahısına daxil edilməməsi barədə Ümumdünya Səhiyyə Təşkilatının (ÜST) qeydi ilə razı deyil.

Agentlikdən bildirilib ki, ÜST tərəfindən verilən məlumatda 29 yanvar tarixinədək COVID-19 peyvənd proqramına başlamış iştirakçı ölkələr “Pfizer-BioNTech” peyvəndinin birinci müstəsna paylanma mərhələsinə daxil edilmədiyi qeyd olunub:

“Bu əsaslandırma aydın deyil və bununla bağlı müddəalar heç bir hüquqi sənəddə və rəsmi yazışmalarda öz əksini tapmayıb. Azərbaycan ÜST-ün tövsiyələrini nəzərə alaraq vaksinasiya strategiyasını təsdiqləyib və vaksinlərin qəbulu üçün bütün texniki tələbləri yerinə yetirib.

Ötən il yaradılmış COVAX platformasının “SARS-CoV-2” virusuna qarşı vaksinlərin hazırlanması təşəbbüsünü yüksək qiymətləndirən və bu əməkdaşlığa ilk qoşulan 50 ölkədən biri də məhz Azərbaycan Respublikasıdır”.

Məlumatda qeyd olunub ki, Azərbaycan vaksinlərin dünya ölkələri arasında ədalətlilik və həmrəylik prinsipləri ilə bölgüsünün tərəfdarıdır:

“Təəssüflə qeyd etmək istərdik ki, təcrübədə bunun əksini görürük.

Bir daha vurğulayırıq ki, Azərbaycan ilk gündən ÜST-ün tövsiyələrinə uyğun fəaliyyət göstərməklə yanaşı, COVID-19-la mübarizə çərçivəsində həyata keçirilən əməkdaşlıqlara öz töhfəsini vermişdir və vətəndaşlarının sağlamlığı üçün qarşıya qoyulmuş bütün öhdəlikləri yerinə yetirməyə bu gün də davam edir”.

Bildirilib ki, COVAX-la yazışmalarda Azərbaycanın bu vaksinləri infrastruktur baxımından qəbul etməyə tam hazır olduğu bildirilib:

“Bu gün COVAX layihəsi faktiki olaraq öz öhdəliklərini yerinə yetirə bilmir. Vaksinlərin düzgün paylaşdırılmasında ədalətsiz yanaşma birbaşa bu layihənin icrasında ciddi problemlərin olmasından xəbər verir.  Hesab edirik ki, COVAX layihəsi çərçivəsində bu proses nəzarətdə saxlanılmalı və istehsalçı şirkətlər qarşısında konkret tələblər qoyulmalıdır. 

Agentlik mövqeyini COVAX-a göndərilən rəsmi məktubda bildirib və təşəbbüskar qurumları qərara yenidən baxmağa çağırıb”.

272